Yohane 3
3
Yesu ndi Nikodemo
1Ndipo kwenga munthu wamu ŵaFarisi, zina lake Nikodemo, murongozgi wa ŵaYuda. 2Munthu uyu wanguza kwaku Yesu ndi usiku, wangumnene, “Rabi, tiziŵa kuti ndimwe msambizgi wakutuwa kwaku Chiuta: chifukwa palive yumoza yo waziŵa kuchita visimikizgu vyo imwe muchita, kwambura kuti Chiuta we nayo.” 3Wangwamuka Yesu wangumnene, “Nadi, nadi, ndikuneneske, munthu kuti waziŵa cha kuwona Ufumu waku Chiuta kwambura kuti wapapika so.” 4Wamnene Nikodemo, “Wangaziŵa uli munthu kupapika po we khongwe? Kumbi waziŵa kusere kachiŵi mu nthumbo ya anyina, ndi kupapika?” 5Wangwamuka Yesu, nadi, ndikuneneske, “Kwambura kuti munthu wapapika ndi maji ndi Mzimu, kuti waziŵa cha kusere mu Ufumu waku Chiuta. 6Cho chapapikako ku nyama ndi nyama; ndipo chochapapikako ku Mzimu ndi mzimu. 7Ungazizwanga cha kuti ndingukunene, ‘Utenere kupapika so.’ 8Mphepu yiputa kweniko kose yikhumba ndipo utuvwa kuuziya kwake, kweni kuti uziŵa cha ko yituwa, ndi ko yitiya: we viyo yose wakupapika ku Mzimu.” 9Wangwamuka Nikodemo, “Vingaŵa uli vyenivi?” 10Yesu wangwamuka wangumnene, “Ndiwe msambizgi waku Yisraele, ndipo kuti uziŵa ivi cha? 11Nadi, ndikuneneske, tirongoro cho tiziŵa, ndipo chenicho tawona tisimikizga; kweni chisimisimi chidu kuti muronde cha. 12Kuti muvwana ndi ine cha po nditikuneniyane ndi vinthu vya charu ichi mungavwana nani uli nanga ndichimuneni yane ndi vinthu vyakuchanya? 13Chifukwa palivi yumoza yo wakweriyako kuchanya, kweni mwana wa munthu pe yo wasikako ku kuchanya. 14Nge ndimo Mosese wangusoske njoka yamu bozwa, viyo kutenere Mwana wa munthu kusoskeka: 15alinga kuti yose wakuvwana mwaku iyo waŵe ndi umoyo wamuyaya.”
16Pakuti Chiuta wangwanja viyo charu, viyo kuti wangupaska Mwana wake wakuwayija, alinga kuti yose wakuvwana mwaku iyo wareke kutayika, kweni waŵe ndi umoyo wamuyaya. 17Chifukwa Chiuta wengavi kumtuma Mwana wake mu charu, kuti weruzge charu; kweni kuti charu chitaskikiye mwaku iyo. 18Wakuvwana mwaku iyo kuti wateruzgika cha, wakureka kuvwana weruzgika kali, chifukwa walive kuvwana mu zina la Mwana wakuwayija waku Chiuta. 19Ndipo ichi ncheruzgu cho, kuti Kungweruka kwaza mu charu, kweni ŵanthu ŵangwanja mdima ukongwa kwakuruska Kungweruka ko; chifukwa zenga ziheni nchitu zawo. 20Pakuti yose wakuchita uheni watinkha Kungweruka ndipo kuti watuza ku Kungweruka ko cha, vinu nchitu zake zingasuskika. 21Kweni yo ngwakuchita uneneska watuza ku Kungweruka ko, alinga kuti nchitu zake zirongoleke, kuti zachitikiya mwaku Chiuta.
Yesu ndi Yohane Mbatizi
22Pavuli paku vyenivi Yesu wanguza, ndi ŵasambizi ŵake, mu charu cha Yuda; wangutandara nawo kweniko, ndipo wabatizanga. 23Yohane nayo wabatizanga mu Ainone pafupi ndi Salima, pakuti ghengako maji ghanandi; ndipo ŵanthu ŵazanga ndi ŵabatizikanga. 24Chifukwa Yohane wenga wandapong'eke mu ulinda.
25Viyo kunguŵapo kufumbana kuchiri ku ŵasambizi ŵaku Yohane ndi mu Yuda ngana pa katozgedu. 26Ndipo wanguza kwaku Yohane, wangumnene, “Msambizgi, munthu yo wenga nawe sirgha liya Yordane, kwaku yo iwe wapanikizganga, awona, wabatiza, ndipo wose wamotoke kwaku iyo.” 27Wangwamuka Yohane ndi wanguti, “Kuti munthu wangaronde kanthu cha, kwambura kuti kapaskika kwaku iyo kutuwa kuchanya. 28Imwe mwaŵeni mutindipanikizga kuti ndingunena, ine kuti ndine Kristu cha, kuti ndine wakutumika paurongo pake. 29Yo ngwakuŵa ndi mwali ndi mweni-nthengwa: kweni bwezi la mweni-nthengwa, lo litumapo ndi kumuvwa, limwemwete ukongwa chifukwa cha liu la mweninthengwa yo: chifukwa chenichi chimwemwe changu chifiskika. 30Kutenere iyo kukuwa, kweni ine kusika.” 31Yo ngwakutuwa kuchanya we pachanya paku wose; yo ngwa panupasi ngwapanupasi, ndipo warongoro vyapanupasi; yo ngwakutuwa kuchanya we pachanya paku wose. 32Wapanikizga chenicho wawona ndi wavwa, kweni chipanikizga chake kuti waronde yumoza cha. 33Yo waronde chipanikizga chake, watijizighiriya kuti Chiuta ndiyo mneneska. 34Chifukwa mweniyo Chiuta wamtuma, warongoro mazu ghaku Chiuta: chifukwa kuti wapaska Mzimu kwamweso cha. 35Dada watumwanja Mwana, ndipo wapaska mu janja lake vinthu vyose. 36Yo ngwakuvwana mu Mwana we nawo umoyo wamuyaya; kweni yo wareka kuvwana mu Mwana, kuti wamwona umoyo cha, kweni kandundu kaku Chiuta kajaririya paku iyo.
Nke Ahọpụtara Ugbu A:
Yohane 3: TongaMw
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Bible Society of Malawi