मत्ती 5
5
यीशु मसीह रा पहाड़ी उपदेस
1यीशु ने जां भीड़ दिख्खी तां से तिन्हा लोक्कां जो सखाणे तांइ फाट्टा पर चढ़ी गे ते तित्ते बेई गे, ते तिन्हेरे चेल्ले तिन्हेरे का आये, 2तां यीशु तिन्हा जो उपदेस दैणा लगे।
धन्न वचन
तिन्हा ने बोल्लेया
3“धन्न हिन से, जे जाणदे कि तिन्हा जो परमेश्वर री जरुरत है, किजोकी स्वर्ग रा राज तिन्हेरा ही है।
4धन्न हिन से, जे मात्तम करदे हिन, किजोकी परमेश्वर ने तिन्हा जो सांती दैणी।
5धन्न हिन से, जे निम्ते हिन, किजोकी तिन्हा ने परमेश्वर रे बणाए जाणे वाली नौई दुनिया रे उत्तराधिकारी होणा।
6धन्न हिन से, जे धार्मिकता रे भूख्खे अते प्यासे हिन, किजोकी परमेश्वर ने तिन्हा जो रजाणा।
7धन्न हिन से, जे दयालू हिन, किजोकी परमेश्वर ने तिन्हा पर दया करणी।
8धन्न हिन से, जिन्हेरे मन सुच्चे हिन, किजोकी तिन्हा ने परमेश्वर जो दिखणा।
9धन्न हिन से, जे मेल करांदे हिन, किजोकी तिन्हा जो परमेश्वर रे बच्चे बोल्लेया जाणा।
10धन्न हिन से, जिन्हा जो धार्मिकता री जिन्दगी जीणे री वजह कने तंग कित्तेया जांदा, किजोकी स्वर्ग रा राज तिन्हेरा ही है।”
11“धन्न हिन तुसा, जां मेरे चेल्ले होणे री वजह कने लोक्कां ने तुसा जो बेइज्जत करणा ते तंग करणा ते झूठ बोल्ली करी तुसा रे खिलाफ हर तरह री गल्लां बोलणी, 12तां खुस ते मगन होई जायो, किजोकी तुसा तांइ इधेरे बदले स्वर्ग अन्दर इक्क बड्डा ईनाम है। तिन्हा ने उन्हा भविष्यद्वक्ता जो जे तुसा का पैल्ले थिये इसी तरिक्के तंग कित्तेया थिया।”
लूण ते रौसनी कने तुलना करणा
13“तुसी दुनिया रे लोक्कां तांइ लूण सांई हिन, पर जे अगर लूण रा स्वाद ही बिगड़ी जाओ, तां फिरी तिस्स जो लूणका नी कित्तेया जाई सकदा? फिरी से कुसी भी कम्म जोग्गा नी रैहन्दा सिर्फ इधेरे कि तिसजो बाहर सूटी दित्तेया जाओ ते मणूआं रे पैरां हेठ आई जाओ। 14तुसा दुनिया रे लोक्कां तांइ इक्क लौ सांई हिन, इक्क इदेया सहर जे पहाड़ पर बस्से रा है, जे लूकाया नी जाई सकदा। 15मणू दीया बाली करी टोकरी रे हेठ नी रखदा पर दीवट पर रखदा तां से पूरे घरे रे लोक्कां जो लौ दिंदा। 16इय्यां ही तुसा री लौ मणूआं रे सामणे चमकणा चाएदी कि से तुसा रे भले कम्मां जो दिख्खी करी तुसा रे प्यो री, जे स्वर्ग अन्दर हिन, बड़ाई करण।”
मूसा जो दित्ते रे कानून रा पूरा होणा
