Ruka 4
4
Pspeengan ka Yesu
(Mat 4:1-11. Mrk 1:12-13)
1Yesu we stngean Bgihur Utux ma kndalax yayung Yarden meyah da. Ddudul Bgihur Utux mosa ckceka tadus brenux ka heya, 240 ali pspeengan Qbsuran Bgihur Naqah. Ini ekan ani maanu kana ali ciida ma mnhedu ka kana ali de muure bale da. 3Rmengo heya ka Qbsuran Bgihur Naqah: “Bale su laqi Utux Baro ka isu we rngagi btunux nii so maha ma pang.” 4Cmiyuk rmengo ka Yesu: “Ga spatis ka Patis:
‘Uxe wano pang nanak ka skuudus seediq.’”
5Desun na bbaro ba dgiyaq dungal ka Yesu Kiya de Qbsuran Bgihur Naqah, asi na pqtani kana ka qnlhangan bobo dxeral, 6rmengo heya: “Bege mu sunan ka kana pusu beyax nii ma kana knledax. Ado wada spstama kenan kana ka nii. Ima ka qmbiqun mu we bege mu. 7So kiya de nasi su thmuku kenan de mpnisu ka kana nii da.” 8Rmengo ka Yesu: “Ado ga spatis Patis:
‘Asi su ka Thmuku Bukung, Utux Baro,
wano heya ka qqpahun su.’”
9Qbsuran Bgihur Naqah we desun na Yerusalem ka Yesu ma phyegun na ludux Sapah Thmkuwan hiya, rngagan na: “Nasi su laqi Utux Baro ka isu we pstaril toma peeyah hini bino! 10Ado ga spatis Patis:
‘Ririh isu, Utux Baro we mpskagul dsnkgulan na baro mpqlahang isu.
11Mpgnama baga daha mlekoh sunan,
so uxe ptsebuc btunux ka papak su.’”
12Cmiyuk rmengo heya ka Yesu: “Mesa rmengo ka Patis: ‘Iya psseung Bukung, Utux Baro su.’” 13Qbsuran Bgihur Naqah we wada na qhdeun ka lmlamu pnsengan na de, mlatac Yeus ka heya han ma tmara migin yahan na duri.
Prading Gmarang Kari Galil ka Yesu
(Mat 4:12-17. Mrk 1:14-15)
14Yesu we madis beyax Bgihur Utux meyah Galil. Kiya de ngayan na we mkgarang kana mtqiri dxeral hiya. 15Kiya de tmgesa sapah pssliyan seediq ma tndhuun heya ka kana seediq.
Sqada Seediq Najare ka Yesu
(Mat 13:53-58. Mrk 6:1-6)
16Meyah alang Najare, kiya ka kndkilan na ka Yesu. Meniq ali sngayan we ida so ooda na klaali mosa sapah pssliyan. Mheyu ssepu na Kari Utux Baro. 17Sbege daha heya ka patis Isaya mpgeela kari. Kiya de rwahan na ma slayan na ga spatis hiya:
18“Nii meniq heyi mu ka Bgihur Utux Bukung,
ado wada ku na hrigan abura,
ggarang malu kari quri seediq qrinuc.
Sskagul na kenan mosa smneeru,
Ptrwahun ka qnerac,
pqtaun ka mbudu,
rraguh ka seediq ga pretun,
19ggarang knkawas gghuwe na seediq ka Utux Baro.”
20Kiya de tkmeun na ka patis ma sbege na mpqeepah hiya de tleung da. Kiya de tgleus mita heya ka kana seediq ga meniq sapah pssliyan hiya. 21Rmengo dheya ka Yesu: “Patis nii we mpbale ba qnbhangan namu ali saya da.” 22Tndhuun daha ka heya ma sklwiun daha ka gnhuwe kari rnengo peeyah quwaq na. Rmengo dungal ka dheya: “Nii we uxe laqi Yosehu peni?” 23Rmengo dheya ka Yesu: “Ida namu maangal kari so nii mprengo kenan: ‘Ising, spuhi nanak sunan! So ka qnbhangan nami ka qneepah su meniq Kaparnaom we pqpahi alang su hini uri.’” 24Kiya de rmengo ka heya: “Bale ba rngage maku: Ini qrasi maangal alang na nanak ka ani ima mpgeela kari. 25Bale ba rngage maku: Ali Eliyah ciida, wada 3 knkawas 6 idas ga leban ka karac, krayan ka kana dxeral. Ciida hbaro ba ka mqedil mqrinuc Israel hiya. 26Ini skguli mosa ani ima mqedil mqrinuc hiya ka heya. Wano skgulan mosa Carpat ga Cidon mita 1 mqedil mqrinuc heya ka Eliyah.” 27Ali Elisa mpgeela kari ciida, hbaro ba ka mnarux msburo heyi Israel hiya. Kiya de wano Naaman seediq Suria ka wada klmeun, ini pkmlei ka ani ima da. 28Mbahang kari so nii ka seediq ga meeniq sapah pssliyan hiya de msqama ba mseang, 29mtutuy ma lwaqi daha nganguc alang ka Yesu, alang smnalu daha we gaga meniq dgiyaq. Kiya de desun daha gmrangan dgiyaq, satang daha qqada hiya ka heya. 30Kiya de Yesu we moda ckceka daha ma wada da.
Lmiwaq Bgihur Naqah ka Yesu
(Mrk 1:21-28)
31Mosa Kaparnaom 1 alang ga Galil ka Yesu, tmgesa seediq ali sngayan. 32Mskluwi ba tnugesa na ka kana seediq. Ado ga niqan ba pusu beyax ka kari na. 33Ga meniq sapah pssliyan hiya ka seediq ga sdooyan bgihur naqah, paru ba quwaq na mdiras rmengo: 34“Ah! Yesu seediq Najare, maanu ka pnugluban ta isu ma yami ho? Meyah su pkuuka menan ho? Klaun misu ima ka isu. Isu we mrtaso ba nuUtux Baro!” 35Mseang rmengo heya ka Yesu: “Gmelux, latac peeyah heyi seediq nii!” Wada tkurun utux naqah ckceka hbaro ba seediq ka heya, kiya de mlatac peeyah heyi na ma ini na plqihi. 36Mskluwi ka hbaro seediq duma mpprengo: “Mmaanu bale ka so nii ho? Ado spooda na pusu beyax mseang bgihur naqah de wada mlatac ka duutux naqah!” 37Kiya de mkgarang kana mtqiri dxeral hiya ka ngayan Yesu.
Pkmalu Hbaro Seediq
(Mat 8:14-17. Mrk 1:29-34)
38Mlatac peeyah sapah pssliyan ka Yesu ma mremux sapah Simon. Ga mnarux paru ba kntlexan ka bubu mqedil Simon. Kiya de heya ka sdurun daha Yesu. 39Mheyu ssiyo na ka Yesu ma kseengun na rmengo ka mnarux kntlexan de asi ktleetu da. Kiya de asi tutuy ka heya ma smbleyaq dheya.
40Priyax hido ciida, ga niqan lmlamu mnarux na ka seediq we desun daha Yesu hiya. Yesu de psaan na baga na ka txtaxa heyi daha ma pklmeun na ka dheya. 41Mlatac peeyah hbaro ba seediq ka dbgihur naqah uri ma mdiras rmengo: “Isu we laqi su Utux Baro!” Kseengun Yesu ka dheya ma ini na psrwai pprengo. Ado heya ka Kiristo we klaun daha.
Gmarang Kari Meniq Yudaya
(Mrk 1:35-39)
42Lmedax karac de mlatac ka Yesu ma mosa dxeral nrao. Mosa migin heya ka hbaro ba seediq, dehuk heya de kmhridun daha uxe daha psaun peeyah dheya ka heya. 43Kiya de rmengo dheya ka Yesu: “Yaku we ida mu asi ka sgarang lualang taxa uri ka malu kari quri qnlhangan Utux Baro. Ado so nii ka sskagul na kenan ka Utux Baro.” 44Kiya de gmarang kari kana sapah pssliyan Yudaya hiya ka heya.
Nke Ahọpụtara Ugbu A:
Ruka 4: Stgdaya
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
The Bible Society in Taiwan, 2020
© 台灣聖經公會版權所有，2020