Lukas Uram 23
23
Er Yesus boboka Roma sienyi Kaisar amwetam bunanyi si Pilatus dam bobinmai uram
23:1-7
1Uram sisingmai ani, uram sisingmai nang nirya anabdobmai ura, Er Yesus boboka Roma sienyi Kaisar amwetam bunanyi si Pilatus dam bobinmai. 2Bobinmai ura, Er Yesus bisi ato eboka tatabdongobmai, “Nunci lilinmab uca, Anyi bira ninyi boboka waningminingdurnyi kururci, ato erur, ‘Roma weik sienyi Kaisar biti pajak dengna karena mem,’ erur. Ba, Erdamnyi bira ato erdarur, ‘Nira Er Imtamnyi biryi ninyi lebwande Weik Sienyi eboka bokwetebnounyi kunun,’ erdarur,” ebmai. 3Ba, Pilatus biryi Er Yesus bisi asibdenmou, “Kanda dib sun Yahudi yala nang Weik Sienyi kurum do?” eboka asibdenmou. Uca, Er Yesus biryi ato ebmou, “Kanci ebmanirima,” ebmou. 4Ura, Pilatus biryi Er Imtamnyi kan ninyi kan noutam kuboka antanirdeirin deyok nang ab ninyi nirya a wekmai nang ab asi ato ebmou, “Niryi Anyi Er malyi kun dinyi ton kum eibman,” ebmou. 5Bok, sunci taba tatab-tatab eboka, “Anyi Er eterena aryi ninyi Yudea mutuk nang nirya bowaniksiniburyi, Galilea mutuk aryi deyok kouamwe uca, a mutuk nang ababyi nirya waningminingdur,” ebmai. 6Pilatus biryi ato ebmai kekebmou ura, sunsi asibdenmou, “Anyi bira Galilea mutuknyi kurur do?” eboka asibdenmou. 7Ura, Pilatus biryi Yesus bira weik sienyi Herodes taleamwe mutuk Galileanyi kuramwe bikmou. Ura, a talak ara Herodes bira Yerusalem atei dam kunmou asi, “Herodes dam bobindarur,” eboka bokdonokmou.
Er Yesus boboka weik sienyi Herodes dam bobinmai uram
23:8-12
8Er Yesus boboka Herodes dam bobinmai ba, Er Yesus eibmou ura, er kanya kilkil mitik kum kubmou. Ara, minob uca, “Er Yesus ni asing ton eibtinyi,” teneramwe deyok ab, tonda Er Yesus deyok asi yuk nang aryi er dam asi, “Er Yesus bira ato kunmar,” eboka nungdamnyi ba, “A kurur to ilil tenen dinyi asi una kuboka kiknirur ati enung do? Ni ton eibtinyi,” teneramwe asi Er dam bobinmai ura, er kanya teleb kubmou. 9Ura, erci Er Yesus bisi asirden dinyi ara mitik kum asibdenmou bok, Er Yesus biryi uram ton doboka dengdeirina kum kubmou. 10A talak aryi antanirdeirin deyok nang ab Musa kerek sengna etereramnyi nang ab aryi Herodes urasin dam tingyandoka Er Yesus bisi ikin-ikin dinyi akwe tatab-tatab ebdongobmai. 11Ura, Herodes ab er yin doun nang ab aryi Ersi durukoka ina ngilingmaici, Herodes biryi weik sien nang ongoraming ongon aling asi ongobdeibmou ura, tubto Pilatus dam bokdonokmou. 12A tum aryok, Herodes ab Pilatus ab mar ibdanandei ani, antanibdobmarei.
