Mātiu 21
21
Ko e Hāʻele faka-Tuʻi ʻa Si̇̄sū ki Selusalemá
(Ma‘ake 11:1-11; Luke 19:28-38; Sione 12:12-19)
1Pea ʻi he fakaofiofi atu ‘a Si̇̄sū mo ʻene kau akó ki Selusalemá, ‘o nau aʻu ki Pētefesi ‘i he Moʻunga ko ‘Ōlivé. Pea fekau atu ‘e Si̇̄sū ʻa e toko ua heʻene kau akó; 2ʻO ne folofola kiate kinaua, ‟Mo ō ki he ki‘i kolo ko ena ‘oku hanga mai̇́, pea te mo sio ai ki ha ‘asi ‘oku nono‘o, mo hano kiʻi ʻuhiki. Mo vete ia ‘o taki mai kiate au. 3Pea ka ‘i ai ha taha ‘e fakalea atu, pea mo talaange, ‘Oku fiema‘u kinaua ‘e he ‘Eiki̇́. Pea te ne toe fakafoki vave mai.” 4Pea ʻe fakamo‘oni ai ʻa e lau ʻa e palōfitá, ʻo pehē:
5‟Mou fanongonongo ki he taʻahine ko Saioné, ‛Ko eni, ko homou tu‘i̇́ ʻena ‘oku hā‘ele mai.
Ko e tu‘i angakātaki ia.
Pea ‘oku heka mai ʻi ha kiʻi ‘asi,
Ko e ʻuhiki ʻo ha ʻasi toho palau.’”
6Pea ō ʻa e ongo tamá ‘o fai fakatatau ki he fekau ‘a Si̇̄sū. 7Peá na taki mai ʻa e ‘asi̇́ mo hono ʻuhiki̇́ ‘o ‘ai ki ai honau ngaahi pulupulú ke heka ai ‘a Si̇̄sū. 8Pea naʻe folahi foki ‘e ha tokolahi honau pulupulú ʻi he halá, kae hanga ‘e ha ni‘ihi ‘o fesi ha ngaahi vaʻa paame, ‘o falikiliki ʻaki ʻa e halá. 9Pea ko e fu‘u kakai na‘e mu‘omu‘a atu ‘ia Sisuú, mo kinautolu na‘e muimui mai̇́, na‘á nau kaikaila ʻo pehē:
‟Hōsana ki he hako ‘o Tēvitá!
Tauange ke monū‘ia,
‘Akoe ʻoku hoko mai ‘i he huafa ‘o e ‘Eiki̇́!
Hōsana ki he Taupotu ʻo e ngaahi Langi̇́!”
10Pea ʻi he a‘u atu ‘a Si̇̄sū ki Selusalemá, kuo ngaʻuta kātoa ʻa e koló, ‘o nau pehē: ‟Ko hai nai ʻeni?” 11Pea tali ʻe he fu‘u kakai naʻe muimui fononga ‘ia Sīsuú, ʻo pehē, ‟Ko e palōfita ko Sīsū, mei Nāsaleti ‘i Kāleli̇́.”
Ko e Hū ‘a Si̇̄sū ki he Temipalé
(Ma‘ake 11:15-19; Luke 19:45-48; Sione 2:13-22)
12Pea hū atu ‘a Si̇̄sū ki he Temipalé ‘o ne tuli mai ki tu‘a ʻa e kakai na‘e fefakatauʻaki ai̇́, mo ne fulihi ʻa e ngaahi tēpile ʻa e kau fakafetongi pa‘angá, mo e ngaahi nofoʻanga ‘o e kau fakatau lupé. 13Peá ne folofola kiate kinautolu, ‟Kuo tohi ʻi he Tohitapú,” ‟‘E ui hoku falé ko e fale fai‘anga lotu. Ka kuo mou ngaohi ia ko e fakataha‘anga ‘o e kau kaiha‘a!”
14Pea na‘e omi ki he Temipalé, kia Si̇̄sū ha kau kui mo ha kau heke, peá ne fakamo‘ui kinautolu. 15Ka ʻi he mamata ʻa e hou‘eiki taulaʻeiki̇́ mo e kau faiako ʻo e Laó, ki he ngaahi me‘a fakaofo kuo fai ʻe Si̇̄suú, pea mo e kalanga, ‟Hōsana ki he ‘Alo ‘o Tēvitá,” ʻa e fānaú, ʻi he temipalé, pea naʻa nau matalili ai; 16‘O nau pehē ange kiate ia, ‟‘Okú ke fanongo ki he vālau ‘oku nau fai̇́?”
Pea tali atu ‘e Sīsū, ‟ʻIo. Ka kuo teʻeki koā te mou lau ʻa e potu folofola ko eni̇́, ‛Kuó ke fakalea mei he ngutu ‘o e longa‘i fānaú, mo e fanga ki‘i valevalé, ʻa e fakamālō ʻo e ʻAfiona.’”
17Pea mavahe leva ‘a Si̇̄sū meiate kinautolu, ʻo ne ʻalu atu ki he kolo ko Pētani̇́, ‘o mohe ai.
Ko e Talatuki‘i ‘e Si̇̄sū ʻa e Fiki taʻefuá
(Ma‘ake 11:12-14,20-24)
18Pea ʻi he pongipongi haké, naʻe toe foki atu ‘a Si̇̄sū ki he koló. Pea naʻá ne fiekaia. 19Pea ‘iloangē naʻá ne fakatokanga‘i ha fu‘u fiki ‘oku tu‘u he veʻehalá, peá ne afe atu ki ai. Ka na‘e ‘ikai te ne ma‘u ai ha fua, ka ko e laú pē. Peá ne folofola ki he fu‘u fiki̇́, ‟Ke ʻoua naʻa toe ai hao fua ‘oʻou.” Pea mae hifo leva ʻa e fu‘u fiki̇́ ‘o mate.
20Pea ʻi he sio ki ai ʻa e kau akó, naʻa nau ‘ohovale ‘aupito mo nau pehē: ‟Ko e hā kuo vave pehē ai ʻa e mae ʻa e fu‘u fiki̇́?”
21Pea tali ‘e Si̇̄sū, ʻo ne folofola kiate kinautolu, ‟Ko hono mo‘oni̇́ ʻeni ‘oku ou tala atú, kapau te mou tui ‘o ‘ikai ha tālaʻa, pea ‘e ‘ikai ngata ‘i ho‘omou lava ‘o fai ʻa e me‘a na‘á ku fai ki he fu‘u fiki̇́, ka te mou toe lava ‘o lea ki he fu‘u moʻunga ko eni̇́ ke mahiki atu‘o patū ki tahi, pea ‘e hoko ia. 22Peá ka ‘ilonga ha me‘a te mou kole ki ai ‘i haʻamou lotu, mou tui, pea ‘e ‘oatu ia.”
Ko e Fehu‘ia ʻo e Mafai ‘o Sīsuú
(Ma‘ake 11:27-33; Luke 20:1-8)
23Pea na‘e toe hū atu ‘a Si̇̄sū ki he Temipalé ‘o faiako ki he kakai̇́. Pea omi ʻa e hou‘eiki taulaʻeiki̇́ mo e kau mātu‘á ʻo e lotú ‘o ‘eke ange, ‟Ko e mafai mei fē ‘okú ke fai ʻaki ʻa e ngaahi me‘á ni? Ko hai na‘á naʻe ‘oatu kiate koe ʻa e mafai ko iā?”
24Pea tali atu ‘e Sīsū, ʻo ne pehē kiate kinautolu, ‟Te u tomu‘a fai atu ‘e au ‘eku fehu‘i. Pea kapau te mou tali mai, pea te u toki tala atu ʻa e faʻahinga mafai ‘oku ou lava ai ʻa e ngaahi me‘á ni. 25Na‘e ma‘u mei fē ‘e Sione ʻa e mafai ke fai papitaisó? Mei he Langi̇́, pē mei he tangatá?”
Pea nau kamata feki̇̄hiaki ai ‘o nau pehē: ‟Ko e hā ‘etau tali ‘e fai̇́? He kapau te tau talaange ko e mafai mei he ‘Otuá, pea te ne pehē mai ‘e ia, ‛Pea ko e hā na‘e ‘ikai ai te mou tui ai kia Sioné?’ 26Pea kapau te tau talaange, ‛Ko e mafai mei he tangatá,’ ka na‘á fai ‘e he kakai̇́ ha me‘a kiate kitautolu. He ‘oku nau tui kotoa pē, ko e palōfita ‘a Sione.” 27Pea talu ai ‘enau tali, ‟‘Oku ‘ikai te mau ‘ilo ʻekimautolu.”
Pea pehē ange ‘e Si̇̄sū kiate kinautolu, ‟Mo au foki, ‘e ‘ikai te u tala atu ‘e au pē ko e mafai mei fē ‘oku ou lava ai ʻa e ngaahi me‘á ni.”
Ko e Talanoa ʻo e Ongo Fohá
28‟Ko e hā haʻamou lau ki he meʻa ni? Naʻe ai ha tangata mo hano ongo foha ʻe toko ua.
Pea ʻalu ange ‘e he tangata ko ʻeni̇́ ki hono foha lahi̇́, ʻo ne pehē: ‛‘Alu mu‘a, tamasiʻi, ‘o ngāue he ngoue vainé he ‘ahó ni!’ 29Pea talaange ‘e he tamasiʻi̇́, ‛He‘ikai te u ʻalu.’ Kae fuoloa si‘i mei ai, kuo liliu hono lotó, ‘o ne ‘alu. 30Pea toe ‘alu ange ʻa e tangatá ki hono foha ‘e tahá ‘o fai ʻa e fekau tatau ki ai. Pea pehē mai ‘e he tamasiʻi ko iā, ‛ʻIo, Tangata‘eiki, te u ‘alu.’ Ka na‘e ‘ikai ke ‘alu ia. 31‟Ko e foha fē na‘á ne fai ʻa e loto ‘o ‘ena tamai̇́?”
Pea nau talaange, ‟Ko e foha lahi̇́.”
Pea pehē ange leva ‘e Si̇̄sū kiate kinautolu, Ko hono mo‘oni̇́ ʻeni ‘oku ou tala atú, ‘e tomuʻa hū ki he Pule‘anga ‘o e ‘Otuá ʻa e kau tānaki tukuhaú mo e kau fe‘auaki̇́, ʻiate kimoutolu. 32He na‘e ha‘u ‘a Sione kiate kimoutolu ‘o fakahā atu ʻa e hala totonu ke mou fou ai̇́, ka na‘e ‘ikai te mou tui ki ai. Kae tui ki ai ʻa e kau tānaki tukuhaú ia mo e kau fe‘auaki̇́. Pea neongo naʻa mou sio ki ai, ka na‘e ‘ikai te mou fiefakatomala ai homou lotó, ‘o tui kiate ia.
Ko e Kau Ngāue he Ngoue Vaine
(Ma‘ake 12:1-12; Luke 20:9-19)
33‟Mou fanongo ka u toe fai atu ha talanoa ʻe taha.
Na‘e ai ha matāpule, na‘á ne tā haʻane ngouevaine peá ne ʻāaʻi ia, pea ne keli ai ha tatau‘anga uaine, pea ne langa ai foki ha taua le‘o peá ne lisi atu ʻa e ngoue vainé ki ha kau tauhingoue ka ne hiki ki ha fonua mamaʻo.
