Levitɩ mɩnɛ 8
8
A BÀWR-MAAL-DÃW-NIWN DEM NŨU-KA-ƳÃWFƲ TUB
8—10
A Aarɔ̃ nɩ a ʋ bidɛbr nũu-ka-ƴãwfʋ tub
1A Sore tɩ yel'ɩ a Moyiir: 2«Bʋɔlɩ a Aarɔ̃ nɩ a ʋ bidɛbr wa n a tuor-taa pɛn-sɛw dɩ̃dɔr nʋɔr. Ƴãw bɛ wa n kpar-son nɩ a kãá-cir-ƴãwfʋ kãá, cãà ƴãw bɛ wa n a yel-bier-ír-bɛrʋ bàwr nadɛr, a pʋ́rɩ ayi nɩ a zãkpa na ƴãw a dipɛ̃ na bɛ ƴãw dãbɩl a. 3Mɩ̀ bʋɔlɩ a Ɩsɩrayɛl nɩbɛ za ɓã taa a be.» 4A Moyiir tɩ sàw nɩ a Sore nʋɔr, bʋɔlɩ a Ɩsɩrayɛl nɩbɛ ɓã taa a tuor-taa pɛn-sɛw dɩ̃dɔr nʋɔr. 5Lɛ n'a a Moyiir tɩ yel a lãw nɩbɛ: «Ɩ̃ na tu n a lɛ a Sore na ƴãw a nʋɔr kʋ̀ m a.» 6Al pùorí, ʋ ƴãw a Aarɔ̃ nɩ a ʋ bidɛbr bɛ taw ta, ʋ ƴãw bɛ so a bɛ dɛwr bɛr. 7Ʋ tɩ su n a Aarɔ̃ a kpar-wogo, ɛ́ ŋmãa nɩ ʋ a kpàwr, lɛb su ʋ kpar-wogo dɔwlɩ, ɛ́ su ʋ a bàwr-maal-kara nyãa-kpale dɔwlɩ, ɛ́ 'lẽ ʋ a bàwr-maal-kara nyãa-kpale bʋ̃-'leni a zikurí#8:7 Nyɛ̃ Ety 28.6-14.. 8Ʋ tɩ ƴãw ʋ nɩ a nyãa-zu-zʋbɛ a nyãa zu, ɛ́ ƴãw a kpan-bie, a Uurim nɩ a Tumim#8:8 Uurim nɩ Tumim: Nyɛ̃ Ety 28.30. . 9A Moyiir tɩ de nɩ a zu-pɛn-vila vili ʋ a zu ɛ́ mɛr a kãá-cir-ƴãwfʋ bãwfʋ. Salm-zɩɛ pɩ̃ɛmɛ na ɩ mɛ̃ tɩ-puuru a n'ʋ a zu-pɛn-vila nisɔw, mɛ̃ a lɛ a Sore na ƴãw a nʋɔr kʋ̀ ʋ a. 10A Moyiir tɩ de nɩ a kãá-cir-ƴãwfʋ kãá maal'ɩ a tuor-taa pɛn-sɛw nɩ bom za na be a ʋ pʋɔ a, a ɩ son. 11Ʋ tɩ mɩr'ɩ a bàwr-maal-kuur nɩ a ʋ bome, a dɛwr-so-bɛrʋ kur-zɩɛ-dʋw nɩ a ʋ dɔwlʋ zie. Ʋ tɩ mɩr a nɩ gb'a ayopõi nɩ a kãá, k'ʋʋ maalɩ a a ɩ son. 12Ʋ tɩ cir'ɩ a kãá ƴãw a Aarɔ̃ zũú, ka nũu ƴãw ʋ. 13Al pùorí, a Moyiir tɩ ƴãw na a Aarɔ̃ bidɛbr taw ta: ʋ su bɛ a bɛ kpar-wowr, 'lẽ bɛ a bɛ kpàgɛ, vɔblɩ bɛ a bɛ pɛn-kpawoli mɛ̃ a lɛ a Sore na yel kʋ̀ ʋ a.
14Ʋ tɩ ƴãw na bɛ wa n a yel-bier-ír-bɛrʋ nadɛr. A Aarɔ̃ nɩ a ʋ bidɛbr tɩ ír'ɩ a nuru dɔwlɩ a ʋ zũú. 15A Moyiir tɩ ŋmãa nɩ a dʋ̃w kɔkɔr, ɛ́ ɩ a zɩ̃ɩ nɩ nobir ƴãw a bàwr-maal-kuur ɩ́lɛ́ ƴãw, k'ʋʋ ɩ ʋ vɩɛl. Al pùorí, ʋ cir a zɩ̃ɩ na cɛ a ƴãw a bàwr-maal-kuur sɩɛ ƴãw. À ŋá n'a ʋ tɩ maalɩ ʋ, kɛ́ bɛ mɩ́ wa tʋ̃ɔ́ tu a yel-bebe suur-dɩ-kʋ̀b tub a ʋ zu. 16A Moyiir tɩ de nɩ a kãá na pàw a dʋ̃w nyagɛ nɩ a púor a, a sabr lõbowr-kpɛ̃ɛ, a alãbie a za ayi lãwnɩ a kãá na pàw a a, nyɩw a za a bàwr-maal-kuur zu. 17A dʋ̃w nɛn-ŋmãa na cɛ a, a gán, a nɛn nɩ a pʋ-bome, bɛ tɩ yi n a nɩ a laɩ pʋɔ tɩ nyɩw bɛr yẽw, mɛ̃ a lɛ a Sore na tɩ yel kʋ̀ a Moyiir a.
18Al pùorí, a Moyiir tɩ ƴãw na bɛ wa n a nyɩw-a-za-bàwr pʋ́ra. A Aarɔ̃ nɩ a ʋ bidɛbr tɩ ír'ɩ a nuru dɔwlɩ a ʋ zũú. 19A Moyiir tɩ ŋmãa nɩ a pʋ́ra kɔkɔr ɛ́ ɩ a zɩ̃ɩ mɩr'ɩ a bàwr-maal-kuur kõkowe. 20Ʋ tɩ var'ɩ a dʋ̃w ŋma gbile gbile, nyɩw a a bàwr-maal-kuur zu, lãwnɩ a zu nɩ a nɛn-kãánɩ. 21Ʋ tɩ pɛ́w nɩ a nyagɛ, a púor nɩ a gbɛ́ɛ, nyɩw a a bàwr-maal-kuur zu lãwnɩ a pʋ́ra za, ʋ ɩ nyɩw-a-za-bàwr a Sore na nɔnɛ a zʋ̀ʋ́r nyũu a. Bàwr bɛ na nyɩw a nɛn a n'ʋ, mɛ̃ a lɛ a Sore na yel kʋ̀ a Moyiir a.
22Ʋ tɩ ƴãw na bɛ baa wa n a pʋ́rɩ ayi sob, ʋ ɩ a bàwr-maalbɛ tome tib bàwr-maal pʋ́ra. A Aarɔ̃ nɩ a ʋ bidɛbr tɩ ír'ɩ a nuru dɔwlɩ a ʋ zũú. 23A Moyiir tɩ ŋmãa nɩ a pʋ́ra kɔkɔr, ɩ a zɩ̃ɩ 'lɩw nɩ a Aarɔ̃ dʋrʋ tolan, a ʋ dʋrʋ nobidaa nɩ a ʋ dʋrʋ gbɛbidaa. 24Al pùorí, ʋ ƴãw a Aarɔ̃ bidɛbr taw ta, ʋ mɩ̀ ɩ a zɩ̃ɩ 'lɩw nɩ a bɛ dʋrʋ tolamɛ, a bɛ dʋrʋ nobidaar nɩ a bɛ dʋrʋ gbɛbidaar, ɛ́ de a zɩ̃ɩ na cɛ a mɩr'ɩ a bàwr-maal-kuur kõkowe. 