YOHANES 1
1
Nihyet di bindei dino tungwatu nya igyai niyaijo nijep
1Habiei ei nimbie him nipou tirigi Allah pai tes dihyeisi dini bigyo ne Nihyet No rinaha. Nihyet dima ningat rin bit Allah ba, noyam kin Noni cem. 2Nihyet kin Allah yahacem Yo rinaha habiei ei nimbie him. 3Allah pai tes mun di hagom tug hon Noni ba, pai tes mun nyeng gom njiriek Noni bi. 4Nihyet dima ne nibousi mem niyaijo nijep ri. Niyaijo nijep dima ne nipigati di piga ei tungwatu nya ingonti ri. 5Nipigati dima piga ei nidinditi noro bit bon nidinditi mu#1:5: Nipas kep bit bon nidinditi mu cem kei lene nipas kep bit bon nidinditi ningon dorti tut cem kei. nipigati kan bi.
6 #
Mat. 3:1; Mrk. 1:4; Luk. 3:1-2 Mpe dima ne Allah cuk Yohanes kwei leu api noni tri tut Allah nihyet. 7Ba, Yohanes kwei tri tut nipigati dima bak tungwatu nya leu binhyepo yo di imiap nihyet yahagom ingon jo kep nipigati. 8Yohanes ne nipigati dima rin bi noro kwei tri tut nipigati he. 9Nipigati dima ne nipigati di nijit rin ba, kwei ei dihyeisi dini leu binhyepo piga ei tungwatu nya yahagom ingonti.
10Nihyet No rinaha ei dihyeisi dini. Allah pai tes mun di hagom tug hon Noni noro tungwatu nya ingat igbit Noni bi. 11Noni kwei ei nitimieisi noro Nide mben igya um Noni bi. 12Lo, tungwatu nya bihi igya um Noni leu api iba ingon com Noni. Gima rino Noni bindei ba, idem mem gima inok Allah nimunggwom bat nya. 13Yoni inok nimunggwom bat nya tug hon nisrek leu tungwatu nyati ba, tug hon tungwatu nya ingut kanti cem bi. Noro Allah bindei ba, igyai niyaijo nijep.
14Nihyet dima luei nitta binok tungwatu ba, kwei bong bit nye. Nyeni ingat nikei-kau-keisi di Nicig yai biNoni lewo Noni ne Nipmot nimig gom ngat ri. Nipmot singat tut nye nindig bibor ba, Nongkom ndo Allah ningat titut yam brei binye. 15Yohanes tri tut Noni bipai “No dima ri. No di dipai sut bipia Noni miya abia kep da kwei ba, ninyeng jei bibor dor njiriek da lewo No rinaha nipou tirigi dipmem srek tut da bigyo.” 16Nihyet dima nisingat tut nyeti bindei ba, Noni njei mun di kei binye sindam buug hon nohonti bi. 17Ide Tuhan yai nicukti binye tug hon Musa noro ndo nisingat tut nyeti kin Allah de ningon gomti brei binye tug hon Yesus Kristus. 18Hi ngat Allah bou niyai him bi sren. Noro Nipmot nimig gom ngat di ya kui Nicig binok gom kin Allah cem ndo Nicig brei binye.
Yohanes di tur tungwatu nya ei minyeiti tri nihyet
(Mat. 3:1-12; Mrk. 1:1-8; Luk. 3:1-18)
19Nibou mben Yahudi nya ei minu ndig Yerusalem isok ighyet ei imam nya kin yo di intun Lewi him dip bak Yohanes bihig ser noni “Nani tou i?”
20Yohanes buhup brei biyok “Dani ne Nibou Ndig di teu tungwatu nya biyai niyaijo nijep biyok rin bi.”
21 #
Ul. 18:15, 18; Mal. 4:5 Ihig ser noni bu “Gi nok lene nani tou i? Elia e?”
Noni buhup “Dani ne Elia cem bi.”
Ihig ser noni mbigom bu “He nani ne Nabi di Mipbor Ngat pima rin e?”#1:21: Nipas kep Nabi di Mipbor Ngat pima rin e?: Mben Yahudi ingon ya mem nabi di mipbor ngat gom di mitau kwei bitri tut Nibou Ndig di teu tungwatu nya biyai niyaijo nijep biyok nikweisi.
Yohanes buhup “Dani ne bi.”
22Lene ipai binoni “Gi bi ne apai igbit anyeng binye. Lewo suar ningkwei hanyen binibuhup yo di icuk nye kwei ighyet. Apai sut nanti binye i?”
23 #
Yes. 40:3
Yohanes buhup “Dani ne no di Nabi Yesaya pai sut ri. Noni pai,
‘Tungwagom nihyet tibim kwei leu iggum ndigsi bipai bipia ma jitin puig di sren kei mem Tuhan nimbutti.’ ”
24Gima rino yo di Farisi nya icuk yok kwei,#1:24: Nipas kep Farisi nya icuk yok kwei, cem kei lene nipas kep gi ikwei dima ne Farisi nya ibou poi rin, cem kei. 25ihig ser Yohanes mbigom bu “Gino nani ne Nibou Ndig di teu tungwatu nya biyai niyaijo nijep biyok kin Elia kin Nabi di Mipbor Ngat pima cem bi ne nggon rino atur tungwatu nya ei minyeiti i?”
26Yohanes buhup “Ditur tungwatu nya ei minyeiti noro No di jingat igbit bi No ya ei jikieti. 27Noni ya abia kep da. Dem mem dikwek Nide srop leu nimig jou bi.”
