Eziptɩ tẽw yib 18
18
A Moyiir na tuori a ʋ dɩɛm-sãà a
1A Moyiir dɩɛm-sãà Zetoro na ɩ a Madian bàwr-maalɛ a, tɩ wõ n a lɛ za a Naaŋmɩn na ɩ a Moyiir nɩ a ʋ nɩ-bʋʋrɛ ƴãw a. Ʋ tɩ wõ n a lɛ a Sore na ɩ bɛ yi a Eziptɩ a. 2A Zetoro pɔwyaa Sefora na ɩ a Moyiir pɔw a, tɩ be n a Zetoro zie. A Moyiir tɩ bɛr ʋ na ʋ lɛb cen a ʋ sãà zie 3nɩ a ʋ bidɛbr ayi. A Moyiir tɩ por'ɩ a dãw-niwn sob Gɛrsom, a pɛr lɛ kɛ́ “Nʋʋra-a-ka”. Bʋ̃ʋ n'ʋ vɛ̃, ʋ tɩ yel'a: «Ɩ̃ lɩɛb'ɩ nʋʋra tẽ-sãan pʋɔ». 4Ʋ tɩ por'ɩ a bidɛbr ayi sob kɛ́ Eliezɛɛr, a pɛr lɛ kɛ́ “A ɩ̃ Naaŋmɩn sõwne mɛ̃ na”. Ʋ tɩ yel'a: «A ɩ̃ sãà Naaŋmɩn sõw mɛ̃ na. Ʋ faa mɛ̃ nɩ a Faarawɔ̃ na zɛbr'ɩ mɛ̃ a nuru pʋɔ.»
5A Moyiir dɩɛm-sãà Zetoro tɩ tɛr'ɩ a Moyiir bidɛbr nɩ a ʋ pɔw cen nɩ tɩ páw nɩ ʋ a wɛja-kpalɛ pʋɔ, a Naaŋmɩn tãw ƴãw ʋ na tɩ maalɩ a ʋ pɛnɛ-sɛwr a. 6A Zetoro tɩ ƴãw na bɛ yel a Moyiir: «Mãa Zetoro, a fʋ dɩɛm-sãà, mãa n'ʋ waar a fʋ zie, mãa nɩ a fʋ pɔw nɩ a ʋ bidɛbr ayi.» 7A Moyiir tɩ yi na tuor'ʋ, tɩ gbĩ dume gũu tɩ tɔ tẽw a ʋ niŋé, ɛ́ nyɔw ʋ weri. Bɛ na wa sowri taa ƴã-ɓaarʋ yele baar'a, bɛ kpɛ n a Moyiir pɛn-sɛw pʋɔ. 8Ʋ tɩ manɩ na kʋ̀ a ʋ dɩɛm-sãà a lɛ za a Sore na ɩ a Faarawɔ̃ nɩ a Eziptɩ tẽw nɩbɛ, ɛ́ a ɩ a Ɩsɩrayɛl nɩbɛ ƴãw n'a a, nɩ a kpɩɛrʋ al za bɛ na nyɛ̃ a sɔ́r zu, ɛ́ a Sore faa bɛ a. 9Nʋ̃ɔ̀ tɩ kpɛ n a Zetoro, a vla al za a Sore na tɩ maalɩ a Ɩsɩrayɛl nɩbɛ a ƴãw, ʋ na tɩ faa bɛ a Eziptɩ tẽw nɩbɛ nuru pʋɔ a. 10Ʋ tɩ yel'a: «A Sore tɛr'ɩ puoru, ʋl na faa nyɩ a Faarawɔ̃ nɩ a Eziptɩ tẽw nɩbɛ nuru pʋɔ a. 11Ɩ̃ pãa bãw nɩ ƴɛrɛŋa k'aa Sore ɩ n kpɛ̃ɛ zuo a ŋmɩmɛ al za na baa cɛ a. Ʋ wul'a a sãá, a lɛn daar a Eziptɩ tẽw nɩbɛ na tɩ dɔwrɛ a Ɩsɩrayɛl nɩbɛ a.»
12A Moyiir dɩɛm-sãà Zetoro tɩ maal'ɩ nyɩw-a-za-bàwr nɩ lãw-taa bagɛ kʋ̀ a Naaŋmɩn. A Aarɔ̃ nɩ a Ɩsɩrayɛl nɩ-kore tɩ wa na wa lãw nɩ a Moyiir dɩɛm-sãà dɩ a bàwr-maal-bʋ̃-dɩrɩ a Naaŋmɩn niŋé.