Er Yesus Pilatus dam tubto tamuboka bobinmai uram
23:13-25
13Er Yesus Herodes urasin dam bobinmai ani, tubto tamuboka Pilatus dam boyanmai. Ba, Pilatus biryi antanirdeirin deyok nang ab sun Yahudi nang sien nang ab akai dam buluboka wekmai nang ab bulubdeibmou. 14Ura, ato ebmou, “Sunci, ‘Anyi bira ninyi boboka waningminingdurnyi kurur,’ eboka ni dam boyanmarum. Bok, sunbabyi dinmarum ba, niryi Anyi Er kuramwe dinyi lilibdenman dinyi ara sunci, ‘Er malyi kurur dinyi ara ato-ato kurur,’ eboka tatabdongobmarum dinyi asi lilibdenman uca, ni ton kum eibman. 15Ba, Herodes bibabyi yuk malyi kun dinyi ton kum eibmarci, tubto nun dam a tamubkarebmar. Ati, diboka ebkun. Anyi bira Erci obkwamatibyi ba, dibkwamote malyi kun dinyi ton kum kurur eibman. 16Ati, niryi Ersi litukoka kulabnyi ura, lobdeibkwan,” ebmou. 17A ebmou deyok ara Pilatus bira wenenmangnyi nang asi weik kwalina tum aryi, “Anyi bira ur obdarur ba, anyi bira lobdeibdarur,” eramwe to aryi ebmou. 18Ato ebmou bok, sun nirya aryi uram doboka ato ebmai, “Barabas bira lobkwetebminyi ura, anyi bira yakwetebdum!” eboka uram dobmai. 19Barabas bira atei keta aryi mar deyok kouamwe deyok ab tonda ninyi oamwe deyok ab aryi ninyi wenen ai dongoamnyi. 20Ura, Pilatus biryi Er Yesus bisi, “Lobdeibtinyi,” tenen ati Yahudi nang sien nang ab ur nang ab buluboka wekmai nang asi tubto uram ebdenmou. 21Uca, sunci uram doboka ato ebmai, “Co lase deici laboka bing dakwayeb, bing dakwayeb!” ebmai. 22Ura, Pilatus biryi liki winiryi dinyi aryi tubto uram iboka sunsi ato ebmou. “Bing dakwayeb ebmarum bok, Er Yesus biryi malyi kun dinyi una kurur do? Niryi Er malyi kun dinyi tentok ababyi ton kum bikman. A deyok aryi, ‘Anyi bisi obne ba, dibkwamar,’ kum tenebman. Ati, niryi Ersi lituknyi ura, lobdeibkwan,” ebmou. 23Ebmou bok, a buluboka wekmai nang mikib asa aryi, tatab-tatab eboka, “Yesus obibyi ba, dibkwande!” eboka uram dobmai. Ato eboka sun uram donmai to asi kunubmou. 24Ura, Pilatus biryi a nang aryi sun tenebmai to ur ebmouci, Pilatus biryi sun ninyi wenen ai dongoaminyi dobkwetebmou ura, Er Yesus bira, “Sun tenebmarum to Er Yesus ur obdarur,” eboka sun taruk dam karebmou. 25Ba, sun uram eboka molobdobmai to kuboka atei keta aryi mar deyok kouamuryi ninyi oamunyi bira lobdeibmou. Ura, Er Yesus bira sun tenebdobmai to kubkwamai ati sun taruk dam karebmou.
