Amaokwu Akwụkwọ Nsọ Ndị Ama Ama siteré na Tsutɨarika 1

Kesaa

Mɨpaɨta kaniutayɨni: «Tewi tepɨtawewieni tahepaɨ tiyuxexeiyame tahepaɨ tiyɨkɨhɨaweme. Pɨtiwata'aitɨani ketsɨte haramaratsie miemete, wikixi meta muyuawitsie miemete, yunaime memɨteyutewatsinɨa, yeutari, yunaime memɨka'ukɨniwawe yuhukama memuku'uwa kwiepa». Kakaɨyari tewi kaniutawewieni yuhepaɨ 'anekame, pitawewi 'inɨarieya mayanikɨ yuhepaɨ 'anekame. 'Uki meta 'uka pɨwarutiwewi.

'Aixɨa kaniwaruyurieni mɨpaɨ 'utaitɨ: «Xekeneyuxiɨtɨaka xekeneyɨmɨiriyani, kwiepa xekenehɨneni xeketene'aitani. Xepɨhɨritɨarieni ketsɨte haramaratsie miemete, wikixi yunaime muyuawitsie miemete, yunaime memɨka'ukɨniwawe yuhukama memuku'uwa kwiepa».

Tsutɨapai Kakaɨyari muyuawi meta kwie kaniutawewieni.

Kwie puyuxamuriekai meta pakumawekai, hapa 'ameukateewa yɨriya penukanakai. Kakaɨyari 'iyarieya haa heima pɨyeyeikakai.

Hikɨ Kakaɨyari mɨpaɨ kaniutayɨni: «Hekɨariya ke'uneni». 'Ana hekɨariya kaniuneni.

Kakaɨyari naime katiniuxeiya tita mɨtiutiwewi. «'Aixɨa pɨ'ane», kaniutayɨni. Hikɨ kaniukuyɨre, ximerita kanayani, 'ataxewirieka tukari kanayani.

Kakaɨyari hekɨariya 'aixɨa katiniuxeiya, 'ana yɨriyatsata kanipata.

Mɨpaɨta katiniwarutahɨawe: «Ne nepɨxeyetuiri kwiepa mieme 'iteɨrite, naime 'iteɨrite yuhatsiyari hexeiyakame, naime 'iteɨrite yutakari yuhatsiyari hexeiyakame. Mɨkɨ naitɨ xe'ikwai pɨrayani.

Hekɨariya «tukari» katiniuterɨwa, yɨriyata «tɨkari». Hikɨ kaniukɨyɨre, ximerita kanayani, mexɨakame tukari kanayani.

Kakaɨyari mɨpaɨ kaniutayɨni: «'Amakuyewa ke'uneni haa hixɨapa ke'ipata haa taheima mieme meta kwiepa mieme».

Tupiriya nepɨxeyetuirieni, xe'ikwai mayanikɨ, yunaitɨ yeutari kwiepa memɨtexuawe, yunaitɨ wikixi muyuawitsie miemete yunaitɨ memeumaketɨka kwiepa». Kemutayɨ mɨpaɨ pɨtiuyɨ.

Kakaɨyari mɨpaɨta kaniutayɨni: «Meke'utixuawere muyuawitsie hekɨariwiwamete, meke'ipata tukari tɨkari, mɨkɨ 'inɨari meke'akɨne taxarita, witarita, 'ahurakaku, xexerixa, tukari meta wiyari, 'inɨariyari meke'akɨne.

Hikɨta Kakaɨyari mɨpaɨ kaniutayɨni: «Ketiutineni kwiepa, ke'utineni tupiriyate yuhatsiyarite hexeiyatɨ, 'iteɨrite yutakari kehexeiyatɨkani meta yuhatsiyarite. Naitɨ xexuitɨ kemɨtiupitɨarie». Mɨpaɨ katiniuyɨni.

Mɨpaɨ katiniuyɨni. Kakaɨyari 'amakuyewa kaniutawewieni, mipataxɨanikɨ haa, tahetɨa mɨtamakakɨ, taheimata muyemakakɨ.

'Ana katiniutineni naitɨ, tupiriyate yuhatsiyari hexeiyatɨ, kɨyexi yu'ikwaxi yuhatsiyari hexeiyatɨ kanayani, naitɨ kemɨtiupitɨarie. Kakaɨyari mɨkɨ 'aixɨa katiniuxeiya.

Kakaɨyari hutame mamariwaweme hekɨariwiwamete kaniutiwewieni, xeime 'anekame tau tukarikɨ mieme, xeimeta yakɨ tixawatɨme metseri tɨkarikɨ mieme, meta xurawetsixi tɨkarikɨ miemete.

Hikɨ Kakaɨyari mɨpaɨ kaniutayɨni: «Haa muyuawitɨa mɨtama ke'uyukuxeɨrieni 'axeikɨa, 'uwakitɨ ke'ayani». Kemutayɨ mɨpaɨ pɨtiɨyɨ. Muwaki «kwie» Kakaɨyari katiniterɨwa, haa muyukuxeɨri «haramara» katiniterɨwa. 'Ixeiyatɨ Kakaɨyari «'Aixɨa pɨ'ane», kaniutayɨni.

'Aixɨa kaniwaruyurieni mɨpaɨ 'utaitɨ: «Xekeneyuxiɨtɨaka xekeneyumɨiriyani, xekenehɨneni haapa haramaratsie. Wikixi meta xekeneyɨmɨiriyani kwiepa».

Kakaɨyari mɨpaɨ kaniutayɨni: «Xekeneyɨmɨiriyani kwiepa yunaitɨ xemayeyuyurini, yunaitɨ memɨteyutewatsinɨa, yeutari meta, yuhukama memuku'uwa kwiepa, yunaime kememɨteheupaɨme». Mɨpaɨ pɨtiuyɨ.

Mɨpaɨ kaniutayɨni Kakaɨyari: «Yumɨiretɨ haapa meketeye'uwani, meketeheɨwɨtɨkani wikixi kwie heima muyuawi kemɨyewa».

Kakaɨyari yunaime katiniwarunetɨani memɨteyutewatsinɨa, yeutari, yunaime yuhukama memɨteku'uwa, yunaime kemɨtiwarupitɨa. Kakaɨyari mɨpaɨ kaniutayɨni: «'Aixɨa pɨ'ane».