Эвел 31
31
Якьуб Лавандихьан гьергуб
1Якьубдиз Лавандин баяри чакан «девлетлу духьна» кӀурайиб ва: «Якьубди ихь адашдихьан вари тадабгъну! Ихь адашдилантина му гьамкьан девлетлу гъахьир ву!» – кӀурайиб ебхьуру. 2Якьубдиз чазра Лаван чахьинди жараси лигуз хъюгънайиваликан аьгъю дубхьнайи. 3Хъа РАББИЙИ Якьубдиз гъапи:
– Яв уьлкейиз, яв багахьлуйирихьна кьяляхъ гъарах. Узу увухъди хьидиза.
4Якьубди Рахилизна Лияйиз чан сюрйирин бина айи чӀураризди гъач йипай кӀури чархачи гьаъру. 5Хъасин Якьубди дурариз гъапи:
– Узуз рябкъюрайиси, ичв адаш узухьинди жараси лигуз хъюгъна. Аммаки йиз адашдин Заанур узухъди хъазухъ. 6Учвузра аьгъячвуз: ичв адашдихъ узу йиз вари юкӀв хъипну, кӀваантӀан лихури гъахьунза, 7хъа дугъу узуз кучӀлар апӀури гъахьну ва йицӀуб ражари йикьрар гьюдюхну. Анжагъ Заанури, дугъахьди узуз чӀуруб апӀуз гъитундар. 8Ичв адашди узуз: «Яв лихбан кьимат цӀарудар ишри», – гъапиган, вари мал-къара цӀаруди бабкан шуйи. Хъа: «Яв кьимат тӀюхъяр кайидар ишри», – гъапиган, вари мал-къара тӀюхъяр кайидар шуйи. 9Магьа гьамци Заанури, ичв адашдин сюрйир йиз хилиъ ивну. 10Саб ражари, маларра марччар жердариккра якъарикк ккайиган, нивкӀукди узуз, цӀигьарихьна гъярайи вари кьунар цӀарудар, тӀюхъяр кайидар ва леке кайидар вуди гъяркънийзуз. 11«Я Якьуб!» – нивкӀукди Заанурин малайикди#31:11 Мушваъ малайикди РАББИЙИН ччвурнахъан кӀура. дих гъапӀунзуз. Узу: «Гьай!» – гъапиза. 12Хъа дугъу гъапизуз: «Лиг, цӀигьарихьна гъярайи вари кьунар цӀарудар, ясана тӀюхъяр кайидар ва леке кайидар ву. Увуз Лаванди апӀурайиб вари рябкъюразуз. 13Фицики Узу Бет-Элиъ увуз гъяркъю Заанур вуза, хъа увура гьадушваъ, гирамивалин лишан вуди ччим гъвандиин улубзну Йиз улихь ху гъапӀунва. Гъудужв, гьаму уьлкейиан удучӀвну яв багъри ватандиз гъарах».
14Рахилина Лияйи Якьубдиз гьамциб жаваб туву:
– Ич адашдин хулак ясана ирснак сарун ич пай кимдар. 15Дугъу учу жарадарси гьисаб апӀура. Дугъу учу масу тувну, хъа учухъ гъурубкьу вари мутму хътипӀну. 16Гьаци вуйиган, Заанури ич адашдихьан тадабгъу вари мутму ухьуз ва ихь веледариз шула. Гьаддиз увуз Заанури фици кӀураш, гьаци апӀин.
17Якьубди бицӀидарна чан хпар девйириин илитуру 18ва Паддам-Арамдиъ чав гъазанмиш гъапӀу вари мал-мутму уч дапӀну, Ханаандиз, чан адаш Исакьдихьна, гъягъюру. 19Думу вахтна Лаван марччар ултӀукъуз душнайи, хъа Рахили чан адашдин хулан бутар#31:19 Заанурси гьисаб апӀури гъахьир. чахьди гъадагънийи.
20Гьамци Якьубди, учв удучӀвну гъяруваликан гьич фукӀара дарпиди, арамейжви Лаван алдатмиш гъапӀнийи. 21Думу Лавандихьан чан вари девлет хьади гьудучӀвну гъушнийи. Ефрат ниркан кудучӀвну, Якьуб Галаад дагъларизди рякъюъ учӀвнийи.
Лавандинна Якьубдин йикьрар
22Шубуд йигълан Лавандихьна, Якьуб удучӀвну гъушну кӀуру, хабар гъабхуру. 23Лаванди чан багахьлуйир уч апӀуру ва Якьубдихъ хъергру. Ургуд йигълан думу Якьубдихъ Галаад дагълариъ хъуркьру. 24Хъа гьадму йишван, арамейжви Лавандиз Заанур ачмиш шулу ва:
– Лиг гьа, Якьубдиз фукӀара мапӀан! – кӀуру.
25Лаван магьа Якьубдихъ хъуркьнийи. Якьубди чан бина дагълариъ ккатӀабццнайи. Лаванра чан багахьлуйирихъди Галаад дагълариъ дийигъу. 26Хъа Лаванди Якьубдихьна дуфну кӀуру:
– Уву гьапӀрава? Уву узу алдатмиш гъапӀунва! Йиз шубар, дявдиъ гъидису йисирар вуйиганси, хъади гьергунва аьхир! 27Узуз саб гаф-чӀал дарпи гьаз гъушунва? Узуз фукӀара дарпиди узу алдатмиш гъапӀунваки! Уву шадди мяълийирна дафна чюнгюр хъади гьаъдийзаву, 28хъа уву узухьди йиз шубаризна худлариз макаркьан апӀуз гъитундарва. Ахмакь ляхнар гъапӀунва. 29Узхьан учвуз ужуйи жаза тувуз шуйзухьан, хъа сан узуз ичв адашдин Заанури гьамци гъапунзуз: «Лиг гьа, Якьубдиз фукӀара мапӀан!» 30Гьа баладар, – давам гъапӀу Лаванди, – яв багъри хулахъ тямягь гъабхьир узхьан гъушунва, хъа йиз хулан бутар гьаз гьитӀикӀунва?
31– Яв шубар уву узхьан кьяляхъ тадагъур кӀури гучӀ гъабхьунзуз, – кӀуру Якьубди. 32– Хъа яв хулан бутар учухь шлихь гъидихъиш, гьадму чӀивиди гъузидар! Гъит ихь багахьлуйир шагьидар ишри: учухь хьайиб вари рибгъ, явуб – гъадабгъ!
Рахили хулан бутар гьитӀикӀнайибдикан Якьубдиз аьгъдайи. 33Лаванди, Якьубдин, Лияйин ва кьюбиб гъараваш дишагьлийирин чадрар асккан-заан гъапӀу, амма фукӀара бихъдар. Лияйин чадриккан ккудучӀвур, думу Рахилин чадриккна гъушу. 34Рахили, кӀуруш, хулан бутар гъадагъну девейин пирпйирин кӀанакк ккивру, хъасин пирпйирин зиин учвра деъру. Дугъан адашди Рахилин чадурра гъирибгъу, амма фукӀара абгуз гъабхьдар. 35Хъа Рахили адашдиз гъапи:
– Йиз агъайиз, узхьан, ихь аьдат вуйиси, гъудужвуз шуладар кӀури, узкан ккимидиси дарибшри, хпарин аьдати уьзри ккагънайир вуза.
