Eziptɩ tẽw yib 10
10
A dɔwrʋ ani sob: a sãsoge
1A Sore tɩ yel'ɩ a Moyiir: «Cen a Faarawɔ̃ zie. Mãa n'ʋ ƴãw ʋlɛ nɩ a ʋ tõ-tõ-bi-bɛrɛ tɛr a zu-kpɛnʋ, k'ɩ̃ɩ tʋ̃ɔ́ maalɩ a nɔ-ɓãa-yele á ŋá za a bɛ sɔgɔ. 2Lɛ n'a fʋ mɩ̀ na tʋ̃ɔ́ manɩ kʋ̀ a fʋ bibiir nɩ a fʋ yan, a lɛ ɩ̃ na ɩ a Eziptɩ tẽw dem a, nɩ a lɛ ɩ̃ na maalɩ a ɩ̃ nɔ-ɓãa-yele a bɛ sɔgɔ a. À ŋá n'a nyɩ na bãw kɛ́ mãa n'ɩ a Sore.»
3A Moyiir nɩ a Aarɔ̃ tɩ cen na tɩ páw a Faarawɔ̃ yel ʋ: «À ŋá n'a a Sore, a Ebre mɩnɛ Naaŋmɩn, ƴɛ̀rɛ a fʋ zie: “Debor daar'a fʋ na zawrɩ a fʋ tʋɔra-siwru a ɩ̃ niŋé tɩ ta? Bɛr a ɩ̃ nɩbɛ bɛ cen tɩ maalɩ mɛ̃. 4Fʋ̃ʋ wa cãà zawrɩ na bɛr a ɩ̃ nɩbɛ bɛ cen a, bio tɛwr, ɩ̃ na ɩ na sãsoge wa a fʋ tẽw pʋɔ. 5A na pàw nɩ a tẽsɔw za, ʋ kʋ̃ cãà sãá ɩ. A na baa na 'wɔb a bʋ̃-kʋ́ɔrɩ al a sa-bi-kube na bɛ sãw bɛr a#10:5 Nyɛ̃ 9.32., a bɛ cɩɛr bom bɛrɛ a tɩɩr na bule a nyɩ póru pʋɔ a zu ɛ. 6A na paal'ɩ a fʋ yie, a fʋ tõ-tõ-bi-bɛrɛ yie nɩ a Eziptɩ tẽw dem za yie. Ʋ na ɩ n dɔwr-kpɛ̃ɛ, nɩr na bɛ dãw nyɛ̃ a nyɩ sãàkʋm-kore daar za wa tɔ a dɩ̃a bibir a”.»
A Moyiir tɩ lɩɛb'a tɔl yi a Faarawɔ̃ zie. 7A tõ-tõ-bi-bɛrɛ tɩ yel'ɩ a nãà: «Fʋ yel kɛ́ a nɩr ŋa ƴãw tɩ a dɔwrʋ tɩ ta debor daar? Bɛr a Ɩsɩrayɛl nɩbɛ lɛ, bɛ cen tɩ maalɩ a Sore bɛ Naaŋmɩn! Fʋ cãà bɛ bãw k'aa Eziptɩ tẽw wɩɛr'ɩ a ʋ loba zie ɩ?» 8Bɛ tɩ bʋɔl'ɩ a Moyiir nɩ a Aarɔ̃ bɛ lɛb wa a Faarawɔ̃ zie, ʋ wa yel bɛ: «Nyɩ na tʋ̃ɔ́ na cen tɩ maalɩ a Sore nyɩ Naaŋmɩn. Ɛcɛ ã-mɩnɛ nɛbɛ na cen?» 9A Moyiir yel: «Tɩ za nɛbɛ na cen, pɔlbili nɩ dɛb-nyamɛ, dɛbr nɩ pɔwbɛ, de nɩ a tɩ píir, a tɩ bʋʋr nɩ a tɩ nĩi. Bʋ̃ʋ n'ʋ vɛ̃, cuw n'ʋ a fɛr kɛ́ tɩ maalɩ a Sore ƴãw.» 10A Faarawɔ̃ tɩ lɛb'a yel bɛ: «Ã'hãa, a Sore ʋ be a nyɩ zie! Nyɩ tɩɛr k'ɩ̃ɩ na kʋ̀ nyɩ nɩ sɔ́r mɔlɛ mɔlɛ à ŋá nyɩ tɛr a nyɩ yie dem cen nɩ ɩ? Nyɛ̃, a nyɩ tɩɛrʋ kpɛ n faa. 11Al bɛ ɩrɛ ɩ! A dɛbr tɛwr nɛbɛ na cen tɩ maalɩ a Sore, alɛ na n'a nyɩ bɔbr a.» Lɛ n'a bɛ tɩ diw bɛ bɛ yi a Faarawɔ̃ zie be.
12A Sore tɩ yel'ɩ a Moyiir: «Dɔl a fʋ nũu a Eziptɩ tẽw zu, a sãsoge wa. A wa paalɩ pàw a tẽw, ɛ́ 'wɔb a mʋ̃ɔ al za a sa-bi-kube na jɩɩrɩ bɛr a.» 13A Moyiir tɩ tùr'ɩ a ʋ dabɔl a Eziptɩ tẽw zu, a Sore ɩ saa-pɛrɩ́ sɛsɛb fu a bibi-ɓil za, nɩ a tɩ̃ɩsɔw za. A biɓaara a, a sɛsɛb tɩ wa n nɩ a sãsoge. 14A tɩ pàw nɩ a Eziptɩ tẽw za, ɛ́ dɔm a ziir za. A bɛ tɩ tɛr nʋɔr ɛ: nɩr bɛ tɩ dãw nyɛ̃ sãsoge sɛw a lɛ a koro za ɩ, ɛ́ kʋ̃ nyɛ̃ a sɛw a lɛ a pùorí ɛ. 15A tɩ pàw nɩ a tẽw za a tẽsɔw bɛ tɩ cãà sãá ɩ. A tɩ 'wɔb'ɩ a mʋ̃ɔ nɩ a tɩ-wɔmɛ al za a sa-bi-kube na tɩ bɛr a. A bɛ tɩ cɛ va-sɛbla been kãw za bɛr a tɩrʋ zu nɩ a póru pʋɔ, a Eziptɩ tẽw za pʋɔ ɩ#10:15 A kan-nɛ́ɛ 12-15 ƴãw a, nyɛ̃ Yel-w 9.3..
16A Faarawɔ̃ tɩ bʋɔl'ɩ a Moyiir nɩ a Aarɔ̃ fɔ̃wlɛ wa yel bɛ: «Ɩ̃ sãw nɩ a Sore nyɩ Naaŋmɩn, ɛ́ mɩ̀ sãw nyɩ. 17Nyɩ lɛb maal dɩ a ɩ̃ sãwna suur kʋ̀ m, ɛ́ zɛlɩ a Sore nyɩ Naaŋmɩn, ʋʋ ír a kũu dɔwrʋ ŋa bɛr mɛ̃.» 18A Moyiir tɩ yi n a Faarawɔ̃ zie tɩ puori zɛlɩ a Sore. 19Lɛ n'a a Sore tɩ ɩ mʋ̃tɔ̃w-kpɛb-lowr sɛsɛb fu n fãw, ɓáw a sãsoge tɩ ƴãw a Bàa-kɛkɛɛ kʋ̃ɔ-kpɛ̃ɛ pʋɔ. Sãsowr-been bɛ tɩ cãà a Eziptɩ tẽw za pʋɔ ɩ. 20Ɛcɛ a Sore tɩ ɩ na a Faarawɔ̃ kpãa tobr zawrɩ na bɛr a Ɩsɩrayɛl nɩbɛ bɛ cen.
A dɔwrʋ piwaɩ sob: a lige
21A Sore tɩ yel'ɩ a Moyiir: «Tùr a fʋ nũu cɔw a salom. Lige, a pàw a Eziptɩ tẽw, liw-varkpara na bɛ tɛr tɔ a.» 22A Moyiir tɩ tùr'ɩ a ʋ nũu cɔw a salom, ɛ́ liw-varkpara pàw a Eziptɩ tẽw za bibie ata#10:22 Nyɛ̃ Ssy 105.28 nɩ Yel-w 16.10.. 23Bibie ata a, nɩr bɛ nyɛ̃ ʋ tɔ ɩ, nɩr bɛ cen zie ɩ. Ɛcɛ a zie tɩ nyɛrɛ nɩ a be a Ɩsɩrayɛl nɩbɛ na kpɩɛr a. 24A Faarawɔ̃ tɩ bʋɔl'ɩ a Moyiir wa yel ʋ: «Nyɩ na tʋ̃ɔ́ na cen tɩ maalɩ a Sore. Nyɩ na tʋ̃ɔ́ na tɛr a nyɩ yie dem mɩ̀ cen nɩ, ɛcɛ a nyɩ píir nɩ a nyɩ bʋʋr nɩ a nyɩ nĩi al na be n a ka.» 25A Moyiir sɔw: «Towtow! A fʋ̃ʋ mɩŋa na kʋ̀ tɩ nɩ dʋn tɩ na na tɩ maal'ɩ lãw-taa bagɛ nɩ nyɩw-a-za-bagɛ kʋ̀ a Sore tɩ Naaŋmɩn a. 26Lɛb waar mɩ̀, tɩ na tɛr'ɩ a tɩ dʋn cen nɩ, dʋ̃w been kãw za bɛ cɩɛr a ka ɩ. Bʋ̃ʋ n'ʋ vɛ̃, a al pʋɔ n'a tɩ na tɩ ír maal'ɩ a Sore tɩ Naaŋmɩn. Tɩ na bɛ ta a be sɛr a, a tɩɩm tɛɛ za bɛ bãw abobe n'a a ɩ.»
27Ɛcɛ a Sore tɩ ɩ na a Faarawɔ̃ kpãa tobr bɛ sàw a Ɩsɩrayɛl nɩbɛ na cen ɛ. 28Ʋ tɩ yel'ɩ a Moyiir: «Cen tɔl cen! Taa sàwr ɩ̃ lɛb wa nyɛrɛ fʋ ɛ! Fʋ̃ʋ lɛb wa nɛbr gbɛ́r a ɩ̃ zie, fʋ kpi na!» 29A Moyiir yel: «A lɛ fʋ na yel a n'a, fʋ bɛ lɛb nyɛrɛ mɛ̃ a fʋ niŋé ɩ.»
Nke Ahọpụtara Ugbu A:
Eziptɩ tẽw yib 10: DBDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
La Bible en Dagara © Alliance Biblique du Burkina Faso, 2013.