Genesis 20
20
Abrahamu ni Abimeleki
1Abrahamu aatthaamawo o Mamure aya o echigawo yoomwera ya Kanani. Aakhalla variyari va muzinda wa Kadeshi ni ellapo ya Shuri nave aakhalla wonanko mulleto mu echigawo ya Gerari. 2#Gen 12.13; 26.7Wenko ahaalleella athu wi, “Sara tti murokoraka.” Sika Abimeleki, mwene o Gerari, aamukusa Sarooyo. 3Vano mahiiyu mamodda Mulluku aamooneyella mwenooyo moolloha ni ollota wi, “Onimakhwathi kaambiiwa mutthiyana omukusalleewoolla tti ootthelliwa.”
4Koma Abimeleki aari ahinakone ni mutthiyanooyo nave aallota wi, “Apwiya, ethiyo nyuwaano ttuuwiipha athu oohichimwa? 5Abrahamu vookilleellani allotille wi, ‘Tti murokoraka,’ Nave olliyettho mwaneenaaye aallota wi, ‘Tti murokoraka.’ Miyaano vaweerani ddenndda, ngoonille yawuupusella murima nave ngichimwalle.”
6Mulluku aamwaakhulla moolloha mwemmo wi, “Ee kinnadduwella wi weyaano waheera ddenndda moohikhalla ni yawuupusella murima. Mwawi ddiiddo kuuvaanyihalle tti miyaano wi ohikichimwelle vookonani ni mutthiyanooyo. 7Koma vano, omuvelleelle mutthiyanoolla wa mamune. Mullopwanooyo tti namallotella nave aneerewuuvekellella wi ohikhwe. Koma waahimuvelleella, ddawoona, kinimuuchenjezeraatu wi onimakhwa weyaano ni nibanja nawo nittheene.”
8Osaka wene, ohinase, Abimeleki aawiithana allupa muttekwaaye attheene aalleella ddittheddenenndda nave athwaayo yahoova wunchichi. 9Sika Abimeleki aamwiithana Abrahamu amukoha wi, “Ethiyo oneerenlleeweella tti tini? Ethiyo kuuchimwenlle tini wi okittatthamullelle ddookatamiha mwawi ddiidda miyaano ni athu attheene a mu omwenaaka? Okeerelleewenndda khe ddaphaama. 10Kaambiiwa tini weerilleewe ddenndda?”
11Abrahamu ahaakhulla wi, “Kaganiza wi wuno tti onipuroni noohimoova Mulluku nave wi eneerokiipha wi emukuse mwaarakoolla. 12Komave, ollota ddawoona, yoolla tti murokoraka, ekaamba yawi tti mwaana attiitthaaka koma ohiri a nipelle nimodda nave miyaano kaamutthella. 13Vawi Mulluku akirumalleeye ovenyera owaani wa attiitthaaka wi kiye o ellapo ddeelleto, kaamulleella mwaarakoolla wi, ‘Okoonihe ororomelleya wawo voomulleellani arive muthu wi mi tti murokoriyo, orive weko nineereehu niyeekewo.’ ”
14Sika Abimeleki aamuhokollosella Sara wa Abrahamu nave enthawi yeeyo amuvaha enkhosa, eng'ombe ni akaporo aallopwana ni aatthiyana. 15Aamulleella Abrahamu wi, “Ellapo ettheeneella tti yaaka, ttuuwora okhalla orive weko onapaalleewewo.” 16Nave aamulleella Sara wi, “Murokoriyoolla kinamvaha makobiri a masiliva 1,000 wi okhalle wonanko omboni wa attheene oriiwenaalla wi weyaano kholakwille.”
17-18Ekaamba ya Sara mwaara Abrahamu, Apwiya yaamumaka mwaara Abimeleki ni atthiyana attheene a munibanjani naye wi ehiyareke. Sika Abrahamu aamuvekella Abimeleki nave Mulluku aamuchiriha Abimelekooyo ni mwaariye vamoddattho ni awariye ang'onong'ono attheene wi yaayareke anamwani.
Nke Ahọpụtara Ugbu A:
Genesis 20: MW2019
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
The Bible in Elhomwe © The Bible Society of Malawi, 2019.