THILSIEMBUL 18
18
Abraham Chapa Piek Tiemna
1Abraham chuh sun nisat lai taka puon-In kawtkhaka a chut lai in, Lalpa chuh Mamre gangpi thingbul achun a kawmah ahung kilak ta a.
2Chun, a vak dâk dawk leh, ngaitie, mi thum a masanga ding chuh a vak mu a; chun, a muh phet chun puon-In kawtkhak apat amau haw tuok ding chun kintakin a tai phei a; leituol a bawkkhup in chibai a bûk a.#Heb 13.2
3A kawmah, “Hepu, nei lungsiet theih chun, lungsiet takin na suok hih ei chiehpel hiel ki’n” a ti a. 4Tui tawmchah hun chawih sak u hen la, na keng uh sil unla, thingbul nuoi ahin kichawl tadih unla, 5Chun, chângthâk tawmchah bêk va la’ng ka ting, na lunggil uh suhalh unla, zie zawh chuleh chieh zawm zel na’n lau; zie dinga chuh, na suokpau kawma hi hung na hiu hi, a ti a. Chun, amau chun, Na gen guol chun va hih ta leh, a tiu a. 6Tichun, Abraham chuh puon-In sunga Sarah kawm achun kin takin ava lut vaka, “Changbuong nêl hawih tak kha tehna dim thum teh inla, mêk inla, chângthâk siem in” a ti a. 7Chun, Abraham chuh bâwng In lam ah a tai a, bâwngno tuoi hawih tak, zawl hiuhieu ahun kai a, a suokte kawm achun kintaka hun huon dingin a sawl a. 8Chun, bâwngnawi khalte, bâwngnawite leh a bâwngno sa huon u chuh a la a, a masang u ah a luihsak ta a. Thing nuoi achun a kieng uh ah a ding zinga; tichun, amau chun a ne tau hi.
9Chun, amau chun a kawmah, “Na zi Sarah khawitak ah a um hi? a tiu a. Amah chun, zie a puon-In akhun a um hi” a ti a. 10Amah chun a kawmah, “Kum kit tuphat hileh na kawmah hungkit tei ing ka ting; chun ngaiin, na zi Sarah hin chapa nei ina” a ti a. A nunga puon-In kawtkhak apat chun Sarah chun ana za a.#Rom 9.9 11Chun, Abraham leh Sarah chuh upa tak leh têk tak ahi tau a; numei dân ngeina chuh Sarah achun a um ta puoh a. 12Tichun, Sarah chun, “teksie ka hih nung in chapa ka nei na die aw! ka lalpa hila a têk ten ta a,” ti’n a lungthim gûkin a nui a.#1 Pet 3.6 13Chun, Lalpa chun Abraham kawmah, “Bang zieka Sarah hin kei teksie hin chapa ka hing tak tak na die aw ti a gûk nuih ahi? 14Lalpa a dingin thil bangkim a haksa taluo a um a ahim? Hun tiem ahung tun phat chuleh na kawmah hungkit ing ka ting, chun Sara’n chapa nei ina” a ti a.#Luk 1.37 15Ziephet chun, Sarah chun, “Ka nui puoi,” ti’n a kilep a; a lau ngâla. Amah chun, awihloh hiel ding, na nui ngêi khala, a ti a.
Abraham in Sodom a Ngetsakna
16Chun, zie mite chuh a kipan dawk u a; Sodom khuo lam chuh a en u a; chun Abraham chuh amau haw thadawk dingin a kipan dawka. 17Chun, Lalpa chun, “Ka thilhih guot hih Abraham kawmah ka îm die aw! 18Abraham hi nam lopi tak leh thilhih thei tak hung hiding ahi a, amah achun khawvel a namtin vangsaka hung um ding ahi ngâl u a. 19Lalpa lampi a hawh theih na ding u leh a nung u a a chate leh a inkuonpih teu thil dik hih ding leh diktaka vaihawm ding leh kitûp taka hih dinga thu a piek theih na dingin amah chuh ka guot ta ngâla. Khutichun, a chungchâng thu Lalpa’n a gen chuh Abraham chunga a tunsak theih na dingin,” a ti a. 20Tichun, Lalpa chun, “Sodom leh Gomorra kiko thawm chuh anasa a, a gitlohnau chuh a huoisie mah mah a, 21Tuhin va chieh suk ing ka ting a kiko thawm uh ka kawm hungtung bang taka ahih u leh a hihloh uh en ing ka ting, a hihloh u le chuh he mai ing ka” a ti a.
22Tichun, mite chuh zie apat chun a kihei u a, Sodom khuo lam chuh a zuon tau a; Abraham vang chuh Lalpa ma achun a ding zinga. 23Chun, Abraham chun ava naih a, “Mi diktatte chuh migilote tawh sumangthai khawm mai ding na him? 24Khaw sung achun mi diktat sawmnga bêk um ta henla hileh, khaw sung a mi diktat sawmnga umte zal chun khuo chuh hawilo in na sumangthai tho dinga ahim? 25Nang hielin khutibang chun mi diktatte chuh migilo banga a umna dingun, mi gilote tawh suklup khawm hiel chuh hih guo sam puo’n na tin; leichung cheng chenga vaihawmpa chun diktak in hih lo ding na him?” a ti a.
26Chun, Lalpa chun, “Sodom khuo sung ah mi diktat sawmnga tieng le ka muh chun, amau haw zal chun khuo pumpi chuh hâwi ing ka,” a ti a.
27“Ngaiin, kei leivui leh meivam mai hin Lalpa chuh ka hun hopih phawlawk ta a, 28Mi diktat chuh nga’n sawmnga a ting lo maithei a; nga a tin loh ziek chun khuo pumpi chuh na sumangthai dinga ahim?” ti’n a dâwng a. Amah chun, “Zie tak achun sawmli leh nga mai ka muh lele sumang puo’ng ka,” a ti a. 29Chun, amah chun a hopih kita, “Zie tak achun sawmli mai mu ta leh chin la,” a ti a Chun, amah chun, “Sawmlite ziek chun le sumang puo’ng ka” a ti a. 30Chun, amah chun, Aw Lalpa lungna ki’n la, vak gen kit dîng ka: zie tak achun sawm thum mai um ta le la? a ti a. Chun, Amah chun, “Zie taka chuh sawmthum tieng le ka muh chun sumangthai puo’ng ka” a ti a. 31Chun, amah chun, ngaitie Lalpa chuh ka hun hopih laklawh ta a, zie tak achun sawmnih mai na mu kha mawh die, a ti a. 32Amah chun, “Aw Lalpa lungna hiel ki’n la, khatvei hun gen kit ing ka; zie tak achun sawmkhat mai na mu kha mawh die” a ti a. Amah chun, “Sawmte ziek chun le sumangthai puo’ng ka” a ti a. 33Tichun, Lalpa chuh Abraham tawh a kiho zawh u chun a chieh ta a, Abraham chuh amah umna mun lam ah a vaikit tai.
Nke Ahọpụtara Ugbu A:
THILSIEMBUL 18: GANGBSI
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.