THILSIEMBUL 32
32
Esau tawh Jakob Kimuhtuohna
1Chun, Jakob chuh a chieh zel a, chun Pathien vânsâwlchâkte’n a na kituokpih u a. 2Jakob in amau chuh a muh in, “Ziehaw hi Pathien sepaihte ahiu hi,” a ti a: tichun zie mun min ding chun Mahanaim#Mahanaim. = Hebrai pau ahi a, amin umzie hi, “giehphuol nih” tihna ahi. a sa a. 3Chun, Jakob chun Edom gam lama a u Esau kawm achun thangko a sawl masa a. 4A kawm u ah, “Ka lalpa Esau kawm achun hiti ahi na gen dinguh ahi, ‘Na suokpa Jakob in hiti hin a gen a: Laban kawm achun malzin ka hi a, tuchan hin ka va um zing a; 5bâwngchal haw, sabiltung leh belam haw, suoknu leh suokpa haw le ka nei a; tichun na mittung ka hih theih na dingin ka lalpa hilh dinga mi ka hun sawl ahi,’ a tii,” ti’n amau chu thu a pie a.
6Chun, thangko haw chuh Jakob kawmah a hungkit u a, “Na u Esau kawm ka va tung u a, mi zali hun pui in nang tuok dingin a hung bawn hi,” ti’n a gen u a.
7Khutichun, Jakob chuh a lau mah mah ta a, a lung a dawng a: tichun a kawma mi um haw, belam hawn haw, bâwng hawnhaw, sangawngsau haw chuh hawn nih a suoh a, 8“Esau chuh lawikhat te kawm a hungtun a, a thah chun, lawikhat um nalaite chuh a taihmang theihna dingun,” a tih ahi.
9Chun, Jakob chuh a paucham a, “Aw, ka pu Abraham Pathien, ka pa Isak Pathien, Aw Lalpa, ‘Na gam lam leh na inkawte kawmah chieh kit ta’n, tichun hun bawlpha’ng ka,’ ei tipa, 10na suok chunga lungsietna chengcheng na suklat leh thutak chengcheng na suklat haw lak ahin a neupen le mu tâk ka hi puoi; zie Jordan lui hi ka mawlh mai tawh ka kân a; tuhin vang lawinih hiel ka hung hi tau hi. 11Lungsiet takin ka u khut apat, Esau khut apat ngêi hin, ei hukdawk in: numei leh naupanghaw puma ei thah ding ka lau ngâl a. 12Nangin, ‘Hun bawlpha ngêi ngêi ing ka ting, na suonte chuh tuisuohgiet a pîlnel simsenloh khawp hiela a tam guolin hun siem ing ka,’ na ti a,” a ti a.#Tsb 22.17
13Zie zan chun zie tak achun a giek ta a; a thil neih haw lak ah a u Esau dinga kipahman dingin a kawihchuom a: 14kelpi zanih leh kel chal sawmnih, belampi zanih leh belamchal sawmnih, 15sangawngsau nawi thawklai sawmthum, a no haw tawh, bâwngpi sawmli leh bâwngchal sawm, sabiltungpi sawmnih leh sabiltungno sawm ahiu hi. 16Ziehaw chuh a chuom chietin a suokte khut ah a kawlsak a; a suokte kawm achun, “Ka ma ah chieh unla, lawi tin hi kikal neihsak zel u,” a ti a. 17Chun, a masa pa kawm achun, “Ka u Esau in a hun kituokpih a, ‘Kuo mi na him? Khawia chieh ding na him? na masanga um haw hi kuo a ahim?’ ti a a hun dawt tak leh, 18Na suok Jakob a ahi; ka pu Esau, nang dinga kipahman a a hun thak ahi; amah le ka nung u akhun a hung hi, tiu in,” ti’n thu a pie a. 19Chun, a bân a leh a bân kit a leh, ganhawn pute chengcheng kawm ale, “Esau na muh tak u leh khuti bangmah a chuh na gen dinguh ahi; 20‘Ngaiin, na suok Jakob chuh ka nung u akhun a um hi,’ tiu in,” ti’n thu a pie chiet a. “Kipahman ka ma a a chieh chun a lung sudam ing ka ting, zie nung chuleh a mel mu’ng ka; tichun ei na lawp kha mawh die,” a tih ahi. 21Khutichun kipahman chuh a masangah a thak masa a, zie zan chun a lawite lak achun a giek ta a.
Peniel ah Jakob in Mi a Buon hi
22Zie zan mah chun a tho a, a zite nih leh, a suoknute nih leh, a cha sawmlekhatte chuh a pui a, Jabok lui kaihmun achun galkai tau a. 23Tichun amau chuh a pui a, lui chuh a galkaih sak a, a neih chengcheng u le a thak kai a. 24Chun, Jakob chuh amah mai in a um ta a; tichun, mi khatin amah chuh phalvak chanin a buon a buon zieng ta a. 25Chun, a zo puoi tih a kihet phetin a malpi guh kisuktuohna chuh a khawihsak a, tichun a buon lai chun Jakob malpi guh kisuktuohna chuh a hung kipel ta a. 26Chun, amah chun, “Ei thah ah, phalvak hi ding ahi tai,” a ti a. Jakob chun, “Nei vangsak loh leh hun thah puo’ng ka,” a ti a. 27Chun, amah chun a kawmah, “Na min bang ahi?” a ti a. Amah chun, “Jakob,” a ti a. 28Amah chun, “Na min chuh Jakob hita puo’n tin, Israel#Israel-Hebrai pau in a umzie chuh, “Pathien a buon hi,” tih na a hizaw ta’n a; Pathien leh mihing na suol a, na zo ta ngâl a,” a ti a.#Tsb 35.10 29Chun, Jakob in amah chuh a dâwng a, “Lungsiet takin na min ei hilh in,” a ti a. Amah chun, “Bang zieka ka min nei dawt ahi?” a ti a. Chun, zie tak achun a vangsak ta a.
30Tichun, Jakob in zie mun min ding chun Peniel#Peniel-Hebrai pau ahi a Pathien mâi” tih na ahi. a sa a; “Pathien chuh kimaichangtuoh in ka mu a, ka hinna hi hawih ahi ngâl a,” a tih ziek ahi. 31Chun, Peniel a khel phet chun ni a hung suok a, amah chuh a hun khawh a, a malpi ziek chun a kibai ta a. 32Zieziekchun tuni chan hin Israel suonte chun malpi guh kisuktuohna a kâwng a thagui hi a ne ngei puou hi: Jakob malpi guh kisuktuohna a a khelpi tha khawihsak ahih ziekin.
Nke Ahọpụtara Ugbu A:
THILSIEMBUL 32: GANGBSI
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.