Gênesis 32
32
Jacó Halpokoxnawakwa Hyoptoxyawakaplu Esaú Piranapni
1Waneya Jacó yamtatka waneya hiwejikalune Hoyakalu towrerune tenhohne hajene yoptotlu.
2Waneya rexinixkana hiwejikalune Hoyakalu towrerune tenhohne hajene Jacó wla tshinatka:
— Nyi hixolune Hoyakalu soldado-tenni.
Waneya wale poktshi rutakhiwakatlu Maanaim.
3Waneya Jacó runamxyawaka pirana hinkakletatshine hyokanata hkosejyawakapna himole Esaú nwaka, Seir tshinikowaka, Edom tshijne hwatshri nwakaya.
4Htowutna, wla htshina:
— Wla htshinanru nutsrukate Esaú. Ptowreru Jacó wla tshina hinkaklekjixwu, “Ptowreru Jacó-no, Labão-sko nwatka, waleymakananno haté xawakni.
5Kapranno boi-ne, jumento-ne npurata, carneiro-ne npurata, cabra-ne npurata. Ktowrerno suxone, jejin-koxa. Xye pirana nyokananwakaxyawakyi pixa nutsrukatyi kihleru pixa yoptolexinipno.”
6Waneya wale pirana hanikatshinemka satokatka Jacó nwaka waneya wla htshinatkaluna:
— Pimole Esaú nwakamka wapokatka seyni wale koxa pixa nwaka hyamta hyoptoxyawakapyi jejineyma, quatrocentos pejnu.
7Waneya Jacó pikpotutatka, hkojwakahchinikanutatka. Hkanipretatkana yine waleymalune, pratshine hkanipretatka, carneiro-ne, cabra-ne, boi-ne, camelo-ne hkanipretatka hepi xkehi rixyawakapna.
8Waneya wla htshina Jacó:
— Hiyahokni Esaú pa xkehipni rapkapinipa, ruylaxiniplu waneya pa xkehi hixetatshripa himukata hasukleta.
9Waneya Jacó wla tshina hanjireta:
— Ha Hoyakalu, nurni Abraão-ni Hoyakalute, nuru Isaque Hoyakalute, Tsru Hixikatshriwa Hoyakalu honukla nunkaklexijeru wla ntshinjeru: “Ptshijne nwaka psatkapanu, pimolene nwaka. Wane hixatshripyi nepixanyi kihleruya.”
10Seynimka hita hi hijhakalurpotno pepixle tshinanuya, hi napkaplu halikakalutu pirana puphujetleru hita ptowrerno yehiya. Klu tshinanu hit-mitshi Jordão wenne nkopruhaxyatka nkanojereymatka tsonu seyni xawakni hepi xkehi mnutkano.
11Hiyáhoni xawakni nanjityi pepixyawakapno, pkochpakanno nomole Esaú myoya. Klu tshinanu npiklu klu tshinanu pa katako runanu hita ruylaxyawakapa hiyrun-koxa runrona ymakananu mturune ruylatanu.
12Seyni mitshi pixa wan-tshinno: “Kihlewaka nkamhinyi. Ksatuji mar powha hwatshri pejnu pixka nixkakanyi, ptshinno mitshi hixolunpotpakyi mpoyaho hitakyahoklexikowakanu pejnupyi.”
13Waneya waneko rawatka wale yetshno. Waneya rimwaleru hkanipretatka henekachalu himole Esaú tshinanupa.
14Pratshine hkaniprelene pejnu wla pejnuna, duzentas cabra-ne, vinte bode-ne, duzentas ovelha-ne, vinte carneiro-ne,
15trinta camelo-ne suxone hiwheneneymana hkanipretatka, quarenta wakane, dez touro-ne, vinte jumenta-ne, dez jumento-ne. Wale pejnu hkanipretatka.
16Htowrerune rutaka satkaka pratshine hislahatshripa rixyawaka. Wale nerupka ranikka. Waneya htowutna htowrerune, wla htshinatkana:
— Hkoseka kopruhalexinno, hohatjiniyakkaka hwakakamxini pratshineyma.
17Waneya pratshine hikosekatshri htowutatka, wla htshinru:
— Nomole Esaú yoptoxinipyi, repomhiniklunupyi katu towreryihe ho hanhe pyanu ho katu prannihe nyi, htshina hepomhalexinipyi,
18Waneya punkakanru, wla ptshinanru: “Ptowreru Jacó pranni nutsrukate Esaú henekachaxikolunepni. Hixa hatjini runamta wale,” ptshinanru.
19Waneko pixka htshinru satu hapkatamtatshri hepi rixinri, mapa rixinri koxa waneko pixka htshinru wale koxa. Waneko pixka htshinatkana wanna ptowruneka pratshine xkehkaka hanikatshine. Waneya Esaú hyoptoxinipa waneko pixka htshinanru.
20Wane pnute htshinanru, wla htshinanru:
— Ptowreru Jacó hita hatjiniyaka hinamtanu. Wla htshina towutletna klu tshinanu wla rixahchinikanuta, “Pa katako numukata yokwiretlu hejnu nkosekkakleruyma tshinanu waneya nohoji potuko rexiniklunupa pa katako kihle yoptole rixanno.”
21Hiyáhoni renekachalepa wenu hkopruhatatka. Seyni wale rumajeruko riknokak-yetshnoxyatka.
Jacó Hoyakaluyma Yahotkajyawaka Piranapni
22Waneya wale yetshno hpalnatka hhanunrone hepi ranikatka, htowrerone hepi ranikatka hiyrun-koxa hiwhenene onze-ne ranikatka waneya Jaboque hapha hkopruhawaka hkopruhaxyatka.
23Ranikatkana, hkopruhakakatkana wanna hiyrun-koxa rimwaleru ptowruka hkopruhakakatka.
24Waneya rapaluchatatka Jacó. Waneya wanekni satu jeji yahoxyalu haté rumrerekatka tkatshi.
25Rexinixka jeji hi rakota yahotletlu Jacó, Jacó tpali hapu yokle hyotnekatka hpixkonuyma hiyáhoni Jacó tpali hapu yokle himtuwnatka hyahotkakka pchinikna.
26Waneya jeji wla tshinru:
— Puchotanno nyiywakapa klu tshinanu hohistsitkani.
Seyni wla htshinatka Jacó:
— Hi nuchotanyi kihlewaka pma tshinanwakatkanuko pchinno.
27Waneya Jacó repomha:
— Klu hiwakyihe?
Waneya ruhitatka, wla htshinru:
— Nhiwaka Jacó.
28Waneya jeji wan-tshinru Jacó:
— Xawakni hi Jacó phiwakatko seyni Israel phiwakatko klu tshinanu Hoyakaluyma pyapretaklu, yineyma koxa pyapretaklu hiyáhoni pyoptotlu.
29Waneya Jacó wla tshinru:
— Klu hiwakyihe pixa, punkakhiwakatanno?
Seyni wale wla tshinru:
— Klu tshinanhe paluk-himatka hiwakatno?
Wanekni kihlewaka htshinanwakaxyatkalu.
30Waneya wale poktshi rutakhiwakata Jacó. Peniel hhiwakatlu klu tshinanu wla htshinatka nethojitlu Hoyakalu seyni hi nupnatka.
31Waneya hkopruhaxinixkalu Peniel ronotatka tkatshi seyni hitpali tshinanu hyohtetatka.
32Wale tshinanu israel-nerune hitpali hapu yokle hi hnika haté xawakni klu tshinanu Jacó tpali hapu yokle himutskirhalerutkani hyotenkoklunutka mitshi.
Nke Ahọpụtara Ugbu A:
Gênesis 32: mpdBiblia
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil