OMOCHANKO 16
16
Hagari na Isumaeli
1Bono Sarai, moka Aburamu, tamoiborerete bana. Ere narenge nomoiseke omosomba Omomisiri, ore korokwa Hagari. 2Sarai agatebia Aburamu, “Noroche bono ng’a Omonene ontangire tinyora abana, menyana nomoiseke oyo one omosomba; aande nabo ndanyore abana korwa asare.” Aburamu akaigwera ogokwana gwa Sarai. 3Ase igo, nyuma Aburamu kamenyire ense ya Kanani emiaka ikomi, Sarai akaimokia Hagari, omosomba oye Omomisiri, akamomoa Aburamu, omosacha oye, ng’a abe mokaye o sere‐sere. 4Erio bakamenyana na Hagari, na ere akaba morito. Ekero arora ng’a obeire morito, akaba ogochaya moibori omwabo.
5Sarai agatebia Aburamu, “Obobe obo bwanyorete, tiga naye bokonyore! Inakoa omoiseke one omosomba koboko kwao; ere, ekero arora ng’a obeire morito, onchayire. Tiga Omonene atogambane inche naye!”
6Aburamu nere agatebia Sarai, “Rora, omosomba oo oyio nase amaboko ao are; mokorere buna oranche.” Erio Sarai akamochanda bobe, na ere agatama korwa asare.
7Omomalaika bw’Omonene akarora Hagari ase erooro ase ensoko y’amache yarenge ase enchera ekogenda Suri. 8Akamoboria, “Aye omosomba o Sarai, ng’ai okorwa, naende ng’ai okogenda?”
Akamoiraneria, “Nigo ngotama korwa ase moibori ominto Sarai.”
9Erio omomalaika bw’Omonene akamotebia, “Irana gochia ase moibori omino, na bwekeyie asare.” 10Naende omomalaika bw’Omonene akamotebia, “Nimentekanie ororeria rwao, na omobaro obo tokonyarwa kobareka, ekiagera barabe abange mono.” 11Naende Omomalaika bw’Omonene akamotebia,
“Rora, morito ore, noibore omwana omoisia;
nomoroke Isumaeli,#16:11 Isumaeli, engencho yaye: Nyasae okoigwa
ekiagera Omonene oigure ekerero ki’emechando yao.
12Ere nigo arabe buna etigere y’orosana ase egati y’abanto,
na okoboko kwaye nigo korabe igoro y’abanto bonsi,
na amaboko ’abanto bonsi nigo arabe igoro yaye;
ere nigo aramenye bosio bw’abamwabo bonsi.”
13Ase ayio Hagari akaroka Omonene oyo okwanete nere Eli‐Roi, engencho yaye “Aye naye Nyasae bw’okorora”; naki akeboria, “Inee! Amaene, narorire Nyasae, na ere ontiga inde moyo nyuma konamororire?” 14Ase ayio ensoko eria ekarokwa Beeri‐Lahai‐Roi#16:14 Beeri‐Lahai‐Roi engencho yaye: ensoko y’Oyo ore moyo ondoche; ero nigo ere egati ya Kadeshi na Beredi.
15Erio Hagari akaiborera Aburamu omwana omoisia; nere akaroka omwana oria oye, Isumaeli. 16Aburamu konya obeire nemiaka emerongo etano na etato, na etano nomo (86), ekero Hagari amoiborerete Isumaeli.
Nke Ahọpụtara Ugbu A:
OMOCHANKO 16: EKEGUSIIBBLE
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
OLD EKEGUSII BIBLE PROTESTANT EDITION
©Bible Society of Kenya, 2020