Marike 12
12
Lè wĩ̀i lɛ ɛ́ Yiezu ɛ́ wɛ̃̀ ɓɛ̀ tɔntɛ́riè dɔ̀ lɛ mɛkɛnɲiì wi bòo hũn
Mat 21.33-46; Lik 20.9-19
1Ɛ́ pehɔ̀ máahṹ, ɛ̀ Yiezu ɛ́ khie ɛ́ khɛ́ àá ɓɛ́ àá wũ̀a ɛ́ nɛ làa: «Nùún dɔ̀ ɛ́ hàarí fɛ́ divɛ̃n vɛ̃̀hɛ̃ mí mún hũn, à wɔ́ hɔ́ kɔnlɔ́ ɛ́ kírie hɔ̀ ǹ ɛ́ khie fɔ̀, à cɛ̃́ lé kṹun lɛ ɛ́ hɔ́ divɛ̃n ńɲiɛ̀ ɛ́ wóò fùɔ́n hũn, ɛ́ tɔn ɔ̀ bɔ̀hìerɔ lɔ́nkɔ́#12.1 Ɓɛ̀dɔ̀ ɛ́ wóò bie nɛ núnkɔ́ zũnù. zũnù yán; à khie dɔ́ lé mún sɔ ɓɛ̀ tɔntɛ́riè dɔ̀ núnú hũn nɛ ɓɛ teń pelè bòo ɛ̀ húi, à cɔ́ van wṹn lɔ̀n. 2Ɛ́ hɔ́ lɛ ɛ́ hɔ́ bòo mìirɔ́ pɛ̃̀hṹ ɛ́ van dɛ̃un, á nùún sɔ ɛ́ tɔrɛ mí tɔntɛ́ dɔ̀ nɛ a vɛ mí mún tɔntɛ́riè viì, ɛ̀ vɛ fé mí hɔ́n vɛ̀nù bòo ɛ̀ dàá ɓen. 3Kɛ́ ɓɛ́ tɔntɛ́riè ɛ́ den van ɓaa ɔ̀ ɛ́ han, ɛ̀ ɓɛ̀ ɲɛun ɔ̀ á khũ̀a cɔ́ àá mí nínkíemáa. 4Á mún ɓàasɔ ɛ́ bĩniɛ tɔrɛ mí tɔntɛ́ ɓuɛ̀. Ɛ́ ɓɛ́ van han ɔ̀ ɛ́ tuirɛ ɲún ɛ̀ ɓɛ̀ tòokɛa ɔ̀. 5Á mún ɓàasɔ ɛ́ bĩniɛ tɔrɛ nì-ɓuɛ̀; ápe ɛ́ ɓɛ́ van ɓɔ́; sí iè pe bòo lɛ ɛ́ wɔ́ àá ɔ́ mún ɓàasɔ tɔntɛ́riè bìkuì. Ɓɛ̀ han ɓɛ̀ dɔ̀, ɛ̀ ɓɛ̀ dɔ̀ ɛ́ ɓɛ́ ɓɔ́. 6Nìnbí-cóoní dɔ̀ mí dòonún ɛ́ temu wo kɛ́ ápe mún ɓàasɔ viì: piè zuú lɛ á wɛ àá mí tĩì míkùi. Ápe iè pe á tɔrɛ dàa víeniɛ nɛ a vɛ ɓɛ tɔntɛ́riè viì iè hɔ̀ lɛ á ɛ́ lieníkɛ à nɛ ɓɛ ɓén vɛ kànɓi mí zuú. 7Kɛ́ ɓɛ́ tɔntɛ́riè sɔ ɛ́ van mɔn ɔ̀ ɛ́ ɓɛ́ khie ɛ́ bie ɓán hũn nɛ làa: “Lɛ iè ɔ̀pe lɛ ɛ́ te ɓá yàá kĩ́ɛ ɛ́ ɓén mìí; mì ɓen kè ɓí é, ɛ́ lépe mún ɛ́ wo bòo ɛ́ sĩ̀ kie ǹ.” 8Ɛ̀ ɓɛ̀ hĩ́nà ɓaa ɔ̀ zuú sɔ ɛ́ ɓɔ́, ɛ́ mɔ̀ van lɔ́ tɛ́viɛniɛ hɔ̀ kɔnlɔ́ máahṹ.» 9Ɛ́ Yiezu ɛ́ zɔn ɓɛ̀ dìɛnin nɛ làa: «Á mún ɓàasɔ ɛ́ wo ɓén wé ńɓùo? À ɓén hĩ́ní ɓen, ɛ́ ɓén ɓé ɓɛ́pe tɔntɛ́riè sɔ à khíi lɛ́ lé mún sɔ tɔntɛ́ ɓua ǹ. 10Mí lò wo kɛ̀rɛa hɔ̀ bòo lɛ ɛ́ Dɔfĩn bie mí bienù vɛ̃hṹ hũn. Hɔ̀ bie nɛ làa:
“Lè sɛ̃̀nlè lɛ ɛ́ ɓɛ́ zũteriè ɛ́ lerɛ tɛ́viɛniɛ,
Ɛ́ temu khũ̀a wɔ́ lé sɛ̃̀nlè lɛ bòo hie, lɛ te le zũnù ɛ́ zɛ̃nkɛanin.
