Gênesis 22
22
Isaque Henekachalu Yoxikkaluru Rixyawakamkapa Piranapni
1Waneya pnut-hohne Hoyakalu yahtaletlu Abraão. Wla htshinru:
— Abraão.
Waneya Abraão hihitlu wla htshinru:
— Hewino.
2Waneya Hoyakalu wan-tshinru Abraão:
— Panikanru piwhene satupkalutu, Isaque, pamotler-potuko. Pyanwakatanru Moriá tshinikowaka tshijne. Waneya wane henekachalu yoxikkaluru pixkakanru pituru npohixyawaka mriji potuko.
3Waneya wale prika yetshpotukawa ruptekatka Abraão. Hiprane jumento-ne ralpokotatka. Ranikamtna waleyma hepi htowrene hiyrun-koxa hituru Isaque. Rali hitshimletatka hpoyahtapyawaka mukata hjimlewaxinripa hyatka. Abraão yanwakatlu Hoyakalu tshinyawaklu mriji nwaka.
4Map-hohne hyaninixka Abraão htunohitatka retlu hipjita runkajyalu howukawalu.
5Waneya Abraão wan-tshinna htowrene:
— Tuka wyaka pchinika hewitshi hwanu jumento-yma, hita noturuyma tsonu hawla yanu. Hoyakalu wimalwutapanu waneya wsatkapanu.
6Waneya Abraão tshitshi kochtshekatka, henekachalu yoxikkalurupa tshinanu, Isaque rutjikakatka seyni Abraão haniklu tshitshi katalu, peixeira koxa. Wane hixatshine hepi yatka.
7Hyamtka pchinikna Isaque hepomhalu Abraão wla htshinru:
— Papa.
Waneya ruhitlu Abraão wla htshinru:
— Klunhe noturu?
Isaque wla tshinru:
— Jitshimamnuwu, tshitshchichri koxa seyni hanurhe carneiro whene wyoxjererupa?
8Abraão wan-tshinru:
— Hoyakalu henekanwu carneiro whene wyoxiklerupa, noturu. Waneya wanna hepi yanamtna.
9Rapojinixkaluna Hoyakalu tshinyawaklu yehi Abraão sotlu rapatjeta waneya ruhlepokotlu tshitshi wane hohoya. Waneya rostutatkalu hituru Isaque waneya tshitshi hoho rutaklu Isaque.
10Waneya hyosurukkanotatka Abraão, peixeira hkochtsheka ruylaxyawakaplu hituru.
11Seyni waneklukawa potuko Tsru Hixikatshriwa Hoyakalu towreru tenhohne hajeru hiynumatlu Abraão hipokananu tenhohneya wla tshinatshri:
— Abraão, Abraão.
Waneya Abraão hihitlu wla htshinru:
— Hewino.
12Hi puylatanru piwhene, — htshina Hoyakalu towreru tenhohne hajeru. — Hike pixanru. Xawakni nimatlu Hoyakalu pkahwakpiratatka klu tshinanu hi ptshipetlu pituru, pituru satupkalutu.
13Waneya Abraão heknojtata waneya retlu satu carneiro ratjiniyaka sretaya kamxihiru hachtshekahwatatshri. Waneya Abraão kachitlu carneiro walekni henekachalu yoxikkaluru hkamhiyatka hiwhene Isaque kachrijru.
14Hiyáhoni Abraão henekachalu yoxikkaluru yehi hiwakata Tsru Hixikatshriwa Hoyakalu hikchikanru mahatatshri htshinru. Haté xawakni wane htshinka: “Tsru Hixikatshriwa Hoyakalu himriji hoho mahatatshri hikchijyawak-mitshi.”
15Waneya Tsru Hixikatshriwa Hoyakalu towreru tenhohne hajeru hipokananu hiynumatatnaklu Abraão tenhohne ruchpaktokanuxya.
16Wla htshinru:
— Halikakalutu nunkaklexyayi hitako nhiwakaya, xye pkamhaleru tshinanu hi ptshipexyano piwhene satupkalutu tshinanu.
17Hita halikaka nuhlehchinikanutanyi hiyrun-koxa nkamhanna pixa piklopichane katahiri tenhohne hajeru pejnu rixyawakapna, hiyrunu ksatuji mar powha wnahlu hajeru pejnu rixyawakapna. Piklopichane konpoklutanna hkamnixjene.
18Hiyrun-koxa piklopichane tshinanu kihlewaka ntshinanwakatanna ptowruneruka tshij-hoho hwatshine hihlehchinikanutko klu tshinanu ntokanu pomkahitatka.
19Waneya Abraão satokanwakatna htowrene yehi waneya ptowruneko satokatka Berseba nwaka rawjexyawaka. Waneko rutukatka Abraão.
Naor Tshinkaluru Whenene Piranapni
20Waneya xyekaka ptowruka hiknohinixka runkakluna Abraão wla htshinruna:
— Milca hiwuhenewjetatkalu pimole Naor jejinni.
21Mitshikananu matutatshri Uz tshinkaluru. Walestsi hajeru Buz tshinkaluru waneya Quemuel tshinkaluru matutatka Arã hiru.
22Waneya Quésede matutatka waneya Hazo tshinkaluru matutatka. Wanestsi matutatshri Pildas tshinkaluru waneya Jidlafe matutatka waneya Betuel matutatka.
23Betuel tshinkaluru matkaklo Rebeca tshinkaluro. Nyi oito-ne Milca tshinkaluro hwuhenetlu Naor tshinkaluru, Abraão mole.
24Hiyrun-koxa Reumá tshinkaluro riwuhenewjechalero whenene pejnu jejine: Teba tshinkaluru, Gaã tshinkaluru, Taás tshinkaluru, Maaca tshinkaluru.
Nke Ahọpụtara Ugbu A:
Gênesis 22: mpdBiblia
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil