Mâkə 13
13
Yésuwə a byábí nána bá gbí Tɛ́mpɛl
1Ngə Yésuwə á bílíní ɛ falu á Tɛ́mpɛl, muwútú m mɔ nfɔ́ a pɔŋí mɔ́ nána, “Á Mulɛ̂! Tátí malɛ́ na nyai ɛyə̌ bá lúŋíní Tɛ́mpɛl ɛ́ lɔ́lí jǐta.” 2Yésuwə a pushú mɔ́ nána, “Ɛ míní nyai ɛyə̌ bá lúŋíní bikpútí bí mandáʼ mán? Nǎn pɔŋ wə̂ lilɛ́ ká lífɔ́ á bilúŋgi bínán lí sî bukɛ́níyá wɛ́yn ámǐn. Bá páŋtí mɔ́ másə́sə̌n.”
Misam míbî ámə́ mí bwəlan
3Á mbís ɛ púndá Yésuwə a kǐ á wúkul wú Ólivə, a shúmání. Wukul wû wú bílí ɛ mindí Tɛ́mpɛl. Á wə́ Píta, Jɛ́msə, Jɔnə́, na Ándruwə bá pílí mɔ́ á kfún átin ti bá kɔ́ndɛ́ mɔ́ nána, 4“Pɔ̌ŋ sə́, njá púndá misam mínán mí bwəlání? Na pɔ̌ŋ sə́ biyəmblan ábə́ bí lúfú nána púndá ɛ mə́ ɛ paʼ ɛyə̌ mí bwəlaní.” 5Yésuwə á pɔ́ŋí bɔ́ nána, Nyí lám nyǔ, álí bwə nána mɔʼ ká nfɔ́ a si səŋ nyə́. 6“Baʼ jǐta bá paʼ á dǐn lí myə, bá byá nána ‘Mi n dí Awə̌ bá Wɔ́kílíní.’ Bá səŋ bâʼ jǐta. 7Njí nyí wúkí na bá wan tɔ nyí wúkí ndúm ɛ njum, nyí si tǎʼ. Mínán mí lɔ́lí ɛ bwəlan, ndé ɛ́ shiyǎ nána lishú lí mə́ ɛ paʼ. 8Ɛkumbu ɛfɔ́ ɛ́ wán njum tɛ́ŋgɛn ɛkumbu ɛpə́pə̂. janiya lifɔ́ lí tyə́ tɛ́ŋgɛn janiya lípə́pə̂. Ndɔʼ ɛ́ sáʼ á mabú nyai na nyai, njɛ ɛnə̂n ɛ́ bá. ‘Ɛ́yín ɛ́ bá ngə wuwa wú wúsúsúwə wú líyá.’” 9Nyə́mə̌n nyí lɔ́lí ɛ bá á mbumsan njí misam mínán mí bútí ɛ bwəlan. Bá bə nyə́ á mákɛ́ má baʼ bá kúti. Bá lá nyə́ mbɛ́ti á ndáʼ ɛ makáni ɛ́ baʼ bá Ísrɛl, nyí tyə́ á múká á wúsú wú bajaniya na kə̂ŋ á ɛ́tútú ɛ́ myə. Ɛ́yínán ɛ́ bwəlan á lí bwə nána nyí pɔ̂ŋ bɔ́ ndúm ɛ mbâ. 10Ndúm ɛ mbâ ɛni ɛ lɔ́lí ɛ byában á baʼ bá bikumbu bísə́sə̌n byáná lishú lí paʼ. 11Njí bá wálí nyə́ bá panán nyə́ á kúti, nyí si takí nyǔ á yǔm ɛ́yə́ nyí byání. Njí púndá ɛni ɛ pílí, nyí byá ká njá yǔmə́ ɛ́yə́ ɛ́ bə́kání nyə́, á ɛ́tútú nána yǔm ɛ́yə́ nyí byání ɛ́ fí á Mudî ámə́ n Sáŋí suká á nyə́. 12Baʼ bá bə̌ bǎn bá nyǎ bá bɔ́ á makɛ́ má baʼ nána bá búlú bɔ́. Basáŋ bá bǎn bá bwə mulimlim á bǎn bá bɔ, bǎn bá tɛ́ŋgɛn basáŋ na bá nyǎ nána bá búlú bɔ́. 13Baʼ bá kfwɛ nyə́ á ɛ́tútú dǐn lí myə. Ndé a wə̌ a wɛnsání ta á shú, á kwisí líshuŋgɛ.
Nsam m bî ámə́ m bwəlan
14Nyí mín ngə ɛyə́lí ɛ́ nsam ɛ́yə́ ɛ́ panan wúsɔ́n á wusú wú Dyǔ ɛ́ bá áfə́ ɛ́ lɔ́liyǎní ɛ bá. (Nyə́ á bə́ ní láŋ misam mín nyí sɔ́ntan mɔ́ bwǎm.) “Njí nyí míní nâ, baʼ ábə́ bá dí á Judéya, bá búŋgú bá kə bá sɔ́mɔn á mákul. 15Awə̌ a dí á ndáʼ ámǐn a sî púlá ɛ́ kwili á ndáʼ a nǔŋ yǔm ká ɛ́fɔ́. 16Mɔ a wə̌ pə́ a dí á ndfukú, mɔ́ pə́ a sî timbá mbí álí nǔŋ kúti. 17Ɛ́ bá wúbî na balân ábə́ bá dí na wutû, na balân ábə́ bá nwáŋí bǎn á púndá ɛni. 18Nyí káni na ɛ́ si bwəlán na nyə́ á púndá ɛ ɛyɔ́ ɛ́yə́ ɛfi ɛ́ ngínya ɛ́ bání. 19Mutakaʼ ámə́ m bá á mádû mâ m bá nyai ɛyə̌ ɛ nan bwəláníyá wə́ butya á púndá ɛyə̌ Dyǔ lí wíkíní nkínshíyə kə́ŋ ti wúyə́. Na yǔm ká ɛ́fɔ́ ngə ɛ́yín ɛ́ sî bwəláníyá pə́. 20Ndé Sáŋgúwə́ a mə́ ɛ lɛ́n madû má mutakaʼ. Njí ɛ́ sî m bá nâ, ní mɔ ká nfɔ́ a sî wɔ́ŋɔ́ líshuŋgɛ. Ndé á ɛ́tútú ɛ́ baʼ bá mɔ ábə́ a mə́ní ɛ pwə, a lɛ́ní madû mâ. 21Á púndá ɛni, njí mɔ a pɔŋí nyə́ nána, ‘Nyí tátí, Awə̌ bá Wɔ́kílíní mɔ́ anín tɔ̌, Tátí mɔ́ ani, nyí si dúbɛ́.’ 22Baʼ jǐta bá nyít mɔ na mɔ m bɔ tɛ́ á butí byá matúm nána mɔ́ a dí Ani Awə̌ bá Wɔ́kílíní. Balakuwa bá mudî bá matúm bá bwəlákí mísam mi mayáká na bá lúfú bíyəmblan jǐta. Bá bwə̌ nâni á ɛ́tútú nána, bá sə̌ŋ bâʼ á bə́ Dyǔ lí pwɛ́síní njí nji ɛ dí álí səŋ bɔ́. 23Ndé nyí nǔŋ púndá, nǎn pɔ̌ŋ nyə́ misam mín mísə́sə̌n byáná mɔ́ li bwəlan.
Li paʼ lí Mwǎn a Mɔnyuŋ na lishúʼ lí nkínshíyəʼ
24Ndé á madû mâ, njí mutakaʼ m mə́ ɛ túm,
‘Dúlu lí tǐm ɛfínjan,
ti ngɔn ɛ́ sî púlá pə́ ɛ bə̌ mwíli m mɔ,
25ti títí ɛ́ fí ámǐn ɛ́ kfúnd áshí,
ti mangínya ámə́ má dí ámǐn má sáʼ á mábú má bɔ.’
26Á púndá ɛni yɔ́ bá míní Mwǎn a Mɔnyuŋ ngə á fíní á líbáŋ átin na ngínya na wulɔ wú ngínya. 27Á lúm áŋgɛl ɛ́ mɔ, á mayəndi másə́sə̌n mánîn á nkínshíyə, álí lǎʼ bâʼ ábə́ Dyǔ lí mə́ní pwɛʼ, butya á lishúkí lí nkínshíyə ti á lishúkí lí wúdya wú Dyǔ.
Yésuwə ǎ baʼ bá nǔŋ ɛláŋsán á ɛ́ju ɛ́ bwə̌ ɛ́ fík
28Nyí nǔŋ ɛláŋsán ɛ́ ɛ́ju ɛ́ bwə̌ ɛ́ fík. Njí ɛlâʼ ɛ́ mə́ ɛ bútí ɛ́ nyítí byɛ̌ bí kɔ́nə́ nyí bí nána ɛyɔ́ ɛ́ mə́ ɛ wútan. 29Mulimlim, á púndá ɛyə̌ nyí mínní misam mínán mí bwəlan, nyí bí nána, a dí bɛbɛ. 30Á mbálɛ, nyɔni ɛnín ɛ́ bá wə́ luŋgɛ́ ti misam mínán mísə́sə̌n mí bwəlan. 31Wudya wú Dyǔ na nkínshíyə bí mɛ, ndé biyala bí myə bí bá wə́ bí bá.
Mɔʼ ká nfɔ́ a bíyǎ bǔn ábə́ Mwǎn a Dyǔ ǎ paʼní
32Mɔ ká nfɔ́ a bíyǎ bǔn tɔ̌ púndá ɛyə̌ misam mín mí bwəlání. Ká áŋgɛl ɛ́yə́ ɛ́ dí ámǐn bá bíyǎ, ká Mwǎn pə́ a bíyǎ. Sáŋ mɔ́mə̌n nfɔ́ mɔ́ a bí púndá ɛ́yə́ misam mín mí bwəlání. 33Nyí nǔŋ púndá, nyí búnsan á ɛ́tútú nána nyí bíyǎ púndá ɛyə̌ púndá ɛni ɛ́ paʼní. 34Ɛ́ bá ngə mɔ awə̌ byáná ǎ sa ɛ́ kə á ɛ́kə, ti a makú ndáʼ ɛ́ mɔ á babwəla bá mɔ, a bə́ mɔ na mɔtɛ́ ɛbulú ɛ́ mɔ, ti a pɔŋí mɔ awə̌ ǎ tátí ɛku ɛ́ wúkâ nána a bwə̂ ɛbulú ɛ́ mɔ bwǎm. 35Áfánikə̌, nyí nǔŋ púndá á ɛ́tútú nána, nyí bíyǎ púndá ɛyə̌ sísə́ a ndáʼ á paʼní. Á púl ɛ́ paʼ á kwin, tɔ̌ nləm mú wúdû, tɔ̌ mushú mushú pilílí tɔ̌ mushú. 36Njí a pilí təlí, a lɔ́liyǎ nyə́ ɛ́ tán nyí nalíyá wuyɔ́. 37Áfánikə̌, suka nyə́ na nyə́ nán pɔ̌ŋní nsam múnán, ndé nǎn pɔ̌ŋ baʼ básə́sə̌n nána ‘Nyí nǔŋ púndá.’”
Currently Selected:
Mâkə 13: bwt
Highlight
Copy
Compare
Share
Want to have your highlights saved across all your devices? Sign up or sign in
