Levitɩ mɩnɛ 14
14
A kɔ̃w dɛwr-so-bɛrʋ
1A Sore tɩ yel'ɩ a Moyiir à ŋá:
2«Nyɛ̃ a lɛ nyɩ na na mɩ́ tu a kɔ̃w dɛwr-so-bɛrʋ ƴãw a: bɛlɛ wa tɛr ʋ cen nɩ kɛ́ bɛ tɩ wul a bàwr-maalɛ a#14:2 Nyɛ̃ Mat 8.4, Mark 1.44, Luk 5.14, 17.14., 3a bàwr-maalɛ na yi n a laɩ pʋɔ tɩ jɩ́r ʋ kaa. A kɔ̃w bàalʋ wa baarɩ a, 4a bàwr-maalɛ na ƴãw na bɛ wa n lili-mimie ayi na ɩ lili-vɩɛlɩ a, nɩ sɛɛdɩr tɩɛ dale nɩ píir kɔblʋ pɛn-zɩɛ-kãbala de nɩ ɩzɔpɩ#14:4 Nyɛ̃ Ety 12.22 nɩ a manʋ. váar. 5Ʋ na ƴãw na bɛ ŋmãa a lile kãw kɔkɔr yawra bʋ̃-mɩɛra na ƴãw bule kʋ̃ɔ a zu-sɔw. 6Ʋ na de nɩ a lili-mimir nɩ a sɛɛdɩr tɩɛ dale nɩ a píir kɔblʋ pɛn-zɩɛ-kãbala nɩ a ɩzɔpɩ váar, lãw tõ a za a lile bɛ na ŋmãa a kɔkɔr a, zɩ̃ɩ pʋɔ. 7Lɛ n'a ʋ na mɩr a sob nɛ na suor a kɔnʋ dɛwr bɛrɛ a, gb'a ayopõi. Ʋ na yel'a k'ʋʋ lɛb'a vɩɛl, ʋ na bɛr'ɩ a lili-mimir ʋ ƴaw kpɛ a wɩ̀ɛ pʋɔ. 8A sob nɛ na suor a dɛwr bɛrɛ a na pɛ́w nɩ a ʋ bʋ̃-suuri, ʋ na põ n a ʋ kɔblʋ za bɛr, ɛ́ so kʋ̃ɔ lɛb vɩɛl. Al pùorí, ʋ na lɛb'a kpɛ a laɩ pʋɔ, ɛcɛ ʋ kʋ̃ tɩ kpɩɛr a ʋ pɛn-sɛw pʋɔ ɩ, tɩ maalɩ bibie ayopõi. 9A bibie ayopõi sob a, ʋ na lɛb'a fɔr a ʋ zu, põ a ʋ tɩɛm, a ʋ mimi-kɔblʋ nɩ a kɔblʋ al za na cɛ a bɛr, al pùorí, ʋ pɛ́w a ʋ bʋ̃-suuri ɛ́ so kʋ̃ɔ. a lɛn daar a, ʋ lɛb'a vɩɛl.»
10«A bibie ani sob a, ʋ na wa n nɩ pʋrali ayi a ƴã-gan zie kãw za na bɛ sãw a, yũon-been peli-pɔw a ƴã-gan zie kãw za na bɛ sãw a, kilo#14:10 Nyɛ̃ 5.11 nɩ a manʋ. piwaɩ zɔ̃ bɛ na bu n kãá a de-kʋ̀b nɩ litɩr ŋmãa kãá. 11A bàwr-maalɛ na maalɛ a yele a na ƴãw na a nɩr ʋl àr a Sore niŋé nɩ a ʋ bʋ̃-kʋ̀rɩ, a tuor-taa pɛn-sɛw dɩ̃dɔr nʋɔr. 12A bàwr-maalɛ na de nɩ a pʋrali-dãw-niwn sob na ɩ a lɛb-kpɛ-taa bàwr pʋrale a, nɩ a litɩr ŋmãa kãá, tɩr a Sore niŋé nɩ a bom de-tɩrʋ tub. 13Ʋ na ŋmãa nɩ a pʋrale kɔkɔr, a be bɛ na mɩ́ ŋmãa a yel-bier-ír-bɛrʋ bàwr bɩɩ nyɩw-a-za-bàwr dʋ̃w kɔkɔr a, a pɛr lɛ kɛ́ zie na ɩ sõw a, bʋ̃ʋ n'ʋ vɛ̃, a lɛb-kpɛ-taa bàwr bom bɩɩ a yel-bier-ír-bɛrʋ bàwr bom a, a bàwr-maalɛ so ʋ, ʋ na ɩ bʋ̃-sõw yaga za a ƴãw. 14A bàwr-maalɛ na ɩ n a dʋ̃w zɩ̃ɩ ƴãw a sob nɛ dʋrʋ tolan zu, a ʋ dʋrʋ nobidaa zu, nɩ a ʋ dʋrʋ gbebidaa zu. 15Al pùorí, ʋ de a kãá pʋr ƴãw a ʋ gʋba nũsalɛ̃pʋ̃ɔ́: 16ʋ na mɩ́ tõ n a ʋ dʋrʋ nobidaatuure a kãá pʋɔ, mɩr'ɩ a Sore niŋé gb'a ayopõi. 17Al pùorí, ʋ ɩ a kãá blã ƴãw a sob nɛ dʋrʋ tolan zu, a ʋ dʋrʋ nobidaa nɩ a ʋ dʋrʋ gbebidaa zu, a be ʋ na ɩ a pʋrale zɩ̃ɩ ƴãw a. 18Ʋ na cir'ɩ a kãá na cɛ a ʋ nũú a ƴãw a sob nɛ zũú, ɛ́ tu a dɛwr-so-bɛrʋ tub a ʋ ƴãw a Sore niŋé. 19A bàwr-maalɛ na maal'ɩ a yel-bier-ír-bɛrʋ bàwr, ɛ́ lɛb tu a dɛwr-so-bɛrʋ tub a sob nɛ ƴãw. Al pùorí, ʋ ŋmãa a nyɩw-a-za-bàwr dʋ̃w kɔkɔr 20nyɩw ʋ za bɛr a bàwr-maal-kuur zu, lãwnɩ a zɔ̃ de-kʋ̀b bom. Lɛ n'a ʋ na baa tu a dɛwr-so-bɛrʋ tub a sob nɛ ƴãw, ʋ lɛb vɩɛl.»
A kɔ̃w nã́w sob dɛwr-so-bɛrʋ
21«A sob nɛ wa ɩ nã́w sob kʋ̃ tʋ̃ɔ́ páw a de-kʋ̀b bome á ŋá za a, ʋ na wa n nɩ pʋrali-been, a lɛb-kpɛ-taa bàwr maalʋ ƴãw, bɛ wa de ʋ kʋ̀ a Sore tu n a bom de-tɩrʋ tub, k'aa sob nɛ tʋ̃ɔ́ lɛb vɩɛl. A sob nɛ mɩ̀ na cãà na wa n kilo ata zɔ̃ bɛ na naw nɩ kãá a de-kʋ̀b bom, nɩ litɩr ŋmãa kãá. 22Ʋ mɩ̀ na wa n nɩ ŋmamɛ ayi bɩɩ naŋmamɛ ayi, a al ʋ na na tʋ̃ɔ́ páw a, a kãw yel-bier-ír-bɛrʋ bàwr maalʋ ƴãw, ɛ́ a kãw nyɩw-a-za-bàwr maalʋ ƴãw. 23A bibie ani sob a, ʋ na wa n nɩ a bʋ̃-kʋ̀rɩ á ŋá a bàwr-maalɛ zie, a tuor-taa pɛn-sɛw dɩ̃dɔr nʋɔr, a Sore niŋé, a dɛwr-so-bɛrʋ tub ƴãw. 24A bàwr-maalɛ na de nɩ a pʋrale nɩ a kãá kʋ̀ a Sore nɩ a bom de-tɩrʋ tub. 25Ʋ na ŋmãa nɩ a pʋrale kɔkɔr, ɩ a zɩ̃ɩ ƴãw a sob nɛ dʋrʋ tolan zu, a ʋ dʋrʋ nobidaa nɩ a ʋ dʋrʋ gbebidaa zu. 26Ʋ na pʋr'ɩ a kãá ƴãw a ʋ gʋba nũsalɛ̃pʋ̃ɔ́, 27ɛ́ mɩ́ tõ a ʋ dʋrʋ nobidaatuure a kãá pʋɔ mɩr'ɩ a Sore niŋé gb'a ayopõi. 28Al pùorí, ʋ ɩ a kãá blã ƴãw a sob nɛ dʋrʋ tolan zu, nɩ a ʋ dʋrʋ nobidaa nɩ a ʋ dʋrʋ gbebidaa zu, a ziir al ʋ na dãw ɩ a pʋrale zɩ̃ɩ ƴãw a. 29A kãá na cɛ a ʋ nũú a, a bàwr-maalɛ na cir a na ƴãw a sob nɛ zũú, ɛ́ tu a dɛwr-so-bɛrʋ tub a ʋ ƴãw a Sore niŋé. 30Al pùorí, a bàwr-maalɛ na de nɩ a ŋmamɛ bɩɩ a naŋmamɛ ƴen sob — mɛ̃ a lɛ a sob na tɛr a — 31maal'ɩ yel-bier-ír-bɛrʋ bàwr, ɛ́ maal'ɩ a kãw nyɩw-a-za-bàwr lãwnɩ a zɔ̃ de-kʋ̀b bom. Lɛ n'a ʋ pãa na tu a dɛwr-so-bɛrʋ tub a nɩr nɛ ƴãw a Sore niŋé.»
32A wulu n'ɩ à á ŋá na càarɩ a kɔ̃w na bɛ tɛr a a dɛwr-so-bɛrʋ tub a.
A zi-ulsɩ na mɩ́ be a yir dacine zu a yele
33A Sore tɩ yel'ɩ a Moyiir nɩ a Aarɔ̃:
34«Nyɩmɛ wa kpɛ a Kanãa tẽw ɩ̃ na na kʋ̀ nyɩ nyɩ so ʋ a pʋɔ baarɩ a, mãa wa ɩ zi-ulu ʋ sãá a nyɩ tẽ-paala yir kãw pʋɔ a, 35a yir sob na cen na tɩ yel à ŋá a bàwr-maalɛ zie: “Ɩ̃ nyɛ̃ nɩ zi-ɓal kãw a ɩ̃ yir pʋɔ.” 36A bàwr-maalɛ na ƴãw na bɛ wob a yir bome za yi n, ɛ́ a ʋl tɔr za bãw cen tɩ jɩ́r a zi-ɓal kaa. À ŋá n'a bom za na tɩ be a yir pʋɔ a, kʋ̃ ɩ bʋ̃-dɛwr ɛ. Al pùorí, a bàwr-maalɛ na kpɛ na k'ʋʋ tɩ jɩ́r a yir kaa: 37ʋ na jɩ́r'ɩ a zi-ɓal kaa vla: ʋlɛ wa tɛr bɔwrɩ na uli ɩ sɛblɛ bɩɩ zɩɩr a, ʋlɛ wa ɩ mɛ̃ ʋ ɩ n bɔw a yir dacin pʋɔ a, 38a bàwr-maalɛ na yi na wa ta a dɩ̃dɔr ƴãw ɛ́ pàw a yir bɛr bibie ayopõi. 39A bibie ayopõi sob a, a bàwr-maalɛ na lɛb'a wa, lɛb wa maal jɩ́r a yir kaa: a zie wa ɓalɩ dɔwlɩ a yir dacin zu a, 40a bàwr-maalɛ na ƴãw na bɛ 'lawrɩ a kʋsɛbɛ na ɓalɩ a, yi zaa nɩ a tẽw pʋɔ tɩ lɔb a bɛr zie na ɩ zi-dɛwr a. 41Ʋ na ƴãw na bɛ kʋɔrɩ a tanɛ na fɔl a yir dacĩ-pʋʋr a, yi zaa nɩ a tẽw pʋɔ tɩ cir bɛr zi-dɛwr pʋɔ. 42Al pùorí, bɛ na de nɩ kʋsɛ-yoru lɩɛr'ɩ a dãw-niwn dem, ɛ́ lɛb bãw fɔl a dacine nɩ tan-paala.»
43«Bɛlɛ wa ír a kʋsɛ-ulsɩ bɛr, kʋɔrɩ a tanɛ bɛr ɛ́ lɛb fɔl a dacine, ɛ́ a ʋlɩ zi-ɓal wa lɛb maal sãá a yir pʋɔ a, 44a bàwr-maalɛ na cen na lɛb tɩ bãw jɩ́r kaa: a zi-ɓal wa lɛb sɩrɩ sãá a, a wul'a kɛ́ bɛ kʋ̃ tʋ̃ɔ́ ír a ulu bɛr a yir pʋɔ ɩ. A yir ŋa tɛr'ɩ dɛwr. 45A na fɛr'a kɛ́ bɛ ŋmɛ a yir ŋmɛr, a ziir al na ɩ a kʋsɛbɛ a nɩ a ziir al na ɩ a dàar a, lãwnɩ a tan-fɔla. Bɛ na wob'ɩ a za yi n a tẽw pʋɔ tɩ ƴãw zie kãw na ɩ zi-dɛwr a.»
46«Nɩr wa kpɛ a yir pʋɔ a bibie al a na fɛr k'ʋʋ pàw gã a, ʋ na ɩ n dɛwr sob tɩ ta a zaanʋɔra. 47Nɩr wa gã a yir ŋa pʋɔ bɩɩ dɩ bom a ʋ pʋɔ a, a fɛr'a k'ʋʋ pɛ́w a ʋ bʋ̃-suuri.»
48«Ɛcɛ a bàwr-maalɛ wa jɩ́r nyɛ̃ a zi-ɓal bɛ lɛb sãá a yir lɛb-fɔlʋ pùorí a, ʋ na yel'a k'aa yir vɩɛl'a, bɛ na tʋ̃ɔ́ ír a zi-ulu bɛr a ƴãw.»
49«A yir dɛwr-so-bɛrʋ tub ƴãw a, a bàwr-maalɛ na de nɩ lili ayi, sɛɛdɩr tɩɛ dale, píir kɔblʋ pɛn-zɩɛ-kãbala nɩ ɩzɔpɩ váar. 50Ʋ na ŋmãa nɩ a lili-dãw-niwn sob kɔkɔr yawra bʋ̃-mɩɛra na ƴãw bule kʋ̃ɔ a zu-sɔw. 51Ʋ na de nɩ a sɛɛdɩr tɩɛ dale, a ɩzɔpɩ váar nɩ a píir kɔblʋ pɛn-zɩɛ-kãbala nɩ a lili-mimir, mɩ́ tõ a lile ʋ na ŋmãa a kɔkɔr a zɩ̃ɩ pʋɔ, ɛ́ tõ a bule kʋ̃ɔ pʋɔ, ɛ́ mɩr'ɩ a yir gb'a ayopõi. 52— À ŋá n'a ʋ na ír a yir dɛwr bɛr nɩ a lile zɩ̃ɩ nɩ a bule kʋ̃ɔ nɩ a lili-mimir nɩ a sɛɛdɩr tɩɛ dale nɩ a ɩzɔpɩ váar nɩ a píir kɔblʋ pɛn-zɩɛ-kãbala. — 53Ʋ na bɛr'ɩ a lili-mimir ʋ ƴaw yi a tẽ-kpɛ̃ɛ pʋɔ kpɛ a wɩ̀ɛ pʋɔ. Ʋ na tu n a tub na na ɩ a yir ʋ vɩɛl a, ɛ́ a yir na vɩɛl'a.»
54A wulu n'ɩ à á ŋá na càarɩ a kɔnʋ bʋʋrɛ, a zu-kpalɛ, 55a ulu na be bʋ̃-suuri zu bɩɩ yir dacine zu a, 56na càarɩ zi-ɓuuri, kpele nɩ zi-nyɩlɩ a. 57A wulu á ŋá mɩ́ sõw na bɛ yel, debor daar'a a nɩbɛ bɩɩ a bome mɩ́ tɛr dɛwr bɩɩ bɛ tɛr dɛwr.
Nke Ahọpụtara Ugbu A:
Levitɩ mɩnɛ 14: DBDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
La Bible en Dagara © Alliance Biblique du Burkina Faso, 2013.