Lucas 10
10
1Cꞌacꞌariꞌ ja kajaw Jesús ecꞌo chic setenta achiꞌiꞌ ja xeruchaꞌ, pa cacaꞌ xerutakel chi nenabeyaj chwach, nebe chipan nojel tak tinamit in chipan ja juleꞌ chic lugar ja bar xtekaj wiꞌ arjaꞌ. 2Quewaꞌ xbijel chique riꞌ:
—Ni katzij wiꞌ nbij chewe, ja winak ejeꞌeꞌ e caniꞌ jun nimlaj tijcoꞌm ja kꞌen chic ja utz chic nba̱n cosechar pro ja rajsamajelaꞌ ja nebano cosechar quixin xa ma e nim ta. Rmalcꞌariꞌ nbij chewe, tebanaꞌ orar, tecꞌutuj tre ja Rajaw ja cosecha chi nerutakto ja rajsamajelaꞌ chi neꞌurquibanaꞌ cosechar ja winak. 3Camic tecꞌamaꞌel ja bey, bien tewotakijel chi ixix ix caniꞌ juleꞌ tak carnelo in ja winak ja bar nixnutakel wiꞌ ejeꞌeꞌ e caniꞌ utiwaꞌ. 4Ma tecꞌamel ta epwok, nixtacꞌa necꞌamel ta emaleta in nixtacꞌa exajab ta chakajaꞌ. Ja tok emajon awaꞌ ja jun viaje riꞌ maxta quixpeꞌe cuqꞌuin winak chi quikꞌiloxic ja tok necꞌul ewiꞌ cuqꞌuin pa bey. 5Ja tok nixoc chipan jun jay, tok neꞌekꞌijlaꞌ ja winak quewaꞌ ja kas nebij chique nabey riꞌ: —Ja quicotemal xin Dios tiqꞌuejeꞌ pan ewochoch, quixcheꞌ chique. 6Ja wi cꞌo jun winak chipan ja jay ja congana quiꞌil ecꞌulic nuban jariꞌ nqꞌuejeꞌe ja quicotemal xin Dios chipan ja rochoch nowi ma queriꞌ ta nuban chewe jariꞌ mta quicotemal xin Dios nqꞌuejeꞌ ta chipan ja rochoch. 7Ja jay ja bar nixcꞌul wiꞌ triꞌ nixqꞌuejeꞌ wiꞌ jaruꞌ pa tiempo nixqꞌuejeꞌ chipan ja tinamit. Tetijaꞌ ja nquisipaj chewe como yatal chewe chi nixtzuki caniꞌ tre jun ajsamajel yatal tre chi ntoji. Maxta quixeli quixoqui chi tak jay tre ja bar nixqꞌuejeꞌ wiꞌ. 8Ja tok nixoc chipan ja jun tinamit xa nak ta chi tinamital ja wi quiꞌil ecꞌulic nbani tetijaꞌ ja nsipax chewe. 9Queꞌetzursaj ja yawaꞌiꞌ ja recꞌo chipan ja tinamit in quewaꞌ nebij chique ja winak riꞌ: —Ja gobierno xin Dios xa nnakajinto ewqꞌuin, quixcheꞌ chique. 10Ja cꞌa wi maquixcꞌuli quixelto cꞌa pa tak bey in quewaꞌ nebij chique ja winak riꞌ: 11—Ja pokok rxin ja retinamit ja cꞌo pa kakan, camic nkaquiraj can jariꞌ retal chi netij na rpokonal rmal ja mta egana xteyaꞌ ta ewxquin tre ja nkabij chewe pro tewotakij chi ja gobierno xin Dios xa nnakajinto ewqꞌuin, quixcheꞌ chique. 12Camic nbij chewe, ja tok xterilaꞌ ja nimlaj kꞌij xin juicio congana lawuloꞌ tre ja tinamit ja maquecꞌulu ewxin, más na lawuloꞌ ja rpokonal xtiquetij chwach ja xtiquetij ja raj Sodoma, neꞌe ja Jesús chique ja setenta discípulo.
13Cꞌacꞌariꞌ xumaj chic jutij tzij, quewaꞌ xbij chique juleꞌ tinamit riꞌ:
—Congana lawuloꞌ chewe ixix ja rix aj Corazín in congana lawuloꞌ chewe ixix chakajaꞌ ja rix aj Betsaida. Queriꞌ nbij chewe como congana nimak tak milagro xinban chewach pro ni ma xeqꞌuex ta wiꞌ ja renaꞌoj. Ja nimak tak milagro xinban chewach wixta ban chiquewach ja ritzel tak winak ja raj Tiro in ja raj Sidón ojer queqꞌuex ta cꞌariꞌ ja quinaꞌoj in queyaꞌ can ta cꞌariꞌ ja ritzelal, queban ta cꞌariꞌ ja nquicꞌutbej quiꞌ chi ntiꞌon chique ja ritzelal ja quibanon chipan ja quicꞌaslemal. 14Pro ja tok xterilaꞌ ja nimlaj kꞌij xin juicio más chi na nim ja rpokonal xtetij ixix chwach ja xtiquetij ja raj Tiro in ja raj Sidón. 15In ixix chakajaꞌ ja rix aj Capernaum, ja nechꞌob ixix chi nixbe chilaꞌ chicaj chi congana nya̱ꞌ ekꞌij pro ja neban, xa nixkajsaxi, ja bar ecꞌo wiꞌ ja camnakiꞌ cꞌa triꞌ nixekaj wiꞌ. Queriꞌ xbij chique ja tinamit. 16In xumaj chic jutij tzij cuqꞌuin ja setenta discípulo:
—Ja winak ja neniman rxin ja xtebij chique, anin cꞌariꞌ ja ninquinimaj. Ja cꞌa winak ja maquecꞌulu ewxin, anin cꞌariꞌ ja maquinquecꞌul in ja winak ja maquecꞌulu wxin, Nataꞌ cꞌariꞌ ja takyonto wxin ja matiquecꞌul. Queriꞌ xbijel ja Jesús chique ja setenta discípulo in xebe, xequibanaꞌ ja bixel chique.
* * * * * * * * * *
17Ja cꞌa tok xemelojto congana nequicoti, xeꞌurkaj ruqꞌuin ja Jesús in quewaꞌ quibij tre riꞌ:
—Kajaw, ja ritzel tak espíritu tok kabij chique chi pan abiꞌ neꞌeli ejeꞌeꞌ xokquinimaj chakajaꞌ, xecheꞌ tre. 18Ja cꞌa Jesús xbij chique:
—Anin xintzꞌat ja Satanás kajsaxi, tzakto chicaj caniꞌ nuban kꞌakꞌ. 19Bien tecꞌwaxaj ja xtinbij chewe riꞌ, camic anin nyaꞌ poder chewe in wi ecꞌoli ja cumatz xqueꞌepakꞌ owi sinaꞌy jariꞌ mta nak ta xteban ta cumal. In chakajaꞌ nyaꞌ chewe chi nixcowini nekajsaj nojel ja poder ja cꞌo pa rukꞌaꞌ ja Satanás. Ni majun nak ta xtibano ta pokon chewe. 20Camic ja ritzel tak espíritu nixquinimaj pro maxta xa rmalariꞌ quixquicoti. Mejor ja neban, como tzꞌibtali ja rebiꞌ chilaꞌ chicaj rmal tariꞌ nixquicoti, neꞌ chique.