25A Moyiir tɩ de nɩ a pʋ́ra zi-kãánɩ: a zʋʋr, a kãá na pàw a nyagɛ nɩ a púor a, a sabr lõbowr-kpɛ̃ɛ, a alãbie a za ayi nɩ a kãá na pàw a a, pãa de nɩ a pɛrɩ́ dʋrʋ-gbɛ́r. 26A Moyiir tɩ ír'ɩ gato been na bɛ ƴãw dãbɩl a, gato been bɛ na maal'ɩ kãá a, nɩ sɛ̃sɛ̃-ɓɛrɓɛr been a dipɛ̃ na bɛ ƴãw dãbɩl a zãkpa na bin a Sore niŋé a pʋɔ, ɛ́ de a dɔwlɩ a nɛn-kãánɩ nɩ a pɛrɩ́ dʋrʋ-gbɛ́r zu. 27Ʋ tɩ ƴãw nɩ a za a Aarɔ̃ nɩ a ʋ bidɛbr nuru pʋɔ, ɛ́ yel bɛ kɛ́ bɛ tu a bom de-tɩrʋ tub, de a kʋ̀ a Sore. 28Al pùorí, ʋ lɛb de a de-kʋ̀b bome á ŋá a bɛ nuru pʋɔ, nyɩw a a bàwr-maal-kuur zu, a nyɩw-a-za-bàwr bome zu. À ŋá n'a a bàwr na wul k'aa bàwr-maalbɛ tĩ nɩ a bɛ tome a tɩ tu. Bom a Sore na nɔ̃w a zʋ̀ʋ́r nyũu a n'ʋ. 29A Moyiir tɩ de nɩ a dʋ̃w nyãa tu n a de-tɩrʋ tub, de ʋ kʋ̀ a Sore. Ʋlɛ tɩ so a pʋ́ra zie ŋa, mɛ̃ a lɛ a Sore na yel a.
30A Moyiir tɩ ɩ n a kãá-cir-ƴãwfʋ kãá nɩ zɩ̃ɩ blã na be a bàwr-maal-kuur zu a, mɩr'ɩ a Aarɔ̃ nɩ a ʋ kparɩ, ɛ́ mɩ̀ mɩr'ɩ a Aarɔ̃ bidɛbr nɩ a bɛ kparɩ. À ŋá n'a ʋ tɩ ka nũu ƴãw a Aarɔ̃ nɩ a ʋ bidɛbr ɛ́ maalɩ a bɛ kparɩ a ɩ son.
31A Moyiir tɩ yel'ɩ a Aarɔ̃ nɩ a ʋ bidɛbr: «Nyɩ ƴãw bɛ dʋw a pʋ́rɩ ayi sob ŋa nɛn a tuor-taa pɛn-sɛw dɩ̃dɔr nʋɔr. Nyɩɩm mɩŋa na 'wɔb ʋ nɩ a be, lãwnɩ dipɛ̃ bɛ na cɔbrɩ a yel ŋa maalʋ ƴãw a, mɛ̃ a lɛ ɩ̃ na ƴãw a nʋɔr kʋ̀ nyɩ a. 32Nɛn bɩɩ dipɛ̃ wa cɛ a, nyɩ na lɔb a na ƴãw a vũumí. 33Nyɩ na maal'ɩ bibie ayopõi a tuor-taa pɛn-sɛw dɩ̃dɔr nʋɔr. A nyɩ tome tib yele maalʋ bibie ayopõi nʋɔr bɛ wa kʋ a, nyɩ bɛ tawr yire a ʋ dɩ̃dɔr nʋɔr ɛ. 34A Sore mɩŋa n'ʋ yel kɛ́ bɛ ɩ à à ŋá tɩ na ɩ a dɩ̃a a, kɛ́ nyɩ tʋ̃ɔ́ páw a nyɩ yel-bebe suur-dɩ-kʋ̀b. 35Nyɩ na be n a tuor-taa pɛn-sɛw dɩ̃dɔr nʋɔr, mʋ̃tɔ̃w nɩ tɩ̃ɩsɔw, bibie ayopõi, al pùorí a, nyɩ na tʋ̃ɔ́ na tone a Sore tome ɛ́ taa kpiir ɛ. À à ŋá n'a a Sore yel kʋ̀ m.» 36A Aarɔ̃ nɩ a ʋ bidɛbr tɩ tu n a lɛ za a Sore na tɩ ƴãw a Moyiir yel kʋ̀ bɛ a.
Nke Ahọpụtara Ugbu A:
Levitɩ mɩnɛ 8: DBDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
La Bible en Dagara © Alliance Biblique du Burkina Faso, 2013.