PĚNDARIADI 2
2
1Tangu naghanape pěndariadi kasěllahu runia patikụ e. 2#Ibr. 4:4, 10 #Sas. 20:11 Su ěllọ e kapitune, Duata e něngěnsuẹeng munaranʼE, kụ bọu ene něngirul᷊e. 3Ene nial᷊amatengʼE ěllo kapitune ene kụ kinoạ e ěllo tani, u su ěllo ene Mawu Ruata e něngirul᷊e wọu napakauadipʼu munaranʼE. 4Seng ene e wěken pěndariadi runia patikụ.
Binal᷊aengu Eden
Piạ e nạung Mawu Ruata něndiadi runia patikụ, 5kụ den tawẹ bine lụhětị dingangu reng tawẹ apa manga sasuang su dunia ini, ual᷊ingu Mawu Ruata e ren tawe napạdasehẹ̌ ringangu ren tawẹ apa taumata waugu pẹ̌kẹ̌karadiahang ěntana ene. 6Kaiso akẹ e nanětạ e nẹ̌giasẹ̌, bọu al᷊unge wawa kụ něholọ e wowon dunia e.
7 #
1Kor. 15:45
Bọu ene Mawu Ruata e něngal᷊ạ e ěntana sěngkodọ, kụ niluhude nakoạ sěngkatau taumata,#2:7: Ěntana … taumata Bawera ”taumata” ringangu ”ěntana” su ral᷊ungu werang Ibrani piạ tingihe mẹ̌sul᷊ung. bọu e nitiukangu singongo mamiahẹ̌ e sorong dal᷊ungu lohangu irunge; kụ nẹ̌biahe taumata ene.
8Bọu ene Mawu Ruata e nẹ̌koạ e winal᷊aengu Eden, su sěmbẹ̌kan daki, kụ piněllọʼE sene taumata nạung seng kinoạʼE ene. 9#Pěl. 2:7, 22:2, 14 Mawu Ruata e napatuwong haghing kalu maral᷊enggihẹ̌, měbẹ̌buam buane mapia, su ral᷊ungu winal᷊aeng ene timuwọe kakaluang kụ makaonggọu pẹ̌bawiahẹ̌, dingangu kalu makạkasingkạu kawe mapia ringangu ral᷊akị e.#2:9: Makạkasingkạu kawe mapia ringangu ral᷊akị e arau kasingkạu mạanum patikụ sabarang.
10Sal᷊ụ sěmbua nelehẹ̌ bọu Eden, něholo winal᷊aeng ene; kụ sul᷊ikudʼu Eden tangu sal᷊ụ ene napahiạ ěpạ u kalělangeng. 11Lelange humotong isẹ̌sẹ̌bạ Pison; sal᷊ụ ene nelehẹ̌ nělikụ ěntanang Hawila. 12Kụ sene tangu kaěbakeng bul᷊aeng sahị ringangu lai kal᷊awọu haghim běngi kụ masigěsạ kaěbakeng dingangu manga watung paramata. 13Lelange karuane isẹ̌sẹ̌bạ Sal᷊ụ u Gihon; akene nelehẹ̌ nělikụ ěntanang Kus.#2:13: Kus (su Mesopotamia); arau Sudan. 14Lelange katěllune isẹ̌sẹ̌bạ Sal᷊ụ u Tigris kụ limiu nẹ̌batụ sěmběkan daki wọu wanuang Asyur. Lelange kaěpạ e isẹ̌sẹ̌bạ Sal᷊ụ u Efrat.
15Bọu ene Mawu Ruata e naměllọu taumata ene su winal᷊aengu Eden mědeạu pělẹ̌hal᷊ẹ̌ pẹ̌kẹ̌karadiahang mẹ̌padul᷊i winal᷊aeng ene. 16Mawu Ruata e něhengetang su taumata ene, ”I kau e wotonge kumaěng bọu patikụ haghim buang kalu su winal᷊aeng ini, 17tabeạu katewe wọu kalu makạkasingkạu mapia ringangu ral᷊akisẹ̌. Buane tangu kumbahangbe kanengang batụu kamagengu i kau kumaěng, ute i kau e sarung mate lai su ěllo ene.”
18Mase Mawu Ruata něhengetang, ”Dal᷊aị taumata e mẹ̌biahẹ̌ sẹ̌sane. Iạ e kai sarung mẹ̌koạ dingangu mẹ̌tatal᷊ahino waugu mẹ̌sasumbalane.” 19Tangu i Sie něngal᷊ạ e ěntana kạdodọ dingangu něluhude haghim binatangu rul᷊unge ringangu binatangu kinoaěng. Kěbị e niwawan Duata su anun taumata e tadeạu makasilo kai areng apa sarung gěllirange su manga binatang e. Seng ene e panẹ̌takengu manga binatang u rul᷊unge ringangu binatangu kinoaěng e nakahombang arenge sěmbaụ-sěmbaụ. 20Kerene taumata e nẹ̌gěllịu arenge su patikụ binatang su rul᷊unge ringangu kinoaěng. Kaiso tawẹ u sorong sěmbaụ bọu tal᷊oaran sire kụ makoạ hapị e kụ mẹ̌tatal᷊ahino makoạ sumbalane.
21Tangu Mawu Ruata e napẹ̌tikịu taumata pinakal᷊ěnabẹ̌, kụ těntal᷊angke i sie kạtikị e, Mawu Ruata e něngal᷊ạ husụ e sěmbua wọu wal᷊unangu taumata ene, mase ěnnạ e nitamingu ghěsi e. 22Bọu husụ ene tangú, Mawu Ruata e něluhudẹ̌ sěngkatau wawine, kụ niwawane sorong anun taumata ene. 23Tangu nẹ̌berạ e taumata ene,
”Ini e i sie taumata e kụ mẹ̌sul᷊ungu iạ e
ruhine wọu ruhiku ringangu ghẹ̌sine wọu ghẹ̌siku.
Takụ isěbạ i sie wawine, ual᷊ingu i sie kai nial᷊ạ bọu esẹ.”#2:23: Su ral᷊ungu werang Ibrani bawera waugu esẹ ute kai ISH, dingangu wawera waugu wawine ute kai ISHA.
24 #
Mat. 19:5; Mrk. 10:7-8; 1Kor. 6:16; Ef. 5:31 Ual᷊ingu ene tau esẹ e maněntang i amange ringangi ninange, kụ mẹ̌těngkasěmbaụ dingangu kawinge kụ irẹ̌dua e makoạ sěmbaụ. 25Esẹ dingangu wawine e těntol᷊e, kai i sire e tawe nakapěndang mamea.
Nke Ahọpụtara Ugbu A:
PĚNDARIADI 2: SXN
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
@ LAI 2003