Gênesis 31
31
Jacó Hasujyawaka Piranapni
1Seyni Jacó jemlu Labão whenene tokanu htshinjekanaxyawakluna Jacó. Wla hima htshinjekanatluna:
— Ptowru potuko wuru himwakanatanru hkonatka Jacó hiyáhoni xye hpohirewnale rapatjereru wuru hejnunkate rixapa.
2Jacó hethojitlu Labão waneya rimathetlu Labão hi kihle hchinikanutkalu Labão Jacó tshinanu mitshikananu pixka.
3Waneya Tsru Hixikatshriwa Hoyakalu hiynumatlu Jacó, wla htshinru:
— Putsrukatene tshijne nwaka pyanu, pimolene nwakako. Hitaymalutyi.
4Waneya Jacó tomhakjixatkalo Raquel, Lia htomhakjixatka campo hiprane wiywaka nwaka rapojyawakapna.
5Waneya wla htshinatkana:
— Nethojitlu puru. Hi kihle hchinikanru hita tshinanu, hi mitshikananu pixka rixa hichinikletno. Seyni nuru Hoyakalute hitaymalu.
6Hiyrun-koxa pimata nkamrurewaxyatkalu puru ptowru nmixkonuyma.
7Puru yokwijejetno. Nkamrure hwenuxyano dez kata hyokmakatka. Seyni Hoyakalu hi ritshitlu rumtujyawakapno.
8Wla htshininipno: “Kayonalu piprapatkani,” htshinini. Waneyakni pratshine kayonalune tsonu matutatka. Seyni waneyatnaka wla htshininipno ptowru hix-yonatatshri matutatshripa pipranpatka pwenuxikolu tshinanu waneya pratshine ptowru hix-yonatatshri tsonu matutatka.
9Hiyahokni wane rixa Hoyakalu konretlu puru prane. Hita renekapratatka.
10Pa kata nupnawata pratshine hatskokajinri papko ntunohiyhaletatka, nupjetlu bode-ne hatskolewatatshine kayonalune tsonni, ptowru hixa yonatatshri hatskolewa hipnata.
11Waneya nupjetlu Hoyakalu towreru tenhohne hajeru. Riynumahipnatno wla htshinahipnatno: Jacó. Waneya nuhihipnatlu wla ntshinru:
— Hehe hewino.
12Waneya wla htshina:
— Ptunohiyhaletanu bode-ne ptowruneka pratshine hatskotatshine kayonalune, ptowru hixa yonatatshine tsonu hatskojeta. Netlu wale ptowruka Labão hixanwakaxyawakyi.
13Betel tshinikowaka sotlu pyopkakanru nhihtshi puyokhohotanru yehi Hoyakalutno, wanekni mitshi ptshinyano. Hiyáhoni xawakni chinpotukawa ppalnanu, xye tshiji puchpajini, psatkapanru ptshijne pimolene yehi.
14Waneya Raquel, Lia wla tshinru:
— Rawhe xawaka satu pa hixanu wyoptolerupa wuru yehiya?
15Hi he metjejetkone pixka rixwu? Klu tshinanu ruchankatkawu hiyrun-koxa hixa wenruni hsaletachata.
16Hiyáhoni hpohirewnale ptowruka pkonyalu wuru halikaka hixani hiyrun-koxa whenene pohirewnalpatkani. Hiyáhoni hanuktako htshina towutletanyi Hoyakalu wane pixanu.
17Waneya hpalnatka Jacó, hiwhenene camelo-ne hoho rutakna hiyrun-koxa hhanunrone camelo-ne hoho rutakna.
18Hiprane ptowruka ranikatka, rejnunkate rapatjereru ranikatka, pratshine ptowruka Padã-Arã tshinikowaka hkayaxinritka ranikatka ruru nwaka, Canaã tshijne nwaka hyiywakapa.
19Waneya Labão yatka hiprane carneiro-ne hjiwjixyawakapa. Seyni Raquel tshowhumtanatkalu mayawletshichakakni turu mayawletshichatni ttshowhutatka.
20Waneya Jacó hike munkakamtkatuko yatka, wane rixa yokwijeretlu Labão, arameu-neru.
21Hiyáhoni rasukatka Jacó, ptowru rimwaleruyma rasukatka. Hpalnatka Eufrates wenne hkopruhamtatka waneya hmixkowahchinikanutatka himriji nwaka Gileade tshinikowaka hyiywakatka.
Labão, Jacó Hatjini Hyiywakapa Piranapni
22Waneya mapa hohne hiknohinixka, runkakkatka Labão, Jacó hasujyawaka pirana.
23Waneya Labão himolene jejine ranikatka, Jacó romkahitna sete hohne pejnu haté rapkapluna himriji yehiya Gileade tshinikowaka.
24Waneya Hoyakalu hakanhayehitatkalu Labão, arameu-neru hoyetshno rupnawleya waneya wla htshinatkalu:
— Xako hi hektuwaka ptshinanru Jacó hiyrun-koxa hi pa hixanu punkaklexinri Jacó.
25Labão hapkaplu Jacó himriji yehiya Gileade tshinikowaka. Wane rumajewakanaxya. Hiyáhoni Labão hiyrun-koxa hmaklutene wane koxa rumajewaxyana.
26Waneya Labão wla tshinru Jacó:
— Kluhe pixatka? Klu tshinanu hit-yehi puchpajyatka potshkerukyi hiyrun-koxa nowhenene suxone ptshowhutatka hatatjewa yohlolewapiyma pkayaxyatkana.
27Haklu tshinanhe pasukatka hit-yehiya hike munkakamtkatyi? Hi punkakamtno paluka yalexyawaka tshinanu. Hitamka haluka yokanretyi poyikowluyma, chikaltshiymamka, toklu tamborim-yma ho harpa-ymamka nyokanatanyi.
28Hi pitshitno namluxyawakapna nomekahine, nchitshone hi namlutatka nunhiywakamkapna. Pixa mahchinikanutyi wane pixyawaka tshinanu.
29Numukata himtukletmakyi. Seyni puru Hoyakalute hiynumatno xye yetshno wla htshinatkano: “Xako hi hektuwaka ptshinanru Jacó hiyrun-koxa hi pa hixanu punkaklexinnru Jacó.”
30Hiyáhoni xawakni pyanutka halikaka klu tshinanu puchinikpotutlu purupji nwaka pyiywakapa seyni klu hikoluklu tshinanhe noyakalutene ptshowhutatka?
31Seyni Jacó wlako tshina hihretlu:
— Wane nixatka klu tshinanu npikatka. Wla nixa hichinikanuwleta: “Hiwhenerone hetko hkonanno hipokananu,” — ntshina hita nanwaka.
32Halikaka xye ptshinreru katu yehikta pukchijinri poyakalutene mayawle ruylatko katuktako. Pujhapanru hewi pimolene hetanuya ho wanerhe satu pa hixanu pixanu hit-yehiya ho hike. Pukchijiniplu panikanru. Seyni Jacó hi himata Raquel tshowhuxyawaklu turu hoyakalutene.
33Waneya Labão jihloklu Jacó himajeru waneya towretshrone himajerumka hjihloka waneya Lia himajeru hjihlokamkatka seyni hi rukchiklu. Waneya Lia himajeru ruchpajyatka Raquel himajeru hjihlokatka.
34Raquel-kmakni tshowhutlu mayawletshichane, camelo-ne wunuwapre hpuko tutaklu. Wale hohoko ttuplakanata. Waneya Labão-mka himajertshi rujhamxyalu seyni mayawletshichakaka hi rukchika.
35Waneya Raquel wla tshinru turu:
— Nutsrukate hi hektuhchinikanupyi nma palniywakanu tshinanu. Klu tshinanu katshino skotno suxo hixannu nixa. Hiyáhoni walemka hijhayehitnina mayawletshichanni seyni hi rukchikanna.
36Waneya Jacó jihekanuwata, Labão hyanhaka. Hyanumatatka Jacó wla htshinatka:
— Klunhe nektunu nukolukjeru, hita hatjini pyiywaka hipokananu?
37Nejnunkatemka ptowruka petatka seyni kluhe pukchikatka nejnunkate pantshi hwatshri hanikajiteya pixa pejnunkate? Hiyáhoni xawakni hejnu pukchikleru ktsaklawaka putakanu nomolene hexyawakaplu, pimolene hexyawakaplu koxa rumukata jemahchinikanreyehixyawakapnona pixa hiyrunu hita.
38Vinte mhale pejnu pixaymakananno. Piprane carneiro-ne hi hiknokawhenetatka hiyrun-koxa piprane cabra-ne hi hiknokawhenetatka wane pchinika. Hiyrun-koxa piprane hi satuknako nnikatka.
39Nijewlu hiylaleru hi nanikatkalu pixa nwaka. Waneyakni nkachrijexyayi hita hamtakatshrino hita. Klu tshinanu pix-honra hi hichochatlu pa hixanune hohohne, hoyetshno tshowhutkalune hi paluka hamtaklechata.
40Hiyáhoni wla nixjekanata. Hohohne hamere nnikata, hoyetshno hi numka katshikleru tshinanu.
41Hiyáhoni vinte mhale pejnu pipji hajerukananno. Nkamrurewatatka quatorze mhale pejnu pixayma piwhenene suxone hepi tshinanu hiyrun-koxa nkamrurewata seis mhale pejnu piprane tshinanu. Nkamrure wenru pyokmajtatokanjekanaxyano dez kata.
42Hoyakalu, nuru Hoyakalute, Abraão Hoyakalute, Hoyakalu Isaque kahwakpirreru hitayma hmixkanumka pixamka hike mimwakatukno pyokanaxinmakno. Seyni Hoyakalu hetlu nsalewnale hiyrun-koxa nkamrure nkamhaleru hita myoya reta hiyahokni xye yetshno ruykotatkayi.
Labão, Jacó-yma Pnu Htshinkajyawakna Piranapni
43Waneya Labão hihitatkalu Jacó, wla htshinatkalu:
— Nyi nchitshone nowhenenetkani hiyrun-koxa nyi mturune nowhenenetkani. Hiyrun-koxa xye pratshine noprane rixyawakna haté hejnu petanru ptowruka hitanukni. Hiyáhoni xawakni hanhe nixanna nyi nwuhenerone hiyrun-koxa hanhe nixanna wanna hiwhenenna, hmatkaklene?
44Hiyáhoni xawakni wtshinkakanu pixa, hitayma. Xye wtshinkajyawakapa walepni satu wimetjeru pixa, hitayma.
45Waneya Jacó sotlu rawatka hyopkakatkalu histsihi, htshinkajyawakna pirana hichinkapikolupa rixyawakapa.
46Waneya Jacó hiynumatna himolene, wla htshinatkana:
— Sotlune hapatjetanu. Hiyáhoni sotlu rapatjetatkana ritjikakatkaluna sotlu. Waneya sotlu ritjikaklernastsi hnijyana.
47Waneya Labão hitakhiwakatlu Jegar-Saaduta. Seyni Jacó hitakhiwakatlu Galeede.
48Waneya Labão wla tshina:
— Xye sotlu witjikakleru waleni wetjeru hita, pixayma xye hohne pixkalutu. Hiyáhoni Galeede rutakhiwakatka.
49Hiyrun-koxa Mispa rutakhiwakatka klu tshinanu wla htshina: — Tsru Hixikatshriwa Hoyakalu hinotanyi pixa hiyrunu hita klu wkamhanu wma metkakkanuko pchini.
50Nowhenerone papnokaxinipa ho pimrone suxone pihnunroxinipna hike yineru hepixanyi. Klu tshinanu Hoyakalni wetjeru pixa hiyrunu hita tshinanu.
51Waneya Labão wla tshinru Jacó:
— Xyekni sotlu nitjikakleru hiyrun-koxa xye stsihi nutakleru pixa, hitayma wkojiretjerni.
52Xye sotlu hitjikakaluru hiphujetatshrini hiyrun-koxa xye sotlu yopkakaluru hiphujetatshrini. Rimathexikowaka xye hi nkoprutanu pixa nwaka nkamnixyawakapyi hiyrun-koxa xye sotlu hitjikakaluru hiphujetatshrini hiyrun-koxa xye sotlu yopkakaluru hiphujetatshrini hikeklu pkoprutanru hita nwaka pkamnixyawakapno.
53Abraão-ni Hoyakalute hiyrun-koxa Naor-ni Hoyakalute wanna hirni Hoyakalute hetahchinikanyehitwu pixa hiyrunu hita. Hiyáhoni Jacó htshinkajyawakna rikamhakakna ruru Isaque hkahwakpiraxyawaka tshinanu.
54Waneya Jacó henekachalu yoxikkaluru hkamhatka himriji hohoya. Himolene htshanixatka waneko hnijyawakapna. Waneya waneko hnijyatkana hiyrun-koxa wane himrijiko rutuk-yetshnotatkana.
55Waneya wale prika yetshpotukawa hpalnatka Labão. Himekahyone ramlutatka hiyrun-koxa hiwhenerone ramlutatka, kihleru piranalu htshinna waneya Labão yatka rawyawaka nwaka.
Nke Ahọpụtara Ugbu A:
Gênesis 31: mpdBiblia
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil