লূক 21
21
নাঢা রানি মিলেবোর্ দান
(মথি ১২:৪১-৪৪)
1ইয়েনর্ পরেদি যীশু রিনি চেলঅ, থাগোইয়্যে মানুচ্চুনে উবোসনা-ঘরর্ দান বাক্সুত্ তারার্ দানুন্ থদন্। 2তে দেগিলো, এক্কো নাঢা রানি মিলে এইনে দ্বিবে পোইজ্যে থলঅ। 3সেক্কে যীশু তা শিচ্চ্যগুনোরে কলঅ, “মুই তমারে ঘেচ্চ্যেক্গুরি কঙর্, এই নাঢা রানি মিলেবো অন্য বেক্কুনোত্তুন্ বোউত্ বেশ্ থলঅ, 4কিয়া অন্যগুনে বেক্কুনে তারার্ সয়সাগোজ্যে ধনত্তুন্ দান গোজ্যন, মাত্তর্ এ মিলেবোর অভাব থেলেয়ো বাঁজি থেবাত্যে তার্ যিগুন এলঅ বেক্কুন্ দি দিলো।”
যুগোর্ শেজ্ দিনুন্
(মথি ২৪:১-৩৫; মার্ক ১৩:১-৩১)
5কয়েক্কো শিচ্চ্য উবোসনা-ঘর পৌইদ্যেনে কধা কদন্, এই পাত্তরুন্ চাহ্দে কত্তমান্ দোল্ আর গোজেনরে দান গুরিবার। সেক্কে যীশু কলঅ, 6“তুই দঅ ইয়েনি বেক্কানি দেগর্, মাত্তর্ এমন সময় এবঅ যেক্কে ইয়েনত্ এক্কো পাত্তর উগুরে আর এক্কো পাত্তর্ ন-থেবঅ; বেক্কুন্ ভাঙি ফেলা অবঅ।”
7শিচ্চ্যগুনে যীশুরে পুযোর্ গুরিলাক্, “মাষ্টরবাবু, কক্কে ইয়েনি অবঅ আর কিবাবোত্যে চিহ্নো দেগিনে আমি বুঝি পারিবোং যে, ইয়েনি ঘুদিবার্ অক্ত ওইয়্যে?”
8জোবত্ যীশু কলঅ, “জাগি থাগঅ, কেঅ যেন তমারে ন-ঠগায়, কিয়া ভালোক্জনে মঅ নাঙে এইনে কধা কবাক্, ‘মুয়ই সিবে!’ আর ‘সময় কায়কুরে এচ্চ্যে।’ মাত্তর্ তারারে ন-বেঙেয়ো। 9তুমি যেক্কে যুদ্ধোর্ আর বিদ্রোহর্ হবর্ শুনিবা সেক্কে ন-দোরেয়ো, কিয়া পত্তমে ইয়েনি বেক্কানি অবঅ; মাত্তর্ সেক্কেয়ো যে শেজ্ সময়ান লুম্মেগি সিয়েন্ নয়।”
10সে পরেদি যীশু তারারে কলঅ, এক জাদে অন্য জাদর্ বিরুদ্ধে আর এক রেজ্য অন্য রেজ্যর্ বিরুদ্ধে যুদ্ধো গুরিবো। 11দর্গরেপারা ভূজোল্ বেবঅ আর নানান্ জাগাত্ ভাদ-রাট্ আর ভানা অবঅ। ইয়েনি বাদেয়ো আগাজত্ এমন ঘটনা ঘুদিবো আর চিহ্নো দেগা যেবঅ যিয়েনি ভারী বেশ্ আর দর্গরেপারা।
12ইয়েনি বেক্কানি অবার্ আগেদি মানুচ্চুনে তমারে ধুরিবাক্ আর তমা উগুরে অত্যেচার্ গুরিবাক্। বিচেরত্যে তারা তমারে সমাজ-ঘরত্ নেযেবাক্ আর জেলোত্ দিবাক্। মত্তে রাজাগুনোর্ আর শাসনগুরিয়্যেগুনো মুজুঙোত্ তমারে নেযা অবঅ, 13আর সেক্কে মঅ পৌইদ্যেনে সাক্ষি দিবাত্তে তমার্ সুযোগ অবঅ। 14তুমি ইক্কিনে মনে মনে ঠিগ্ গুরি ফেলঅ, সেক্কে নিজোর্ পক্ষে কধা কবাত্যে তুমি আগেত্তুন্ ধুরি যুক্কোল্ ন-অবা, 15কিয়া মুই তমারে এমন কধা আর এমন জ্ঞান যুগেই দিম্ যিয়েনর জোবত্ তমা শত্রুগুনে কিজু কোইয়ো ন-পারিবাক্ আর সিয়েন অস্বীগের্-অ গুরি ন-পারিবাক্। 16তমার্ মা-বাবে, তমার্ ভেইয়ুনে আর তমার্ ইত্ত্য-কুদুম্মোগুনে, তমার্ সমাজ্জ্যেগুনে তমারে ধুরিবাক্; আর কয়েকজনে তমারে ধুরিনে মারেয়ো ফেলেবাক্। 17মত্তে বেক্ মানুচ্চুনে তমারে ঘিনেবাক্, 18মাত্তর্ কনবাবদে তমার এক্কান্ চুল্-অ ভস্ত ন-অবঅ। 19তুমি থির্ থেলে, তুমি নিজোরে উদ্ধোর্ গুরি পারিবা।
20তুমি যেক্কে দেগিবা যিরূশালেমানরে সৈন্যগুনে ঘিরি ফেল্ল্যন্ সেক্কে বুঝিবা, যিরূশালেমর্ ভস্ত অবার্ সময় এচ্চ্যে। 21সে অক্তত্ যিগুনে যিহূদিয়াত্ থেবাক্ তারা মুড়োমুড়ি চাগালাত্ ধেই যাদোক্। যিগুনে শঅরত্ থেবাক্ সিগুনে শঅর বারেদি যাদোক্। যিগুনে আদাম ইন্দি থেবাক্ সিগুনে কনঅ বাবদে শঅরত্ ন-এত্তোক, 22কিয়া এ দিনুন্ অবঅ সাজা পেবার্ দিন, আর ইয়োত্ পবিত্র বোইবোত্ যিয়েনি লেগা আঘে সিয়েনি পূরোণ্ অবঅ। 23সেক্কে যিগুনে পিদিলী আর যিগুনে চিগোন্ গুরোরে বুগো দুধ হাবান্ তারার্ অবস্থা কিবাবোত্যে অবঅ! দেজত্ ভারী দুঘ্ অবঅ আর যিহূদী মানুচ্চুনো উগুরে গোজেনর্ সাজা লামি এবঅ। 24লাম্বা ছুড়িলোই তারারে মারে ফেলা অবঅ আর বেক জাদ্তুনো ইধু তারা বন্দী ইজেবে ছিদি থেবাক্। যেদক্ দিন সং অযিহূদীগুনো সময়বো ন-পুরায় সেদক্ দিন সং অযিহূদীগুনে যিরূশালেমানরে তারার্ ঠেংঅ পাদালোই উরিবাক্।
25“সেক্কে বেলান্, চানান্ আর তারাগুনো ইধু বোউত্ চিহ্নো দেগা যেবঅ। পিত্থীমিত্ বেক জাদ্তুনে দুঘ্ পেবাক্ আর দোজ্যে সাগরর্ গুজুরোনি আর তুবোলত্তে তারা অমকদ থির্ নেইয়্যে অবাক্। 26জগদত্ কি এজের্ ভাবিনে দরে মান্জ্যে মুজ্জ্য যেবাক্, কিয়া বেলান্-চানান্-তারাগুন্ ইগুন্ আর থির্ ন-থেবাক্। 27সে অক্তত্ দাঙর্ খেমতালোই আর মহিমালোই মান্জ্যপুয়োবোরে তারা মেঘ ভিদিরে গুরি এত্তে দেগিবাক্। 28এ বেক্ ঘটনাগানি ঘদতে আরাম্ব গল্লে পরেদি তুমি উদিনে থিয়্যেইয়ো আর মুয়োনি তুল্ল্য, কিয়া তমার্ উদ্ধোরর্ সময়বো কায়কুরে এচ্চ্যে।”
29ইয়েনর্ পরেদি যীশু তা শিচ্চ্যগুনোরে শিক্ষ্যে দিবাত্যে এ কধাগান্ কলঅ, ডোমোর্ গাজ্ আর অন্য গাজ্চুনোর্ পৌইদ্যেনে ভাবি চঅ। 30যেক্কেনে দেগিবা তারার্ পাদানি নিগিলি এত্তে দেগিলে পরেদি তুমি বুঝি পারিবা যে, খরান্কাল্ কায়কুরে লুম্মেগি। 31সেবাবোত্যেগুরি যেক্কে তুমি দেগিবা ইয়েনি ঘদের্ সেক্কে বুঝি পারিবা যে গোজেন রেজ্যগান্ কায়কুরে লুম্মেগি। 32মুই তমারে ঘেচ্চেক্গুরি কঙর্, যেক্কে ইয়েনি অবঅ সেক্কেয়ো এ কালর্ কিজু মানুচ্ বাঁজি থেবাক্। 33আগাজ্ আর পিত্থিমীগান্ শেজ্ অবঅ, মাত্তর্ মঅ কধানি উমরত্তে থেবঅ।
34-35“তুমি উজিয়ার্ থেয়ো যেন তমা মনানি ওলোমোত্ত্য, মাত্তলে ধুরিনে আর সংসারর্ চিদেলোই লুঙি ন-পড়। সিয়েন ন-অলে ফাল্ যেবাবোত্যেগুরি অদাদত্ বানা যায় সেবাবোত্যেগুরি অদাদত্ সে দিন্নো তমা উগুরে, এমন কি, পিত্থিমীর বেক্ মানুচ্চুনো উগুরে এইনে পুড়িবো। 36সজাক্ থেয়ো আর নিত্য তবনা গরঅ যেন যিয়েনি ঘুদিবো সিয়েনি পার্ ওই যাদে আর মান্জ্য পুয়োবো মুজুঙোত্ যেইনে থিয়্যেবার্ তুমি বল্ পঅ।”
37সে সময়োত্ যীশু পত্তি দিন উবোসনা-ঘরত্ শিক্ষ্যে দিদো, মাত্তর্ রেদোত্ বারেদি যেইনে জৈতুন মুড়োবোত্ থেদঅ। 38বেক্ মানুচ্চুনে তা কধানি শুনিবাত্যে বেন্যেপোত্যে উবোসনা-ঘরত্ আঝির্ অদাক্।
Nke Ahọpụtara Ugbu A:
লূক 21: CBT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Copyright © 2021 Bangladesh Bible Society