Yele-za-pɛr-tib 42
42
A Zakɔb tõ n a ʋ bidɛbr a Eziptɩ
1A Zakɔb tɩ wõ na kɛ́ ble be n a Eziptɩ tẽw. A lɛ n'a ʋ tɩ yel a ʋ bidɛbr: «Bʋ̃ʋ n'ʋ so nyɩ zɩ̃ jɩ́rɛ taa à ŋá? 2Ɩ̃ wõ na bɛ yel kɛ́ ble be n Eziptɩ tẽw. Nyɩ cen tɩ dà wa n, lɛ n'a tɩ na cãà vʋʋrɛ ɛ́ ta kpi ɛ#42:2 Nyɛ̃ Nɩ-t 7.12..» 3A Zuzɛb yɛ-bɛrɛ pie tɩ cen nɩ a Eziptɩ kɛ́ bɛ tɩ dà a ble. 4Ɛcɛ a Zakɔb bɛ tɩ tõ a Zuzɛb yɛ-bile Bɛ̃zamɛ lãwnɩ a ʋ yɛbr ɛ, bʋ̃ʋ n'ʋ vɛ̃, ʋ tɩ tɩ́ɛr'ɩ ʋ pʋɔ: «Bom nãà mab'a ɩ ʋ.» 5A Zakɔb bidɛbr tɩ ta n a Eziptɩ tẽw lãwnɩ ble daarbɛ bɛ mɩnɛ, bʋ̃ʋ n'ʋ vɛ̃, a kɔ̃ tɩ fɛrɛ nɩ a nɩbɛ a Kanãa tẽw za.
A Zuzɛb na ɩ a ʋ yɛbr mɛ̃ ʋ bɛ bãw bɛ a
6A Zuzɛb'ʋ tɩ kaarɛ a tẽw zie. Ʋlɛ n'ʋ tɩ kʋɔrɛ a ble kʋ̀rɛ a nɩbɛ za. A ʋ yɛbr tɩ wa na wa gbĩ dume gũu tɩ tɔ tẽw a ʋ niŋé. 7A Zuzɛb tɩ nyɛ̃ nɩ a ʋ yɛbr bãw, ɛcɛ ʋ bɛ tɩ sàw bɛ bãw ʋ ɛ, ɛ́ tɩ ƴɛ̀r a bɛ zie nɩ kɔkɔ-kpɛ̃w. Ʋ tɩ sowri bɛ na: «Nyɩnɛ nyɩ yi?» Bɛ sɔw: «Kanãa tẽw n'a tɩ yi, ɛ́ wa bʋ̃-dɩrɩ dàb.»
8A Zuzɛb tɩ nyɛ̃ nɩ a ʋ yɛbr bãw, ɛ́ bɛl bɛ bãw ʋ ɛ. 9A Zuzɛb tɩ lɛb'a tɩ́ɛrɩ a zánʋ ʋ na zánɩ nɩ bɛ a#42:9 Nyɛ̃ 37.5-9., ɛ́ yel bɛ: «Yel-sɔwlɩ-piwri-bãwnbɛ n'ɩ nyɩ! A tẽw lõboge al na bɛ kpɛmɛ a n'a nyɩ wa kɛ́ nyɩ wa sɔwlɩ piwri bãw.» 10Bɛ tɩ sɔw na: «Tẽ-kaarɛ ɛ, lɛ bɛ n'a ɩ. Bʋ̃-dɩrɩ dàb tɛwr ƴãw n'a tɩ wa. 11Dɛb-been bibiir'ɩ tɩ za, nɩbɛ na tɛr yel-mɩŋa a n'ɩ tɩ, tɩ bɛ ɩ yel-sɔwlɩ-piwri-bãwnbɛ ɩ.» 12A Zuzɛb sɔw: «Ziri n'a! Nyɩ wa na kɛ́ nyɩ wa piwri bãw a tẽw lõboge al na bɛ kpɛmɛ a.» 13Bɛ lɛb yel: «Tɩ tɩ ɩ n yɛbr pie nɩ ayi, sãà-been bibiir, a Kanãa tẽw. A tɩ bile za be n a tɩ sãà zie, ɛ́ a tɩ kãw bɛ cãà ɩ.» 14A Zuzɛb yel bɛ: «A alɛ n'ɩ à á ŋá ɩ̃ na tɩ yere kʋ̀rɛ nyɩ a: yel-sɔwlɩ-piwri-bãwnbɛ n'ɩ nyɩ. 15Ɛcɛ ɩ̃ na ɩ nyɩ na kaa: a Faarawɔ̃ bɛ wa n'ʋ a na, alɛ bɛ ɩ lɛ, a nyɩ yɛ-bile bɛ wa wa a ka a, nyɩ bɛ yire a tẽw ŋa pʋɔ ɩ. 16Nyɩ tõ a nyɩ kãw ʋ cen tɩ tɛr ʋ wa n, ɛ́ a bɛl na cɛ a be a gaso pʋɔ. Lɛ n'a ɩ̃ na bɛl nyɛ̃, nyɩ yel'ɩ yel-mɩŋa bɩɩ. Alɛ bɛ wa ɩ lɛ n'a a, ɩ̃ pɔ n nɩ a Faarawɔ̃ na vʋʋrɛ a, nyɩ sɩrɩ na ɩ yel-sɔwlɩ-piwri-bãwnbɛ.»
