LUK 12
12
ढोंग विरुद्ध येशुड वान शिष्यलाक चेतावनी इस्ताड
मत्तय 10:26-27
1इंताटला हजारो मंदीद इंतोट गर्दी आय्या की वार वगामेगारनी तोक्केदेंक आंटीर, आप्पुड येशुड पहिला वान शिष्यलान आन्या: “परुशी मंदी खमीर बद्दल, आंटे वार ढोंग बद्दल सावध उंडना. 2तेरशेदेंक दाक फोई इल्ला येमीच मुशीनेद लेद इंगा यरका काक फोई इल्ला येमीच दाशीनेद लेद. 3दिनिचांग मीर येम पण मोब्बुला माटलाड्यार आदी यलगुला इनेदेंक वच्ची इंगा मीर यवाराना गुम्माला येमाना दोंगातारला शप्यार आदी इल्लु मिंदकेल घोषित शेशेदेंक वच्ची.”
येशुड वान शिष्यलाक हिम्मत इस्ताड
मत्तय 10:8-31
4 “पण ना मित्रलाला, निन मिक शपतान, यवार फयीन मततार वारकी मीर यरस्कुनाकुंडा, येनटीक की दान काना जास्त वार येमीच शेशी शकायार. 5मीर यवारकी यरस्कुना बेक इदी निन मिक शपतान. मिमलान मतेशी नेंका नरकला येशेद यवारकी अधिकार उंडाद, वानकी यरस्कोंडा. हुं, निन मिक शपतान, वानके यरस्कोंडा. 6आय्यीद गुवालनी रोंड शिन्ना कलदारलाक आम्मुतार का लेद? तरी पण परमेश्वर दांटल्योन वगादान पण भुलायाड. 7पण मी नत्ती मिंदुडी आन्नी यंडकाल पण कोल्चीनेय उंडाय. यरस्कुनाकुंडा. शेंगेम गुवाल काना पण मिद किंमत जास्त उंडाद.
8 यवाड नन्नु मंदी मुंदार स्वीकार शेस्ताड, आ प्रत्येक मनशीन परमेश्वर दुतला मुंदार मनशी कोडकु स्वीकार शेशी. 9पण यवाड नन्नु मंदी मुंदार नाकारीस्ताड, वाड स्वर्गदुतला मुंदार नाकारीच्चेदेंक वच्ची. 10प्रत्येक मनशी यवाड मनशी कोडकु विरुद्ध माटलाडी, वान क्षमा शेशेदेंक वच्ची. पण यवाड पवित्र आत्मा विरुद्ध निंदा शेस्ताड वान क्षमा शेशेदेंक दाका फोई. 11यप्पुड मंदी मिमलान सभास्थान, सरकार इंगा अधिकारीला मुंदार फटकेन फोयार, आप्पुड मीर येम माटलाडाला लेकाते स्वतान यल्ला वाचाया मताला दिन बद्दल पहिलाने चिंता शेस्केन कुसनाकुंडा. 12येनटीक की मीर येम माटलाडाला इदी पवित्र आत्मा आप्पुडे मिक नेरपी.”
श्रीमंत मुर्ख मनशीद दृष्टांत
13मंग गर्दी लोन्केल वगाड येशुन आन्या, “गुरुजी, ना तम्मुनकी ना हिस्सा लोनदी संपत्ती नाक इच्चेदेंक शप!” 14पण येशुड वान आन्या, “हे तम्मुडा, नन्नु मी मिंदा मध्यस्थी लेकाते न्यायाधीश आंका यवाड निवडाशीनाड?”#निर्गम 2:14. 15मंग येशुड वारनी आन्या, “साभाळींडा इंगा आन्नी प्रकारलोन लोभलाकेल स्वतान धुराम फेटना येनटीक की यप्पुड वगा मनशी देगार वान गरज काना जास्त उंटाद आप्पुड आदी संपत्ती वानदी जीवन आयताद इल्ला लेद.” 16मंग वाड वारकी वगा दाखला शप्या, “वगा धनवान मनशी शेल्ला शेंगेम मंचीद फंटा वच्या. 17वाड स्वता जताक विचार शेशी इल्ला आन्या, 'निन येम शेयदुन, येनटीक की ना देगार आदी फेट्टेदेंक जागा लेद?' 18मंग वाड इल्ला आन्या, 'निन इप्पुड इल्ला शेस्तान निन नाय गाद्याल केडपी फेद्दाय कटतान, मंग निन नाद आंता धान्य इंगा माल आंदु जमा शेशान' 19इंगा निन ना जेमुन आन्यान ‘हे जेम, इप्पुड नी इचांग शेंगेम यंडलु साली इंतोट माल फेटनेद उंडाद. आराम शेय, तिन, ताग इंगा मजा शेय.’ 20पण परमेश्वर वान आन्या, अरे मुर्ख, जर इबद नीद जेम फोया तर नु जमा शेशीनेद संपत्ती यवारकी शिक्की?' 21इल्ले आ मनशी पण उंडाड यवाड स्वता इचांग संपत्ती जमा शेस्ताड पण परमेश्वर कंडलाला धनवान लेड.”
चिंता बाबतीला चेतावनी
मत्तय 6:19-21
22मंग येशुड वान शिष्यलान आन्या, “दिनिचांग निन मिक शपतान, स्वता जीवन बद्दल लेकाते मीर येम तिनाला दिन बद्दल चिंता शेयाकुंडा. लेकाते मी फय बद्दल आंटे याय बट्टाल फेटकुनेद दिन बद्दल चिंता शेयाकुंडा. 23येनटीक की आन्नाम काना जेम बट्टाल काना फय महत्वद उंडाद. 24काकुलाद विचार शेयना आय पेरायाव इंगा कापणी पण शेयाव. आटलाक गोदामलु लेव इंगा गाद्याल लेव. तरी पण परमेश्वर आटलान साकताड. पक्षील काना मीर यंता तरी मौल्यवान उंडार!#स्तोत्रसंहिता 147:9. 25चिंता शेशीगास मी दिंटल्योन्टोड यवाड स्वता आयुष्यला वगा घंटा वाढायमती शकास्ताड? 26जर मीर शिन्नाद माटा शेशी शकायार, तर इंगोगो माटला बद्दल येनटीक चिंता शेस्तार? 27फुवुल यल्ला वाढास्ताय दिनदी विचार शेयना; आय कष्ट शेयाव, कोय्याव; तरी पण निन मिक शपतान, शलमोन राजा पण वान पुर्ण वैभवला दांटल्योन वगादान लेका पण सजाया लेकुंड्या. 28याद गड्डी इबद उंडाद इंगा रेप आग्गीला येशेदेंक वस्ताद, दानकी जर परमेश्वर इल्लोन बट्टाल फेटताड, तर हे अल्पविश्वासी मंदीलाला, वाड मिक यंता तरी मंची बट्टाल फेट्टाक फोई येम! 29मीर येम तिनेद इंगा येम तागेद दिन बद्दल काळजी शेयाकुंडा इंगा इ माटा बद्दल चिंता शेयाकुंडा. 30येनटीक की दुन्यामलोन राष्ट्रल इ माटलु मिळाय मतेदेंक खटपट शेस्ताय; पण इ माटलाद मिक गरज उंडाद, इदी मी स्वर्गलोन परमेश्वर आब्बानकी यरका उंडाद. 31तर मीर पहिला वानदी राज्य मिळाय मतेदेंक झटायना, आंटे दान जताक इ पण माटलु मिक शिक्की.
32 हे शिन्ना कळप, यरस्कुनाक, येनटीक की मिक वानदी राज्य इच्चेद इदी मी स्वर्गीय आब्बानकी बागाशीनाद.
33 मिद संपत्ती आम्मी गरीबोरकी फंचकाडना; इंगा इल्लोनी तित्तील बनाय मतना, याय फाताय काव, आंटे स्वर्गला इल्लोनदी धन जमा शेयना याद कमी काद, यादान देगार दोंगा दाड इंगा फुल्गुल नाश शेयाव. 34येनटीक की यंदु मिद धन उंडाद आंदु मिद मन पण आंटी.
नेहमी तैयार उंडना
मत्तय 24:42-51
35 मी नडमुल कट्टीनेय इंगा दिव्वाल आंचीनेय उंडा निंडा. #
निर्गम 12:11; 2 राजे 4:29; इफिस 6:14; मत्तय 5:16. 36इंगा मालकुड फेंडलीकेल वापस वच्ची आप्पुड वान इचांग लगेच कवाड तेरवाला, आंका वापस वच्चेद दावा सुशेतोर मंदी लेका मीर कांडा. 37इंगा मालकुड वच्ची नेंका या कुल्योर वानकी मेल्का उंडीनोर कमशार वार धन्य; निन मिक खरेम शपतान की, वाड वानी नडमुल कटकेन वारनी रोट्या तिनेदेंक कुसनामती इंगा वच्ची वारदी सेवा शेशी. 38वाड निम्मा मोब्बुला लेकाते दान नंतर वच्ची पण या कुल्योड वानकी तैयारीला कमशी वाड धन्य. 39इंगा इदी लक्षला तिस्कोंडा की; दोंगा यप्पुड वच्ची इदी जर इल्लु मालकुनकी यरका उंडीन्टे तर वाड मेल्का उंटुन्या इंगा वानदी इल्लु फगला मतानिया कुंटुन्या. 40मीर पण तैयार उंडना; येनटीक की मिक यरका लेद आ क्षणला मनशी कोडकु वच्ची.”
