Yele-za-pɛr-tib 39
39
A Zuzɛb na ɩ a Potifaar tõ-tõ-bie a
1A Ɩsɩmayɛl bʋʋrɛ na tɩ tɛr a Zuzɛb cen nɩ a Eziptɩ a tɩ kʋ̀ɔr'ʋ na kʋ̀ a Eziptɩ tẽw nɩr kãw bɛ na bʋɔlɛ Potifaar a. Ʋ tɩ ɩ n a nãà tõ-tõ-nɩ-kpɛ̃ɛ kãw nɩ a sojarɩ na gùre ʋ a nɩ-kpɛ̃ɛ. 2A Sore tɩ be n a Zuzɛb zie#39:2 Nyɛ̃ Nɩ-t 7.9., bom za tuur ʋ. A Zuzɛb tɩ kpɩɛr'ɩ a ʋ nɩ-kpɛ̃ɛ na ɩ a Eziptɩ tẽw nɩr a yir. 3A Potifaar tɩ nyɛ̃ na k'aa Sore be n a Zuzɛb zie, k'ʋʋ mɩ́ tɩ ɩ na bom za a Zuzɛb na ɩrɛ a tu vla. 4A Potifaar pʋɔ tɩ pɛlɩ nɩ a Zuzɛb ƴãw, ʋ de ʋ ʋ ɩ a ʋ tõ-tõ-bie. Ʋ tɩ de nɩ a ʋ yir kaafʋ nɩ a ʋ bʋ̃-tɛrɩ za kaafʋ tome kʋ̀ a Zuzɛb. 5A Potifaar na tɩ dier a ʋ yir kaafʋ nɩ a ʋ bʋ̃-tɛrɩ za kaafʋ tome kʋ̀rɛ a Zuzɛb wa báarɛ a, a Sore maal'ɩ a ʋ yir a Zuzɛb zũú. A maalʋ ŋa tɩ lʋ̃ɔ nɩ a ʋ bome za, a ʋ yir pʋɔ nɩ a ʋ póru pʋɔ. 6Lɛ n'a a Potifaar tɩ de a ʋ bome za ƴãw a Zuzɛb nuru pʋɔ. Ʋ bɛ tɩ cãà kaarɛ bom za zie, a bɛ ɩ a ʋl mɩŋa bʋ̃-dɩrɩ tɛwr ɛ.
A Potifaar pɔw ŋmãa nɩ ziri ƴãw a Zuzɛb
A Zuzɛb tɩ pɔ̀l'a, ɛ́ vɩɛl. 7A tɩ cɛlɩ nɩ blã, ɛ́ a Zuzɛb nɩ-kpɛ̃ɛ pɔw jɩ́r ʋ ɛ́ yel: «Gã nɩ mɛ̃!» 8Ɛcɛ a Zuzɛb tɩ zawr'a, ɛ́ yel a ʋ nɩ-kpɛ̃ɛ pɔw: «Nyɛ̃, a ɩ̃ nɩ-kpɛ̃ɛ tɛr mɛ̃ nɩ a ʋ zie ka, ɛ́ bɛ cãà kaarɛ bom za zie a yir pʋɔ ɩ. Ʋ de nɩ a ʋ bome za ƴãw a ɩ̃ nuru pʋɔ. 9A yir ŋa pʋɔ a, ʋ bɛ tɛr fãw zuo mɛ̃ ɩ. Ʋ bɛ sɩb mɛ̃ bom kãw za, a bɛ ɩ a fʋ̃ʋ na ɩ a ʋ pɔw a ɩ. Ŋmɩŋmɩn za n'a ɩ̃ na tʋ̃ɔ́ tõ ton na bɛ maal'ɩ wob, ɛ́ maalɩ yel-bier sãw a Naaŋmɩn?» 10A Potifaar pɔw tɩ ƴɛ̀rɛ nɩ a Zuzɛb zie bibie za, k'ʋʋ wa gã kɔw ʋ, bɛ lãw taa. Ɛcɛ a Zuzɛb bɛ tɩ bɛrɛ wone a ʋ ƴɛ̀rʋ ɛ.
11Bibir kãw, a Zuzɛb tɩ wa n a yir a tome ƴãw, ɛ́ tõ-tõ-bie kãw za bɛ tɩ ka be ɩ. 12A Potifaar pɔw tɩ nyɔw ʋ nɩ a kparʋ ƴãw, ɛ́ yere: «Gã nɩ mɛ̃!» Ɛcɛ a Zuzɛb tɩ cɛ n a kparʋ fuori ƴãw ʋ a nũú, ɛ́ zɔ tɔl yi. 13A pɔw na tɩ nyɛ̃ a Zuzɛb ʋ zɔ yi ɛ́ bɛr ʋ a ʋ kparʋ a ʋ nuru pʋɔ a, 14ʋ ŋmɛ n cɛl bʋɔlɩ a tõ-tõ-biir wa yel bɛ: «Nyɩ nyɛ̃ a na a! A ɩ̃ sɩr tɛr'ɩ ebre nɩr kãw wa n k'ʋʋ wa ɩrɛ tɩ laar. Ʋ wa n a ɩ̃ zie k'ʋʋ wa gã nɩ mɛ̃, ɩ̃ wa ŋmɛ cɛl. 15Ʋ na dɛ wa wõ ɩ̃ ŋmɩɛr a cɛlsɩ bʋɔlɛ nɩ a, ʋ zɔ na tɩ yi, ɛ́ bɛr a ʋ kparʋ a ɩ̃ zie.»
16Ʋ tɩ bin nɩ a Zuzɛb kparʋ a ʋ zie gùre nɩ a ʋ sɩr lɛb waa daar. 17A nɔ-been nɛ n'ʋ ʋ tɩ ƴɛ̀r kʋ̀ ʋ: «A ebre gbãgbaa fʋ na tɛr wa kʋ̀ tɩ a wa n a ɩ̃ zie k'ʋʋ wa sãw mɛ̃ bɛr. 18Ɛcɛ ɩ̃ na dɛ wa ŋmɛ a cɛl bʋɔlɩ a nɩbɛ a, ʋ zɔ na kɛ́ bɛr a ʋ kparʋ a ɩ̃ zie.» 19A nɩ-kpɛ̃ɛ na tɩ wõ a ʋ pɔw manɩ a lɛ a Zuzɛb na ɩ a ʋ zie a, ʋ nyɛ̃ nɩ suur. 20Ʋ tɩ ƴãw na bɛ nyɔw a Zuzɛb tɩ pàw a gaso ʋl pʋɔ a nãà na mɩ́ ƴãw a ʋ nɩ-pàwrɩ a.
A Zuzɛb na be a gaso pʋɔ a
À ŋá n'a a Zuzɛb tɩ be a gaso pʋɔ. 21Ɛcɛ a be mɩ̀ a, a Sore tɩ be n a ʋ zie, ɛ́ wul ʋ a ʋ nɔ̃wfʋ. Ʋ tɩ ɩ na a gaso-gùrbɛ nɩ-kpɛ̃ɛ nɔ̃w a ʋ yele. 22A nɩ-kpɛ̃ɛ ŋa tɩ de nɩ a nɩ-pàwrɩ za ƴãw a Zuzɛb nuru pʋɔ. A Zuzɛb'ʋ tɩ jɩ́rɛ ton za na tone a gaso pʋɔ a. 23A gaso-gùrbɛ nɩ-kpɛ̃ɛ bɛ tɩ cãà cɛlɛ bom za ʋ na de kʋ̀ a Zuzɛb a zie ɩ. Bʋ̃ʋ n'ʋ vɛ̃, a Sore tɩ be n a Zuzɛb zie, ɛ́ ɩrɛ bom za a Zuzɛb na maalɛ a ʋ tuur vla.
Nke Ahọpụtara Ugbu A:
Yele-za-pɛr-tib 39: DBDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
La Bible en Dagara © Alliance Biblique du Burkina Faso, 2013.