Er Yesus co lase deici laboka bing dakwamai ati bobinmai uram
23:26-32
26Ura, yin doun nang aryi Er Yesus co lase deici laboka bing dakwamai mutuk dam bobanmai ura, ninyi si Simon Kirene ateinyi bira baitam aryi atei tam ukuryok wengyangarou. Asi, yin doun nang aryi anyi talebdongoboka Er Yesus bobmou co lase bobdeibmai ura, Er Yesus bobde menengmou ba, erda aminda bobmilibmou. 27Ura, ninyi yubwa tentok Er bobanmou ura, aminda milibmai. A milibmai nang kankan ara nerabwe mer ara Er Yesus deyok ati urumna eboka engebnin banmai. 28-29Asi, Er Yesus biryi urasin dangubokmou ura, a nerabwe mer asi ato ebmou, “Se Yerusalem atei nerabwe, sunda Niti engenmanuruma mem. Erda sun Yerusalem atei nang asi sun mar bosin nang aryi iyangansingnyi uca, sun mabwe nermabwe obingnyi ba, boukwe aryi engenmamunci, ato ebkwandum, ‘Mi you kurondarur nerabwe ab mi kin aling tiriksou ba, mi kum deirirondarur nerabwe ab mi moum kum dinindarur nerabwe ab ara telebe,’ ebkwandum talak dam kubkwamar ati sun dam nerabwe ab sun mabwe nermabwe ab ati engebdandobdarur! 30Tonda a talak ababyi mar ordana nang aryi ona ilil kubci ura, ninyi aryi, mutuk kon asi ato ebkwaming, ‘Dalubkaboka nunsi siklibsurum,’ ebkwaming ba, mitik-mitik mutuk kon asi ato ebkwaming, ‘Nunsi amubloboksurum,’ ebkwaming. 31Ba, ninyi aryi yik co asi ato kubting ura, koula co ara una kubting do? Ara, Ni malyi kuna kumnyi bibabyi mambul doboka dibkwaman ati sunda wanok sun mining malyi kun dinyi ati mar ordana deyok aryi, ilil mitik kum kubkwamasir,” ebmou. 32Ba, Er Yesus ab, ukula don nang bitinyi ab tonkwa co lase deici laboka bing dakoka obkwamai ati bobinmai.
Er Yesus bisi yin doun nang aryi co lase deici laboka bing dakmai uram
23:33-43
33Er Yesus bisi bobinmai mutuk si ara, “Ninyi kisok yangkol yok,” eramnyi mutuk asi bobinmai. Ura, Er Yesus ab, ninyi ukula don nang bitinyi ab, tonkwa co lase deici laboka bing dakmai. Tonyi bira Er Yesus siriktam kuboka bing dakmai ba, tonyi bira Er Yesus kwanimtam kuboka bing dakmai. 34Bing dakmai ura, co lase laboka bing dakmai dub aryi Er Yesus biryi Er Nai Imtamnyi bisi ato uram sisikmou. “Nai, sun kunmang dinyi ara kum bikdanmang ati, kanci sun malyi kun dinyi kilibdum!” eboka molobmou. Ura, Er Yesus onmai nang aryi Er Yesus ongoramwe ongon aling bokdobkwamai ati keil deici asi kerek sekdongoboka im sukmai. 35Adikum tikmai nang ara a kunmai dinyi nirya sun asing aryi eibmai. Bok, sun Yahudi nang sien nang ara Er Yesus bisi ina ngilikoka ato ebmai, “Erda Ninyi Lemnanyi Er Imtamnyi biryi wiboka Bokwetebunyi kuranci ura, yuk nang asi lemdeirirur to kuboka ukuryok ara Erbiramnyi lebdandobkur arya,” ebmai. 36Ba, yin doun nang ababyi Ersi ina ingilikoka, co anggur yung me sik ilinto dinyi dinibmai. 37Ura, ato ebmai, “Kanda dib sun Yahudi yala nang weik sienyi kuraminyi ura, lebdandobdum!” ebmai. 38Ba, co laboka bing dakmaia kisok dub kobdob ara, “Anyi bira sun Yahudi yala nang weik sienyi kurur,” eboka kerek sekdongobmai. 39Ninyi ukula don nang bitinyi Er Yesus ab tonkwa bing dakmainyi biryi Er Yesus bisi kereboka durungmouci, ato ebmou. “Kanda ninyi lemna Weik Sienyi kurum ara dib do? Dib obura! Kan baramnyi lebdandobminyi ura, nunbabyi lebdobsurum!” eboka kerebmouci, durukmou. 40Ato ebmou bok, er kwit dinatamnyi biryi er kwit bisi erekdobmouci, ato ebmou. “Kanda Er Imtamnyi biryi aminda wenebkwansir dinyi ara ilil kum tenebmarim do? Kanbabyi dibkwamarim to Erbabyi neiktoto dibkwamar! 41Nunda, nun malyi kubde banimnyi to aryi dibkwamanim. Uca, Erda malyi kun dinyi ara iya ton kum kurur bok, dibkwamar,” ebmou. 42Er kwit bisi enmou ani, sirya ebmou ura, Er Yesus bisi ato ebmou, “Yesus, Kan aminda sienyi kiboka yangaminyi tum ara ni takniminyei ati teneibdenkwanurum!” ebmou. 43Uca, Er Yesus biryi ersi ato ebmou, “Niryi kansi diboka ebkatabdeibkwinkin! Arub tum ababyi kan ab Ni ab tonkwa Er Imtamnyi kurur dam mutuk si Firdaus binkwinim,” ebmou.