Лаванди варишвар ккиригънушра, дугъаз хулан бутар гъидихъундайи. 36Гьамус хъял кади алархьуз Якьубдин нубат вуйи:
– Гьан, йиз тахсир фтиъ аш йип, узу увуз фу гъапӀну уву узухъ хъчӀарккуз? 37Уву йиз вари мутму ккирибгъунва, явуб фу гъибихъунвуз? Гьан улуп, гъит ихь багахьлуйири чпин кӀуруб йипри! 38Къад йисан узу увухъ гъилихунза, му арайиъ гьич саб марччли я ччил, цӀигьру – мудур ктипнийинхъа? Узу яв лижгъян якъар гъитӀундарзаяв! 39Эгер нахшрари мал-къара пуч гъапӀишра, узу увухьна гъячӀюбгъюб гъабхундайза. Увуз гъабхьи зарар узу йиз марччариинди ккебкуйзавуз. Йигъну гъабхьиб, йишвну гъабхьиб – сабдизра дилигди, уву узкан гъудубгуб ктабгъуйва. 40Йигъну манишну уркъурийзу, йишвну – аьхълушну, ул иливдайза! 41Къад йисан узу увухь гъахьунза. ЙицӀиюкьуд йисан яв шубар бадали увухъ гъилихунза, йирхьуд йисан – яв мал-марччлихъ, хъа уву йицӀуб ражари ихь дапӀнайи йикьрар гьюдюхюнва! 42Хъа эгер йиз адашдин Заанур – Ибрагьимдин Заанур ва Исакьди икрам апӀурайи Заанур – узухъди хътайиш, узу фукӀара хьтарди утӀурккуйва. Хъа Заануриз узуз кайи гиран ва йиз жафа рябкъюра: гьаддиз сан Думу узхъанди хъюгънади гъахьну!
43Хъа Лаванди Якьубдиз гьамци жаваб тувру:
– Аьхирина аьхир, мурар йиз шубар вуйиз, йиз – худлар, йиз – мал-марчч. Увуз мушвахь рябкъюрайиб вари йизуб вуйиз. Узу йиз шубариз гиран ктапӀур кӀурайва? Ясана худлариз? 44Гъач йикьрар йитӀидихьа ва гъит думу йикьрар ухьуз шагьид ишри.
45Гьадмуган Якьубди саб аьхю гъван, гирамиб вуди дубсру, 46хъа чан багахьлуйириз:
– Гъванар уч апӀинай, – кӀуру.
Дурари гъванарин чӀвеъ апӀуру ва дидихъ ипӀуб-убгъуб апӀуру. 47Думу тепейиз Лаванди Егар-Сахадута#31:47 Арамей чӀалниинди: Шагьидвалин тепе. кӀуру, хъа Якьубди – Гал-Эд#31:47 Кюгьне жугьуд чӀалниинди: Шагьидвалин тепе. кӀуру. 48Лаванди гъапи:
– Му тепе ихь йикьрарин шагьид ибшри.
Гьаддиз му тепейиз Гал-Эд кӀуру. 49Гьацира му тепейиз Мицпа «гъаравулвалин йишв» гъапи, фицики Лаванди гьамци кӀури давам гъапӀу:
– Гъит РАББИ ухьуз, ухьу чиб-чпихьан ярхла айиганра лигури ишри. 50Эгер уву йиз шубариз гиран ктапӀури гъашиш, ясана дурарилан гъайри уву увуз хъа хпар гъахиш, кӀваинди гъибт: ихь шагьид Заанур ву гьа, адми – дар! 51Лиг, – гъапи Якьубдиз Лаванди, – гъванарин гьаму тепена, ихь кьялаъ узу дубснайи гьаму гирами гъван, 52– гьамрар ву ихь йикьрарнан шагьидар. ЧӀуру ният ади узу му тепейин яв терефназди гъягъидарза, ва чӀуру ният ади увура му гирами гъвандихьанра тепейихьан йиз терефназди мягъян. 53Гъит, ихь диванчйирди Нагьорин Заанурна Ибрагьимдин Заанур ишри, яни Якьубдинна Лавандин абйири икрам апӀури гъашидар.
Якьубди чан адаш Исакьдиз Шлихьан гучӀуйиш Гьадгъуинди ху гъапӀу. 54Хъасин Якьубди дагъдиин Заануриз гъурбан хуру ва багахьлуйириз ипӀуб-убхъуб гьивру. ИпӀбалан кьяляхъ дурар, йишв адапӀури, гьадму дагъдиин гъузнийи. 55ГвачӀнинган Лаван, чан шубаризна худлариз макар ва ужʼвал ккун дапӀну, чан йишваз кьяляхъ гъягъюру.
Nke Ahọpụtara Ugbu A:
Эвел 31: ТабГК
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Институт перевода Библии, 2010, 2013, 2016, 2018, 2023