Yele-za-pɛr-tib 29
29
A Zakɔb na tuori a Arasɛl a
1A Zakɔb tɩ ìr'a lo a sɔ́r cere a saa-pɛrɩ́ ten lowr. 2Bibir kãw, ʋ tɩ nyɛ̃ nɩ bule a wɩ̀ɛ pʋɔ. Zawr ata píir nɩ bʋʋr tɩ gã nɩ a be, bʋ̃ʋ n'ʋ vɛ̃, be n'a a dʋn tɩ nyúur a kʋ̃ɔ. Kʋsɛ-kpɛ̃ɛ tɩ pàw nɩ a bule nʋɔr. 3A dʋn za na mɩ́ wa ɓã taa baar'a, bɛ mɩ́ bili nɩ a kʋsɩɛr bɛr, ɛ́ ƴãw a dʋn a nyũ, ɛ́ bɛ lɛb bili a kʋsɩɛr pàw a bule nʋɔr. 4A Zakɔb tɩ sowr'ɩ a pi-cɩ̃ɩnbɛ: «Ɩ̃ bá mɩnɛ ɛ, nyɩnɛ nyɩ yi?» Bɛ sɔw: «Tɩ yi n Haran tẽw.» 5Ʋ lɛb sowri bɛ: «Nyɩ bãw nɩ Nahɔɔr bidɛb Labã a?» Bɛ sɔw: «Ʋ̃ʋ, tɩ bãw ʋ na.» 6A Zakɔb lɛb sowri bɛ: «Ʋ kpɛmɛ na a?» Bɛ sɔw: «Ʋ kpɛmɛ na. A ʋ pɔwyaa Arasɛl'ɩ ŋan na kparɛ a píir nɩ a bʋʋr waar'ɩ a.» 7A Zakɔb lɛb yel: «A zie cãà na ɩ cãà zuo, a dʋn diw-ɓã-taa bɛ ta sɛr ɛ. Nyɩ ƴãw a nyũ a kʋ̃ɔ, ɛ́ nyɩ lɛb kpa a cen nɩ a tɩ 'wɔb a mʋ̃ɔ.» 8A pi-cɩ̃ɩnbɛ tɩ sɔw na: «A dʋn za bɛ wa ɓã taa a, tɩ kʋ̃ tʋ̃ɔ́ ɩ. Alɛ wa ɓã taa baar'a n'a bɛ mɩ́ bili a kʋsɩɛr bɛr a bule nʋɔr ƴãw, ɛ́ tɩ ƴãw a dʋn a nyũ.»
9A Zakɔb tɩ cãà na ƴɛ̀rɛ nɩ bɛ a lɛn daar a Arasɛl na wa ta n a ʋ sãà dʋn a, pi-cɩ̃ɩnɛ tɩ n'ʋ. 10A Zakɔb na dɛ wa nyɛ̃ a ʋ mã-dɛb pɔwyaa Arasɛl, nɩ a ʋ mã-dɛb dʋn a, ʋ taw na ta bili a kʋsɩɛr bɛr a bule nʋɔr ƴãw, ɛ́ ƴãw a kʋ̃ɔ a ʋ mã-dɛb dʋn a nyũ. 11A Zakɔb tɩ nyɔw nɩ a Arasɛl weri, ɛ́ kone sìwre. 12Ʋ tɩ yel'a kʋ̀ a Arasɛl k'ʋʋ ɩ n a ʋ sãà nɩr kãw, k'ʋʋ ɩ n Erebeka bidɛb. A Arasɛl tɩ zɔ na cen tɩ yel kʋ̀ a ʋ sãà. 13A Labã na dɛ wa wõ a ʋ yeepuule bidɛb Zakɔb yele a, ʋ zɔ na tuor'ʋ tɩ nyɔw ʋ weri, ɛ́ tɛr ʋ kul'ɩ a yir. A Zakɔb tɩ man nɩ a lɛ a yele na ɩ a kʋ̀ ʋ. 14A Labã tɩ yel ʋ na: «Ɩ̃ yir nɩr sɩrɩ nɛ b, zɩ̃ɩ-been n'ɩ tɩ.» A Zakɔb tɩ kpɛ n cuw-ɓil a Labã zie.
A Zakɔb kul'ɩ a Labã pɔwyaar bɛ za ayi
15Bibir kãw, a Labã tɩ yel'ɩ a Zakɔb: «Ɩ̃ nɩr nɛ b, ɛcɛ al ƴãw bɛ n'a fʋ na tone a ɩ̃ tome zawla ɩ. Yel a sã-ya fʋ na bɔbr a kʋ̀ m.»
16Zɩ̃ k'aa Labã tɩ tɛr'ɩ pɔwyaar ayi. A kpɛ̃ɛ dɩ Leya, ɛ́ a bile dɩ Arasɛl. 17A Leya jɩ́rʋ ʋ na mɩ́ jɩ́r a bɛ mɩ́ tɩ damnɛ nɩr ɛ, ɛcɛ a Arasɛl ʋl tɩ vɩɛl'ɩ a nyɛ́b nɩ a jɩ́rʋ ƴãw. 18A Zakɔb tɩ nɔnɛ nɩ a Arasɛl, ɛ́ yel a Labã: «Ɩ̃ na tõ n a fʋ tome yome ayopõi, a fʋ pɔwya-bile Arasɛl kulu ƴãw.» 19A Labã tɩ sɔw na: «Mãa nɩ̃ɛ de ʋ kʋ̀ b a, alɛ sa ɩ̃ na na de ʋ kʋ̀ nɩ-yũo a. Be a ɩ̃ zie.»
20A Zakɔb tɩ tõ n a Labã tome yome ayopõi, a Arasɛl kulu ƴãw. Ɛcɛ a tɩ ɩ na mɛ̃ bibie blãlɛ n'a a, ʋ na tɩ nɔnɛ a Arasɛl yaga za a ƴãw. 21Al pùorí ʋ yel a Labã: «A ɩ̃ tome yome nʋɔr ta na. Kʋ̀ m a ɩ̃ pɔw, ɩ̃ bɔbr'a kɛ́ tɩ lãw taa.»
22A Labã tɩ bʋɔl'ɩ a be dem za ɓã taa ɛ́ maalɩ cuw-kpɛ̃ɛ. 23Ɛcɛ a zie na wa sɔb a, ʋ tɛr'ɩ a ʋ pɔwyaa Leya cen nɩ tɩ kʋ̀ a Zakɔb, ʋ páw ʋ. 24A Labã tɩ de nɩ a ʋ tõ-tõ-bi-pɔw Zilipa kʋ̀ a ʋ pɔwyaa Leya, k'ʋʋ tone ʋ. 25A biɓaara a, a Zakɔb tɩ nyɛ̃ na ʋ ɩ Leya#29:25 A Zakɔb nyɛ̃ na ʋ ɩ Leya: Ŋmɩŋmɩn n'a a Zakɔb ɩ bɛ bãw k'aa Leya n'ʋ? Bɛ mɩ́ tɩ pàw nɩ a ƴãwnɩ-yúor niwn nɩ pɛn, a kul-taa cuw tib daar tɩ ta a tɩ̃ɩsɔw a dɛb nɩ a pɔw na na lãw taa a., ʋ yel a Labã: «Bʋ̃ʋ n'ʋ fʋ ɩ m à à ŋá? Arasɛl ƴãw bɛ n'a ɩ̃ tõ a fʋ tome ɩ? Bʋ̃ʋ n'ʋ so fʋ bɛlɩ mɛ̃?» 26A Labã sɔw: «A tɩ ka a, a bile bɛ dier niwn kule sɩr a kpɛ̃ɛ ƴãw ɛ, a bɛ ɩrɛ a lɛ ɩ. 27Dɩ a kpɛ̃ɛ da-ɓil kul-taa cuw baarɩ, ɛ́ tɩ mɩ̀ na kʋ̀ b'ɩ a bile, a ɩ̃ tome fʋ na na lɛb tõ yome ayopõi a ƴãw.» 28Lɛ n'a a Zakɔb tɩ ɩ. Ʋ tɩ baar'ɩ a Leya da-ɓil kul-taa cuw, ɛ́ a Labã kʋ̀ ʋ a Arasɛl. 29A Labã tɩ de nɩ a ʋ tõ-tõ-bi-pɔw Bilha kʋ̀ a ʋ pɔwyaa Arasɛl, k'ʋʋ tone ʋ. 30A Zakɔb mɩ̀ tɩ páw nɩ a Arasɛl, ɛ́ nɔnɛ ʋ zuo a Leya. Ʋ tɩ tõ n a Labã tome yome ayopõi dɔwlɩ.
A Zakɔb bibiir
31A Sore na tɩ nyɛ̃ a Zakɔb ʋ bɛ nɔnɛ a Leya man a Arasɛl a, ʋ kʋ̀ n a Leya dɔwfʋ, ɛ́ a Arasɛl ɩ pɔw-ãan. 32A Leya tɩ tɛr'ɩ pʋɔ dɔw dɛble por kɛ́ Urubɛn#29:32 Urubɛn: A yúor ŋa pɛr'ɩ “A Sore nyɛ̃ na”.. Bʋ̃ʋ n'ʋ vɛ̃, ʋ tɩ yel'a: «A Sore nyɛ̃ nɩ a ɩ̃ kpɩɛrʋ, ƴɛrɛŋa a, a ɩ̃ sɩr na nɔnɛ mɛ̃ na.»
33Ʋ tɩ lɛb'a tɛr pʋɔ lɛb dɔw dɛble, ɛ́ yel: «A Sore bãwnɩ a na bɛ na bɛ nɔnɛ mɛ̃ a, ɛ́ lɛb kʋ̀ m bidɛble. Ʋ tɩ por ʋ nɩ Sɩmɩ̃ɔ#29:33 Sɩmɩ̃ɔ: A yúor ŋa pɛr'ɩ “A Sore bãwnɩ a na”..»
34Ʋ tɩ lɛb'a maal tɛr pʋɔ dɔw a bidɛbli ata sob, ɛ́ yel: «Ƴɛrɛŋa ʋl a, a ɩ̃ sɩr na tu m'a, ɩ̃ na dɔw bidɛbr ata kʋ̀ ʋ a.» Lɛ n'a bɛ tɩ por a ʋ yúor kɛ́ Levi#29:34 Levi: A yúor ŋa pɛr'ɩ “Ʋ na tu m'a”..
35Ʋ tɩ lɛb'a tɛr pʋɔ dɔw dɛble, ɛ́ yel: «Ƴɛrɛŋa a, ɩ̃ pãa na danɛ nɩ a Sore.» Alɛ so ʋ por ʋ Zuda#29:35 Zuda: A yúor ŋa pɛr'ɩ “Ɩ̃ na danɛ nɩ a Sore”..
Lɛ n'a ʋ tɩ ŋmãa a dɔwfʋ.
Nke Ahọpụtara Ugbu A:
Yele-za-pɛr-tib 29: DBDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
La Bible en Dagara © Alliance Biblique du Burkina Faso, 2013.