41मंग पेत्रड आन्या, “प्रभु, नु इदी दाखला माक शपतुनाव का आंदारकी?” 42आप्पुड प्रभुड आन्या, “वाड विश्वासयोग्य इंगा बुद्धिमान कारभारी यवाड उंडाड, यवान माल्कुड वान इल्लु नोकर-चाकरला मिंदा अधिकारी निवडाशीनाड दिनिचांग की वाड वारकी योग्य वेळला तिनेदेंक आन्नाम इयाला? 43वान मालकुड वच्ची आप्पुड इल्ला शेशेताप्पुड या कुल्योड वानकी कमशी वाड धन्य. 44निन मिक खरेम शपतान, मालकुड वान आंता संपत्ती मिंदा वान अधिकारी नेमाशी. 45पण ‘ना मालकुनकी वच्चेदेंक शेंगेम वेळ आंटी,’ इल्ला वान मनला आनी वाड कुल्योड बाकी कुल्योरनी मतेदेंक आंटी इंगा तिनी तागी मस्त आय्यी, 46तर कुल्योड दावा सुडाड इल्लोन दिनमु इंगा वानकी यरका लेद इल्लोन वेळला वान मालकुड वच्ची इंगा वान कोस्काडी तुकडाल शेशी, इंगा अविश्वासी मंदीद आयताद आल्ला वानदी अंत आय्यी. 47मना मालकुनदी इच्छा यरका उंडी या कुल्योड तैयार निलवाड लेकाते वान इच्छा लेका शेयाड वानकी शेंगेम देब्बाल शिक्की. 48पण यवानकी यरका लेकुंड्या आंका वाड देब्बाल तिनेय फनुल शेशीनाड वानकी रव्वा शिक्की. यवारकी शेंगेम इच्चेदेंक वच्चीनाद वान तीकेल शेंगेम आडगेदेंक वच्ची, इंगा यवार देगार शेंगेम फेट्टेदेंक वच्चीनाद वान तीकेल शेंगेम तिस्कुनेदेंक वच्ची.”
शांती लेद फुट
मत्तय 10:34-39
49 “निन पृथ्वी मिंदा आग्गी आंचेदेंक वच्चीनान; आदी जर इयाड नंताक भडकाशीन्टे तर यंता बागा आयतुन्या? 50नाक बाप्तिस्मा तिस्कुनेद उंडाद इंगा याड नंताक आदी काद आड नंताक निन शेंगेम अस्वस्थ उंडान! 51निन पृथ्वी मिंदा शांतता प्रस्थापित शेशेदेंक वच्चीनान, इल्ला मिक वाटास्ताद येम? निन मिक शपतान, लेद, तर फुट केडपेदेंक वच्चीनान. 52इप्पुडनोट वगा इंटल्योन्टोर आयगुरला इद्दार विरुद्ध मुग्गुर इंगा मुग्गुर विरुद्ध इद्दार इल्ला फुट फडी. 53कोडकु विरुद्ध आब्बाड इंगा ‘आब्बान विरुद्ध कोडकु,’ कुतुर विरुद्ध आम्मा इंगा आम्मा विरुद्ध कुतुर, ‘कोडाल विरुद्ध आत्ता इंगा आत्ता विरुद्ध कोडाल’ इल्ला फुट फडी.”#मीखा 7:6.
54वाड मंदी समुदायनी आन्या, यप्पुड पश्चिमे तीकेल मोडाम वच्चेताप्पुड मीर सुस्तार आप्पुड मीर लगेच आंटार की, वाना वच्ची इंगा आल्ले आयताद. 55यप्पुड दक्षिण तीकेल घाली वस्ताद, आप्पुड मीर आंटार घर्मी आय्यी इंगा आल्ले आयताद. 56हे ढोंगी मंदीलाला! मिक पृथ्वी मिंदुडी इंगा मोडामलोनी चिन्हल यरका उंडाय, तर इ काळ बद्दल मीर येनटीक अर्थ तीयार?
57 “मी इचांग येम शिंगार उंडाद दिनदी मिरे येनटीक निर्णय तिस्कुनार? 58नु नी विरोधी जताक न्यायालयकी फोयेताप्पुड दावाताने वान जताक एकी शेय, लेकाते वाड निन्नु न्यायाधीश तीकुड येका फोई इंगा न्यायाधीश निन्नु शिपाईला शेतल्या इच्ची इंगा शिपाईल निन्नु जेलला येशार. 59निन निक शपतान, याड नंताक नु आन्नी दुडलु फिटाय मताव आड नंताक नु आंदुकेल इडाके फोयाव.”
اکنون انتخاب شده:
LUK 12: WNT
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید