Gênesis 21
21
Isaque Matuxyawaka Piranapni
1Tsru Hixikatshriwa Hoyakalu hixkajyawaklo potuko tixatka Sara. Wane rixlo Sara htshina hinkaklexyawakpotuklo.
2Waneya tsrutsolejpotuko rixinixka Abraão tmichiwata Sara, twuhenetlu jeji Hoyakalu mitshi tshinyawaklu Abraão hohne potuko tmatuwhenetatka.
3Waneya Abraão hiwakatlu hiwhene, mturu Sara matkakleru, Isaque htshinru.
4Waneya oito hohne rixinixka hiwhene Isaque, Abraão histakaptojimtatatkalu htshin-towutlexyawakpotuklu Hoyakalu.
5Cem mhaletkalu Abraão hituru Isaque matuxyatkalu Abraão.
6Sara wla tshinatka:
— Hoyakalu poyikowkakatkano hiyrun-koxa ptowru yineru xye pirana jematshripa hitayma poyikowatanu.
7Kathe xawaka himukata hinkakletlu Abraão pa hohne tachitshakawhenexyawakapa Sara tshinkaluro? Klu tshinanu hit-honra nutsrukate hitsruka jeji niwhenetlu.
8Waneya mturu tseruwnatka waneya rutuka hachiretatka. Rutuka hachirexinri hohne potuko Isaque, Abraão tsru niklu hkamha.
Sara Kamnixyawaklo Agar Tshinkaluro Piranapni
9Waneya Sara hetlu egito nero Agar tshinkaluro whene, reyiklu Abraão whene tmatkajinri.
10Hiyáhoni wla ttshinatkalu Abraão:
— Twu suxo towretshro, toturuyma puknokanu. Klu tshinanu towretshro whene hi yoptotanru rumlujikolna nowhene Isaque-yma.
11Seyni hiwhene rixyawaka tshinanu tsru tshino potuko hjema Abraão xye pirana tshinanu.
12Waneya Hoyakalu wla tshinru Abraão:
— Hi pjematshinotanu mturu tshinanu hiyrun-koxa ptowrero tshinanu hi pjematshinotanu. Ptowru potuko Sara tshinyawakatkayi pirana wale pkamhanu klu tshinanu piklopichanepa Isaque hichpajikatshripni.
13Seyni towretshro whene koxa pa neru nixkakanru klu tshinanu wale honra pixa whenni.
14Waneya Abraão yetshpotukawa ruptekatka. Pão hiyrun-koxa honha kastonolu honha hwatshri hkochtsheka, wale reneklo Agar. Xyekaka wala rutjikakatka, mturu reneklo waneya hyokanatlo tyiywakapa. Hiyáhoni tyatka mayinerewakanu, popriwaka Berseba tshinikowaka tyotaljechaxyatka.
15Waneya hnikaxinixkaluna ronnehna kastonolu hwatshri Agar kaptsheru chehi hmana tutakamtlu mturu.
16Waneya kahnete tya katshralu poyaho hapkaklexikowaka pchini tya. Waneya waneko tuplatatka. Klu tshinanu wla ttshina:
— Hi naluka hetka hipukatanru mturni. Mturu hinapleko ttuplata waneya ttshiyahpotutatka tsru kte potuko tixa.
17Hoyakalu jemlu mturu kte. Waneya Hiwejikaluru Hoyakalu towreru tenhohne hajeru hiynumatlo Agar tenhohneya, wla htshinro:
— Kluhe pixa Agar? Hi ppikanu klu tshinanu Hoyakalu jemlu mturu kte rukoluhyawakaya.
18Ppalnanu pixa. Pyopkakakanru mturu, pkosemyotanru klu tshinanu satu neru hixkolupni koxa wale.
19Waneya hkotpukayhaletatkalo waneya hakopha tetatka. Wane tya kastonolu tsepohatatkalu honha waneya mturu tutatka.
20Hoyakalu mturuymalu. Htseruwnatka mturu. Wane popriwaka yineru mwiywakanu rawjetna. Waneyakni katshralu hapkajikatshri rixnatkawa mturu.
21Popriwaka Parã tshinikowaka rawatka. Waneya runro sato suxo twapa Egito tshijneya toturu hhanunro tixyawakapa.
Abraão Abimeleque-yma Htshinkajyawakna Piranapni
22Waneklu papko potuko Abimeleque tshinkaluru h-soldado-tene chefe-te Ficol tshinkaluruyma hiynumatlu Abraão waneya wla htshinru:
— Hoyakalu honra pixayma ptowruko pkamhaleru tshinanu.
23Hiyáhoni xawakni wane ntshinanyi hikeklu hohne pkamnitanno hita, hi noturuko pkamnitanu, hi hiklopichaneko pkamnitanu. Hike nma mixjekanaxyawakanyi pixka pixanno hita hewi pwajekanatka pchinika pixka pixanno hita. Hiyrun-koxa wane pixanru xye tshijne pwiywakatka.
24Waneya Abraão wla tshinru:
— Haté hehe wane ntshinanyi.
25Waneya Abraão kaheknanuwyehitlu Abimeleque hakopha hikolukle tshinanu klu tshinanu Abimeleque towrerune hakakatkana Abraão maklutene hipokananu.
26Waneya Abimeleque wla tshinru:
— Hi nimata kathe wane hixa. Hi pimatkakatkano xye pirana haté xawakni hohne hiyrun-koxa hi njemlu xye pirana haté xawakni.
27Waneya Abraão ovelha-ne rawapa, boi-ne rawap-koxa waneya Abimeleque reneklu. Wane hixatshine pa pirana ritshinkakna.
28Seyni sete carneiro whenene hixolune pratshine xkehi hkotspalaxya Abraão.
29Waneya Abimeleque hepomhalu Abraão, wla htshinru:
— Klu hikoluklehe nyi carneiro whenene sete kahnete putaka?
30Waneya Abraão wla tshinru:
— Nyi sete carneiro whenene nomyo pyoptoxinine rimathexikowakapa xye hakopha teno pnalu hita jitotlerni wale.
31Wale tshinanu Berseba rutakhiwakatlu klu tshinanu pa hchinikanurutu rimixatkaluna wale hakopha.
32Hiyáhoni pa chinikantshirutu hkamhatkana Berseba tshinikowakaya. Waneya Abimeleque hiyrun-koxa h-soldado-tene chefe-te Ficol tshinkaluru koxa yatka. Hsatokatkaluna filisteu-nerune tshijne nwaka wannako htshijne.
33Waneya Abraão satu tamargueira ptshe rutaklu Berseba tshinikowaka. Wanekni rapohchinikanuxyalu Tsru Hixikatshriwa Hoyakalu hike rixiniko mnikawnakatupa.
34Abraão filisteu-nerune tshijne rutukatka hix-hohne potuko.
Nke Ahọpụtara Ugbu A:
Gênesis 21: mpdBiblia
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil