Marike 10
10
Yiezu bòo lɛ á bie hɔ̀ Yaamu yáakɛrɔ́ bòo hũn
Mat 19.1-12; Lik 16.18
1Ɛ́ Yiezu ɛ́ khie lɔ́ yán, à khie van àá Zudee pɛ̃̀hɛ̃ hũn, ɛ́ van àá lé vṹn lɛ ɛ́ ɓɛ́ wóò nɛ Zurudɛ̃n san-cóoní lɔ̀n. Ɛ́ ɓɛ́ nìzã̀amáa ɛ́ sĩ̀n ɓɛrɛ koo ɓánlɔ̀n piè vìi, á khie ɛ́ ɓɛ̀ kɛ̀rán àá Dɔfĩn bienù kɛ̀a bòo lɛ á dàa wóò wé hɔ́ fúu. 2Ɛ́ ɓɛ́ Farizĩɛɓɛ dɔ̀ ɛ́ ɓɛrɛ lúwiniɛ ɔ̀ ǹ, ɛ̀ ɓɛ̀ ɛ́ cɛ̀ nɛ ɓɛ ɛ̀ vĩ-ɛ mí kùrú biehĩ́ hũn, ɛ́ ɓɛ́ ɔ̀ dìenin nɛ làa: «Kìe làndɛ́ wṹn lɔ̀n, ɛ́ bɛ́rɔ ɛ́ sũǹ dɛ̀ ɓá hṹnu ɛ́ ɲɛ?» 3Ɛ́ Yiezu ɓiɛ̀ zɔn ɛ́ ɓɛ̀ dìenin ɛ́ nɛ làa: «À Moyiize iè ɲunù bienù dúsɔ á lɛ́ miɛ ǹ?» 4Ɛ́ ɓɛ́ zɔn nɛ: «À Moyiize ɛ́ lɛ́ wṹn kie ǹ nɛ bɛ́rɔ ɛ́ dɛ̀ yaamu yáakɛrɔ́ vɛ̃hṹ ɛ́ wĩ́ ɛ́ lɛ́ ɓá hṹnu ǹ, à ɛ́ ɲɛ-a.» 5Ɛ́ Yiezu zɔn bie lɛ́ ɓà ǹ ɛ́ nɛ làa: «Hɔ̀ iè hɔ̀ lɛ ɛ́ mí tĩɛ̀ ɛ́ dɛ̃un cɛ̃̀un ɛ́ Moyiize ɛ́ dàa hàarí wɛ̃́ lépe ɲunù bienù sɔ sí ɛ́ lɛ́ miɛ ǹ. 6Kɛ́ lé dímíɲɛ́ fìi ɓánlén, ɛ́ Dɔfĩn wɔ́ ɓɛ́ àá bɛ́rɔ àá ɓá hṹnu. 7Ɛ́ sí iè hɔ̀pe temu lɛ́, á bɛ́rɔ ɛ́ dàa wóo ɓén fùansí ɓá yàá àá ɓá nín, à ɛ́ khíi cɛɓán àá ɓá hṹnu, 8ɛ́ ɓɛ́pe ɓɛ́ ɲuunáà ɛ́ wo ɛ́ wé tɛkɛ-cóoní. Ɛ̀ ɓɛ̀ wo bĩniɛ yí nìɛ ɓɛ̀ ɲu, kɛ́ ɓɛ́ iè nìcóoní. 9Ɛ́ nìnbírɔ ɛ́ yí fɔ́ɓán à sankɛ hɔ bòo lɛ ɛ́ Dɔfĩn ɛ́ wɔ́ àá dìcóoní wɛ̀.» 10Ɛ́ bòo lɛ ɛ́ ɓɛ́ van zɔn wi le zũnù hũn, ɛ́ Yiezu kɛ̀ránzɛ̀ɓɛ̀ ɛ́ sĩ̀n ɛ́ ɔ̀ dìenin hɔ̀ yaamu yáakɛrɔ́ bòo hũn. 11Ɛ́ Yiezu ɛ́ zɔn bie lɛ́ ɓà ǹ nɛ làa: «Kɛ́ bɛ́rɔ ɛ́ ɲɛun ɓá hṹnu à khie yan hɛ̃́-ɓuɛ̀, ɛ̀ ɓɛ̀ iè hã́a á ɛ́ fé à kɛ́ ápe ɓá hũnu lɛ á pɛ̃́. 12Ɛ̀ hṹnu kɛ́ á pɛ̃́ ɓá bɛ́rɔ à van yan bɛ́-ɓuɛ̀ à iè bɛ́fé.»
Yiezu ɛ́ ɓɛ̀ zĩncãahɛ̃ ɛ̀ dúɓɛ́nin
Mat 19.13-15; Lik 18.15-17
13Ɛ́ ɓɛ́ nìnbirìe dɔ̀ ɛ́ van ɛ́ dàa ɓɛ zĩncãahɛ̃ dɔ̀ ɛ́ dàa ɓɛrɛ Yiezu viì nɛ a hɛ ɓà ǹ. Ɛ́ piè kɛ̀ránzɛ̀ɓɛ̀ ɛ́ khie ɛ́ ɓàasiè sɔ ɛ̀ wũ̀aní. 14Ɛ́ Yiezu ɛ́ mɔn hɔ̀, ɛ́ piè tĩì síɛ hĩ́nà, á khie ɛ́ bie àá mí kɛ̀ránzɛ̀ɓɛ̀ ɛ́ nɛ làa: «Mì fuànsí ɓɛ́ zĩncãahɛ̃ ǹ nɛ ɓɛ ɓen niǹ viì, ɛ̀ mì bí si ɓɛ wɛ̀; iè hɔ̀ lɛ ɛ́ ɓɛ́ nìnbirìe lɛ ɛ́ kɛ kɛ̀a ɓɛpe, iè pe ɛ́ lé Dɔfĩn bɛ́záanú bòo ɛ́ sɛ̃̀ nin. 15Nin bie hɔ lɛ́ miɛ ǹ àá bɔ̀bín nɛ nìnbírɔ lɛ yí tɛ̀ Dɔfĩn bɛ́záanú bòo kɛ̀a zĩncáahɔ́ bòo sí, á yí dɛ̀ yán ɛ́ yá zɔ wɛ̀.» 16À khie fɔ́ ɓɛ́ zĩncãahɛ̃ ɛ́ yòó dàa mí bàanì hũn, à wóò yòó bè mí níhĩ́ hɔrɔ lɔ̀n, à dúɓɛa ɓà ǹ.
Zufìɛ bòo ɓàasɔ dɔ̀ bòo
Mat 19.16-30; Lik 18.18-30
17Ɛ́ bòo lɛ ɛ́ Yiezu ɛ́ khie ɛ́ mii mìí lé wṹn, ɛ́ nùún dɔ̀ ɛ́ van lìɛ ɛ́ ɓen lúsí mí nunkɛ́yìe lɔ̀n piè híɛhɔ́ à ɛ́ ɔ̀ dìenin ɛ́ nɛ làa: «Kɛ̀ránlɔ sãanù, hɔ̀ iè ńɓùo ɛ́ ń fɔ́ɓán ɛ̀ ǹ wé ɛ̀ dàá yí lé mɛkɛ̃nì lɛ yá vé?» 18Ɛ́ Yiezu ɛ́ zɔn bie lɛ́ à ǹ nɛ làa: «Kɔ́ wiɛ dàa ɛ́ nìn ve nɛ nìsãanù? Nìnbírɔ dɔ̀ lɛ sãa ɛ́ mí kɛ́ Dɔfĩn mí dòonún ɛ́ ɓen bòo mí. 19Kɔ́ dũ le Dɔfĩn ɲunù bienù lò: “Bí ɓé nìnbírɔ, bí fé hã́a tàá bí fé báa, bí kɛ̃̀mɛkɛ, bí ɓúu ɓúo ɛ̀ bè nìnbírɔ dɔ̀ lɔ̀n, bí khɛ̃̀ní nìnbírɔ ɛ̀ fé bòo, mɛ̀ndɛ̃ mì yàá àá mì nín.”» 20Á nùún ɛ́ zɔn bie lɛ́ Yiezu ǹ ɛ́ nɛ làa: «Kɛ̀ránlɔ, hɔ̀pe sí míkùi ɛ́ nín wé ɛ̀ dàá mìí niǹ zĩncɛmu fúu ɛ̀ ɓen dɛ̃ zoòni.» 21Ɛ́ Yiezu ɛ́ yòó huie ɔ̀ à wɛniɛ ɔ̀; à zɔn bie lɛ́ à ǹ ɛ́ nɛ làa: «Bɔ̀cóoní dɔ̀ kɛ́ wi yán iè pe ɛ́ kɔ́ fɔ́ɓán ɛ̀ kɔ̀ bĩní wé: vɛ yìɛní kɔ́ bòo lɛ ɛ́ kɔ́ dàa míkùi ɛ̀ lɛ́ màa ɓɛ̀ nìkherà ǹ, ɛ́ kɔ́ den ɛ́ yí yírɛ́ hɔ̀ hóohũn. Kɛ́ pehɔ̀ máahṹ, ɛ̀ kɔ̀ ɓen bè niǹ máahṹ.» 22Ɛ́ hɔ́ lɛ á nùún ɛ́ ɲɛ́ hɔ́pe biehĩ́ sɔ sí, ɛ́ piè híɛhɔ́ ɛ́ yòó yáa á khie cɔ́ kɛ́ piè tĩì ɛ́ yáa iè hɔ̀ lɛ á hũn ie bòo ɓàasɔ cɛ̃̀un. 23Ɛ́ Yiezu ɛ́ yòó húie mí kɛ̀ránzɛ̀ɓɛ̀ lɛ kírie mí ǹ ɛ́ khieniɛ à zɔn bie lɛ́ ɓà ǹ ɛ́ nɛ làa: «Hɔ̀ hɛ̀ lɔ̀nbiè ɛ́ wí ɛ̀ ɓɛ̀ bòo ɓàasiè ɛ̀ zɔ Dɔfĩn bɛ́záanú.» 24Ɛ́ hɔ́ biehĩ́ sɔ ɛ́ lɛ́ ɛ́ ɓɛ́ kɛ̀ránzɛ̀ɓɛ̀ tĩɛ yòó yáa míkùi ɛ́ Yiezu bĩniɛ zɔn bie lɛ́ ɓà ǹ nɛ làa: «Niǹ nìɛ, Dɔfĩn bɛ́záanú zɔnlɔ́ ɛ́ lɔ̀nbiè wi dɛ́! 25Ɲúkṹmì ńzɔ khíi àá mísĩ́mí kṹu ɛ́ wuawi pɔ bòo ɓàasɔ ńzɔ Dɔfĩn bɛ́záanú hũn.» 26Ɛ́ hɔ́ hɛ̀ wookɛa yòokɛa ɓɛ̀ kɛ̀ránzɛ̀ɓɛ̀ lɔ̀n ɛ́ ɓɛ́ khie dìekɛ ɓán nɛ làa: «Á wo iè wíeni ɛ́ temu dɛ̀ ɓén fuen?» 27Ɛ́ Yiezu ɛ́ húie ɓɛ̀ à zɔn nɛ làa: «Hɔ̀ iè bòo lɛ ɛ́ nìnbirìe yí dɛ̀ yá wé, kɛ́ Dɔfĩn ɛ́ pe dɛ hɔ̀ wé; iè hɔ̀ lɛ ɛ́ bòo lɛ ɛ́ wé tɛ Dɔfĩn viì ɛ́ mínɛ wɛ̀.»
28Ɛ́ Piɛre ɛ́ zɔn bie lɛ́ à ǹ nɛ làa: «Ɛ́ kɔ́ húi, lɛ iè kèpe ɛ́ fùɛrɛ̀sí ké bòo míkùi ǹ ɛ̀ kè ɓɛrɛ bɔ̀ kɔ̀ máahṹ.» 29Ɛ́ Yiezu zɔn bie lɛ́ à ǹ nɛ làa: «Nin khɛ́ hɔ́ lɛ́ miɛ ǹ àá bɔ̀bín: Nìnbírɔ kɛ́ á fùɛrɛ̀sí mí zũnù, ǹ tàá ɓá zɛ̀ɓɛ̀, tàá ɓá hĩ́ini, tàá ɓá nín, tàá ɓá yàá, tàá mí nìɛ, tàá mí mɛhɛ̃ ǹ, ǹpe àá lé Bentĩnu yènsénín, 30ɛ́ ɓàasɔ ɛ́ yí fúu yìe khĩminù hɔ̀pe zoòni wihĩ́ sɔ lɛ hũn: zĩhĩ́ɛ àá zɛ̀ɓɛ̀ àá hĩ́ini àá ńnínɓɛ̀ àá nìɛ, àá mɛhɛ̃, kɛ́ á lò ɓiɛ̀ ɛ́ yí lé sɛ̃́ɲíi, kɛ́ yìrí máahṹ, à ɛ́ yí lé mɛkɛ̃nì lɛ ɛ́ yá vé. 31Ɛ́ ɓɛ́ nìnbirìe cɛ̀rìɛɛ dɔ̀ lɛ ɛ́ dú hɔ́ híɛhɔ́ hɔ̀ zoòni ɛ́ ɓén dí máahṹ, ɛ̀ ɓɛ̀ cɛ̀rìɛɛ dɔ̀ lɛ dú hɔ́ máahṹ zoòni ɛ́ ɓén dí híɛhɔ́.»
Yiezu sĩ̀n mí húmú àá mí vìerɔ́ bòo ɛ̀ bie kɛ̀a yìehĩ̀tĩlán
Mat 20.17-19; Lik 18.31-34; Mar 8.31-33
32Ɛ́ Yiezu àá mí mɛ́nbèriè ɛ́ wo hṹn wi le wṹn lɔ̀n ɛ́ yòó vaá-vɛ hɔ Zerizalɛɛmu, ɛ́ Yiezu ɛ́ hṹn dú hɔ́ híɛhɔ́. Ɛ́ piè kɛ̀ránzɛ̀ɓɛ̀ ɛ́ hṹn hũn yerɛ, ɛ̀ ɓɛ̀lɛ ɛ́ bɔ̀ pie máahṹ ɛ́ hṹn zánkɛ. Ɛ́ Yiezu ɛ́ khie vɔn mí kɛ̀ránzɛ̀ɓɛ̀ pírú àá nìɛ ɓɛ̀ ɲu ɛ́ dàa khɛ̃̀nnɛ khie van, à sĩ̀n ɛ́ hɔ̀ bòo lɛ mii wí-è ǹ ɛ̀ bie lɛ́ ɓà ǹ. 33Á ɛ́ bie àá ɓɛ́ ɛ́ nɛ làa: «Lɛ iè kèpe ɛ́ wo yòó vaá-vɛ hɔ Zerizalɛɛmu, á Nìnbírɔ Zuú ɛ́ ɓɛ ɛ̀ yòó vɛ dé hɔ́ Dɔfĩn khɛ̃́ndàariè hándíe àá ɔ́ Moyiize làndɛ́ kɛ̀ránliè núnú hũn, ɛ̀ ɓɛ̀ lè lìe ɛ̀ bie nɛ a fɔ́ɓán à ɓé, ɛ̀ ɓɛ̀ khíi lɛ́ á ɓɛ̀ nìnbirìe lɛ ɛ́ mí lé Dɔfĩn wṹn lɔ̀n; 34ɛ̀ ɓàasiè ɛ́ fé khíi yáakɛ ɛ̀ khàaníkɛ kóo lɔ̀n ɛ̀ hɛ àá hɔ́ ńhùiehĩ́ ɛ́ khíi ɓé. Kɛ́ pehɔ̀ wihĩ́ bɔ̀nbɔ̀tĩlán zɔǹ à ɛ́ vìé.»
Zaake àá Zãn bòo lɛ ɓɛ́ hɛ̃nnɛ Yiezu viì bòo
Mat 20.20-28
35Ɛ́ Zebede nìɛ Zaake àá Zãn ɛ́ ɓɛrɛ lúwiniɛ Yiezu ǹ ɛ̀ ɓɛ̀ bie lɛ́ à ǹ nɛ làa: «Kɛ̀ránlɔ ké wɛ nɛ hɔ bòo lɛ ɛ́ ké ɛ̀ hɛ̃un kɔ̀ viì ɛ́ kɔ́ wé ɛ̀ lɛ́ kie ǹ.» 36Ɛ́ Yiezu ɛ́ zɔn ɓɛ̀ dìenin nɛ làa: «Hɔ̀ iè ńɓùo ɛ́ mi wɛ nɛ ǹ wé ɛ̀ lɛ́ miɛ ǹ?» 37Ɛ́ ɓɛ́ zɔn bie lɛ́ à ǹ nɛ làa: «Pɛ̃̀hṹ lɛ kɛ́ kɔ́ ɓɛrɛ kɔ̀ bɛ́záanú hũn, ɛ̀ kɔ̀ lɛ́ nɛ kepe kè ɲuunáà ádɔ̀ ɛ́ kansí kɔ́ ńdóonín àdɔ̀ ɛ́ kansí kɔ́ ńmiinín.» 38Ɛ́ Yiezu zɔn bie lɛ́ ɓà ǹ nɛ làa: «Mí yí dũ hɔ bòo lɛ ɛ́ mí ɛ́ hɛ̃un wɛ̀. Lè ɲuǹlán dìɛ lɛ tú àá hɔ́ sɛ̃́ɲíi lɛ nin ɲu ɛ́ mí biè ɛ́ dɛ̀ ɓén ɲu? Yée kɛ́ lé lɔ̀nbiè lɛ ɛ́ ɓɛ́ ɛ̀ líiní mi hũn ɛ́ mí biè dɛ̀ ɓén lí hũn?» 39Ɛ́ ɓɛ́ zɔn nɛ ɓɛ́ dɛ̀ hɔ̀. Ɛ́ Yiezu zɔn bie lɛ́ ɓà ǹ nɛ làa: «Hɔ̀ ɛ́ bɔn kɛ́ mí ɓén ɲu àá lé sɛ̃́ɲíi ɲuǹlán dìɛ lɛ ɛ́ nin dàá ɲu, ɛ̀ ɓɛ̀ lò ɓén líiní miɛ lè lɔ̀nbiè lɛ ɛ́ ɓɛ́ ɛ̀ líiní mi hũn. 40Kɛ́ hɔ́ ɓen kɛ́ hɔ́ ńkansí àá niǹ ńdóonín tàá àá niǹ ńmiinín, ɛ̀ hɔ̀ yí ńpe ɛ́ te hɔ ɛ́ lɛ́ wɛ̀. Hɔ̀pe kaǹsílénɓɛ̀ sɔ ɛ́ Dɔfĩn ɛ́ wookɛa ɛ́ bɔ̀sí ɓɛ́lɛ ɛ́ sãawi ɛ̀ ɓɛ̀ teń hɔ́ lɔ̀n ɛ̀ kań bòo hũn.» 41Ɛ́ ɓɛ́ kɛ̀ránzɛ̀ɓɛ̀ pírú sí kɛ́ ɛ́ ɲɛ́ hɔ́, ɛ́ peɓɛ̀ tĩɛ̀ ɛ́ hĩ́nà Zaake àá Zãn ǹ. 42Ɛ́ Yiezu ɛ́ vɔn ɓɛ̀ ɓɛ́kùi à ɛ́ bie àá ɓɛ́ nɛ làa: «Mí dũ kɛ́ ɓɛ́lɛ ɛ́ ɓɛ́ cɛ̃̀mɛ̀náa nìɛ ɛ́ wóò líi àá ɓɛ́ ɲúuhɛ̃siè ɛ́ wóò vɛ́ peɓɛ̀ ɲɛkɛ̃̀a, ɛ̀ peɓɛ̀ nì-bɛ̃hɛ̃ ɛ́ lò wóò zɛ̃́ní ɓɛ́ pànkɛ́ àá ɓɛ́. 43Kɛ́ hɔ́ yí fɔ́ɓán ɛ̀ hɔ̀ wé kɛ̀amu mì tĩ́ihṹ wɛ̀. Àlɛ kɛ́ á ɛ́ cɛ̀ nɛ mí wé nì-bɛhɔ́ mì tĩ́ihṹ, à fɔ́ɓán à wé mí tɔntɛ́.» 44Ɛ̀ mì tĩ́ihṹ kɛ́ ádɔ̀ ɛ́ cɛ̀ nɛ mí wé mí hándí, ɛ̀ ɓàasɔ ɛ̀ wé mípe mìkùi wɔnù. 45Iè hɔ̀ lɛ á nìnbírɔ Zuú ɛ́ yí ɓen ɛ̀ ɓɛ̀ nìnbirìe ɛ̀ tɛ́ tɔnlɔ́ ɛ̀ lɛ́ nin wɛ̀; kɛ́ á ɓɛrɛ ɛ́ mii tɛ́ tɔnlɔ́ ɛ̀ lɛ́ ɓɛ́ nìnbirìe ǹ, à lɛ́ mí mɛkɛ̃nì kɛ̀a sàanín ɛ̀ dàa fuení nìnbirie bìkuì ǹ.
Mui dɔ̀ wiɛnírɔ́ Zeriko lóo hũn
Mat 20.29-34; Lik 18.35-43
46Ɛ́ Yiezu àá mí kɛ̀ránzɛ̀ɓɛ̀ ɛ́ van dɛ̃un Zeriko. Ɛ́ bòo lɛ ɛ́ ɓɛ́ zɔn lɔ́ lé lóo hũn àá ɓɛ́ nìzã̀amáa lɛ bɔ̀ peɓɛ̀ máahṹ, ɛ́ ɓɛ́ ɓen lɔ́ yú mui dɔ̀ kɛ́ á kɛsí lé wṹn ɲunù ɛ́ hɛ̃nkɛ; pie yèrè ɛ́ ɓɛ́ nɛ Baritime, lɛ iè Time te mí yɛ̀nù. 47Á mui ɛ́ ɲɛ́ ɛ̀ ɓɛ̀ nɛ a iè Nazarɛɛte Yiezu temu ɛ́ khíi, á hĩ́nà ɛ́ bénkɛ ɛ́ nɛ làa: «Daviide Zuú Yiezu, mi niǹ miinɛ̀.» 48Ɛ́ ɓɛ́ nìnbirìe bìkuì ɛ́ khie fĩ àá ɔ́ nɛ a hĩì; kɛ́ á den bĩniɛ wookɛa ɛ́ bénkɛ cɛ̃̀un ɛ́ bie nɛ làa: «Daviide Zuú Yiezu, ń nɛ kɔ mi niǹ miinɛ̀.» 49Ɛ́ Yiezu ɛ́ dɛ̃̀ à zɔn bie nɛ làa: «Mì vi-e nɛ a ɓen.» Ɛ́ ɓɛ́ vɔn ɔ̀ mui ɛ̀ ɓɛ̀ bie lɛ́ à ǹ nɛ làa: «Hiení kɔ́ tĩì, síɛ hĩ́ní, à ɛ́ kɔ̀ ve.» 50Á mui ɛ́ tɛ́viɛniɛ mí mùakú, à síɛ khɔ́sí hĩ́nà ɛ́ ɓɛrɛ Yiezu viì. 51Ɛ́ Yiezu ɛ́ zɔn ɛ́ ɔ̀ dìenin nɛ làa: «Hɔ̀ ńɓùo ɛ́ kɔ́ wɛ nɛ n wé lɛ́ kɔ ǹ?» Á zɔn nɛ làa: «Kɛ̀ránlɔ, lɛ́ nɛ niǹ yìe wóo bĩní mi bòo.» 52Ɛ́ Yiezu zɔn bie lɛ́ à ǹ ɛ́ nɛ làa: «Ɛ́ kɔ́ lan, kɔ̀ ńdɛsìnlɔ́ ɛ́ wiɛniɛ kɔ.» Ɛ́ mí laà hũn, ɛ́ piè yìe ɛ́ yòó hɛ́rɛ, á wo loo bòo; á khie bɔ̀ Yiezu máahṹ lè wṹn lɔ̀n.
اکنون انتخاب شده:
Marike 10: bwj
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 L’Association Nationale pour la Traduction de la Bible et l’Alphabétisation