THILSIEMBUL 5
5
Adam Suonte
(1 Kh 1.1-4)
1Ziehi Adam suonte chuonna lehkhabu chuh ahi. Pathien in mihiem a siem ni khan amah batna nei in a siem a; 2Amau chuh pasal leh numei in a siem a; vang a pie a, siem ahih niu ngêi khan a min dingun “Mihing” ana sa tai.#Mat 19.4; Mrk 10.6 3Chun, Adam chuh kum za leh sawmthum ahih in amah mel leh amah lim bang pu chapa a nei a; a min dingin Seth a sa a. 4Seth a neih nung in Adam chuh kum zagiet a dam a: chanu leh chapate a hing kit hi. 5Tichun, Adam damsung chengcheng chuh kum zakuo leh sawmthum ahi a; chun, a thi ta a.
6Seth chuh kum za leh nga a hih in chapa Enos a nei a, 7Chun, Enos a neih nung in Seth chuh kum zagiet leh sagih a dam a, chanu leh chapate a hing kit a. 8Tichun Seth damsung cheng chuh kum zakuo leh sawmlenih ahi a, chun, a thi ta a. 9Chun, Enos chuh kum sawmkuo a hih in chapa Kenan a hing a: 10Kenan a neih nung chun Enos chuh kum zagiet leh sawmlenga a dam a, chanu leh chapate a hing kit a; 11tichun Enos damsung cheng chuh kum zakuo leh nga ahi a, chun, a thi ta a; 12Chun, Kenan in kum sawmsagih a hih in chapa Mahalalel a hing a. 13Mahalalel a neih nung in Kenan chuh kum zagiet leh sawmli a dam a, chanu leh chapate a hing kita. 14Tichun Kenan damsung cheng chuh kum zakuo leh sawm ahi a, chun, a thi ta a.
15Chun, Mahalalel chuh kum sawmgup leh nga a hihin, chapa Jared a hing a, 16Jared a neih nung in Mahalalel chuh kum zagiet leh sawmthum a dam a, chanu leh chapate le a hing kit a, 17Tichun Mahalalel damsung cheng chuh kum zagiet leh sawmkuo leh nga ahi a, chun, a thi ta a.
18Chun, Jared in kum za leh sawmgup le nih a hihin, chapa Enok a hing a, 19Enok a neih nung in Jared chuh kum zagiet a dam a, chanu leh chapate le a hing kit a, 20Tichun Jared damsung cheng chuh kum zakuo leh sawmgup le nih ahi a, chun, a thi ta a. 21Chun, Enok in kum sawmgup leh nga a hihin, chapa Mathusel a hinga: 22Mathusel a neih nung in Enok chuh kum zathum sung chuh Pathien tawh a kivawp zing u a, chanu leh chapate le a hing kit a: 23Tichun Enok damsung cheng chuh kum zathum leh sawmgup leh nga ahi: 24Enok chuh Pathien tawh a kivawp zing sek u a: chun, Pathien in a lamang a, a um ta puoh a.#Heb 11.5; Jud 14
25Chun, Mathusel chuh kum za leh sawmgiet leh sagih ahih in, chapa Lamek a hing a; 26Lamek a neih nung in Mathusel chuh kum zasagih leh sawmgiet leh nih a dam a, chanu leh chapate le a hing kit a: 27Tichun Mathusel damsung cheng chuh kum zakuo leh sawmgup leh kuo ahi a: chun, a thi ta a.
28Chun, Lamek in kum za leh sawmgiet leh nih a hih in, chapa a hing a: 29Zie ngêi hin Lalpa hansie lawh lei a I nasepnau leh khut a I sepgimnau ahin ei thamuon tan a, ti’n a min dingin Noah a sa a. 30Noah a neih nung in Lamek chuh kum zanga leh sawmkuo leh nga a dam a, chanu leh chapate a hing kit a: 31Chun, Lamek damsung cheng chuh kum zasagih leh sawmsagih leh sagih ahi a, chun, a thi ta a. 32Noah chuh kum zanga mi ahi a, amah chun chapa thum, Shem, Ham leh Japheth a hing hi.
Nke Ahọpụtara Ugbu A:
THILSIEMBUL 5: GANGBSI
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.