17A Zuzɛb tɩ pàw bɛ nɩ a gaso pʋɔ bibie ata. 18A bibie ata sob na wa vɩɛ a, ʋ yel bɛ na: «Nyɩ nyɛ̃ a lɛ nyɩ na na ɩ tʋ̃ɔ́ cãà vʋʋrɛ a, ɩ̃ na zɔrɛ Naaŋmɩn a ƴãw. 19Nyɩmɛ wa ɩ nɩbɛ na tɛr yel-mɩŋa a, nyɩɩm sàw a nyɩ kãw be a gaso ŋa pʋɔ bɛ na pàw nyɩ a. A bɛl na cɛ a, bɛ kul'ɩ a ble tɩ kʋ̀ a nyɩ yie dem a kɔ̃ na kʋrɛ a. 20Al pùorí, nyɩ tɛr a nyɩ yɛ-bil-pʋrɩ za wa kʋ̀ m. Lɛ n'a ɩ̃ na bãw kɛ́ nyɩ yel'ɩ yel-mɩŋa, ɛ́ nyɩ kʋ̃ kpi ɛ.» A yɛbr tɩ sàw nɩ a lɛ. 21Ɛcɛ bɛ tɩ yere nɩ a bɛ cara pʋɔ: «'Woi! Tɩ nyɛrɛ nɩ dɔwrʋ a tɩ yɛb Zuzɛb ƴãw: tɩ tɩ nyɛ̃ nɩ a ʋ kpɩɛrʋ, a lɛ ʋ na tɩ zɛlɛ tɩ kɛ́ tɩ zɔ ʋ nɩbaalʋ a, ɛ́ tɩ bɛ tɩ bɛr wõ a ʋ zɛlʋ ɛ. Alɛ n'a so a kpɩɛrʋ á ŋá na ta tɩ a.» 22Urubɛn tɩ yel'a ƴãw pʋɔ: «Ɩ̃ bɛ tɩ yel kʋ̀ nyɩ kɛ́ nyɩ taa ɩrɛ a bie ŋa faa kãw za ɩ? Ɛcɛ nyɩ bɛ bɛr wõ a ɩ̃ ƴɛ̀rʋ ɛ#42:22 Nyɛ̃ 37.21-22.. A ʋ kũu san n'ɩ ŋan bɛ sowre tɩ a dɩ̃a.» 23Bɛ bɛ tɩ bãw k'aa Zuzɛb wone a na ɩ, ƴɛ̀r-lɩɛbɛ na tɩ be be a ƴãw. 24Lɛ n'a a Zuzɛb tɩ bɛr bɛ ɛ́ taw yi pùor tɩ kõ.
A Zuzɛb yɛbr lɛb'a kul a Kanãa tẽw
A Zuzɛb tɩ lɛb'a wa a pùorí wa yel k'ʋʋ na tɛr'ɩ Sɩmɩ̃ɔ, ɛ́ ƴãw bɛ nyɔw ʋ 'lẽ a bɛ niŋé. 25Al pùorí, ʋ tɩ ƴãw na bɛ paalɩ a bɛ vʋɔrɩ nɩ ble, ɛ́ lɛb ƴãw ŋa za libie a ʋ vʋɔra pʋɔ, ɛ́ kʋ̀ bɛ sɔ́r bʋ̃-dɩrɩ. Lɛ n'a a tõ-tõ-biir tɩ ɩ bɛ. 26Bɛ tɩ tuo nɩ a bɛ ble vʋɔrɩ a bɛ bòn lo n a sɔ́r.
27A zie na wa sɔb bɛ tɛw a, a bɛ ƴen sob tɩ yuo nɩ a ʋ vʋɔra k'ʋʋ ír mʋ̃ɔ ƴãw a ʋ bõw. Ʋ tɩ nyɛ̃ nɩ a ʋ libie bɛ ƴãw a vʋɔra nʋɔrɩ́. 28Ʋ tɩ cɩɩr'ɩ a ʋ yɛbr zie yel: «Bɛ lɛb'a kʋ̀ m a ɩ̃ libie, alɛ n'ɩ a ŋan a ɩ̃ vʋɔra pʋɔ!» Bɛ bɛ tɩ bãw ŋmɩŋmɩn za n'a ɩ, ɛ́ dɛ̃bɩ̃ɛ tɩ nyɔw bɛ, bɛ sowre taa: «Bʋ̃ʋ n'ɩ à à ŋá a Naaŋmɩn na ɩ tɩ a?»
29Bɛ na tɩ ta a Kanãa a bɛ sãà Zakɔb zie a, bɛ man nɩ a lɛ za a yele na ɩ a kʋ̀ ʋ. 30Bɛ tɩ yel'a: «A nɩr ʋl na so a tẽw a ƴɛ̀r'ɩ a tɩ zie nɩ kɔkɔ-kpɛ̃w. Ʋ de tɩ na bʋɔlɛ nɩbɛ na wa a tẽw piwru a. 31Ɛ̀ tɩ sɔw ʋ yel: “Tɩ bɛ ɩ yel-sɔwlɩ-piwri-bãwnbɛ ɩ, nɩbɛ na tɛr yel-mɩŋa a n'ɩ tɩ. 32Tɩ tɩ ɩ n yɛbr pie nɩ ayi, sãà-been bibiir, ɛcɛ a tɩ kãw bɛ cãà ɩ, ɛ́ a bile za zie cãà a Kanãa, a tɩ sãà zie.” 33Lɛ n'a a nɩr ŋa na so a tẽw a yel tɩ: “Ɩ̃ bɔbr'a k'ɩ̃ɩ bãw, nyɩ sɩrɩ na ɩ nɩbɛ na tɛr yel-mɩŋa a bɩɩ. Nyɩ bɛr a nyɩ kãw a ka, ɛ́ kul'ɩ a ble tɩ kʋ̀ a nyɩ yie dem a kɔ̃ na kpɩɛr a. 34Al pùorí, nyɩ tɛr a nyɩ yɛ-bil-pʋrɩ za wa kʋ̀ m, lɛ n'a ɩ̃ na bãw kɛ́ nyɩ bɛ ɩ yel-sɔwlɩ-piwri-bãwnbɛ ɩ, kɛ́ nyɩ ɩ n nɩbɛ na tɛr yel-mɩŋa a. A lɛn daar a, ɩ̃ na lɛb kʋ̀ nyɩ a nyɩ yɛb, ɛ́ bɛr nyɩ nyɩ cɔlɛ a tẽw maalɛ a nyɩ yele.»
35Bɛ tɩ kpowr'ɩ a bɛ vʋɔrɩ, ŋa za nyɛ̃ vʋɔle nɩ a ʋ libie a ʋ vʋɔra pʋɔ. Bɛ na tɩ nyɛ̃ a libie á ŋá a, dɛ̃bɩ̃ɛ tɩ kpɛ n bɛ za, lãwnɩ a bɛ sãà Zakɔb. 36A Zakɔb tɩ yel bɛ na: «Nyɩ bɔbr'a k'ɩ̃ɩ ta cãà tɛr bie ɩ! Zuzɛb bɛ cãà be ɩ, Sɩmɩ̃ɔ bɛ cãà be ɩ, ɛ́ nyɩ mɩ̀ na lɛb de a Bɛ̃zamɛ ɛ! Mãa zu n'a à á ŋá za lɛb lore!» 37Urubɛn tɩ yel ʋ na: «Mãa bɛ wa tɛr a Bɛ̃zamɛ lɛb wa kʋ̀ b a, fʋ na tʋ̃ɔ́ na kʋ a ɩ̃ bidɛbr bɛ za ayi. De ʋ kʋ̀ m, ɩ̃ɩ na tɛr ʋ na lɛb wa kʋ̀ b.» 38A Zakɔb tɩ sɔw na: «A ɩ̃ bidɛb bɛ páwr nyɩ cere ɩ! A ʋ yɛb kpi na, ʋʋ cɛ ʋ yõ. Bʋ̃-kãw wa ɩ ʋ a sɔ́r zu a, nyɩmɛ nɛbɛ n'a so ɩ̃ cen a kpɩmɛ tẽw nɩ pʋ-sãwna, a mãa na kor à à ŋá a.»
Nke Ahọpụtara Ugbu A:
Yele-za-pɛr-tib 42: DBDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
La Bible en Dagara © Alliance Biblique du Burkina Faso, 2013.