Eziptɩ tẽw yib 26
26
A zi-sõw
1«A zi-sõw ƴãw a, nuru tõ-tõ-biir na wob'ɩ pɛn-nuru pie nɩ lɛ̃ fomi-kpɛn na jɛr'ɩ píir kɔblʋ fomi-zɩɩr-mʋɔlɛ, fomi-zɩɩr-kãbala nɩ fomi-zɩɩr-ɓõɓõ a. Bɛ na maw nɩ seribɛ̃ ƴãw a vɩɛl. 2A pɛn-nuru za na zɛ̃ n taa: a wogo ɩ mɛtɩr pie nɩ anaar ɛ́ a yɛ̀lʋ ɩ mɛtɩr ayi. 3Bɛ na de nɩ niwn sɛ pɛn-nuru anũu ɓã taa, ɛ́ mɩ̀ lɛb sɛ a anũu ɓã taa. 4Bɛ na tʋɔr tʋɔr'ɩ bʋ̃-'leni nɩ píir kɔblʋ pɛn-zɩɛ-mʋɔlɛ ƴãw a pɛn-nuru anũu sob nʋɔr ƴãw, ɛ́ mɩ̀ ƴãw a anũu al na sɛ ɓã taa a, a pɛn-nũ-dãw-niwn sob nʋɔr ƴãw. 5A pɛn-nuru anũu na ɓã taa a dʋrʋ lowr a, nɩ a pɛn-nuru anũu mɩ̀ na ɓã taa a gʋba lowr a, nyɩ na ƴãw nɩ bʋ̃-'leni lɩz'a ayi nɩ pie, ɛ́ ɩ a tori taa. 6Bɛ na maal'ɩ bʋ̃-cawrɩ lɩz'a ayi nɩ pie nɩ salm-zɩɛ, mɩ́ caw nɩ a pɛn-nuru anuure na ɓã taa a ziir ayi a, a ɓã taa, a pɛn-sɛw ɩ bʋ̃-been daadaa.»
7«Al pùorí, bɛ na wob'ɩ pɛn-nuru pie nɩ been nɩ bʋʋr kɔblʋ fomie, a pɛnɛ-sɛwr ayi sob ƴãw, ʋ mɩ́ pàw a Kpɛb zie. 8A pɛn-nuru za na zɛ̃ n taa: a wogo ɩ mɛtɩr pie nɩ anũu, ɛ́ a yɛ̀lʋ ɩ mɛtɩr ayi. 9Bɛ na de nɩ niwn sɛ pɛn-nuru anũu ɓã taa, ɛ́ mɩ̀ lɛb ɩ a lɛ a ayʋɔb na cɛ a ƴãw. A pɛn-nuru ayʋɔb sob na dɔl'a siw a pɛn-sɛw niŋé. 10A pɛn-nuru anũu na sɛ ɓã taa a, bɛ na ƴãw nɩ bʋ̃-'leni lɩz'a ayi nɩ pie a pɛn-nuru anũu sob nʋɔr ƴãw. Ɛ́ a pɛn-nuru ayʋɔb mɩ̀ na sɛ ɓã taa a, bɛ na ƴãw nɩ bʋ̃-'leni lɩz'a ayi nɩ pie a pɛn-nũ-dãw-niwn sob nʋɔr ƴãw. 11Bɛ na maal'ɩ bʋ̃-cawrɩ lɩz'a ayi nɩ pie nɩ kur-zɩɛ. Al pùorí bɛ caw a nɩ a bʋ̃-'leni, a pɛn-sɛw ɩ bʋ̃-been daadaa. 12A pɛnɛ-sɛwr ayi sob ŋa pɛn-nuru na mɩ́ guu na siw zaalɛ: a pɛn-nuru yɛ̀lʋ lowr a, a pɛn na guu a põ-zɛ̃-taa zie na mɩ́ siw na zaalɛ a Kpɛb zie pùorí. 13A pɛn-nuru wogo lowr a, a mɛtɩr pɛn na guu a na siw na zaalɛ a Kpɛb zie lõboge ayi ƴãw, tʋ̃ɔ́ pàw ʋ. 14Bɛ na cɔbrɩ nɩ pʋ́rɩ gan-zɩɩr nɩ gan-kpɛn kpɛn mɩ́ dɔl pàw a pɛnɛ-sɛwr ayi sob.»