34Pea ʻi he ofi ʻa e toʻukai̇ kālepi̇́, naʻá ne fekau atu ha‘ane kau tamaioʻeiki ke nau ō ‘o ma‘u mei he mātu‘á tauhingoué, hono ‘inasi mei he fua ‘o e ngoue vainé. 35Ka na‘e puke ‘e he mātu‘á tauhingoué ia ʻene kau tamaioʻeiki̇́, ‘o tā ʻa e toko taha, pea tāmate‘i ʻa e toko taha, pea tolomakaʻi ʻa e toko taha. 36Pea toe fekau atu ‘e he matāpulé haʻane kau tamaioʻeiki̇ kehe ʻo tokolahi ange ʻia kinautolu ne tomuʻa ʻalu atú, ka naʻe ngaohikovi‘i pē mo kinautolu foki ‘e he mātu‘á tauhingoué.
37Pea toki fekau faka‘osi atu ‘e he matāpulé, ʻa hono fohá, kiate kinautolu, he naʻá ne pehē ‘i hono lotó, ‛ʻOku pau pē te nau toka‘i hoku fohá.’ 38Ka ʻi he sio leva ʻa e mātu‘á tauhingoué, ko e fohá eni, naʻa nau alēlea, ʻo pehē: ‛Ko e foha hokó eni. Mou haʻu, tau tāmate‘i ia ‘ekitautolu, ka tau ma‘u hono kelekelé.’ 39Pea nau puke ia ‘o fakapuna ki he tu‘a ngouevainé ‘o nau tāmate‘i ia ai.
40Peá ka ʻiloange leva kuo tu‘u atu ʻa e matāpulé ki heʻene ngoue vainé, Ko e hā nai haʻane me‘a ‘e fai ki he mātu‘á tauhingoué ko ʻeni̇́?”
41Pea tali ‘e he hou‘eiki taulaʻeiki̇́ mo e kau mātu‘á ʻo e lotú kia Sīsū, ‟Te ne tāmate‘i ʻa e kakai kovi ko iā ka ne lisi atu ʻa e ngoue vainé ki ha kau mātu‘á te nau ‘oange hono ‘inasi̇́ ʻoka hokosia ʻa e faʻahitaʻu toli vainé.”
42Pea pehē ‘e Si̇̄sū kiate kinautolu, ‟Kuo teʻeki koā ke mou lau ʻi he Tohitapú ʻa e potutohi ko eni̇́,
‛Ko e maka ne ʻikai tali ‘e he kau tufungá,
Kuo hoko ia ko e maka mahu‘inga tahá.
Ko e ngāue ia ʻa e ‘Eiki̇́,
Pea fakaofo moʻoni ki he‘etau vakai̇́?’
43Pea ko hono mo‘oni̇́ ʻeni ‘oku ou tala atú, ‘E fa‘ao meiate kimoutolu ʻa e Pule‘anga ‘o e ‘Otuá kae ‘oange ma‘á ha kakai te nau ‘omai ʻa e fua ‘oku fiema‘ú. 44Pea ‘ilonga ha taha ‘e tūkia he maka ko ʻeni̇́ ‘e mofesifesi. Peá ka tō ʻa e maká ni ‘i ha taha, pea ‘e lailai ʻa e toko taha ko iā.”
45Pea ʻi he fanongo ʻa e hou‘eiki taulaʻeiki̇́ mo e kau Fālesi̇́ ki he ngaahi talanoa fakatātā ne fai ‘e Sīsuú, naʻa nau ‘ilo ko ʻene ʻuhingá kiate kinautolu. 46Pea nau faʻufaʻu leva ke tāmate‘i ia. Ka na‘e ‘ikai te nau lava ‘o puke ia ko ‘enau manavahē ki he kakai̇́. He na‘e tui ʻa e kakai̇́ ko e palōfita ‘a Si̇̄sū.
Nke Ahọpụtara Ugbu A:
Mātiu 21: TCNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Tongan Contemporary New Testament © Bible Society of the South Pacific, 2011.