* * * * * * * * * *
21Ni jariꞌ hora congana jun nimlaj quicotemal winakar pa ranma rmal ja rEspíritu Santo in xumaj tzij ruqꞌuin ja Tatixel ja cꞌo chilaꞌ chicaj, quewaꞌ xbij tre riꞌ:
—Nataꞌ, atat at Rajaw caj at Rajaw rwachꞌulew, congana nmaltioxij chawe como ja winak ja nquechꞌob kaj pa tak canma chi congana cotak in congana quinaꞌoj ma chiquewach ta ejeꞌeꞌ akꞌalasan wiꞌ nak rbanic nojel awaꞌ ja nmajon rbanic in nojel ja nmajon rbixic pro ja rakꞌalasan wiꞌ, chiquewach ja winak ja quibanon taknoꞌy chawach. Queriꞌ abanon chique Nataꞌ como queriꞌ ja ravoluntad, neꞌe ja Jesús tre ja Tatixel. 22Cꞌacꞌariꞌ xbij: —Ni majun nak ta ja maquita jachon pa nukꞌaꞌ rmal ja Nataꞌ. Ni majun nak ta otakyon ja kas mero rnaꞌoj ja Ralcꞌwalaxel pro ja rotakyon xa ruyon ja Dios ja Tatixel. In chakajaꞌ ni majun nak ta otakyon ja kas mero rnaꞌoj ja Tatixel pro ja rotakyon xa nuyon anin ja rin Alcꞌwalaxel, in ja renchaꞌon chi nkꞌalasaj chiquewach, ejeꞌeꞌ cotak chakajaꞌ, neꞌe.
23Cꞌacꞌariꞌ xumaj tzij cuqꞌuin ja rdiscípulo pro xa queyon:
—Ixix congana quiꞌil chewe rmal ja nixtajini netzꞌat ruqꞌuin ewach. 24Como anin nbij chewe chi e qꞌuiy ja rojer tak profeta in e qꞌuiy ja rojer tak rey ejeꞌeꞌ congana quiyarij quetzꞌat ta ja caniꞌ nixtajini netzꞌat ixix camic in congana quiyarij quicꞌaxaj ta chakajaꞌ ja caniꞌ nixtajini necꞌwaxaj ixix camic, neꞌe ja Jesús chique.
* * * * * * * * * *
25Cꞌo cꞌa jun achi peti, arjaꞌ jun chique ja maestro ja netijon quixin ja winak tre ja ley xin Dios. Ja cꞌa rachi cꞌo rgana ncꞌambajaj ja Jesús in xa rmalariꞌ tok quewaꞌ xbij tre riꞌ:
—Maestro ¿nak nban utzcꞌa chi nyataj chwe ja utzlaj cꞌaslemal ja mta qꞌuisic trij? neꞌ tre ja Jesús.
26—Tabij chwe ¿nak tzꞌibtal can chipan ja ley xin Dios? ¿Nak nawasaj atat trij? neꞌxi ja rachi.
27—Quewaꞌ nbij riꞌ: —Tawajoꞌ ja Dios ja rawajaw pro nojel acꞌuꞌx tawajoꞌ, in nojel awanma in nojel awachokꞌakꞌ in nojel anaꞌoj tawajoꞌ chakajaꞌ. Ja caniꞌ nawajoꞌ kaj awiꞌ ayon queriꞌ cꞌa tabanaꞌ chique ja raprójimo, queꞌawajoꞌ chakajaꞌ. Queriꞌ nbij, neꞌe ja rachi.