11 Ɲunsɔ ɛ́ temu nɛ hɔ wé kɛ̀amu,
Ɛ́ hɔ́ iè bɔ̀bɛhɔ́ kè yìe hũn.”»
12Ɛ́ ɓɛ́ Zuifuɓɛ hándíe ɛ́ cɛ̀ ɛ́ ɓɛ ɛ̀ ɓaà Yiezu iè hɔ̀ lɛ ɛ́ ɓɛ́ dũ kɛ́ lépe wĩ̀i lɛ á wɛ̃̀ ɛ́ nɛ̀ ɓɛ̀. Kɛ́ ɓɛ́ den ɛ́ ɓɛ̀ nìzã̀amáa ɛ̀ zán, ɛ́ ɓɛ́ fùɛrɛ̀sí-e ǹ ɛ̀ ɓɛ̀ khie cɔ́.
Hɔ̀ lànpóo lɛ wóò sàaní lɛ́ á Rɔmu bɛ́zu-bɛhɔ́ ǹ bòo
Mat 22.15-22; Lik 20.20-26
13Ɛ́ ɓɛ́ Zuifuɓɛ hándíe ɛ́ tɔrɛ ɓɛ̀ Farizĩɛɓɛ dɔ̀ àá ɔ́ Herɔɔde máahṹ nìɛ dɔ̀ nɛ ɓɛ vɛ Yiezu viì, ɛ̀ vɛ vĩ-ɛ mí kùrú biehĩ́ hũn. 14Ɛ́ ɓɛ́ van ɔ̀ dìenin nɛ làa: «Kɛ̀ránlɔ, ké dũ kɛ́ hɔ́ iè bɔ̀berà ɛ́ kɔ́ wóò bie; kɔ́ yá nìnbírɔ dɔ̀ ɛ̀ zán wɛ̀. Kɔ́ yáà kɛ̀ nìnbirìe dɔ̀ yìe wɛ̀, kɛ́ hɔ́ iè Dɔfĩn wṹn ɛ́ kɔ́ wóò kɛ̀rán àá ɓɛ́ nìnbirìe àá bɔ̀bín. Ɛ́ hɔ́ sũǹ te mí yìe ɛ̀ kè wóo sàaní hɔ́ lànpóo ɛ̀ lɛ́ á Rɔmu bɛ́zu-bɛhɔ́ Sezaare? Ké fɔ́ɓán ɛ̀ kè wóò sàaní hɔ́ yée kɛ́ ké bí wóò sàaní hɔ̀?» 15Kɛ́ Yiezu den dũ peɓɛ̀ bòo lɛ ɛ́ ɓɛ́ tànkɔ̀niɛ ɓɛ́ hũn, á zɔn bie lɛ́ ɓà ǹ nɛ làa: «Mí wiɛ dàa cɛ̀ ɛ̀ mì vĩ mi? Mì dàá lépe vɛ̃n-zuú dɔ̀ dàá ɓen nɛ ń húi.» 16Ɛ́ ɓɛ́ van dàa lè dɔ̀ ɛ́ dàa ɓɛrɛ. Ɛ́ Yiezu ɛ́ zɔn ɓɛ̀ dìenin nɛ làa: «Á wíeni híɛhɔ́ àá mí yèrè ɛ́ temu wi le lɔ̀n?» Ɛ́ ɓɛ́ nɛ a iè ɔ̀ Rɔmu bɛ́zu-bɛhɔ́ Sezaare. 17Ɛ́ Yiezu ɛ́ zɔn bie lɛ́ ɓà ǹ nɛ làa: «Ɛ́ hɔ́ bòo lɛ bòo sɛ̃̀ à Sezaare ɛ́ mí lɛ́ á Sezaare ǹ, ɛ̀ hɔ̀lɛ bòo sɛ̃̀ Dɔfĩn ɛ́ mí ɓiɛ̀ lɛ́ hɔ́pe Dɔfĩn.» Ɛ́ ɓɛ́ hɛ̀ yòó dɛ̃̀ cɔũn.
Ɓɛ̀ ɛ́ Yiezu dìenin àá nìhiè vìerɔ́ bòo
Mat 22.23-33; Lik 20.27-40
18Ɛ́ ɓɛ́ Sadusĩɛɓɛ dɔ̀ ɛ́ van ɓɛrɛ Yiezu viì. Ɓɛ̀ iè ɓɛ̀pe lɛ ɛ́ wóo nɛ ɓɛ nìhiè ɛ́ yá ɓén vìé wɛ̀. Ɛ́ ɓɛ́ ɓɛrɛ ɛ́ Yiezu dìenin nɛ làa: 19«Kɛ̀ránlɔ, Moyiize ɛ́ wɛ̃́ lé ɲunù bienù lɛ ɛ́ lɛ́ kie ǹ. À nɛ “Kɛ́ nìnbírɔ dɔ̀ ɓà zuú ɛ́ húrun à kɛ́ ɓá hṹnu kɛ́ á yí yí yɛ̀nù àá ɔ́, à pelɛ húrun ɓà zuú sɔ ɛ̀ khíi mìí ɔ́pe hṹnu sɔ ɛ̀ yɛ ɛ̀ dàá lɛ́ máahṹ ɓá zùú lɛ húrun.” 20Kɛ́ zɛ̀ɓɛ̀ hùuɲu dɔ̀ ɛ́ hàarí wi yán. Á hán bɛ́rɔ ɛ́ yan ɓá hṹnu à khie húrun kɛ́ á yí yí yɛ̀nù àá ɔ́ wɛ̀. 21Á ńɲúunín ɛ́ khie mɔ̀ ɓà hũnú ɛ́ yan, á ɓiɛ̀ khie húrun kɛ́ á yí yí yɛ̀nù àá ɔ́pe hṹnu wɛ̀. Á ńtĩinín bòo ɛ́ ɓiɛ̀ khie wɔ́ kɛ̀amu. 22Ɛ́ ɓɛ́pe zɛ̀ɓɛ̀ hùuɲu sɔ ɓɛ́kùi bòo ɛ́ wɔ́ kɛ̀amu; ɓɛ̀ yankɛ à hṹnu sɔ, ɛ́ húrunkɛ kɛ́ ádɔ̀ ɛ́ yí yí yɛ̀nù àá ɔ́ wɛ̀. Ɛ́ pehɔ̀ máahṹ, àpe hṹnu ɛ́ ɓiɛ̀ khie húrun. 23Ɛ́ ɓɛ́ nìhiè vìerɔ́ zɔn, á wo ɓén wí-e hɔ́sɔ ɓà hũnú ɓɛ̀ zɛ̀ɓɛ̀ hùuɲu sɔ tĩ́íhṹ? Ɓɛ̀pe ɓɛ́kùi ɛ́ lò wo yankɛ à.» 24Ɛ́ Yiezu ɛ́ zɔn bie lɛ́ ɓà ǹ nɛ làa: «Mí biè ɛ́ mìte ɛ̀ vĩ́iní, iè hɔ̀ lɛ ɛ́ mí den yí dũ Dɔfĩn bienù vɛ̃hɛ̃ bòo lɛ ɛ́ hɔ́ bie, ɛ̀ mì lò yí dũ Dɔfĩn pànkɛ́ bòo wɛ̀. 25Ɓɛ̀ nìhiè vìerɔ́ yìi hũn, ɛ̀ ɓɛ̀ báa ɛ́ yá ɓén yɛ́ hã́a, ɛ̀ ɓɛ̀ hã́a ɛ́ lò ɓiɛ̀ yá yɛ báa wɛ̀; kɛ́ ɓɛ́ ɓén wé kɛ̀a hóohũn mɛlɛkɛɓɛ bòo sí. 26Kɛ́ hɔ́ ɓen kɛ́ ɓɛ́ nìnbiriè lɛ húrunkɛ vìerɔ́ bòo, ɛ̀ mì iè biè sũǹ yí kɛ̀rán ɔ́ Moyiize vɛ̃hṹ hũn, hɔ̀ bòo lɛ ɛ́ Dɔfĩn ɛ́ khɛ́ lɛ́ à ǹ lè vɛ̃̀n-cíi lɛ ɛ́ cĩ̀ hũn? Dɔfĩn ɛ́ bie nɛ làa: “Ǹpe iè Abarahaamu Dɔfĩn àá Yizaake Dɔfĩn àá Zakɔɔbu Dɔfĩn.” 27Ɛ́ Dɔfĩn ɛ́ yí ɓɛ́ nìnbirìe lɛ húrun Dɔfĩn, kɛ́ hɔ́ iè ɓɛ̀lɛ yìe wi Dɔfĩn. Mí hɛ̀ vṹnun àá bɔ̀bín.»
Dɔfĩn ɲunù bienù lɛ bòo hie ɛ́ pɔ hɔlɛ kɛ́ míkùi bòo
Mat 22.34-40; Lik 10.25-28
28Ɛ́ Moyiize làndɛ́ kɛ̀ránlɔ dɔ̀ ɛ́ ɲɛ́ kɛ́ Yiezu ɛ́ wũ̀aní àá ɓɛ́ Sadusĩɛɓɛ, á mɔn kɛ́ Yiezu ɛ́ kɔ̃́niɛ ɓɛ̀ Sadusĩɛɓɛ sãàniɛ, á van lúwiniɛ ɔ̀ ǹ à ɔ̀ dìenin nɛ làa: «Dɔfĩn ɲunù bienù dúsɔ ɛ́ temu bòo hie ɛ́ pɔ hɔlɛ kɛ́ míkùi?» 29Ɛ́ Yiezu zɔn bie lɛ́ à ǹ ɛ́ nɛ làa: «Dɔfĩn ɲunù bienù lɛ bòo hie pɔ hɔlɛ kɛ́ míkùi iè lè lɛ: “Yizarayɛɛle, tɛ́ kɔ́ ɲɛkɛ̃̀a, kè Ɲunsɔ Dɔfĩn ɛ́ temu iè Ɲunsɔ mí dòonún. 30Ɛ́ kɔ́ fɔ́ɓán ɛ̀ kɔ̀ wɛní Ɲunsɔ lɛ iè kɔ̀ Dɔfĩn àá kɔ́ tĩì míkùi, àá kɔ́ mɛkɛ̃nì míkùi, àá kɔ́ bɔ̀dũmunù míkùi, àá kɔ́ pànkɛ́ míkùi.” 31Ɛ̀ lè ɲunù tɛmu lɛ bĩniɛ sɛ̃̀ ɛ́ iè lè lɛ: “Kɔ́ fɔ́ɓán ɛ̀ kɔ̀ wɛní mì ńkɔnù kɛ̀a bòo lɛ ɛ́ kɔ́ dàá wɛ kɔ kùrú sɛ̃́hṹ.” Dɔfĩn ɲunù bienù dɔ̀ lɛ bĩniɛ pɔ hɔpe bɔ̀nbɔ̀ ɲu sí ɛ́ mí wɛ̀.» 32Á làndɛ́ kɛ̀ránlɔ ɛ́ zɔn bie lɛ́ Yiezu ǹ nɛ làa: «Kɛ̀ránlɔ, kɔ̀ bienù ɛ́ tĩ. Hɔ̀ bòo lɛ ɛ́ kɔ́ bie ɛ́ bɔn. Ɲunsɔ ɛ́ temu iè Dɔfĩn mí dòonún, Dɔfĩn dɔ̀ ɛ́ bĩniɛ mínɛ kɛ́ Hɔ́pe ɛ́ ɓen bòo mí. 33Ɛ́ nìnbírɔ ɛ́ fɔ́ɓán à wɛní Dɔfĩn àá mí tĩì míkùi, àá mí bɔ̀dũmunù míkùi àá mí pànkɛ́ míkùi; à fɔ́ɓán à wɛní ɓá ńkɔnù kɛ̀a bòo lɛ á dàá wɛ̀ mí kùrú sɛ̃́hṹ. Hɔ̀pe sí ɛ́ bòo tṹ ɓɛ́ bìlaàsiè lɛ wóò ɓé ɛ̀ cĩ̀ní ɛ̀ lɛ́ Dɔfĩn, àá hɔ́ hɛ̃mù bòo àá mí ɲúuhɛ̃ lɛ wóò lɛ́ Dɔfĩn.» 34Ɛ́ Yiezu ɛ́ mɔn kɛ́ á bie bɔ̀dũmunù bienù, á zɔn bie lɛ́ à ǹ nɛ làa: «Kɔ̀ viì ɛ́ yí ni àá Dɔfĩn bɛ́záanú wɛ̀.» Ɛ́ nìnbírɔ dɔ̀ ɛ́ yí bĩní hiení mí tĩì ɛ̀ zɔ dìe ɔ̀ ǹ àá bòo dɔ̀ wɛ̀.
Àpe Kirisa sũǹ iè Daviide hũn zuú?
Mat 22.41-46; Lik 20.41-44
35Ɛ́ hɔ́ lɛ ɛ́ Yiezu ɛ́ khie ɛ́ ɓɛ̀ nìnbirìe ɛ̀ kɛ̀rán àá Dɔfĩn bienù lè Dɔfĩn zũ-bɛhɔ́ hũn, á zɔn ɛ́ ɓɛ̀ dìenin ɛ́ nɛ làa: «Hɔ̀ wo wiɛ á Moyiize làndɛ́ kɛ̀ránliè ɛ́ dàa wóò nɛ a Kirisa ɛ́ iè Daviide hũn zuú? 36Àpe Daviide míte ǹ ɛ́ hàarí bie àá lé Mɛkɛ̃n-Sãanu pànkɛ́ ɛ́ nɛ làa:
“Ɲunsɔ Dɔfĩn ɛ́ bie lɛ́ niǹ Ɲunsɔ ǹ ɛ́ nɛ làa:
Ɓen Síɛ kansí niǹ ńdóonín,
Nin lɛ́ ɛ̀ mì ńbíyanliè ɛ̀ wé kɔ́ zehĩ́ bènlén wànlè.”
37Ápe Daviide míte ǹ ɛ́ wo ɛ́ ɔ̀pe Kirisa ɛ̀ ve nɛ mí Ɲunsɔ; á wo wiɛ dàa dɛ̀ ɛ́ bĩní khíi wé piè hũn zuú?» Ɛ́ ɓɛ́ nìzã̀amáa lɛ dɛ̃̀ ɛ́ piè bòo ɛ̀ ɲí ɛ́ hɛ̀ wɛ ɓɛ́te.
Yiezu nɛ ɓɛ nìnbirìe ɛ̀ pɛ ɓɛ́te àá ɓɛ́ làndɛ́ kɛ̀ránliè
Mat 23.1-36; Lik 20.45-47
38Ɛ́ hɔ́ lɛ ɛ́ Yiezu ɛ́ ɓɛ̀ nìnbirìe ɛ̀ kɛ̀rán, á ɛ́ bie àá ɓɛ́ ɛ́ nɛ làa: «Mì pɛ míte ɛ̀ mì bí wé kɛ̀a ɔ́ Moyiize làndɛ́ kɛ̀ránliè wɛ̀. Ɓɛ̀ wɛ hɔ tĩ̀-bɛ̃hɛ̃ zɔnlɔ́ ɛ̀ dàá múakɛ khíi ɛ̀ ɓɛ̀ nìnbirìe den fòoníkɛ hɔ fɔ́hĩ́ hũn. 39Ɓɛ̀ ɓen van ɓɛ́ ńkóoɓánlɔ̀n zĩhĩ́ɛ hũn, ɛ̀ hɔ̀ hán wànlɛ̀a iè pe ɛ́ ɓɛ́ wɛ ɛ́ wóò vɛ kansí lɔ̀n, ɛ̀ ɓɛ̀ ɓen van hɔ̀ sɛ́hĩ́ hũn, ɛ̀ hɔ̀ hán wànlɛ̀a iè pe ɛ́ ɓɛ́ wɛ. 40Ɓɛ̀ mɛ-hã́a zĩhĩ́ɛ ɛ́ ɓɛ́ te ɛ́ wóò dí míkùi; kɛ́ ɓɛ́ lò den ɓen ɓɛ hɛ̃un Dɔfĩn, ɛ̀ ɓɛ̀ temu dìń hɛ̃un míi, bòo lɛ ɛ́ wé ɛ̀ ɓɛ̀ nìnbirìe ɛ̀ mi ɓɛ. Ɛ́ hɔ́pe sí bòo hũn, ɛ́ Dɔfĩn ɛ́ ɓén vɛ́ peɓɛ̀ ɲɛkɛ̃̀a cɛ̃̀un.»
Mɛ-hṹnu nìkherà dɔ̀ hɛ̃mù bòo lɛ á lerɛ bòo
Lik 21.1-4
41Ɛ́ Yiezu khie van kɛsí lé ɓɔnwiè lɛ ɛ́ ɓɛ́ nìnbirìe ɛ́ wóò ɓen kóo hɔ́ hɛ̃mù màa hũn ɛ̀ lɛ́ Dɔfĩn híɛhɔ́, ɛ́ ɓɛ̀ nìnbirìe bòo lɛ ɛ́ ɓɛ́ dàa ɛ́ hɔ̀ màa ɛ̀ kóo yán ɛ̀ húi. Ɛ́ bòo ɓàasiè bìkuì ɛ́ wóò ɓen kóo hɔ́ màa bɔ̀kùi. 42Ɛ́ mɛ-hṹnu nìkherà dɔ̀ ɛ́ ɓiɛ̀ van ɓɛrɛ ɛ́ ɓen kóo vɛn-zɛ̀ɓɛ̀ bɔ̀nbɔ̀ ɲu dɔ̀ lɛ hɛ̀ yá yí bòo dɔ̀ ǹ hùúu. 43Ɛ́ Yiezu ɛ́ zɔn vɔn mí kɛ̀ránzɛ̀ɓɛ̀ à ɛ́ bie àá ɓɛ́ ɛ́ nɛ làa: «Nin khɛ́ hɔ́ lɛ́ miɛ ǹ àá bɔ̀bín, ɔ̀pe mɛ-hṹnu nìkherà sɔ lɛ ɛ́ koo pɔniɛ ɓɛ́pe lɛ ɛ́ ɓɛrɛ koo hɔ̀ màa lè ɓɔnwiè hũn ɓɛ́kùi. 44Iè hɔ̀ lɛ ɛ́ ɓɛ́pe ɓɛ́kùi bòo lɛ ɛ́ ɓɛ́ ɓɛrɛ koo ɛ́ yí bòo dɔ̀ peɓɛ̀ viì wɛ̀. Kɛ́ ápe àá bòo lɛ á lò dàa bòo dɔ̀ mí míkùi, iè piè bòo lɛ á dàá míkùi á ɓɛrɛ lɛ́; hɔ̀ iè piè bòo lɛ á hṹn mii dàá díiní míte míkùi á mɔ̀ ɛ́ ɓɛrɛ lɛ́.»
اکنون انتخاب شده:
Marike 12: bwj
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 L’Association Nationale pour la Traduction de la Bible et l’Alphabétisation