Gênesis 25
25
Abraão Klopicha Quetura Tshinkaluro Hichpajikatshine Piranapni
1Waneya Abraão hhanunrowatatnaka. Quetura tshinkaluro hhanunrota.
2Wla pejnu tmatkakatka, Zinrá, Jocsã, Medã, Midiã, Isbaque, Sua.
3Jocsã tshinkaluru whenetlu Sabá, Dedã. Sabá tshinkaluru whenetlu Assurim, Letusim, Leumim.
4Midiã whenetlu Efa, Efer, Enoque, Abida, Elda. Nyi pejnu Quetura tshinkaluro whenene.
5Seyni Abraão ptowruka rimwaleru hiwhene Isaque tshinkaluru reneklu.
6Wanepnawaka Abraão hiwuhenewachalero whenene henekachalkaka tsonu renekatkana Abraão. Waneya riweka pchinikawa Abraão hyokanatna tkatshi hichpajyawaka sreta nwaka hyiywakapna hiwhene Isaque-stsi hma mwiywakanupna.
Abraão Hipnale Piranapni
7Wla pejnu mhale riwekatka Abraão cento e setenta e cinco mhale riwekatka Abraão.
8Waneya rupnanatka Abraão, tsrutsoleji potniko hix-hohne potuko riwekniwa rupnanatka. Himolenni hipnatshinni nwaka hyatka.
9Waneya waleniko hwuhenene Isaque, Ismael kapnatanru Abraão-ni hipjita hwapanatatshri Macpela tshinikowaka Efrom heteu-neru campo-te hwatshri Manre tshinikowaka hinapleya.
10Xye campo ranjitnixka mitshi Abraão Hete whenenenu. Wanekni hkapnatkana Abraão-ni hiyrun-koxa hhanunroni Sara-ni wane hkapnatkanna.
11Rali hipnaletanatka Abraão-ni Hoyakalu kihlewaka htshinru Isaque, Abraão-ni whene. Isaque Beer-Laai-Roi tshinikowakastsi hwatka.
Ismael Klopichane Piranapni
12Xyekni Ismael, Abraão-ni whene Sara-ni towrero Hagar tshinkaluro egito nero whene Abraão-ni mitshi titshixya Sara-ni whene klopicha pirana.
13Rix-matlexyawakna Ismael whenene piranni xye. Ismael whene mitshikananu matutatshri Nebaiote tshinkaluru, wanestsi hajeru Quedar tshinkaluru, Abdeel, Mibsão,
14Misma, Dumá, Massá,
15Hadade, Tema, Jetur, Nafis, Quedemá seyoka.
16Xyekakni Ismael whenene hiwaka, nyi satkaka wannako rawyawakna poktshi rawna. Doze neru rakankakanna nyi jejine doze.
17Wla pejnu mhale riwekatka Ismael cento e trinta e sete mhale. Hnikawna hiwekletatka. Rupnanatka Ismael-ni, himolenniyma rapatjesamenrutatka.
18Ismael klopichane hi hipxakna Isaque klopichane seyni rawyawakna Havilá tshinikowaka haté Sur tshinikowaka egito tshijne yoptowaka sreta hwatshri tshijne Assíria tshijne nwaka yahapotatshri sreta rawatkana. Rutspalkajyana Isaque klopichane.
Jacó, Esaú Pirana
19Xyekni Isaque, Abraão whene klopicha pirana. Abraão-ni whenetlu Isaque.
20Waneya Isaque quarenta mhaletkalu hhanunrotlo Rebeca, Betuel whene, arameu-neru whene, Padã Arã tshijne hajeru, hiyrun-koxa Rebeca Labão arameu-neru-mole piranni.
21Waneya Isaque hapohchinikanutlu Tsru Hixikatshriwa Hoyakalu hhanunro Rebeca tshinkaluro tshinanu, klu tshinanu mwuhenewaklétoni. Waneya Tsru Hixikatshriwa Hoyakalu yijnakotlu ranjihohnere hiyáhoni Rebeca, hhanunro, michiwatatka.
22Waneya hyahotkakna mturune wala nanwakaya hiyáhoni wane ttshina:
— Haklu tshinanhe wane hixyehitno?
Hiyáhoni tya tepomhaplu Hoyakalu.
23Waneya Hoyakalu wan-tshinro:
— Hepi nerukta pixa nanwaka hitokote hwa hiyáhoni hepi nerune kotspalatko pixa nanwakaya; satu ner-potu yohnika mixkonupa hiyrunu hepurtshi towutanru tsrujru.
24Waneya rapokpapkolutatka tmatuwhenexyawaka wanena mturune hepirune mturu-mapa hitokote rawna.
25Mitshikananu matutatshri seromtalni hiyrun-koxa wale mane psoluka mkatshri kapixiru kamhikolu pixka rixmaneta; hiyáhoni rutakhiwakatlu Esaú.
26Waneya repuru matutatka, himyo hkachikanaxyalu Esaú stsihjixi. Hiyáhokni hhiwakatka Jacó. Isaque sessenta mhaletkalu Rebeca matkajinixkana wanna hepirune.
27Waneya htseruwnana mturune, Esaú kyahkakleru kihleru rixapa, campo kyapaklerni seyni Jacó hi kyanakle, tenda pjikaka rawhohnejeta.
Esaú Hnijitu Hipekoxyawaklu Mitshikananu Matutatshri Kaylerumkapa Piranapni
28Isaque nikalu heru hiyahokni ramotlu Esaú seyni Rebeca hamotlu Jacó.
29Jacó hiwlalewakanata rujpatewakanata, waneya rapokatka Esaú campo ruchpajya, ruhroka natshi tshinanu.
30Waneya Esaú wan-tshinru Jacó:
— Wuya, pchiretanu penekannotshi xye hiwlalu psoji! Hiriyahok-nnatshineta. Waneya sero jpalu nnalu wale. (Wale tshinanu Edom hiwakatka koxa).
31Seyni ruhitlu Jacó:
— Hike, seyni mitshikananhapka pixa mitshikananu matutatshri kaylerumkapa pitshixinno tsrujru nkahwajikolupa.
32Waneya Esaú wan-tshinru Jacó:
— Petanno nupnapirata hiyáhoni xawakni hanhe rix-hepixletanno hita mitshikananu matutatshri kaylerumkapa?
33Seyni Jacó wan-tshinru Esaú:
— Hike seyni punkaklexinno.
Hiyáhoni Esaú hinkakletlu waneya mitshikananu matutatshri kaylerumkapa ritshixyatkalu.
34Waneya Jacó heneklu Esaú pão hiyrun-koxa hiwlalu lentilhas kamhikolu reneklu. Esaú nika, rura waneya hpalnatka, hyatka. Hiyáhoni Esaú heyikatkalu mitshikananu matutatshri rixyawakatka.
Nke Ahọpụtara Ugbu A:
Gênesis 25: mpdBiblia
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil