yuwana 4
4
asa 4
yecu na gwa gweḏi samɩra
1na gwune na gwele gwun gwiro elo lɩŋe lɩbarɩsi lɩmadiŋɩni galakwe yecu gwumədiene calɩmis ga jutəno ḏi yuwana nulbabṯaije, 2—namɩni yecuŋu gwate gwiro gwibabṯaijiḏi no namɩni calɩmis juŋun jiro— 3nuwalane yauḏia, nuaɽuwe jalil, 4na arram ŋu gwele gi ṯaṯ kɩlɩgi ganu samɩra; 5nuwila kamɩrɩgen yete yeḏi samɩra yun yan sukara, yun yijo gɩṯo gi ḏɩri ḏun ḏiḏəḏi yagub ŋaɽe ŋuŋun ŋun ŋan yɩɩsib, 6na ŋɩnəwei lɩbir iijo leḏi yagub. na gi gwune yecu gwuwiḏi kalo gwola ganu nurtonyɩḏe nujiga gi lɩbir elo, na galo giro anyino ganu. 7na gwa wila gweḏi samɩra gwar gwaŋɩɽe ŋau; na yecu eicɩno, ḏəḏiŋine ŋau ilyu, 8gi gwune calɩmis juŋun jimele kamɩrɩgen jeḏɩla gia. 9na gwa gweḏi samɩra eicɩno, gwuḏaro gəko ŋa gwun gwiro gwiju nuŋwiɽoṯəḏɩjo ŋau ŋe, namɩni nyi gwiro gwa gweḏi samɩra? gi gwune liju late laṯɩje kal gete lisamɩra le no. 10na yecu wɩrlijo ŋuɽuna nueicɩno, ḏa ŋa gwilɩŋiḏi ḏiḏəḏo ḏeḏi elo na gwan əḏi ŋu gwun gweicaŋano, ḏəḏiŋi ŋau ilyu, gwaŋaɽoṯəḏɩjoŋa na gwaŋaḏəḏə ŋau ŋɩmiḏo. 11na gwa eicɩno, gwele gwi, ŋa gwate gwəṯi gwaŋ gwe ḏaŋɩɽa no, na lɩbir lola ganu, namɩni ŋa gwəṯi ŋau ne ŋun ŋɩmiḏo? 12ŋa gwiro gwubuṯano ḏi gwurninyo gwəri gwun gwan yagub gwun gwiḏəḏije lɩbirio, nananɩyu ganu ŋu na nyaɽe nyuŋun na almal yuŋun a? 13na yecu wɩrlijo ŋuɽuna nueicɩno, liji wei lun leyu ŋau ŋeno lal ouḏo e mɩna; 14namɩni gwun gweyu ŋau ŋun ŋiḏəḏɩlonyi gwate gwan ouḏo e minu no; namɩni ŋau ŋun ŋɩlḏəḏɩnyi ŋaro lugwun lroiny lun laṯabubuḏa gi ḏɩmiḏa gi gɩḏilio. 15na gwa eicɩno, gwele gwi, ḏəḏiŋi ŋau ŋeno kani ate nyi ouḏo e minu no, i ate nyi eleḏa ŋɩne gi ḏaŋɩɽa no. 16na yecu eicɩno, wiḏi ŋorniḏa gwəmɩnyəŋe gwuŋa nyagwila ŋɩne. 17na gwa wɩrlijo ŋuɽuna nueicɩno, nyi gwate gwəṯi gwəmɩnyəŋe no. na yecu eicɩno, ŋa gwuməḏi muma, naŋarno ŋa gwate gwəṯi gwəmɩnyəŋe no, 18gi gwune ləṯəlo gwerre ṯoḏɩne, na gwun gwəṯo gwunnɩno gwuŋa gwate gwiro no. ŋuɽun ŋeno ŋa gwuməḏi muma. 19na gwa eicɩno, gwele gwi, nyi gwilɩŋiḏi niarno ŋa gwiro nebi. 20lɩgwurninyo ləri lorṯeḏi eloŋu gi lɩrgwom leno. namɩni nyaŋa laṯarno galo go urucəlim arram gaṯanyanorṯeḏa eloŋu. 21na yecu eicɩno, gwa, əmɩnyəji, gaja gaje gila nya late lanorṯeḏa babaŋ gi lɩrgwom elo leno i urucəlim no. 22nyaŋa ŋaṯanyalorṯeḏa ŋun ŋate ŋilɩŋiḏanyalo no, namɩni anaŋa gwaṯanorṯeḏa gwun gwilɩgiḏana, gi gwune ḏɩkəḏəḏɩnə ga ḏeḏi liju ḏiro. 23namɩni gaja gaje gila, na ke gijo gwunnɩno, na lun lorṯeḏi gwerkwe ganu lorṯeḏa babaŋ gwuɽɩwə gwe na ŋuɽun ŋe ŋun ŋiro gwerkwe, gi gwune libunyilo baba lun liro dino alorṯeḏa ŋuŋu. 24elo gwiro gwuɽɩwə; na lun lorṯeḏi arram gwalorṯeḏa gwuɽɩwə gwe na ŋuɽun ŋe ŋun ŋiro gwerkwe. 25na gwa eicɩno, nyi gwilɩŋiḏi gwun gwuwɩrṯɩnu gweḏi elo gwun gwaṯɩleico kɩrisṯo gwaje gwila, na ḏa gwɩmila gwijiuməḏɩjo ŋɩdi ŋe wei. 26na yecu eicɩno, nyi gwiro gwun gwuməḏɩjaŋa. 27na kaja kono na calɩmis juŋun wila, nalobaga ṯuṯ gi gwune gwuməḏɩlo gwa gwe; namɩni gwate gwete gwimaneicɩno, gwudaro gwubunya? i nuneicɩno, gwudaro nanyagwumə no? 28na gwa walane kiḏi guŋun, nuaɽuwe kamɩrɩgen nueico ləmɩnyəŋe no, 29wilal, nyaŋaḏa gwiji gwun gwuməḏɩji ŋuɽuna wei ŋun ŋidujiŋilo kweno gwil gwarno gwiro kɩrisṯo a? 30nalduḏo kamɩrɩgen nalwila lugwun.
31na kaja kono na calɩmis eicɩno, mualɩm gwəri, iṯi. 32nulmɩni eicɩno, nyi gwəṯi gia giʼe gun gate gilɩŋiḏanya no. 33na calɩmis uməḏəṯe laginŋu naleicɩno, gwiji gwete maŋanəpijo ŋɩdio ŋe ḏiṯa a? 34nal yecu eicɩno, gia ginyi giro ḏidujia ŋuɽuna ŋun ŋɩbunyɩlo gwun gwuwəjɩŋi, na ŋaṯɩmi ŋɩru ŋuŋun. 35nya late laṯarno, luwə lore kwoɽo kɩnadi ḏɩwona ḏila na? eʼe, nyi gweiceijɩno, baŋəḏɩl elo nyadaŋa dɩri; gi gwune nalro ŋwona nɩɽe gwunnɩno gi ḏɩwona. 36ŋu gwun gwaṯɩwone gwape əlgɩrucə, naṯuwəɽeice nyaɽe ldu gi ḏɩmiḏa gi gɩḏilio, kani ŋu gwun gwaṯɩkwoi na gwun gwaṯɩwone nalḏile ganu berene. 37na ḏuməḏo ḏun ḏiro gwerkwe ḏaṯarno, gwete gwaṯɩkwoi na gwiro kaja gwaṯɩwone. 38nyi gwuwəjaje nyalawele nyawona ḏɩwona ḏun ḏate ḏəpəḏənyəne ŋɩru no; namɩni liro kaja ŋapilo lɩbuḏu nanu, namɩni nyaŋa lawona ŋɩdio ŋeḏi ŋɩru ŋagin.
