Mātiu 15
15
Ko e Tukufakaholo ‘a e Kau Mātu‘á
(Ma‘ake 7:1-13)
1Pea na‘e toki omi mei Selusalema ha kau Fālesi mo ha kau faiako ʻo e Lao ‘a Mōsesé kia Si̇̄sū ‘o nau ‘eke ange, 2‟Ko e hā ‘oku talangata‘a ai ho‘o kau akó ki he akonaki kuo tukufakaholo mai mei heʻetau ngaahi kui̇́? He ʻoku ‘ikai te nau tomu‘a fanofano pea toki kai!”
3Pea tali ‘e Si̇̄sū, ‟He ko e hā ‘oku mou talangata‘a ai kimoutolu ki he fekau ‘a e ‘Otuá, ka mou angimui ki ho‘omou ngaahi tala tukufakaholó? 4He ko e folofola ʻa e ‘Otuá, ‛Faka‘apa‘apa ki ho‘o tamai̇́, mo ho‘o fa‘eé. Pea ʻilonga ‘a ia ‘oku lea kovi ki heʻene tamai̇́ pē ko ‘ene fa‘eé, ‘e tautea mate ia.’ 5Ka ‘oku mou pehē ‘ekimoutolu, ‘ʻilonga ha taha ‘oku ‘i ai ha‘ane me‘a ke ne tokoni‘i ʻaki ʻene tamai̇́ pē ko ʻene fa‘eé, kapau te ne pehē ‘e ia, ‛Ko e me‘a na‘á mo mei ma‘u meiate aú, kuo foaki ia ma‘a e ‘Otuá; 6Pea ko ia ‘e tuku ʻene tamai̇́ mo ʻene fa‘eé kae ‘ave ʻa e me‘á ia ma‘a e ‘Otuá.’ Ko e founga ia ‘oku mou faka‘ikai‘i ʻaki ʻa e folofola ʻa e ‘Otuá, ka mou angimui kimoutolu ki ho‘omou tala tukufakaholó. 7ʻA e kau mālualoi! ‘Oku mo‘oni ʻa e lau ʻa e palōfita ko ʻAisea, heʻene palōfisai fekauʻaki mo kimoutolu; 8‟Ko e kakai ni,
‘Oku nau faka‘apa‘apa kiate au,
ʻaki pē honau mu‘a ngutú,
ka ‘oku mama‘o ʻaupito honau lotó.
9Ko e koto taʻeʻaonga pē ‘enau lotu kiate aú,
he ‘oku nau akonaki ʻaki,
ʻa e ngaahi tuʻutuʻuni fakaetangata pē,
ka nau tala ko ‘eku ngaahi tuʻutuʻuni ia!”
Ko e Ngaahi Me‘a ‘Oku ʻUli ai ha Taha
(Ma‘ake 7:14-23)
10Pea toki ui ‘e Si̇̄sū ʻa e kakai̇́ ke nau ʻunuʻunu mai, pea naʻe talaange kiate kinautolu, ‟Mou fanongo mai ʻo ʻai ke mahino ʻa e meʻa ni. 11‘Oku ‘ikai ko e me‘a ‘oku hū ki loto he ngutú ‘oku ʻuli ai ha tahá, ka ko e me‘a ‘oku hū mai mei hono ngutú ‘oku ʻuli ai̇́.”
12Pea omi kia Si̇̄sū ‘ene kau akó ‘o nau talaange, ‟‘Okú ke mea‘i na‘e lavea ‘a e loto ‘o e kau Fālesi̇́ ‘i ho‘o lau na‘e fai̇́?”
13Ka naʻe talaange ‘e Si̇̄sū, ‟Ko e ‘ʻakau kotoa na‘e ‘ikai ke tō ‘e he‘eku Tamai fakalangi̇́, ‘e ta‘aki ia. 14‘Oua te mou hoha‘a ki he kau Fālesi̇́. Ko e kau taki kinautolu ‘oku kui. Ka taki ‘e ha kui ha kui, pea te na fakatou tō ‘i ha luo.”
15Pea talaange ‘e Pita kia Si̇̄sū, ‟Fakamatala mai mu‘a ‘a e talanoa fakatātaá ni kiate kimautolu.”
16Pea tali ‘a Si̇̄sū ki ai, ‟He ‘oku pehē fau hoʻomou taʻemahinó? 17Kuo teʻeki koā ke mahino kiate kimoutolu: ʻIlonga ha me‘a ‘oku hū ki loto he ngutú, ‘oku ‘alu hifo ia ki he keté, pea toki hū ki tu‘a mei he sinó. 18Ka ko e ngaahi me‘a ‘oku ‘alu ki tu‘a mei he ngutú, ‘oku ‘alu hake ia mei he lotó. Ko e ngaahi me‘a ia ‘oku ʻuli ai ha taha. 19He ‘oku fou mei he lotó ʻa e ngaahi fakakaukau kovi ‘oku iku ki he tāmate, mo e tono, mo e fe‘auaki, mo e kaiha‘a, mo e fakamoʻoni loi, mo e lauʻikoviʻi. 20Ko e ngaahi me‘a ia ‘oku ʻuli ai ha taha. Ka ko e kai teʻeki ke fanofanó, ‘oku ‘ikai ke ʻuli ai ha taha.”
Ko e Tui ‘a ha Fefine
(Ma‘ake 7:24-30)
21Pea ‘alu ‘a Si̇̄sū mei he feitu‘u ko iá ‘o a‘u ki he kauʻāfonua ‘oku ofi ki he ongo kolo ko Taia mo Saitoni̇́. 22Pea ko eni, na‘e nofo ai ha fefine Kēnani. Pea kalanga mai ia kia Si̇̄sū, ‟‘Eiki ē, Hako ‘o Tēvita, ke ke ‘alo‘ofa mai mu‘a kiate au! Ko si‘eku tama fefiné, kuo ma‘u ia ‘e ha tēvolo, pea ‘oku fu‘u faingata‘ā‘ia lahi.” 23Kae fakalongolongo pē ‘a Si̇̄sū.
Pea omi kia Si̇̄sū ‘ene kau akó ‘o nau kole ange, ‟Fekau mu‘a ʻa e fefiné ni ke ‘alu, he ‘oku fakahoha‘a ‘ene muimui ‘iate kitautolú mo ʻene tangi̇́!”
24Kae talaange ‘e Si̇̄sū, ‟Kuo fekau mai pē au ke u ‘alu ki he fanga sipi kuo mole mei he fale ‘o ‘Isileli̇́!”
25Pea ha‘u ʻa e fefiné ‘o tūʻulutui atu ki he vaʻe ‘o Si̇̄suú pea naʻe pehē ange, ‟ʻEiki, tokoni mai mu‘a, kiate au.”
26Ka naʻe talaange ‘e Si̇̄sū, ‟‘Oku ‘ikai taau ke toʻo e mā ‘a e fānaú ‘o laku ki he fanga kulii̇́.”
27Pea tali ʻe he fefiné, ‟ʻIo ʻEiki, ʻoku mo‘oni, ka na‘á mo e fanga kulii̇́ ‘oku nau kai pē foki he momo ‘oku ngangana mei he tēpile ‘a honau ‘eiki̇́.”
28Pea pehē ange ‘e Si̇̄sū ki he fefiné, ‟Fefine, tā ʻoku lahi pē hoʻo tui̇́! Ko e me‘a ‘okú ke kole mai̇́, ‘e fai ia ma‘au.” Pea naʻe moʻui leva ʻene ta‘ahiné mei he taimi ko iá.
Ko e Fakamo‘ui ‘e Si̇̄sū ha Tokolahi
29Pea ‘alu atu ‘a Si̇̄sū mei ai ki he veʻe Tahi Kāleli̇́, pea naʻe ‘alu hake ki ha tafa moʻunga, ‘o taʻutu hifo ai. 30Pea omi ʻa e fuʻu kakai tokolahi mo ‘enau kau heke, mo e kui, mo e kau toketu, mo e noa mo e kakai na‘e mo‘ua he alanga mahaki kehekehe, ‘o tuku atu kinautolu ki he vaʻé ‘o Sīsuú, pea naʻe fakamo‘ui kinautolu.
31Pea ofoofo ai ʻa e kakai̇́ he‘enau sio ki he lea ‘a e kakai na‘e noá, mo e ‘alu lelei ʻa e kau toketú, mo e kau heké, mo e ʻā ‘a e faʻahinga naʻe kui̇́: pea nau fakamālō‘ia ‘a e ‘Otua ‘o ‘Isileli̇́.
Ko e Fafanga ‘e Si̇̄sū ‘a e Toko Fā Afe
(Ma‘ake 8:1-10)
32Pea ui mai ‘e Si̇̄sū ‘ene kau akó, ‘o ne talaange, ‟‘Oku ou fu‘u tokanga ki he kakai̇́ ni; he kuo ‘osi ʻa e ‘aho ‘e tolu mo e ‘ikai ke nau ma‘u ha me‘atokoni. ‘Oku ou loto ke ‘oange ha me‘a ke nau kai, na‘á faifai ka nau pongia he hala ki ‘api̇́.”
33Pea ‘eke ange ‘e he kau akó, ‟Te tau ma‘u mei fē ha me‘akai feʻunga ‘i he feitu‘u mamaʻó ni ke fafanga ʻaki kātoa ʻa e kakai̇́?”
34Pea toe fehu‘i ange ‘e Si̇̄sū kiate kinautolu, ‟Ko ho‘omou fo‘i mā ‘e fiha ‘oku ma‘ú?”
Pea nau talaange, ‟Ko e fo‘i mā pē ‘e fitu, mo ha fanga ki‘i mata‘iika.” 35Pea fekau ‘e Si̇̄sū ʻa e kakai̇́ ke nau tangutu ki lalo. 36Pea naʻe toʻo e fo‘i mā ‘e fitú mo e mata‘i iká, ‘o fai ʻene fakafeta‘i ki he ‘Otuá, pea naʻe toki pakipaki ia ‘o ‘atu ki he kau akó ke nau tufaki ki he kakai̇́. 37Pea nau kai kotoa ai ‘o mākona.
Pea toki hanga ‘e he kau akó ‘o tānaki e toetoenga me‘akai̇́, ‘o fonu ai ʻa e kato lalahi ‘e fitu.
38Ko e tokolahi ‘o e kakai na‘e fafangá, ko e toko fā afe nai, tukukehe ʻa e kakai fefiné mo e fānaú.
39Pea tuku ange leva ‘e Si̇̄sū ‘a e kakai̇́ ke nau ō, pea naʻe toki heka vaka ‘o folau atu ki he feitu‘u Makatani̇́.
Nke Ahọpụtara Ugbu A:
Mātiu 15: TCNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Tongan Contemporary New Testament © Bible Society of the South Pacific, 2011.