28Mun dini yok hagom pek kep mem yok ei minu mien Betania#1:28: Nipas kep Betania ndo tut minu mien gom di jo ei Minyei Yordan nite dima ug ei bei mpia nipriti ba, ninyeng noyam kin minu mien di jo dideu Yerusalem. ei Minyei Yordan nite dima ug ei bei mpia nipriti. Gima ne mpia ttou nsi gom di Yohanes tur tungwatu nya ei minyeiti ei ri.
Domba Pmot Allah de
29Njapti kui bu ne Yohanes ngat igbit Yesus tirigi ttau kwei. Noni pai biyok “Jingat i! Domba Pmot Allah de di kos ser tungwatu dihyeisi dini ide sisar No rima! 30No di dipai sut bipia ya abia kep da ba, ninyeng jei bibor dor njiriek dinyeng lewo Noni No rinaha nipou tirigi dipmem srek tut da bigyo pima ri. 31Nipou ne dikan tut ninyeng bi. Noro dikwei tur tungwatu nya ei minyeiti leu binhyepo dibindo Noni brei bak mben Israel.”
32Yohanes tri tut mun di noni ngat bou niyai him bipai “Dingat Allah Ninnei di dwop juk nok hakimoi leu mpia-bbed him biteu ei Yesus dip leu api dimba hanyen ug bi. 33Mpe dima lene dikan igbit Noni bi. Noro Allah di cuk da kwei mem gima ditur tungwatu nya ei minyeiti pai bida ‘Mporo angat Allah Ninnei di dwop juk bigwam ei tungwagom dip leu api dimba hanyen ug bi. No dima rino tur tungwatu nya ei Ninnei Gi Kwesti.’ ” 34Yohanes pai biyok “Dingat mun dima yok hagom bou diyai him tu. Gima rino dipai bije bipia Noni ne Allah Nipmot ri.”
Yo di igya kui Yesus bibie nya
35Njapti kui bu lene Yohanes kin yo di igya kui noni ibou can ingat rin ei mpia ttou nsi dima hanyen. 36Tirigi Yohanes ngat Yesus di njiriek noni lene pai “Domba Pmot Allah de pima rima!”
37Ibou can di igya kui Yohanes pima ikes noni ei leu bibit Yesus. 38Yesus ngat yo cin di ibit Noni lene hig simber yok “Nggon rino jibit Da i?”
Leu api ibuhup “Rabi e, abong ei siritou i?” (Ninyeng rabi noyam kin ninyeng guru.)
39Noni buhup “Jikwei ngat.” Gima rino ibit Noni bingat igbit nibongti leu api ibit bong lewo ug ei jam bitai ba, mpia cut tu.
40Tungwagom leu ibou can di imiap Yohanes nihyet bibit Yesus pima rino Andreas di Simon Petrus nikinjoi. 41Noni ug nggok ser nikindig Simon haninyai bipai bak “Nyeni nuum Nibou Ndig di teu tungwatu nya biyai niyaijo nijep biyok di tungwatu nya ijem ninyeng Kristus tu.” 42Leu api noni buwak Simon bikwei ngat Yesus.
Yesus ngig niyai kep Simon lene pai bak “Anyeng Simon ba, acig ninyeng Yona. Noro hon kep ammani kui ne ijem anyeng Kefas bu.” (Ninyeng Kefas noyam kin ninyeng Petrus ba, ndo tut nungug tigya.)
Yesus hig Filipus kin Natanael kwei bibit Noni
43Njapti kui bu lene Yesus kos tut ningon kanti mem gima ug ei hanjop Galilea. Noni ttau kep Filipus bipai binoni “Akwei bit Da.” 44Filipus nitimieisi leu minu mien Betsaida ba, Andreas kin Petrus ibong ei sirima. 45Filipus ug nggok ser Natanael bipai binoni “Nyeni nuum tungwagom di Musa pas tut Noni ei Puig Yahudi nicukti ba, nabi nya cem ipas tut Noni. Ninyeng Yesus leu minu ndig Nazaret ba, nicig ninyeng Yusuf.”
46Noro Natanael srep “Bon mun di kei hi kwei leu Nazaret e?”
Filipus buhup “Akwei suug ngat i.”
47Yesus ngat Natanael di kwei ndam Noni lene pai sut noni “Jingat i! No dini ne mben Israel ningat-ngat rin ba, niris mun bak tungwatu nya jo ei Noniti bi.”
48Natanael buhup “Notou akan igbit tut da i?”
Yesus buhup “Aponi tirigi Filipus buwak na kwei bigyo ne dingat na tirigi agwam kui biei ara dima tu.”
49Natanael buhup “Na di Guru e, jo nibreisi bipia Nani ne Allah Nipmot ba, mben Israel ide Nibou Ndig cem ri!”
50Yesus hig ser noni “Angon jo kep Da drek dip gi dipai sut na bipia dingat na tirigi agwam kui biei ara dima tu e? Mporo ma angat mun di bon ninyeng dor njiriek gima di mipek kep mem na bu yo!” 51#Kej. 28:12 Yesus pai bu “Ma jiyok ngon kep lewo dipai nijit-jau bije bipia mijingat mpia-bbed him kau leu lene Allah de malaikati nya ikui-juk nyen biti Munggwom Tungwatu Nipmot noyam kin iti lin.”
Nke Ahọpụtara Ugbu A:
YOHANES 1: HAD
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye