Dolabololo 17
17
1Lebe rousu e'a ceka'a ua re ma'u rimoi,
reo wala ga'a 'i romanga reo ngo-ngoromo, mada'a ma'u rubutu kama togumu ua.
2Budaka matengo ga'a rai 'akala ma la-la, unanga 'ai kuasa lamo'o toma ngowa 'olo nau'u ga'a 'o pula'a mara'a,
re ḏuanga i'a unanga gena-ge 'o sanga warisi ma'u mete'e reo ngowa 'olo nau'u 'ai ioronongoḏu.
3Guraci re salaka 'i si'uisi reo u'u,
mada'a manusia manga 'akala re sinyingara, Ma JOU 'a tai'i.
4Ngowa'a kajahatana 'aḏi mete'e demo-demo ma jira,
re ngowa'a sa-sakala 'aḏi nyafusu 'isene demo-demo ga'a sihaga.
5Ngowa'a ga'a 'aḏi sipa-pake ua ngowa'a ma dinga'unu ua,
ananga gena-ge 'aḏi sije-jengere Ma Jou'ongu Madutu, ananga manga do-dadi.
Ngowa'a ga'a 'aḏi maroanga sababu ngowa'a 'aḏi sanga bahala,
ḏuanga i'a ananga gena-ge 'aḏi sanga hukumu.
6Ngowa'a re danongo 'aḏi dadi bi-biri'i manga lastari,
re ete re dotumu 'aḏi dadi ngowa 'olo manga biono gau'u.
7Ngowa'a ga'a 'aḏi emono wo-waro 'aḏi patasa ua sisupu demo ma la-la
Ma la-lamo'o i'a ḏi'i, ngowa'a sayanga ma jingi'i 'aḏi patasa ua sisupu demo sa-sakala.
8Pipisi sepa ma tero sa'olo mustika toma ngowa'a ga'a ya sipula'a,
toma ngi'i ḇato ananga 'aḏi talaḏi, ananga 'aḏi bara'utungu.
9Ngowa'a ga'a 'aḏi 'elingi ua manga sala,
'aḏi sitotomo manga ḏagilomu,
mada'a na'o ngowa'a 'aḏi siba-baolo manga sala
pa'i 'aḏi sitola'a ḏagilomu sabi manga hubungana.
10Ngowa'a remanga wo-waro ga'a ya sinyanyasele, na'o ananga 'aḏi sanga ḇangata pa'i soi moi ḇato, ananga 'aḏi sahe
reo ngowa'a ga'a 'aḏi emono wo-waro, na'o ananga gena-ge 'aḏi sanga ca'olo latu moi i'a.
11Ngowa'a ma jira pa'i 'a'a kajahatana,
mada'a ngowa'a matengo ga'a 'ai 'akala re sinyingara 'i cira madutu ḏuanga i'a 'o sanga soma'a di'a 'o sapolo ra unanga.
12Lebe rousu ma'u sanga beruang ma lelara ga'a ma ngowa ri iranga,
reo ngowa'a ga'a 'aḏi emono wo-waro ga'a 'aḏi sijumu manga haga.
13Na'o ngowa'a 'aḏi balasa kajahatana toma ngowa'a ga'a ya'u 'a'a la,
kajahatana gena-ge 'i lage ua tamanga wala.
14'A'a kaco ma mulaingi, enanga gena-ge ma tero 'aḏi welanga ḇanyo ma ngo'omo,
dadi ngini ni torusu wakutu 'i dadi kaco nyangu.
15Sibebasa ngowa'a kajahatana, re 'aḏi sihukumu ngowa'a loasa re banari ga'a kamanga sala ua#17:15 Ḏa ngowa'a gena-ge juruhakimi,
Hali romoḏiḏi gena-ge, Ma JOU 'a emono.
16Kama faeda cua na'o ngowa'a ga'a 'aḏi emono wo-waro, ananga 'aḏi simoini ma pipisi di'a 'aḏi disa 'akala soro'unu,
sababu ananga ga'a manga 'akala cua di'a ya sahe.
17Ḏagilomu 'aḏi dadalara tau-taunu,
re ioro re nongoḏu 'aḏi ma'u riono toma 'orasa kangela.
18Ngowa'a ga'a manga 'akala cua, gena-ge ananga ga'a 'aḏi 'a'a jaji,
di'a 'aḏi tuusu manga ḏagilomu ma banyatoro.#Dol. 6:1
19Ngowa'a ga'a nyanyaḏi ma'u go'oro,
ananga gena-ge 'aḏi nyafusu 'a'a kaco ḏi'i.
ngowa'a ga'a momole,
ananga gena-ge 'aḏi disa bodito.
20Ngowa'a ga'a manga 'akala re sinyingara 'i cira, ananga gena-ge 'aḏi sanga ua 'ori i'a ma la-la.
ngowa'a ga'a yai'i 'i sa-salanga, ananga gena-ge ḏuanga i'a 'aḏi sanga bodito.
21Ngowa'a ga'a sanga ngowa 'olo ga'a 'aḏi emono wo-waro, ananga gena-ge 'aḏi si'a'a ma ḇaḇa 'ai 'akala re sinyingara 'i kangela,
re ngowa'a na'u ga'a ngowa'a haga, ma ḇaḇa kai monere ua.
22'Akala re sinyingara ma roanga 'i dadi sou'u ga'a si-la,
mada'a 'akala re sinyingara 'i rapo'o, enanga gena-ge 'i singonono obongo.
23Ngowa'a kajahatana 'aḏi dawongo pipisi sepa sigo-gogono,
la 'aḏi siseko hukumu ma ḏo-ḏagi.
24Ngowa'a remanga wo-waro ga'a ya sinyanyasele, ananga 'aḏi pa'i totoho 'akala soro'unu ḇato,
mada'a ngowa'a ga'a 'aḏi emono wo-waro, ananga manga la'o 'i tatamo si'a re sino singadolo toma dungia sitabi donga.
25Ngowa'a nau'u ga'a 'o emono wo-waro, unanga gena-ge 'o sigasa garura tai ḇaḇa,
re sikangela ma ngina 'ami 'akala re sinyingara.
26Singa'unu bo-bangu toma ngowa'a loasa re banari;
gena-ge 'i rapu,
Ca'olo ngowa'a sayanga ma jingi'i, gena-ge 'i sala.
27Ngowa'a pahe remanga wo-waro, ananga gena-ge 'aḏi kanau repe ua,
ngowa'a remanga wo-waro ga'a ya sinyanyasele, ananga gena-ge 'aḏi nga'unu tahana manga diri.
28Re ḏi'i na'o ngowa'a haga 'aḏi masiogoro, ngowa'a 'aḏi ta'ajiri ananga gena-ge ngowa'a 'akala soro'unu.
re na'o ngowa'a haga 'aḏi damunu manga madanga, ngowa'a 'aḏi ta'ajiri ananga gena-ge ngowa'a remanga wo-waro ga'a ya sinyanyasele.
اکنون انتخاب شده:
Dolabololo 17: SAJ
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2025 Indonesian Bible Society (LAI)