Liike 17

Hɔ̀ bɔ̀koohɔ́ àá hɔ́ sɛ́wɛ́rí dénlɔ́ bòo

Mat 18.6-7; 18.21-22; Mar 9.42

1Ɛ́ Yiezu ɛ́ khie ɛ́ khɛ́ àá mí kɛ̀ránzɛ̀ɓɛ̀ ɛ́ nɛ làa: «Hɔ̀ bòo lɛ wóò súuní ɓɛ́ nìnbirìe ɛ̀ ɓɛ̀ dàá khe Dɔfĩn wṹn ɛ́ pe wóo ɓén wé fúu. Kɛ́ nìnbírɔ lɛ temu wóò lɛ́ ɛ́ hɔ́ dàa wé ɛ́ pe yìi ɓén mi hɔ. 2Kɛ́ ɓɛ́ hṹn can niihṹ dɛ̀bɛhɔ́ ɓàasɔ fɔnù ǹ ɛ́ mɔ̀ tɛ́ dɔ́ ɲun-bɛhɔ́ hũn, ɛ̀ hɔ̀ pɛ́ bòo ɛ́ hṹn tṹ piè viì, ɛ́ pɔ hɔ bòo lɛ ɛ́ ɓén wí-è ǹ, lɛ kɛ́ á dàa lɛ́ ɛ́ ɓɛ́pe zĩncãahɛ̃ lɛ ádɔ̀ ɛ́ khɔn Dɔfĩn wṹn. 3Ɛ́ mí pɛ́ míte bòo. Kɛ́ mì zuú ɛ́ wɔ́ bɔ̀koohɔ́, ɛ̀ kɔ̀ wã̀aní-ɛ. Kɛ́ á tɛ̀ dũnɛ nɛ mí wɔ́ bɔ̀koohɔ́, à nɛ mí yá bĩní wé hɔ́, ɛ̀ dé sɛ́wɛ́rí lɛ́ à ǹ. 4Kɛ́ á wɔ́ kɔ bɔ̀koohɔ́ àá kɔ yìe cɛ̀rìɛɛ wu-cóoní hũn, kɛ́ á wóò khũ̀á ɓén ɛ̀ ɓen bie lɛ́ kɔ̀ ǹ nɛ mí bòo yàá, ɛ̀ kɔ̀ dé sɛ́wɛ́rí ɛ̀ lɛ́ à ǹ.»

Ńdɛsĩ̀nlɔ́ bòo lɛ ɛ́ hɔ́ dɛ̀ ɛ́ wóò wé

5Ɛ́ ɓɛ́ tɔnkɛriè zɔn bie lɛ́ á Ɲunsɔ ǹ nɛ a sĩiní ɓɛ́ ńdɛsìnlɔ́. 6Ɛ́ Ɲunsɔ ɛ́ zɔn kɔ̃́niɛ ɓɛ̀ nɛ làa: «Kɛ́ mí hṹn dàa ńdɛsìnlɔ́, hɛ̀rí kɛ́ hɔ́ kɛ fĩi kɛ̀a ńpièhĩ́ biì bòo sí, ɛ́ mí dɛ̀ wóo bie ɛ́ lɛ́ lé vɛ̃̀hṹ lɛ ɓà ńmà ǹ nɛ: “Bùí kɔ́te ɛ̀ khíi vɛ zɔ fɛ́sí dìń hɔ́ ɲun-bɛhɔ́ hũn!” Ɛ́ lé lò ɛ́ wé hɔ́.

7Kɛ́ ádɔ̀ mì tĩ́ihṹ ɛ́ dàa tɔntɛ́ lɛ wóò vɛ vɛ̀ piè mún hũn, tàá lɛ wóò sie piè bìlaàsiè, ɛ́ pɛ̃̀hṹ lɛ kɛ́ ápe tɔntɛ́ ɛ́ van lɔ́ hɔ́ maa ɛ́ ɓen, ɛ́ ɓàasɔ iè wìe ɛ́ bie lɛ́ à nɛ á ɓen síɛ kansí fùa fùa à dí? 8Ńɓùé lò! À den ɛ́ bie lɛ́ à ǹ nɛ a sɛ́sɛ́ mí díe, à zɛ̀ní mí tĩ̀ɛ, à dàá hɔ́ dàá ɓen nɛ mí dí, ɛ̀ mí dí ɛ̀ mí ɲu. Kɛ́ mí ɓen dú vɔ́, á ɓiɛ̀ den khíi dí à ɲu lò. 9Á yá dé mí tɔntɛ́ bɛrikɛ hɔ̀pe bòo lɛ á wɔ́ bòo hũn, iè hɔ̀ lɛ ɛ́ hɔ́ iè piè tɔnlɔ́ á tɛ́. 10Ɛ́ hɔ́ ɓiɛ̀ dɛ̃̀ kɛ̀amu àá miɛ. Bòo yée bòo lɛ ɛ́ ɓɛ́ wóo nɛ mi wé, kɛ́ mí wɔ́ hɔ́ vɔ́, ɛ̀ mì wóo bie nɛ: “Ké iè tɔntɛriè mí dòonún. Ɛ́ hɔ́ iè kè tɔnlɔ́ lɛ ɛ́ ké fɔ̀ɓán ɛ̀ kè tɛ́ ɛ́ ké tɛ́.”»

Bòo lɛ ɛ́ Yiezu dàa wiɛniɛ ɓèríe pírú dɔ̀

11Ɛ́ bòo lɛ ɛ́ Yiezu ɛ́ bɔ̀ lè wṹn ɛ́ vaá-vɛ Zerizalɛɛmu, á zɔn bɔ̀ Samari àá Kalile pɛ̃̀hɛ̃ ńtṹnú ǹ. 12Á van mii zɔ lóo dɔ̀, ɛ̀ ɓèríe pírú dɔ̀ ɛ́ ɓen lɔ́ piè híɛhɔ́ ɛ̀ sĩ́. Kɛ́ ɓɛ́ den wo khɛ̃̀nɛ van dɛ̃̀, 13ɛ̀ ɓɛ̀ ɛ́ bénkɛ ɛ́ nɛ: «Yiezu, kɛ̀ránlɔ́, mi ke miinɛ̀!» 14Ɛ́ Yiezu ɛ́ mɔn ɓɛ̀ á zɔn bie lɛ́ ɓà ǹ nɛ làa: «Mì vɛ ɓɛ khɛ̃́ndàariè viì nɛ ɓɛ húi miɛ nɛ bòo ɛ́ mí wan.» Ɛ́ hɔ́ lɛ ɛ́ ɓɛ́ khie bɔ̀ lè wṹn cɔ́, ɛ́ ɓɛ́ wán. 15Ɛ́ hɔ́ lɛ ɛ́ ɓɛ́ ɛ̀ húi ɛ̀ ɓɛ̀ wan, ɛ́ wìcóoní peɓɛ̀ tĩ́ihṹ, ɛ́ khie khũ̀a kã́a Yiezu kɛ́ á bénkɛ ɛ́ Dɔfĩn yèrè ɓàanínin. 16Á ɓɛrɛ ɓen ɓúrɛsí lé sṹsùnù Yiezu híɛhɔ́ à dɔ́ piè bɛrikɛ. À nùún sɔ hàarí ɛ́ lé Samari. 17Ɛ́ Yiezu wo zɔn nɛ làa: «Ɓɛ̀pe ɓèríe pírú sɔ ɓɛ́kùi ɛ́ yí wɛ? Ɛ́ ɓɛ́ káani sí kɛ́ ɛ́ wi àá yí? 18Ɛ́ hɔ́ iè ńɓùo temu lɛ́ ɛ́ ɓɛ́pe ɛ́ dàa yí liení bie nɛ ɓɛ ɓen dé Dɔfĩn bɛrikɛ kɛ́ ápe nɛ̀hɛ̃nù lɛ ɓén bòo mí?» 19Ɛ́ Yiezu ɛ́ khie bie lɛ́ à ǹ nɛ làa: «Siɛ hĩ̀ní, kɔ́ dɛ̀ ɛ́ lan, kɔ̀ ńdɛsìnlɔ́ ɛ́ fueniɛ kɔ̀ ǹ.»

Yiezu ɛ́ hɔ̀ bòo lɛ ɛ́ ɓén wé piè khũ̀á ɓenlɔ́ yìi hũn bòo ɛ̀ bie

Mat 24.23-28; 24.37-41

20Ɛ́ ɓɛ́ Farizĩɛɓɛ ɛ́ khie ɛ́ Yiezu dìenin nɛ hɔ iè wuàwurù ɛ́ Dɔfĩn dàa mii síɛ bìsí mí bɛ́záanú ɓɛ́ tĩ́ihṹ. Ɛ́ Yiezu zɔn bie lɛ́ ɓà ǹ ɛ́ nɛ làa: «Dɔfĩn yí mii síɛ bìsí mí bɛ́záanú kɛ̀a ie dìɛ dɔ̀ ɛ̀ ɓɛ̀ nìnbirìe ɛ̀ mi wɛ̀. 21Ɛ́ ɓɛ́ nìnbirìe yá wóo ɓén bie nɛ: “Mì húi lè lɛ wi hũ̀nún, tàá lè van wi hũ̀nyéniń!” Mì dũń sãàní kɛ́ Dɔfĩn bɛ́záanú ɛ́ wi mi tĩ́ihṹ.» 22À khie bie lɛ́ ɓɛ́ kɛ̀ránzɛ̀ɓɛ̀ ǹ nɛ làa: «Lè pɛ̃̀hṹ dɔ̀ vaá-ɓen ɛ̀ mì ɓén cànkɛ nɛ mi mi-ɛ Nìnbírɔ Zuú, hɛ̀rí wu-cóoní dɔ̀ hũn, kɛ́ mí den yá mi-ɛ wɛ̀. 23Ɓɛ̀ nìnbirìe ɛ́ wóo ɓén bie ɛ́ lɛ́ miɛ ǹ nɛ: “Mì húi, à wi hũ̀nún” tàá “À van wi hũ̀nyéniń!” Ɛ̀ mì bí vɛ yán wɛ̀, ɛ̀ mì bí tɛ̀ peɓɛ̀ bòo wɛ̀. 24Kɛ̀a bòo lɛ ɛ́ hɔ́ hóo ɲiiníkɛà ɛ́ dàa wóò yòó wánsí lé hóohũn fúu khíi vɛ ɛ̀ ɓɛ̀ nìnbirìe ɓɛ́kùi ɛ̀ mi, iè pe á nìnbírɔ Zuú ɛ́ ɓen vaá-ɓen ɛ́ hɔ̀ ɓiɛ̀ ɓén wé kɛ̀amu. 25Kɛ́ á fɔ́ɓán à lɔ̀n be cɛ̃̀un vé, ɛ̀ ɓɛ̀ zoòni nìnbirìe ɛ̀ pĩ́-ɛ tɛ́viɛní. 26À nìnbírɔ Zuú khũ̀á ɓenlɔ́ yìi hũn, ɛ̀ hɔ̀ bòo lɛ hàarí wɔ́ á Nowe pɛ̃̀hṹ hũn ɓà ńmaà, ɛ́ ɓiɛ̀ ɓén bĩní wé. 27Ɓɛ̀ nìnbirìe hàarí ɛ́ dí kɛ́ ɓɛ́ ɛ́ ɲu, ɛ̀ ɓɛ̀ báa àá ɓɛ́ hã́a ɛ́ hàarí ɛ́ yɛ ɓán fúu ɛ́ van dɛ̃un lè wurù lɛ á Nowe dàa yòó zɔn lè wiè dɛ̀bɛhɔ́ hũn. Ɛ́ hɔ́ hɔ́-bɛhɔ́ ɛ́ ɓɛrɛ tɔ̀ tɔ̀ ɛ́ ɓɔ́ ɓɛ́ ɓɛ́kùi. 28Ɛ̀ hɔ́ bòo lɛ hàarí wɔ́ à Lɔɔti pɛ̃̀hṹ hũn ɓà ńmaà ɛ́ ɓiɛ̀ ɓén bĩní wé: ɓɛ̀ nìnbirìe hàarí ɛ́ dí kɛ́ ɓɛ́ ɛ́ ɲu, ɛ̀ ɓɛ̀ ɛ́ hɔ̀ bòo ɛ̀ yɛ̀ kɛ́ ɓɛ́ ɛ́ yìɛní, ɛ̀ ɓɛ̀ ɛ́ hɔ̀ vɛ̃̀hɛ̃ ɛ́ fɛ́ kɛ́ ɓɛ́ ɛ́ hɔ̀ zĩhĩ́ɛ ɛ̀ te. 29Kɛ́ zɔǹ lɛ á Lɔɔti dàa zɔn lɔ́ hɔ́ Sodɔɔmu lóo hũn, ɛ́ hɔ́ dṹn àá hɔ́ cìrìbí lɛ zɛ̃un ɛ́ yòó lɔ́ hɔ́ hóohũn ɛ́ tɔ̀ síɛ peɓɛ̀ lɔ̀n ɛ́ síɛ ɓɔ́ ɓɛ́ ɓɛ́kùi. 30Ɛ́ hɔ́ ɓà ńmaà ɛ́ ɓiɛ̀ ɓén wí-e nìnbírɔ Zuú khũ̀á ɓenlɔ́ zɔn. 31Pehɔ̀ zɔǹ, kɛ́ nìnbírɔ ɛ́ yòó wi mí zũnù lòo hũn, á bí bie nɛ mii síɛ zɔ khui mí tĩ̀ɛ lɛ zɔn wi le zũnù hũn vé wɛ̀. Àlɛ ɛ́ van wi hɔ maa hũn ɛ̀ bí bie nɛ mii khũ̀á ɓen mí yíe wɛ̀. 32Mì síɛ liení-ɛ pe Lɔɔti ɓà hṹnu bòo lɛ hàarí wɔ́ à ǹ. 33Àlɛ kɛ́ á nɛ mii fuení mí mɛkɛ̃nì ǹ á ɓén vĩ́iní lé, àlɛ kɛ́ á tɛ̀ vĩ́iniɛ mí mɛkɛ̃nì á ɓén yí lé. 34Nin khɛ́ hɔ́ lɛ́ miɛ ǹ nɛ pehɔ̀ yìi hũn, ɛ̀ ɓɛ̀ nìnbirìe bìɛ ɲu lɛ páaníɛ dũmua le dɛmu dìɛ dìcóoní lɔ̀n hɔ̀ sṹnúhṹ, ɛ́ nìcóoní ɓén mìí, à sí kɛ́ ɛ́ kén yán. 35Ɛ̀ ɓɛ̀ hã́a bìɛ ɲu lɛ páaníɛ ɛ́ hɔ̀ bòo ni, ɛ́ nìcóoní ɛ́ ɓén mìí, à sí kɛ́ ɛ́ kén yán. [ 36Ɛ̀ ɓɛ̀ báa bìɛ ɲu lɛ van wi le mún hũn, ɛ́ nìcóoní ɓén mìí à sí kɛ́ ɛ́ kén yán.]» 37Ɛ́ ɓɛ́ kɛ̀ránzɛ̀ɓɛ̀ ɛ́ ɔ̀ dìenin nɛ làa: «Ɲunsɔ hɔ̀ iè yí ɛ́ hɔ́ mii wé hũn?» Á zɔn bie lɛ́ ɓà ǹ nɛ làa: «Lè viì lɛ á wìlaàsɔ lɛ húrun ɛ́ wi hũn iè pe ɛ́ ɓɛ́ dúriè ɛ́ wóò vɛ kóo ɓánlɔ̀n hũn.»

Currently Selected:

Liike 17: bwj

Highlight

Copy