Er Yesus dibmou uram
23:44-49
44A mutuk nirya kiting dukduk en aryi kunuk dakmou ani, kiting yakna winiryi kimbau ura, berekmou. 45A kunuk dakmou talak aryi Bait Allah ai ara Er Imtamnyi biti ninyi dama deirirban ai, noutam wilimna diribkweteamnyi aling asi noutumang kobdob kwilikde yurbinmou ani, bitinyi kibmou. #23:45 Er Imtamnyi biti ninyi dama deirirban ai, noutam wilimna diribkweteamnyi aling ara Er Yesus dibmoua biriman aryi Er Imtamnyi dam wengban bisik lilibmou ati dakoka antanibmou. 46Ura, Er Yesus biryi uram weikanun iboka ato ebmou, “Nai, Ni kanya kan taruk dam karebne!” ebmou ura, isin nebneb ena dakdobmou. 47Ba, mar deyok donanyi biryi a ukubmou asi asing eibmou ura, erci Er Imtamnyi bisi si weik ebmouci, er dib tenen dinyi lak ebmou. “Diba, anyi bira malyi dinyi iya ton kum kuramunyi bisi obmab,” ebmou. 48Ato sirya ebmou ura, Er Yesus onmai ati yandoka arubdongobmaici, dinmai nang ara ato kubmou asi asing eibmai ura, sun taram kulabdandoro binmai. 49Bok, Er Yesus dam kobdob aryi bingnamnyi nang ab Galilea mutuk aryi milibmai nerabwe mer ab ara yuk mutuk tikmaici, Er Yesus bisi onmaici, kunmai dinyi nirya eibmai.
Er Yesus Kristus dibmoua tukwe asi keil umbura dam dongorbinmou uram
23:50-56
50Mutuk si Yudea atei si Arimateanyi si Yusuf bira erda kanya teleb boramunyi kuramwe. 51Ba, ninyi ilinto aryi ersi kisal weik dangnamnyi. Ba, ton Er Imtamnyi mikib aryi leboka kalingna talak ati dibde buramwe. Tonda sun Yahudi yala nang uram sengkwetenanyi kuramwe. Yahudi nang sien nang ton nang aryi, “Yesus obkwayeb,” eboka uram sisikmaici, obmai ara erda, “Teleb,” kum tenebmou. 52Er Yusuf biryi Pilatus dam bindoka Er Yesus tukwi asi, “Ur ebkwandura,” tenen molorbinmou. 53Molobmou ura, Er Yesus tukwi asi co lase deici laboka bing dakmai asi dobkweteboka kait kaluna si lenan aryi akubmou. Sirya akubmou ura, erci keil asi teleboka ukamnyi ai deirirbinmou. A keil umbura ara ninyi iya ton kum deirirbaramnyi asi deirirbinmou. 54Yusuf biryi a ukubmou tum ara sun Yahudi yala nang wa in uki tum kubkoua damtoto kubde bau asi kubmou. 55Nerabwe mer Er Yesus ab Galilea mutuk aryi tonkwa yanmai nerabwe ara, “Er Yesus tukwi asi tukwe umbura maibkwamar asi una kuboka maibkwamar do?” tenen tonkwa bindoka tukwe dongon dam dirbinmai. 56A nerabwe ara Er Yesus tukwe dongon dam binmai ani, atei yanmai ura, tong teleb co yung kiknirminingmaici, sun Yahudi yala nang aryi Musa kerek sengna sekdeiamwe ba, kunuramnyi to taruk louboka bukmai.
Nke Ahọpụtara Ugbu A:
Lukas Uram 23: MTG
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
@LAI 2007 (New Testament), @LAI2022 (Old and New Testament)