THILSIEMBUL 21
21
Isak Pien Thu
1Chun, Lalpa’n a gensa guol khan Sarah chuh a va veh a, Lalpa chun a gensa guolin Sarah chungah a hih ta a. 2Tichun, Sarah chun nau a vawp a, Pathien in a kawma hun a tiem hun tak chun Abraham chuh a têk nung in chapa a hinsak ta a.#Heb 11.11 3Chun, Abraham in a chapa, Sara’n a hinsak min ding chun Isak a sa ta a. 4Chun, Abraham chun, Pathien in a kawma thu a piek bang ngêi in, a chapa Isak chuh a ni giet ni chun zek a tan sak tai.#Tsb 17.12; Nas 7.8 5Chun, a chapa Isak a pien lai chun Abraham chuh kum za mi ahi tai. 6Chun, Sarah chun “Pathien in ei nuih sak tai, mitin a he taphawt in ei nuih pih in au,” a ti a. 7Amah mah in, “Sara’n nausen hun pawm ina tih kuo a Abraham kawma gen ngaihna he ding? A têk nung hin chapa ka hinsak ta hi,” a ti a. 8Tichun, nausen chuh a hung khanglien a, a nawichep a haihsak tau a; Isak chuh a nawichep a haih ni chun Abraham in guolvakna lopitak a siem a.
Hagar leh Ishmael Sawlmang na
9Chun, Aigupta mi Hagar chapa, Abraham dinga a hinsak chun a nuihsan lai tak Sarah chun a mu a. 10Zieziekchun Abraham kawm achun, “Zie suoknu leh a chapa hi nawhdawk ah; suoknu chapa hin ka chapa Isak go luohpih thei puo’n a,” a ti a.#Gal 4.29-30 11Zie thu chun Abraham a sulungkham a, a ziek chuh Ishmael chu le a chapa a hih ziekin. 12Himahlele, Pathien in Abraham kawmah, “Naupang chungchâng leh na suoknu chungchâng thu hi nang ngaih in thil phalo tak hi kihen; Sara’n na kawma a gen cheng chuh zawp mai in; Isak ahin na suonte hun ti ding ahi ngâl u a.#Rom 9.7; Heb 11.18 13Suoknu chapa hile nang suon ahih ziekin, chi a gen kham zet hung pawt ina,” a ti a.
14Tichun, Abraham chuh zingkal matak in a tho a, chângthâk leh tui-ûm tuia dim in a la a, Hagar a pie a, a liengko ah a tunsak a, naupang chu tawh a sawlmang ta a; tichun a chieh a, Beer-sheba gamgaw ah a vak, a vak ta a. 15Chun, tui-ûm a tui chuh a hung bei ta a, tichun naupang chuh hambawk lak mun khat achun a kawih ta a. 16“Naupang thi ding chuh ka en ngam puoi,” a tih ziekin thal kap phâk vel ding tieng achun a va chu ta a, ngeih tak in a kap ta a.
17Chun, Pathien in naupang aw chuh a za a; Pathien vânsâwlchâk in van apat in Hagar chuh a vak sama, a kawmah, “Hagar, bang na ti a ahi? lau kih, a umna a naupang aw kha Pathien in a za apuo! 18Tho inla, naupang kha kaitho inla, na khut in tu’n; amah chuh nam lopi taka siem ding ka hi,” a ti a. 19Chun, Pathien in a mit a sukvak saka, tuisutdawk a mu ta a; tichun a va chieh a, tui-ûm achun tui a thal dim a, naupang chuh a dâwnsak ta a. 20Chun, Pathien chuh naupang kawm achun a um zel a, a hung khanglien zel a; gamgaw achun a um a; thal kap thiem mi a hung hita a. 21Paran gamgaw achun a um a; a nu chun Aigupta mi zi’n a neihsak tai.
Abraham leh Abimelek Thugawlh
22Zielai chun Abimelek leh a sepaihte lawiupa Phikol chun Abraham kawmah, “Na thil hihna lam cheng achun Pathien na kawmah a um zel sek a.#Tsb 26.26 23Zieziekchun, tuhin Pathien min lo in, kei leh ka chapa leh ka chapa-chapa’n le diklo taka hun bawllo a, ka hun na lungsiet guol khan kei leh na umna gam hih lungsiet thuk zaw diek dingin ka kawmah kipautiem in” ti’n a gen a. 24Chun, Abraham chun, “Kitiem ing ka,” a ti a.
25Abimelek suokte’n tuisutdawk a lâksak ziekun Abraham in Abimelek chuh a hilhgaih a. 26Chun, Abimelek chun, “Zie thil hihpa chuh kuo ahih ka he hiel puoi: nangin la nei hilh puoh ngâla, tuni tih loh chun ka na he kha hiel puoi,” a ti a. 27Tichun, Abraham chun belamte leh bâwngchalte a kai a, Abimelek chuh a pie a; chun a nih u chun thugawlh a siem tau hi. 28Abraham in a belam hawn lak a belamno anu sagih a kawihchuom a, 29Chun, Abimelek chun Abraham kawmah, “Belamno anu sagih a chuom a na kawih dawk hi bangti dân a?” a ti a.
30Abraham chun, “Zie tuisutdawk hi ken ka laih ngêi ahi tih nei hetpihna dinga zie belamno a nu sagih hi ka khut apat na lak ding ahi,” ti’n a dâwng a. 31Zieziekchun zie mun chuh Beer-sheba a sa a; zie taka chuh a nih u a a kipautiem ziek un.
32Khutichun Beer-sheba achun thugawlh a bawl tau a: Abimelek leh a sepaihte lawiupa Phikol chuh Philistia te gam achun a chieh kit tau hi.
33Chun, Abraham in Beer-sheba achun châk thing a phut a, zie tak achun Lalpa kumkhuo a Pathien min chuh a lo ta a. 34Tichun, Abraham chuh Philistia te gam achun sawttak a um hi.
Nke Ahọpụtara Ugbu A:
THILSIEMBUL 21: GANGBSI
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.