17“इय्यां मत समजदे, कि मैं परमेश्वर रे कानून या भविष्यद्वक्ता री कताबां जो खत्म करणे तांइ आये रा है, मैं उन्हा जो खत्म करणे तांइ नी, पर पूरा करणे तांइ आये रा है। 18किजोकी मैं तुसा जो सच बोलदा कि जां तांइ आसमान ते जमीन टली नी जांदे, तां तांइ परमेश्वर रे कानून री इक्क सियारी या इक्क बिंदी भी, जां तांइ से पूरी नी होई जांदी, तां तांइ नी मिटी नी सकदी, 19इधेरे तांइ जे इन्हा छोटे का छोटे हुक्मां बिच का कुसकी इक्क जो नी मनगा, ते तिय्यां ही होरणी मणूआं जो सिखांगा, तिनिए स्वर्ग रे राज अन्दर सबका छोटा होणा, पर जे कोई इन्हा हुक्मां पर चलगा ते इन्हा जो सिखांगा, तिस्स जो ही स्वर्ग राज अन्दर महान मन्नेया जाणा। 20किजोकी मैं तुसा जो बोलदा, जां तांइ तुसा री धार्मिकता, शास्त्रियां अते फरीसी लोक्कां री धार्मिकता का बधी करी ना हो, तां तांइ तुसा स्वर्ग रे राज अन्दर नी जाई सकदे।”
खून ते गुस्सा करणे री सजा
21“तुसां सुणी बैठ्ठे रे हिन कि पुराणे जमाने बिच परमेश्वर ने असा रे बुजुर्गां कने बोल्लेया थिया, कुसकी रा खून मत करदे, किजोकी जे कोई अगर कुसकी रा खून करगा तां तिसजो कचेरी बिच सजा दित्ती जाणी। 22पर मैं तुसा जो बोलदा कि जे कोई अपणे भाई पर गुस्सा करगा, तिसजो सजा मिलणी, अते जे कोई अपणे भाई जो निकम्मा बोल्ले तिसजो कचेरी बिच सजा दित्ती जाणी, अते जे कोई अपणे भ्याल जो बेवकूफ बोलगा, तिसजो नरक री आग्ग बिच पाया जाणा। 23इधेरे तांइ जे तू वेदी पर अपणी भेंट चढ़ाया करदा हो अते तिज्जो चेत्ता आओ कि तेरी वजह कने तेरे भ्याल रे दिल बिच तेरे खिलाफ किच्छ है, 24तां अपणी भेंट तित्ते ही छड्डी दे ते पैल्ले जाई करी अपणे भ्याल कने सुलह् कर अते फिरी आई करी अपणी भेंट चढ़ा। 25तेरा दुश्मण तिज्जो कचेरी लेई चले रा हो अते जां तुसा रस्ते बिच हो, तां तिसजो उस्सी बेल्ले अपणा दोस्त बणाई लै कुदखी इय्यां ना हो कि से तिज्जो हाकिम का देई देयो ते फिरी हाकिम सपाई जो, ते तिज्जो जेल होई जाओ। 26मैं तिज्जो सच बोलदा तू जेल का तां तांइ नी छूटणा जां तांइ तू इक्क-इक्क पैसा चुकाई नी दिंगा।”
व्यभिचार रे बारे बिच शिक्षा दैणा
27“तुसां जाणदे कि आज्ञा दित्ती गई थी कि, व्यभिचार मत करदे, 28पर मैं तुसा जो ए बोलदा, कि जे कोई कुसकी जनानी जो गंदी नजर कने दिखदा तां से अपणे मनां अन्दर पैल्ले ही तिस कने व्यभिचार करी चुक्केया। 29जे तेरी सज्जी हाख्खी पाप करणे री वजह बणदी, तां तिसजो कड्डी करी सूटी दे किजोकी तेरे तांइ ए ही खरा है कि तेरे सरीर रे अंगा बिच का इक्क अंग नास होई जाओ अते तेरा सारा सरीर नरक अन्दर नी सुट्टेया जाओ। 30जे तेरा सज्जा हत्थ पाप करणे री वजह बणदा, तां तिसजो कट्टी करी सूटी दे किजोकी तेरे तांइ ए ही खरा है कि तेरे अंगा बिच का इक्क नास होई जाओ ते तेरा सारा सरीर नरक अन्दर नी सुट्टेया जाओ।”
तलाक रे बारे