39na lisamɩra lutu leḏi amɩrɩgen yono naləmɩnyi gi gwune nalḏiŋɩni ŋuɽuna ŋeḏi gwa gi gwune teiju ga, nuarno, gwaŋiju ŋidio wei ŋun ŋidujiŋilo. 40gwune na lisamɩra wila lugwun, nalbunyi nalarno gwalijaḏaṯa ga lagin; nujiga ŋɩnəwei ŋwamon ŋwɩttən. 41na liji əmɩnyi lutəno gworki gi gwune naldiŋɩni ŋuɽuna ŋuŋun, 42naluməḏɩjo gwa naleicɩno, gwunnɩno anəmɩnyi, anate nəmɩnyu kalo geḏi ŋuɽun ŋuŋa no, nanalmɩni əmɩnyi gi gwune ḏiŋɩnanalo kaja gəri, nanalɩŋe gwerkwe, kweno gwiro gwun gwikəḏəḏi liji ga leḏi gɩḏilio.
yecu gwiŋiri ŋaɽe nanu ŋeḏi wəkil gweḏi gwele jalil
43gwune na ŋwamon ete ŋwɩttən nudu ŋɩnəwei nuwele jalil. 44gi gwune yecuŋu gwiteijo ga nuarno liji leḏi amɩrɩgen yuŋun late laṯɩnəji nebɩŋ no. 45gwune nuwila jalil na liji leḏi jalil naləmɩnyi nalgwuloḏa lagin; gi gwune aŋəḏɩlo ŋuɽuna wei ŋun ŋapulo urucəlim kɩmuri, gi gwune luŋa dino lɩmele kɩmuri.
46na yecu wila mɩna kana gweḏi jalil, kalo gun gimɩdinine ŋau nalro ŋau ŋeḏi jaɽe jun jiro gi ḏuɽuṯ. na wəkil gwijo gwete gweḏi gwele, na ŋaɽe ŋuŋun eḏeḏe nanu kamɩrɩgen yun yan kabranaum. 47gwune nudiŋɩni yecu gwumadiɽi yauḏia nuwila jalil, nuwele lugwun nuɽoṯəḏɩjo gwagwulo nugele ŋaɽe ŋuŋun muma; gi gwune ŋo gɩṯo ŋai. 48na yecu eicɩno, ḏa nya late limaŋu ḏəŋɩnio na ŋɩdi ŋun ŋɩmobeje liji ga ṯuṯ no, nya late ləmɩnyi no. 49na wəkil gweḏi gwele eicɩno, gwele gwi, gwulo cagi gwerre ŋaɽe ŋi ŋate ŋɩmai no. 50na yecu eicɩno, wiḏi mino, ŋaɽe ŋuŋa ŋiməmɩḏe. na gwəmɩnyo əminyi ŋuɽuna ŋun ŋuməḏɩjɩlo yecu nuwele. 51na gi gwune ju gi ḏigwula, nalobeḏeṯe lɩwainy le luŋun naluməḏɩjo naleicɩno, ŋaɽe ŋuŋa ŋiməmɩḏe. 52nulɽoṯəḏɩjo ŋaɽe ŋɩmadone kaja sa umɩnyo. naleicɩno, kilenyene əa jetɩdo anyino ganu ŋɩɽainy ŋɩmeɩe. 53na baba lɩŋe muma kaja kono giro gun gwuməḏɩjige yecu gwune nueicɩno, ŋaɽe ŋuŋa ŋiməmɩḏe; nuəmɩnyi, ŋu na liji leḏi dunu gwuŋun wei. 54na ŋuɽun ŋun ŋɩbuḏo ŋeno ŋiro ŋun ŋugwujano gworo ŋun ŋapɩlo yecu gi gwune nudu yauḏia nuweleḏa jalil.
Nke Ahọpụtara Ugbu A:
yuwana 4: OTR1966
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Nuba, Otoro New Testament
© British and Foreign Bible Society, 1966.