15«Bɛ na maal'ɩ dà-tɩɛrɩ mɩ́ ɩ a àr a saaƴẽwn tɩɛ a Kpɛb zie tɛr. 16-17A dà-tɩɛrɩ za na ŋmɛ̃ n taa: kãw za wogo na mɩ́ ɩ n mɛtɩr anũu, ɛ́ a yɛ̀lʋ ɩ mɛtɩr-kʋba-bie lɩz'a anaar ŋmãa anũu. Dà-pãgalali ayi na mɩ́ be n a dà-tɩɛrɩ pɛr ƴãw, kãw ka lowr, kãw ka lowr, a ɓɛrɩ taa siw. 18Bɛ na maal'ɩ dà-tɩɛrɩ lɩzɛr a pɛn-sɛw lõbowr na be a saa-pɛrɩ́-dʋrʋ-lowr a ƴãw, 19ɛ́ maalɩ a dà-tɩɛrɩ dɔwlʋ ziir nɩ salm-pla, bome lɩz'a ayi: dà-tɩɛra za na mɩ́ tɛr'ɩ dɔwlʋ ziir ayi, a dà-pãgalali ayi ƴãw. 20A pɛn-sɛw lõbowr na be a saa-pɛrɩ́-gʋba-lowr ƴãw a, bɛ mɩ̀ na maal'ɩ dà-tɩɛrɩ lɩzɛr, 21nɩ salm-pla dà-tɩɛrɩ dɔwlʋ ziir lɩz'a ayi, dɔwlʋ ziir ayi dà-tɩɛra been ƴãw. 22A pɛn-sɛw pɛr ƴãw na be a mʋ̃tɔ̃w-kpɛb-lowr a, bɛ na maal'ɩ dà-tɩɛrɩ ayʋɔb, 23de nɩ dà-tɩɛrɩ na ɩ a tʋɔra a, a pɛrɩ́ gõgone ƴãw. 24A dà-tɩɛrɩ ayi á ŋá na yãyaar'ɩ a pɛrɩ́, ɛ́ do tɩ tuori taa a bãw-dãw-niwn sob pʋɔ. A za ayi na ŋmɛ̃ n taa, ɛ́ ɩ a pɛn-sɛw gõgone dà-tɩɛrɩ. 25A na ɩ à ŋá a, a pɛn-sɛw pɛr na tɛr'ɩ dà-tɩɛrɩ ani nɩ salm-pla dɔwlʋ ziir pie nɩ ayʋɔb, dɔwlʋ ziir ayi dà-tɩɛra been ƴãw.»
26«Al pùorí, bɛ na pɛnɩ nɩ akasɩa dà-garjɩrɩ: anũu garjɩr a pɛn-sɛw lõbowr kãw dà-tɩɛrɩ, 27anũu garjɩr a lõbowr ƴen sob dà-tɩɛrɩ, ɛ́ anũu garjɩr a pɛrɩ dà-tɩɛrɩ, a mʋ̃tɔ̃w-kpɛb-lowr. 28A sɔwlɩsɔw dà-garjɩra na garjɩr'ɩ a dà-tɩɛrɩ a põ-zɛ̃-taa zie, ɛ́ yi kõkowr ŋa tɩ tɔ kõkowr ŋa. 29Bɛ na nyɩl'ɩ salm-zɩɛ pàw a dà-tɩɛrɩ nɩ a dà-garjɩrɩ za, ɛ́ maalɩ salm-zɩɛ bamɛ mɩ́ tõ a dà-garjɩrɩ za. 30Al pùorí a, Moyiir i, fʋ na ƴãw na bɛ maalɩ a zi-sõw ʋ ɩ mɛ̃ a ʋl ɩ̃ na wul fʋ a tãw zu ka a.»
31«Nuru tõ-tõ-biir na wob'ɩ pɛn-yawla nɩ lɛ̃ fomi-kpɛn na jɛr'ɩ píir kɔblʋ fomi-zɩɩr-mʋɔlɛ, fomi-zɩɩr-kãbala nɩ fomi-zɩɩr-ɓõɓõ a. Bɛ na maw nɩ seribɛ̃ ƴãw a ʋ zu. 32Akasɩa dàar kpule anaar bɛ na nyɩl salm-zɩɛ pàw a ƴãw n'a bɛ na kpa a pɛn-yawlɩ nɩ salm-zɩɛ pĩi-bie. Kpule dɔwlʋ ziir anaar bɛ na maal'ɩ salm-pla a, al zu n'a bɛ na dɔwlɩ a kpule. 33A pĩi-bi-nɔ-gori pile n'a a pɛn-yawla na be.»
«A pɛn-yawla ŋa pùorí n'a bɛ na bin a daga na ƴãw a wõ-taa kʋsɛ-pamɛ a. A pɛn-yawla n'ʋ na bɩw a zi-sõw nɩ a zi-sõw-za-zi-sõw. 34Al pùorí, bɛ na de nɩ a daw-pàwra dɔwlɩ pàw a wõ-taa daga, a zi-sõw-za-zi-sõw pʋɔ. 35Bɛ na bin nɩ a tabal a zi-sõw pʋɔ, a pɛn-yawla niŋé, a Kpɛb zie saa-pɛrɩ́-gʋba-lowr, ɛ́ bin a fɩ̃tɩlɩ dɔwlʋ zie tori a tabal a Kpɛb zie saa-pɛrɩ́-dʋrʋ-lowr.»
36«A pɛn-sɛw-sõw yẽw dɩ̃dɔr ƴãw a, pɛn-mawrbɛ na maal'ɩ pɛn-yawla ƴen sob nɩ lɛ̃ fomi-kpɛn kpɛn na jɛr'ɩ píir kɔblʋ fomi-zɩɩr-mʋɔlɛ, fomi-zɩɩr-kãbala nɩ fomi-zɩɩr ɓõɓõ a. 37A pɛn yawlʋ ƴãw a, a nɩbɛ na maal'ɩ kpule anũu nɩ akasɩa dàar, ɛ́ nyɩl salm-zɩɛ pàw. Salm-zɩɛ pĩi-bie n'a bɛ na kpa n a pɛn-yawlɩ. Bɛ na nyɩl'ɩ kur-zɩɛ maal'ɩ a kpule dɔwlʋ ziir bome anũu.»
Nke Ahọpụtara Ugbu A:
Eziptɩ tẽw yib 26: DBDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
La Bible en Dagara © Alliance Biblique du Burkina Faso, 2013.