যোহন 1
1
গোজেন কধাগান মানুচ্ ওইনে জোর্মেল
1পত্তমে কধাগান্ এলঅ, কধাগান্ গোজেন সমারে এলঅ আর কধাগান্ নিজেই গোজেন এলঅ। 2আর পত্তমে তে গোজেন সমারে এলঅ। 3বেক্কানি সেই কধালোই সৃট্টি ওইয়্যে। আর যিয়েনি সৃট্টি ওইয়্যে সিয়েনি ভিদিরে কনঅ কিজু তারে বাদে সৃট্টি ন-অয়। 4তা ভিদিরে জিংকানি এলঅ আর সেই জিংকানিগান্ এলঅ মান্জ্যর পহর্। 5সে পহরান্ আন্ধারত্ জ্বলের্ মাত্তর্ আন্ধার্ পহ্রানরে জিদি ন-পারে।
6গোজেনে যোহন নাঙে এক্কো মান্জ্যরে পাধেয়্যে। 7তে পহ্র পৌইদ্যেনে সাক্ষী ইজেবে সাক্ষি দিবাত্যে এচ্চ্যে যেনে বেক্কুনে তা সাক্ষিগান্ শুনিনে বিশ্বেজ্ গুরি পারন্। 8যোহনে নিজে সেই পহ্রান্ ন-এলঅ মাত্তর্ সে পহ্রান্ পৌইদ্যেনে সাক্ষি দিবাত্যে এচ্চ্যে।
9তেয়ই আঝল্ পহ্র, যে পত্তি মান্জ্যরে পহ্র দান গরে, তে পিত্থিমীত্ এজের্। 10তে পিত্থিমীত্ এলঅ আর পিত্থিমীগান্ তা মাধ্যমে সৃট্টি ওইয়্যে, তো জগদর্ মানুচ্চুনে তারে ন-চিনিলাক্। 11তে নিজো দেজত্ এলঅ, মাত্তর্ তা নিজো মানুচ্চুনে তারে মানি ন-ললাক্। 12মাত্তর্ যেদক্জনে তা উগুরে বিশ্বেজ্ গুরিনে তারে গুজি ললাক্ তারারে বেক্কুনোরে তে গোজেনর্ পুয়ো অবার্ অধিকারান্ দিলো। 13এ মানুচ্চুনোর্ জর্ম লোত্তুন্ ন-অয়, কিয়্যের্ কামনা বা মরদ বাসনাত্তুন্অ ন-অয়, মাত্তর্ গোজেনত্তুনই ওইয়্যে।
14সে কধাগানই মানুচ্ ওইনে জর্মেল আর আমা ভিদিরে বজত্তি গুরিলো। বাবা গোজেনর্ বানা এক্কো গুরি পুয়ো ইজেবে তার্ যে মহিমা সে মহিমাগান্ আমি দেক্ক্যেই। তে দোয়্যে আর সত্যলোই ভরা। 15যোহনে তা পৌইদ্যেনে রঅ ছাড়িনে সাক্ষ্য দিইনে কলঅ, “তেয়ই সে মানুচ্চো যিবে পৌইদ্যেনে মুই কোইয়োং, যে মঅ পরেদি এজের্ তে মত্তুন্ বেশ্ দাঙর্, কিয়া তে মর্ বোউত্ আগেত্তুন্ ধুরি আঘে।”
16আমি বেক্কুনে তার্ সেই পূরোণ অনাত্তুন্ দোইয়্যে উগুরে আরঅ দোয়্যে পেইয়্যেই। 17মোশির্ মাধ্যমে রীদি-সুদোম দিয়্যে ওইয়্যে, মাত্তর্ যীশু খ্রীষ্টর্ মাধ্যমে দোয়্যে আর সত্য এচ্চ্যে। 18গোজেনরে কেঅ কনদিন্অ ন-দেগন্। তা লগে থেইয়্যে সেই বানা এক্কো গুরি পুয়ো, যিবে নিজেই গোজেন, তেয়ই তারে ফগদাং গোজ্যে।
যোহনর্ সাক্ষি
(মথি ৩:১১; মার্ক ১:৬-৮; লূক ৩:১৫,১৬)
19যেক্কে যিহূদী নেতাগুনে যিরূশালেম শঅরত্তুন্ কয়েক্কো ধর্মগুরু আর লেবীয়রে যোহন ইধু পাধেল সেক্কে যোহনে তারা ইধু এ সাক্ষিগান্ দিলো। তারা পুযোর্ গুরিলাক্, “তুই কন্না?”
20জোবত্ যোহনে অস্বীগের্ ন-গুরিলো বরং স্বীগের্ গুরিনে কলঅ, “মুই মশীহ নয়।”
21সেক্কে তারা যোহনরে পুযোর্ গুরিলাক, “সালে কন্না? তুই কি এলিয়?”
তে কলঅ, “নয়, মুই এলিয় নয়।”
তারা কলাক্, “সালে তুই কি সেই ভাববাদীবো?”
জোবত্ তে কলঅ, “নয়।” 22সেক্কে তারা তারে কলাক্, “সালে তুই কন্না? যিগুনে আমারে পাধেয়োন ফিরি যেইনে তারারে দঅ আমার্ জোব্ দিয়্যে পুরিবো। তঅ নিজো পৌইদ্যেনে তুই নিজে কি কচ্?”
23যোহনে কলঅ, “মুয়ই সেই রবুয়ো, যিবে পৌইদ্যেনে ভাববাদী যিশাইয় কোইয়্যে,
ধূল্যেচর-চাগালাত্ একজন রঅ দাঙর্ গুরিনে কত্তে,
তুমি প্রভুর্ পথতান্ উজু গরঅ।”
24যোহন ইধু যিগুনোরে পাধেই দিয়্যে ওইয়্যে তারা ফরীশী এলাক্। তারা যোহনরে পুযোর্ গুরিলাক্, 25“যুনি তুই মশীহয়ো নয়, এলিয়য়ো নয় বা সেই ভাববাদীয়ো নয়, সালে কিত্ত্যে তুই বাপ্তিষ্ম দুয়োর্?”
26যোহনে জোবত্ কলঅ, “মুই পানিত্ বাপ্তিষ্ম দুয়োঙর্ ঠিগ্, মাত্তর্ তমা ভিদিরে এমন্ একজন আঘে যিবেরে তুমি ন-চিনো। 27যিবে মঅ পরেদি এবার্ কধা এলঅ। মুই তার্ জদা ফিটেগানি খুলিবার্ যগাজ্যে নয়।”
28যর্দন গাঙর্ উকুলে বৈথনিয়া আদামত্ যিয়েনত্ যোহনে বাপ্তিষ্ম দের্ সিয়েনত্ ইয়েনি বেক্কানি ঘোট্যে।
29তার্ কেল্যে যোহনে যীশুরে তা নিজো ইন্দি এত্তে দেগিনে কলঅ, “উইয়োবু চঅ, গোজেনর্ ভেড়া ছবুয়ো, যিবে মান্জ্যর্ বেক্ পাপ্পানি দূর্ গরে। 30ইবে সেই মানুচ্চো যিবে পৌইদ্যেনে মুই কোইয়োং, মঅ পরেদি একজন এজের্ যিবে মত্তুন্ দাঙর্, কিয়া তে মর্ বোউত্ আগেত্তুন্ ধুরি আঘে। 31মুই তারে ন-চিনিদুং, মাত্তর্ তে যেন ইস্রায়েলীয়গুনো ইধু ফগদাং পায় সেনত্তে মুই এইনে পানিত্ বাপ্তিষ্ম দোঙর্।”
32সে পরেদি যোহনে এ সাক্ষিগান্ দিলো, “মুই পবিত্র আত্মারে কোদোর ধোক্ক্যেন্ ওইনে স্বর্গত্তুন্ লামি এইনে তা উগুরে থাদে দেক্ক্যং। 33মুই তারে ন-চিনিদুং, মাত্তর্ যে মরে পানিত্ বাপ্তিষ্ম দিবাত্তে পাধেয়্যে তেয়ই মরে কোই দিয়্যে, ‘যা উগুরে পবিত্র আত্মারে লামি এইনে থাদে দেগিবে, তেয়ই সে মানুচ্চো যিবে পবিত্র আত্মালোই বাপ্তিষ্ম দিবো।’ 34মুই সিয়েন্ দেক্ক্যং আর সাক্ষ্য দোঙর্, ইবেই গোজেনর্ পুয়োবো।”
শিচ্চ্য অনা
35তার্ কেল্যে যোহন আর তার দ্বিজন্ শিচ্চ্য আরঅ সিয়েনত্ এলাক্। 36এমন সময়োত্ যীশুরে আঢি যাদে দেগিনে যোহনে কলঅ, “উইয়োবু চঅ, গোজেনর্ ভেড়া ছবুয়ো।”
37যোহনরে এ কধাগান্ কধে শুনিনে সে দ্বিজন্ শিচ্চ্য যীশুর্ পিজে পিজে যাহ্ ধুরিলাক্। 38যীশু পিজেদি ফিরিনে তারারে এত্তে দেগিনে কলঅ, “তুমি কি তগর্?”
যোহন শিচ্চ্যগুনে পুযোর্ গুরিলাক্, “রব্বি (অত্তাৎ মাষ্টরবাবু), তুই কুধু থাচ্?”
39যীশু তারারে কলঅ, “এইনে চুগি।” সেক্কে তারা যেইনে যীশু যিয়েনত্ থেদঅ সে জাগায়ান্ চেলাক্ আর সেদিন্ন্যে তা সমারে থেলাক্। সেক্কে প্রায় বেল্যে মাদান্ চের্বো বাজের্।
40যোহন কধা শুনিনে যে দ্বিজন্ যীশুর্ পিজে পিজে যেইয়োন্ তারাত্তুন্ একজন নাঙ্ এলঅ আন্দ্রিয়। তে এলঅ শিমোন-পিতর ভেই। 41আন্দ্রিয় পত্তমে তার্ ভেই শিমোনরে তোগেইনে নিগিলেল আর কলঅ, “আমি মশীহর (অত্তাৎ খ্রীষ্টর্) দেগা পেইয়্যেই।” 42আন্দ্রিয় শিমোনরে যীশু ইধু আনিলো।
যীশু শিমোন ইন্দি রিনি চেইনে কলঅ, “তুই যোহন পুয়ো শিমোন, মাত্তর্ তরে কৈফা বিলি ডাগা অবঅ।” এ নাঙানর্ অত্ত পিতর, অত্তাৎ পাত্তর্।
43তার্ কেল্যে যীশু ঠিগ্ গুরিলো তে গালীল রেজ্যত্ যেবঅ। সে সময়োত্ যীশু ফিলিপ সমারে দেগা ওইনে তারে কলঅ, “আয়, মঅ শিচ্চ্য অগি।”
44ফিলিপে এলঅ বৈৎসৈদা আদামর্ মানুচ্। আন্দ্রিয় আর পিতরেয়ো সেই একই আদাম মানুচ্। 45ফিলিপ নথনেলরে তোগেই পেইনে কলঅ, “মোশি যিবে কধা রীদি-সুদোম লিগি যেইয়্যে আর যিবে পৌইদ্যেনে ভাববাদীগুনেয়ো লেখ্যন্ আমি তার্ দেগা পেইয়্যেই। তে যোষেফর্ পুয়ো যীশু, নাসরত আদাম মানুচ্।”
46নথনেল ফিলিপরে কলঅ, “নাসরতত্তুন্ কি গম্ কনকিজু এই পারে?”
ফিলিপ তারে কলঅ, “এইনে চাহ্।”
47যীশু নথনেলরে নিজো ইন্দি এত্তে দেগিনে তা পৌইদ্যেনে কলঅ, “উইয়ো চাহ্, এক্কো আঝল্ ইস্রায়েলীয়। তা মনত্ কনঅ ছলনা নেই।”
48নথনেলে যীশুরে পুযোর্ গুরিলো, “তুই কেধোক্ক্যেন্ গুরি মরে চিনিলে?”
জোবত্ যীশু তারে কলঅ, “ফিলিপ তরে ডাগিবার্ আগে যেক্কে তুই সেই ডোমোর্ গাজ তলে এলে, সেক্কে মুই তরে দেক্ক্যং।”
49ইয়েন্দোই নথনেল যীশুরে কলঅ, “মাষ্টরবাবু, তুয়ই গোজেনর্ পুয়ো, তুয়ই ইস্রায়েলীয়গুনোর্ রাজা।”
50যীশু তারে কলঅ, “তরে সেই ডোমোর্ গাজ তলে দেক্ক্যং, এ কধাগান্ কোইয়োং বিলি বিশ্বেজ্ গুরিলে? ইয়েনত্তুন্ বেশ্ আরঅ দাঙর্ কাম্ তুই দেগিবে।” 51পরেদি যীশু কলঅ, “মুই তমারে ঘেচ্চ্যেক্গুরি কঙর্, তুমি স্বর্গগান্ খুলো দেগিবা, আর দেগিবা গোজেনর্ দূত্তুনে মান্জ্য পুয়োবোর্ কায় কুরেত্তুন্ উদোদন্ আর তা কায়কুরে লামদন্।”
Nke Ahọpụtara Ugbu A:
যোহন 1: CBT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Copyright © 2021 Bangladesh Bible Society