A Moyiir kaa na ír ƴɛ̀r-dɩrbɛ
13A bio daarɩ́, a Moyiir tɩ zɩ̃ na k'ʋʋ dɩ n a nɩbɛ a ƴɛ̀rʋ. A nɩbɛ tɩ gù n a biɓaara tɩ ta a zaanʋɔra, kɛ́ bɛ ta a ʋ niŋé a ƴɛ̀rʋ-dɩb ƴãw. 14A Moyiir dɩɛm-sãà na tɩ nyɛ̃ a alɩ bome nɛ za ʋ na ɩrɛ a nɩbɛ ƴãw a, ʋ yel ʋ na: «Bʋ̃ʋ n'ʋ so fʋ mɩ́ tu à à ŋá? Bʋ̃ʋ n'ʋ so fʋ tone a ton ŋa a fʋ yõ, mɩ́ ƴãw a nɩbɛ àr'ɩ gbɛ́ɛ a biɓaara tɩ ta a zaanʋɔra?» 15A Moyiir tɩ sɔw na: «Mɛ̃ a nɩbɛ taa nɛbɛ mɩ́ waar a ɩ̃ zie, kɛ́ bɛ wa sowri a Naaŋmɩn#18:15 Nyɛ̃ Yzt 25.22 nɩ a manʋ.. 16Bɛlɛ wa tɛr yel a, bɛ mɩ́ wa na wa páw nɩ mɛ̃, ɩ̃ dɩ a ƴɛ̀rʋ a yel bɛ na tawr'ɩ taa a ƴãw, ɛ́ wul bɛ a lɛ a Naaŋmɩn na yel a, nɩ a ʋ wulu bɛ bãw.»
17A ʋ dɩɛm-sãà yel ʋ: «À à ŋá fʋ na mɩ́ ɩ a bɛ vɩɛl ɛ. 18Fʋ na bàl'ɩ fʋ tʋɔra, lãwnɩ a nɩbɛ na waar wa nyɛrɛ fʋ a. A ton ŋa tɩbrɛ na gãw fʋ. Fʋ kʋ̃ tʋ̃ɔ́ tõ ʋ fʋ yõ ɩ. 19Ƴɛrɛŋa a, bɛr wõ a ɩ̃ ƴɛ̀rʋ. Yã n'a ɩ̃ wule fʋ, ɛ́ a Naaŋmɩn a, ʋ be a fʋ zie! Mɩ́ lɩɛrɩ a nɩbɛ a Naaŋmɩn niŋé manɩ a yele kʋ̀ ʋ. 20Fʋ mɩ̀ na mɩ́ ɩ na a nɩbɛ bãw a lɛ a Naaŋmɩn na yel a nɩ a ʋ wulu. Mɩ́ wul bɛ a sɔ́r a na fɛr kɛ́ bɛ tuur a, nɩ a lɛ a na sɛw kɛ́ bɛ ɩrɛ a. 21A al na baa cɛ a ƴãw a, kaa ír a nɩbɛ pʋɔ nɩbɛ na ɩ nɩbɛ a, nɩbɛ na zɔrɛ Naaŋmɩn, nɔnɛ a yel-mɩŋa, ɛ́ kʋ̃ sàw bɛ ŋmɛ bɛ nʋɔr a. Ƴãw bɛ ɩ nɩbɛ túre, nɩbɛ kɔbr, nɩbɛ lɩz'a ayiri nɩ piir nɩ nɩbɛ piir nɩ-bɛrɛ. 22Bɛlɛ nɛbɛ na dɩrɛ nɩ a nɩbɛ a ƴɛ̀rʋ bibie za. Bɛ na mɩ́ wa n nɩ a yele al na ɩ yel-bɛrɛ a, a fʋ zie, ɛ́ dɩ a ƴɛ̀rʋ a al na bɛ maal kpɛmɛ a ƴãw. Ɩ à à ŋá a fʋ tuor tɩbrʋ siwri, ɛ́ bɛ lãw nɩ fʋ tuo a fʋ tuor. 23Fʋ̃ʋ wa ɩ à à ŋá a, ɛ́ a lɛ wa n'a a Naaŋmɩn yel a, fʋ na tʋ̃ɔ́ na, ɛ́ a nɩbɛ bɛ ŋa za na mɩ́ lɛb'a ta a bɛ yie nɩ ƴã-ɓaarʋ.» 24A Moyiir tɩ wõ n a ʋ dɩɛm-sãà wulu, ɛ́ ɩ a lɛ za ʋ na yel kʋ̀ ʋ a. 25Ʋ tɩ kaa na ír a Ɩsɩrayɛl nɩbɛ pʋɔ, nɩbɛ na ɩ nɩbɛ a, ƴãw bɛ kaarɛ a nɩbɛ zie, ɩ nɩbɛ túre, nɩbɛ kɔbr, nɩbɛ lɩz'a ayiri nɩ piir nɩ nɩbɛ piir nɩ-bɛrɛ. 26Bibie za n'a bɛ mɩ́ tɩ dɩrɛ nɩ a nɩbɛ a ƴɛ̀rʋ. Bɛ mɩ́ tɩ wa n nɩ a yele al na kpɛmɛ a, a Moyiir zie, ɛ́ dɩ a ƴɛ̀rʋ maalɩ a al na bɛ maal kpɛmɛ a ƴãw bɛl mɩŋa.
27Al pùorí, a Moyiir bɛr a ʋ dɩɛm-sãà ʋ lɛb kul a ʋ tẽw.
Nke Ahọpụtara Ugbu A:
Eziptɩ tẽw yib 18: DBDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
La Bible en Dagara © Alliance Biblique du Burkina Faso, 2013.