Eziptɩ tẽw yib 1
1
NAAŊMƖN SÕW NA A ƖSƖRAYƐL NƖBƐ YI ZAA A EZIPTƖ TẼW PƲƆ
1:1—15:21
A Ɩsɩrayɛl nɩbɛ lɩɛb'ɩ gbãgbaar a Eziptɩ tẽw
1A Zakɔb bɛ mɩ̀ na bʋɔlɛ Ɩsɩrayɛl a bibiir na wa a Eziptɩ tẽw nɩ a bɛ sãà a yée n'ɩ á ŋá: 2Urubɛn, Sɩmɩ̃ɔ, Levi nɩ Zuda. 3Ɩsakaar, Zabulɔ̃ nɩ Bɛ̃zamɛ, 4Dan nɩ Nɛfɩtali, Gadɩ nɩ Asɛɛr. Ŋa za nɩ a ʋ yir dem tɩ nɛbɛ. 5A Zakɔb yir dem za tɩ ɩ n nɩbɛ lɩz'a ata nɩ pie. A Zakɔb bidɛb kãw na dɩ Zuzɛb a tɩ dãw na be a Eziptɩ. 6Al pùorí, a Zuzɛb tɩ kpi na, a ʋ yɛbr mɩ̀ kpi, tɩ lãwnɩ a ʋlɩ daar nɛ nɩbɛ za. 7A Ɩsɩrayɛl bibiir tɩ dɔw na yɛ̀r a pùorí tɩ yãwmɛ bɛ tɛr tɛwr ɛ, ɛ́ tɛr fãw yaga za. Bɛ tɩ paal'ɩ a tẽw za.
8Na-paala#1:8 A na-paala ŋa tɔ̃w na ɩ n Aramɩsɛsɩ 2 sob. Nyɛ̃ Nɩ-t 7.18. tɩ ìr'a dɩ naalʋ a Eziptɩ tẽw, nãà na bɛ tɩ dãw bãw a Zuzɛb a. 9Ʋ tɩ yel'ɩ a ʋ nɩbɛ: «Nyɩ nyɛ̃, a Ɩsɩrayɛl nɩbɛ yãwmɛ na zuo tɩ, ɛ́ tɛr fãw zuo tɩ. 10Nyɩ ɩ tɩ bɔ yã, ɩ kɛ̀ bɛ ta cãà yãwmɛ dɔwlɛ ɩ. Alɛ bɛ ɩ lɛ, ɛ́ zɛbr wa ɩ mɛ̃ a ìr'a a, bɛ na pʋɔ nɩ a tɩ dɔ̃ dem pʋɔ zɛb'ɩ tɩ, ɛ́ yi zaa a tẽw pʋɔ.» 11Lɛ n'a a Eziptɩ tẽw dem tɩ kaa ír tõ-tõ-nɩ-bɛrɛ, kɛ́ bɛ mɩ́ fɛr a Ɩsɩrayɛl nɩbɛ bɛ tõ tõ-kpɛn a wõ bɛ. À à ŋá n'a a Ɩsɩrayɛl nɩbɛ tɩ mɛ a Pitom#1:11 Pitom nɩ Aramɩsɛsɩ: A tẽ-bɛrɛ ayi á ŋá be n a Nɩl man-gbɛ́r saa-pɛrɩ́-gʋba-lowr nɩ a saa-pɛrɩ́ cara pʋɔ. nɩ Aramɩsɛsɩ tẽ-bɛrɛ na ɩ a Faarawɔ̃ bʋ̃-dɩrɩ maal-binu ziir a. 12Ɛcɛ a lɛ tɔr za bɛ na tɩ dɔwrɛ bɛ a n'a, bɛ nɩ̃ɛ lɛb tɩ bãw yãwmɛ dɔwlɛ, ɛ́ paalɛ a zie. A ɩ a lɛ a Eziptɩ tẽw dem tɩ zɔrɛ bɛ. 13A Eziptɩ tẽw dem tɩ dɔwr'ɩ a Ɩsɩrayɛl nɩbɛ mɛ̃ gbãgbaar nɛbɛ a. 14Bɛ tɩ ɩ na a bɛ nyɔ-vʋʋrʋ bɛ nʋmɛ towtow ɛ, a tõ-kpɛn bɛ na tɩ ƴãw bɛ tone a ƴãw: yawra nawfʋ, birkiri ŋmab, póru tõ-bʋʋrɛ za, nɩ gbãgba-tome za bɛ na tɩ fɛr ƴãw bɛ tone a.
A Faarawɔ̃ bɔbr'a k'ʋʋ kʋ a Ɩsɩrayɛl nɩbɛ dɛbli
15A Ebre nɩbɛ tɩ tɛr'ɩ pɔw-dɔwrbɛ ayi, a kãw dɩ kɛ́ Sɩfɩra, ɛ́ a kãw kɛ́ Puwa. A Eziptɩ tẽw nãà tɩ yel'ɩ 16à ŋá kʋ̀ bɛ: «Nyɩmɛ mɩ́ wa dɔwr a Ebre pɔwbɛ a, nyɩɩm mɩ́ maal jɩ́r a bie: ʋlɛ wa ɩ dɛble a, nyɩɩm kʋ ʋ, ɛ́ ʋlɛ wa ɩ powle a, nyɩɩm bɛr ʋ ʋ vʋʋrɛ.» 17Ɛcɛ a pɔw-dɔwrbɛ tɩ zɔrɛ nɩ a Naaŋmɩn, bɛ bɛ tɩ tu a lɛ a Eziptɩ tẽw nãà na yel a ɩ, ɛ́ bɛr a dɛbli bɛ vʋʋrɛ. 18Lɛ n'a a nãà tɩ bʋɔlɩ a pɔw-dɔwrbɛ wa yel bɛ: «Bʋ̃ʋ n'ʋ so nyɩ ɩ à à ŋá? Bʋnʋ ƴãw n'a nyɩ bɛr a dɛbli bɛ vʋʋrɛ?» 19Bɛ tɩ sɔw ʋ na: «A Ebre pɔwbɛ bɛ ɩ mɛ̃ a Eziptɩ tẽw pɔwbɛ a ɩ. Bɛ kpɛmɛ na, mɩ́ dɔw a bɛ bie ɛ́ a pɔw-dɔwrɛ wa bãw ta.»
20À ŋá n'a a Ɩsɩrayɛl nɩbɛ tɩ yãwmɛ dɔwlɛ cere, ɛ́ tɛr fãw. Naaŋmɩn tɩ maal'ɩ a pɔw-dɔwrbɛ, 21ɩ kɛ̀ bɛ tɛr nɩbɛ, bɛ na tɩ sàw a ʋ nʋɔr a ƴãw. 22Ɛcɛ a Faarawɔ̃ tɩ ƴãw nɩ nʋɔr ŋa kʋ̀ a ʋ nɩbɛ za: «Ebre bi-pɩɩla za na dɔw ɩ dɛble a, nyɩ mɩ́ lɔb ʋ ƴãw a Nɩl#1:22 Nɩl: A Eziptɩ tẽw man n'ʋ dɩ a Nɩl. Nyɛ̃ Yzt 13.10. pʋɔ. Ɛcɛ nyɩ mɩ́ bɛr a powli bɛ vʋʋrɛ.»
Nke Ahọpụtara Ugbu A:
Eziptɩ tẽw yib 1: DBDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
La Bible en Dagara © Alliance Biblique du Burkina Faso, 2013.