28—Ni katzij wiꞌ ja nabij leꞌ. Ja cꞌa wi xtaban cumplir ja ley ja cꞌa xabij leꞌ jariꞌ nyataj chawe ja utzlaj cꞌaslemal ja mta qꞌuisic trij, neꞌxi rmal ja Jesús. 29Ja cꞌa rachi arjaꞌ nrajoꞌ nutoꞌ riꞌ rmalariꞌ tok xbij chic tre ja Jesús:
—Pro ¿echinatak cꞌariꞌ ja nprójimo? neꞌ tre. 30Ja cꞌa Jesús arjaꞌ xumaj rbixic jun cꞌambal tzij tre, quewaꞌ xbij tre riꞌ:
—Cꞌo jun achi xuban jutij xelel pa Jerusalén, xuleꞌ chipan ja tinamit Jericó. Ecꞌo cꞌa juleꞌ alakꞌomaꞌ quechap ja rachi, quilakꞌajel ja cꞌo ruqꞌuin pro ni nojelal, quesoc can, quipunbaꞌ can pa bey, jutzꞌit laj quicamsaj. 31Cꞌo cꞌa jun sacerdote penak pa bey. Ja cꞌa sacerdote tok xutzꞌat chi punuli ja rachi pa bey xusol rubey, ma xkꞌax ta ruqꞌuin. 32Pi chi cꞌa jun ajsamajel xin Dios ja levita neꞌxi. Ja cꞌa levita tok xurkaj chipan ja lugar xutzꞌat ja rachi, xusol chic rubey, ma xkꞌax ta ruqꞌuin chakajaꞌ. 33Pro cꞌo cꞌa jun achi aj Samaria, arjaꞌ rmajon rviaje in xurkaj chipan ja lugar. Ja cꞌa raj Samaria tok xutzꞌat pon ja rachi congana xpokonaj rwach, 34be ruqꞌuin. Ja tok xekaj ruqꞌuin cꞌo juleꞌ aceite rachbil vino xuyaꞌ chwach ja bar soctajnak wiꞌ jariꞌ xkꞌombej. Ja tok kꞌomtaj rmal cꞌacꞌariꞌ xubatzꞌ. Como cꞌo ruquiej rcꞌamonto xtzꞌubaꞌel ja rachi trij, xucꞌamel pa jun pensión, bien xuban cuenta. 35Ja cꞌa chi rcab kꞌij ja raj Samaria benam nuban, cꞌo caꞌiꞌ quetzal pwok xlasaj, xutoj can pa rukꞌaꞌ ja rajaw pensión in quewaꞌ xbij tre riꞌ: —Tabanaꞌ paki jutzꞌit cuenta ja rachi, tayaꞌaꞌ tre xa nak ta ja ncꞌatzin tre. Ja tok xquinmelojto anin wotak chi nuntojoꞌ ja rucꞌas awqꞌuin nojelal, neꞌ can tre. 36Ja tok bitaji ja cꞌambal tzij rmal ja Jesús quewaꞌ xbij chic tre ja maestro riꞌ: —Camic tabij chwe, ja chawe atat ¿nak chique ja roxiꞌ achiꞌiꞌ ja xoc rprójimo ja rachi ja chap cumal ja ralakꞌomaꞌ? neꞌ tre.
37—Ja pokonan rwach, neꞌxi rmal ja maestro.
—Camic jat, tabanaꞌ atat ja caniꞌ xuban ja raj Samaria, neꞌe ja Jesús tre.
* * * * * * * * * *
38Cꞌacꞌariꞌ xumaj chic jutij rubey, xekaj pa jun aldea. Triꞌ cꞌo wiꞌ jun ixok, Marta rubiꞌ, arjaꞌ cꞌulu rxin pa rochoch. 39Ja cꞌa Marta cꞌo jun ruchakꞌ, María rubiꞌ. Ja cꞌa María arjaꞌ tzꞌabeꞌoc chwach ja Jesús in xumaj rcꞌaxaxic nojel ja tijonem ja ntajini nuyaꞌ. 40Pro ja Marta congana nkꞌisaj riꞌ chi rbanic ja samaj pa jay rmalcꞌariꞌ tok be ruqꞌuin ja Jesús in quewaꞌ xbij tre riꞌ:
—Wajaw ¿la macatoclaꞌ il tre ja nuchakꞌ nuyon inryaꞌon can chwach ja samaj? Tabij paki jutzꞌit tre chi ninrutoꞌ, neꞌ tre.
41—Marta, atat qꞌuiy rwach ja ramajon rbanic in xa nakꞌisaj awiꞌ rmal in ntiꞌon chawe chakajaꞌ. 42Pro cꞌo jun ja más na ncꞌatzin chawe chi naban ja más na utz jariꞌ ja ntajini nuban ja María camic in majun nak ta xtilasan ta tre ja tijonem ja ntajini ncꞌaxaj, neꞌxi ja Marta rmal ja Jesús.
Currently Selected:
Lucas 10: tzjW
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
