Eziptɩ tẽw yib 4
4
Naaŋmɩn wul'ɩ a ʋ fãw a Moyiir
1A Moyiir tɩ sɔw nɩ a Sore: «Bɛ kʋ̃ sàw a ɩ̃ ƴɛ̀rʋ ɛ, ɛ́ kʋ̃ sàw a ɩ̃ nʋɔr ɛ. Bɛ na yel mɛ̃ na: “Ziri n'a, a Sore bɛ ɩ fʋ nyɛ̃ ʋ ɛ”.» 2A Sore tɩ sowr'ʋ na: «Bʋ̃ʋ n'ʋ fʋ tɛr a nũú?» A Moyiir sɔw: «Dabɔl'ʋ.» 3A Sore yel ʋ: «Lɔb ʋ bɛr tẽw!» Ʋ lɔb bɛr a tẽw, a dabɔl lɩɛbɩ waab. A Moyiir tɩ̃wnɩ yi pùor fɔ̃wlɛ. 4A Sore yel ʋ: «Dɔl a nũu nyɔw nɩ ʋ a zʋʋrɩ́.» Ʋ dɔl a nũu nyɔw nɩ: a waab lɛb lɩɛbɩ dabɔl a ʋ nũú. 5A Sore tɩ yel'a: «A na wul'ɩ a Ɩsɩrayɛl nɩbɛ k'ɩ̃ɩ ɩ na fʋ nyɛ̃ m, a mãa Sore, a bɛ sãàkʋm-kore Naaŋmɩn, a Abraham Naaŋmɩn, a Ɩzaakɩ Naaŋmɩn nɩ a Zakɔb Naaŋmɩn.» 6A Sore tɩ lɛb'a yel a Moyiir: «Dɔwlɩ a nũu a fʋ nyãa zu.» Ʋ dɔwlɩ a nũu a ʋ nyãa zu, ɛ́ lɛb ír, a nũu kɔ̃w ʋ za, pɛlɩ parpar. 7A Sore tɩ lɛb'a yel: «Lɛb dɔwlɩ a fʋ nũu a fʋ nyãa zu.» Ʋ lɛb dɔwlɩ a nũu a ʋ nyãa zu, ɛ́ ír, a nũu lɛb ŋmɛ̃ ʋ ŋmɛ̃a. 8A Sore tɩ yel ʋ na: «A Ɩsɩrayɛl nɩbɛ bɛ wa sàw a fʋ ƴɛ̀rʋ, ɛ́ bɛ cɛlɛ a bãwfʋ dãw-niwn sob zie a, bɛ na sàw nɩ a bãwfʋ ayi sob. 9Ɛ́ bɛlɛ wa nyɛ̃ a bãwfʋ ayi á ŋá, ɛ́ cãà bɛ sàw, ɛ́ cãà bɛ de a fʋ ƴɛ̀rʋ a, fʋ na 'wɔ̃w nɩ a Nɩl kʋ̃ɔ cir bɛr a tẽw: a Nɩl kʋ̃ɔ á ŋá na lɩɛb'ɩ zɩ̃ɩ a tẽw.»
Naaŋmɩn kaa na ír Aarɔ̃ k'ʋʋ sõwne a Moyiir
10A Moyiir tɩ yel'ɩ a Sore: «Fʋ gaafara, Sore e, ɩ̃ bɛ ɩ ƴɛ̀r-bãw-ƴɛ̀rɛ ɩ. Ɩ̃ bɛ ɩ ʋ dɩ̃a nɩ bio ɛ, nɩ fʋ mɩ̀ na saa tĩ kɛ́ ƴɛ̀rɛ nɩ mɛ̃ a ɩ. A ƴɛ̀rʋ mɩ́ kpɛmɛ nɩ a ɩ̃ zie.» 11A Sore tɩ sɔw ʋ na: «Ãa n'ʋ ƴãw a nʋɔr a nɩsaal? Ãa n'ʋ mɩ́ ɩ ʋ bɛ ƴɛ̀rɛ bɩɩ bɛ wone? Ʋ nyɛrɛ bɩɩ zɔ̃w? A mãa Sore bɛ n'ʋ ɛ? 12Pãa cen ƴɛrɛŋa. Fʋ̃ʋ wa ƴɛ̀rɛ a lɛn daar a, ɩ̃ na be n a fʋ zie, ɩ̃ na mɩ́ wul fʋ nɩ a ʋlɩ bom nɛ fʋ na na yel a.» 13A Moyiir yel: «Fʋ gaafara, Sore e, tõ nɩ-yũo!»
14Lɛ n'a a Sore tɩ nyɛ̃ nɩ a Moyiir suur, ɛ́ yel ʋ: «A fʋ yɛb Aarɔ̃ na ɩ a Levitɩ a bɛ be be ɩ? Ɩ̃ bãwnɩ a na ʋl na tʋ́ɔr ƴɛ̀rɛ a. Ʋlɛ n'ɩ ŋan tuore fʋ. Ʋlɛ wa nyɛrɛ fʋ wa báarɛ a, nʋ̃ɔ̀ na kpɛ ʋ na bɛ dɩ vuo ɩ. 15Tɩ ƴɛ̀r a ʋ zie, ɛ́ yel a ʋlɩ bom nɛ a na fɛr k'ʋʋ yel a kʋ̀ ʋ. Nyɩmɛ wa ƴɛ̀rɛ a, mãa mɩŋa na be n a nyɩ zie, ɩ̃ɩ na wul nyɩ nɩ a ʋlɩ bom nɛ a na fɛr kɛ́ nyɩ ɩ a. 16Ʋ na mɩ́ lɩɛrɩ fʋ na ƴɛ̀r a nɩbɛ zie: ʋ na ɩ n a fʋ ƴɛ̀r-manɛ, ɛ́ fʋ ɩ mɛ̃ naaŋmɩn a, a ʋ zie. 17De a dabɔl ŋa tɛr a nũú, ʋlɛ n'ʋ fʋ na maalɛ nɩ a nɔ-ɓãa-yele.»
A Moyiir lɛb'a cen a Eziptɩ tẽw a ʋ nɩ-bʋʋrɛ zie
18A Moyiir tɩ lɛb'a cen a ʋ dɩɛm-sãà Zetoro zie tɩ yel ʋ: «A fɛr'a k'ɩ̃ɩ lɛb ta a ɩ̃ bʋʋrɛ zie a Eziptɩ tẽw nyɛ̃, bɛ cãà na vʋʋrɛ ɛ.» A Zetoro yel ʋ: «Fʋ na cen nɩ nɩ ƴã-ɓaarʋ!»
19A Sore tɩ yel'ɩ a Moyiir a Madian#4:19 Madian: Nyɛ̃ 2.15 nɩ a manʋ. tẽw: «Lɛb cen a Eziptɩ, bʋ̃ʋ n'ʋ vɛ̃, a bɛlɩ dem za na tɩ bɔbr a fʋ kʋb a, bɛ kpi na.» 20Lɛ n'a a Moyiir tɩ ƴãw a ʋ pɔw nɩ a ʋ bidɛbr do zɔm a bõw, ʋ lɛb cen a Eziptɩ. Ʋ tɩ ƴãw nɩ a ʋ dabɔl a Naaŋmɩn na yel k'ʋʋ de a a nũú. 21A Sore tɩ yel'ɩ a Moyiir: «Ɩ̃ kʋ̀ b'ɩ nɔ-ɓãa-yele maalʋ fãw. Fʋ̃ʋ wa lɛb ta a Eziptɩ a, fʋ̃ʋ maal'a a Faarawɔ̃ niŋé. Ɛ́ mãa a, ɩ̃ na ɩ na ʋ kpãa tobr, bɛ bɛr a Ɩsɩrayɛl nɩbɛ bɛ cen ɛ. 22A lɛ n'a fʋ na yel ʋ: À ŋá n'a a Sore ƴɛ̀rɛ: “A Ɩsɩrayɛl nɩbɛ n'ɩ a ɩ̃ bidɛb-dãw. 23Ɩ̃ yel'a kʋ̀ b kɛ́ fʋ bɛr bɛ bɛ cen tɩ maalɩ mɛ̃, fʋ zawrɩ. A na ɩ à ŋá a, ɩ̃ na kʋ n a fʋ bidɛb-dãw”.»
24A sɔ́r bɛ na tɩ cãà lo a n'a, tɩ̃ɩsɔw kãw bɛ na tɩ tɛw kɛ́ bɛ pɩ̃ɛnɩ a, a Sore tɩ wa a Moyiir zie wa bɔbr a ʋ kʋb. 25A Sefora tɩ ɓáw nɩ kʋsɛ-cɩlʋ daadaalɛ ŋmãa nɩ a ʋ bidɛb yɔ-gan nyʋɔr, tɔ n a Moyiir gbɛ́ɛ#4:25 Gbɛ́ɛ: A yʋɔr'ʋ bɛ mɩ̀ mɩ́ tɩ bʋɔlɩ à à ŋá a Ebre ƴɛ̀rʋ pʋɔ., ɛ́ yel: «Fʋ ɩ n zɩ̃ɩ sɩr#4:25 Zɩ̃ɩ sɩr: A ƴɛ̀rʋ ŋa pɛr sɔwl'a. Bɛ tɔ̃w bɔbr'a kɛ́ bɛ yel k'aa zɩ̃ɩ n'a gù fʋ. a ɩ̃ zie.» 26Lɛ n'a a Sore tɩ bɛr a Moyiir. A yʋɔr-ŋmãafʋ zũú n'a a Sefora tɩ yel kɛ́ a “zɩ̃ɩ sɩr”.
27A Sore tɩ yel'ɩ a Aarɔ̃: «Cen tuori a Moyiir a wɛja-kpalɛ pʋɔ.» A Aarɔ̃ tɩ cen na tɩ páw ʋ a Naaŋmɩn tãgɛ̃́#4:27 A Orɛb tãw n'ʋ. Nyɛ̃ 3.1., nyɔw ʋ weri. 28A Moyiir tɩ man nɩ a ƴɛ̀rʋ al za a Sore na tɩ tõ n ʋ a, kʋ̀ a Aarɔ̃, nɩ a nɔ-ɓãa-yele al za ʋ na tɩ yel k'ʋʋ tɩ maalɩ a. 29Al pùorí, bɛ za ayi tɩ cen na tɩ bʋɔlɩ a Ɩsɩrayɛl nɩ-kore za ɓã taa. 30A Aarɔ̃ tɩ lɛb'a yel a ƴɛ̀rʋ al za a Sore na tɩ ƴɛ̀r kʋ̀ a Moyiir'a, ɛ́ maalɩ a nɔ-ɓãa-yele a nɩbɛ niŋé. 31A nɩbɛ tɩ sàw na de. Bɛ na tɩ bãwnɩ a k'aa Sore nyɛ̃ nɩ a bɛ wʋ̀ʋr, ɛ́ wa a bɛ faafʋ a, bɛ tɩ gbĩ n dume gũu tɩ tɔ tẽw puor'ʋ.
Nke Ahọpụtara Ugbu A:
Eziptɩ tẽw yib 4: DBDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
La Bible en Dagara © Alliance Biblique du Burkina Faso, 2013.