31“ए भी बोल्लेया गे रा थिया, जे कोई अपणी लाड़ी जो तलाक दैणा चाओ, तां से तिसजो त्याग-पत्तर देयो। 32पर मैं तुसा जो ए बोलदा कि जे कोई अपणी लाड़ी जो व्यभिचार जो छड्डी करी कुसकी होरसी वजह कने तलाक दिंगा, तां से तिसका व्याभिचार करवांदा अते जे कोई तिस छड्डे री जनानी कने ब्याह् करगा, से तिस कने व्याभिचार करदा।”
कसम मत खांदे
33“फिरी तुसा सुणी बैठ्ठे रे हिन कि असा रे बुजुर्गां जो बोल्लेया गेया थिया, कि झूठ्ठी कसम मत खांदे, बल्कि प्रभु कने कित्ते री कसमां जो पूरा कर। 34पर मैं तुसा जो ए बोलदा कि कदी कसम मत खांदे नां तां स्वर्ग री, किजोकी से परमेश्वर रा सिंहासन है, 35नां धरती री, किजोकी से तिन्हेरे पैर रखणे री पीड़ी है, ना यरुशलेम सहर री, किजोकी से महाराज्जे रा सहर है। 36अपणे सरे री भी कसम मत खांदे किजोकी तू इक्क बाल जो भी नां चिट्टा अते नां ही काला करी सकदा। 37पर जे तू हाँ चाह्ंदा तां हाँ बोल अते नां चाह्ंदा तां सिर्फ नां बोल, किजोकी जे किच्छ भी इसका जादा हुन्दा से शैतान रे पास्से का हुन्दा।”
बदला मत लिंदे
38“तुसां ए भी जाणदे कि आज्ञा दित्ती गई थी कि, हाख्खी रे बदले हाख्खी, अते दांद्द रे बदले दांद्द। 39पर मैं तुसा जो बोलदा कि दुष्ट मणू रा सामणा मत करदे पर जे कोई तेरे सज्जी खाड्डी पर चांड़ मारो, तिसेरे पास्से दुई खाड्डी भी करी दे। 40अते जे कोई तेरे पर मुकद्दमा चलाई करी तेरा कुरता भी उतारणा चाओ, तां तिसजो अपणी लोई तक देई दे। 41जे अगर कोई सिपाई तिज्जो जबरदस्ती इक्क किलोमीटर लेई जाये, तां तिसेरे कने दो किलोमीटर दुर चली जा। 42जे कोई तेरे का मंगो, तां तिसजो दे, अते जे कोई तेरे का उधार लैणा चाओ, तिसजो पीठ्ठ मत दिख्खा।”
दुश्मणा कने प्यार करणा
43“तुसां ए भी जाणदे कि आज्ञा दित्ती गई थी कि, अपणे गुआन्डियां कने प्यार करो, अते अपणे बैरियां कने नफरत, 44पर मैं तुसा जो बोलदा, अपणे दुश्मणा कने प्यार करो अते जे तुसा जो तंग करदे, तिन्हा तांइ प्रार्थना करो। 45ताकि तुसा अपणे पिता परमेश्वर रे बच्चे बणी सको जे स्वर्ग बिच हिन, किजोकी से ठीक लोक्कां पर ते बुरे लोक्कां पर अपणा सूरज चमकान्दा, अते धार्मिक अते अधर्मी दोन्नां लोक्कां पर बरखा बरसांदे। 46किजोकी जे तू उन्हा कने ही प्यार करगा जे तेरे कने प्यार करदे हिन, तां तुसा जो कै ईनाम मिलणा? कै इय्यां ही चुंगी लैणे वाले नी करदे? 47जे तुसा सिर्फ अपणे भ्यालां जो ही नमस्ते करदे, तां कुण जदेया कोई बड्ड़ा कम्म करदे? कै गैर यहूदी रे मणू भी इय्यां ही नी करदे? 48इधेरे तांइ जरुरी ए है कि तुसा सिद्ध बणो, जिय्यां तुसा रा पिता परमेश्वर सिद्व है जे स्वर्ग बिच हिन।”
Nke Ahọpụtara Ugbu A:
मत्ती 5: CDHNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.