MARKA 4

Buh chi thehtu tehkhin thu

(Mt 13.1-9; Lk 8.4-8)

1Tin, dîl kamah chuan a zirtîr leh ta a. Tin, mipui tam tak mai a hnênah an rawn inkhâwm a; chutichuan, dîlah chuan lawngah a chuang a, a ṭhu a; mipuiho zawng zawng chu dîl kama khawmualah chuan an awm a. #Lk 5.1-3

2Tin, tehkhin thuin thu tam tak a zirtîr a; a zirtîrnaah chuan an hnênah, 3“Ngaithla ula, en teh u; buh chi thehtu buh chi thehin a feh a; 4tin, heti hi a lo ni a, a theh laiin a ṭhen kalkawng dungah a tla a, savaten an rawn tlân zo ta a. 5Tin, a ṭhen pialtlêp chung lei pan hmunah a tla a; lei a chhah loh avangin a ṭo ta nghâl a; 6nimahsela, ni a lo tlângsân deuhvin em vuaiin a lo awm a, zung a neih loh avângin a râwp ta mai a. 7Tin, a ṭhen hnimhlîngnei zîngah a tla a, hnim chu a lo ṭo sâng a, a dîp ral ta a, rah rêng rêng a rah ta lo va. 8Tin, a ṭhen lei ṭhaah a tla a, a ṭo va, a ṭhang lian a, a rah ta a; sawmthum te, sawmruk te, za tein a pung ta hlawm a,” a ti a.

9Tin, amah vêkin, “Tu pawh hriatna tûra beng nei chuan hre rawh se,” a ti a.

Tehkhin thu a sawi chhan

(Mt 13.10-17; Lk 8.9-10)

10Tin, fianriala a awm laiin sâwm leh pahnihte leh a ṭhuihruai dangte chuan tehkhin thute chu an zâwt fiah a. 11Tin, ani chuan an hnênah, “Pathian ram thurûk chu nangni hriat zawng phal a ni a, pâwna mite tân erawh chuan engkim tehkhin thûa tih a ni; 12chutichuan, ‘Hmuh zawng an hmu thei na a, hriat erawh chu an hriat theih lohna tûr leh, beng zawngin an hre thei na a, a ngaihna erawh chu an hriat theih lohna tûrin; chuti lo chuan, an hawi kîr leh ang a, ngaihdam an lo ni hlauh dah ang e,’ ” a ti a. #Is 6.9-10

Buh chi thehtu tehkhin thu hrilhfiahna

(Mt 13.18-23; Lk 8.11-15)

13Tin, amah vêkin an hnênah chuan, “He tehkhin thu hi in hre thei lo maw? Chuti a nih chuan, engtin nge tehkhin thu dang zawng zawngte chu in hriat hleih ang? 14Buh chi thehtu chuan thu chu a theh a ni. 15Tin, kawng dunga thu thehnate chu hêng hi an ni: thu an hriat veleh Setana chuan an rilrua thu theh chu a lâksak nghâl ṭhîn. 16Tin, chutiang bawkin pialtlêp chunga theh chu hêng hi an ni: thu an hriat veleh lâwm taka pawm nghâlte hi; 17nimahsela, anmahniah chuan zung rêng an nei lo va, rei lo tê chauh an awm a; chumi hnuah chuan thu avânga hrehawmna emaw, tihduhdahna emaw a lo awm veleh an tlu nghâl mai ṭhîn. 18Tin, mi dangte chu hnimhlîngnei zînga theh chu an ni a; chûngte chuan thu chu an hre tawh a; 19nimahsela, khawvêl lungkhamnate, hausakna bumnate, thil dang châknate chu a lo luhin, thu chu a dîp a, rah lovin a lo awm ṭhîn. 20Tin, lei ṭhaa theh chu hêng hi an ni: thu chu hriaa, pawma, a leh sawmthum te, a leh sawmruk te, a leh za tea rahte hi an ni,” a ti a.

Khova khuh khâwnvâr

(Lk 8.16-18)

21Tin, amah vêkin an hnênah chuan, “Khâwnvâr chu a dahnaa dah lova, hrai hnuaiah emaw, khum hnuaiah emaw dah tûrin an rawn la ngai em ni? #Mt 5.15; Lk 11.33 22Puan loh tûra zêp eng mah a awm lo va, lang lo tûra thuhrûk eng mah a awm hek lo. #Mt 10.26; Lk 12.2 23Tu pawhin hriatna tûra beng an neih chuan hre rawh se,” a ti a.

24Tin, amah vêkin an hnênah chuan, “In ngaihthlâk chu eng nge a nih fîmkhur rawh u; in tehna ngai bawkin an tehsak ang che u a, an pe tam zâwk mah ang che u. #Mt 7.2; Lk 6.38 25Tu pawh a nei chu an pêk belhchhah ang a; tu pawh a nei lo chu a neih chhun pawh an lâksak ang,” a ti a. #Mt 13.12; 25.29; Lk 19.26

Chi lo ṭiak tehkhin thu

26Tin, amah vêkin, “Pathian ram chu hetiang hi a ni; miin leiah hian chi theh sela, 27zânah muhîlin chhûnah tho ṭhîn sela, chi chu, a zia a hriat lohvin lo ṭiakin lo ṭhang sela; chutiang chu a ni. 28Lei hian amahin rah a rawn chhuah ṭhîn; a tîr berah a kûng, chumi hnuah chuan a vui; tin, chumi hnu lehah a vuiah chuan buh fang pum chu. 29Nimahsela, rah chu a lo hmin hunin, buh lâk a lo hun tâk avângin favah chu a phawrh nghâl ṭhîn,” a ti a. #Joel 3.13

Anṭam chi tehkhin thu

(Mt 13.31-32,34; Lk 13.18-19)

30Tin, amah vêkin, “Pathian ram chu engtin nge kan tehkhin ang? A nih loh leh, eng tehkhin thuin nge kan tehkhin ang? 31Anṭam chi fang khat leia an thehin, leia chi zawng zawng aiin tê ber mah sela, 32a theh hnuah erawh chuan a lo ṭiak a, thlai zawng zawng aiin a lo lian ta zâwk a, zâr lian tak takte a lo nei a; chutichuan, chunglêng savate chu a bukah chuan an riak thei ṭhîn; chutiang chu a ni,” a ti a.

33Tin, chutiang tehkhin thu tam tak chuan an hriat theih tâwk tâwkin thu chu an hnênah a sawi ṭhîn a. 34Nimahsela, tehkhin thu lovin an hnênah thu a sawi ngai lo; a zirtîrte hnênah erawh chuan fianrialah engkim a hrilhfiah ṭhîn a ni.

Thlipui hau reh

(Mt 8.23-27; Lk 8.22-25)

35Tin, chumi ni vêkah chuan, khua a lo tlai lamin ani chuan an hnênah, “Râl lehlamah sâwn i kai ang u,” a ti a. 36Tichuan, mipuite chu kalsanin, amah chu a awm pângngai ang chuan lawngah chuan an kalpui ta nghâl a. Lawng dangte pawh a hnênah a awm a. 37Tin, thlipui nasa tak a lo tleh a, tuifâwnte chu lawngah chuan a fâwn lût hlawp hlawp a; chutichuan, lawng chu a lo khat dâwn ta mai a. 38Tin, ani chu lukham chu khama muhîlin, lawng mei lamah chuan a awm a. Tin, an kai tho va, a hnênah chuan, “Zirtîrtu, kan boral hi pawi i ti lo vem ni?” an ti a. 39Tin, ani chu a lo harh a, thli chu a hau va, dîl hnênah pawh chuan, “Ngawi la, awm hle hle rawh!” a ti a. Tin, thli chu a bâng a, a lo reh ta ṭhuap mai a. 40Tin, ani chuan an hnênah, “Engati nge chuti êma in hlauh ni le? Rinna rêng in la nei lo a ni maw?” a ti a. 41Tin, hlauh namênin an hlau ta lo va, “He mi hi tu nge ni le, thli leh dîl lam pawhin a thu an âwih hi?” an ti hlawm a.

Currently Selected:

MARKA 4: MIZOVBSI

Highlight

Copy