Luke 15
15
Kandombo ka kanyuoŋo ŋaa amivura mono
1Angaa lempo aso bila abuga akima ba baasa maami maabi#15.1 Azife ba abizi kanyima angiri kiigi kayaga bo mva angaa maami maabi., ayi mpila Zezi ma kayuga mbari a nde. 2Ma bwa afarizi bila ayizigi angiri yiga ba ajorogo Zezi kanca paniŋi a bo ndi: «Yi sila mbuuru ma, eli ayaligi kaka bila baari ba baasa maami maabi, ŋaa nde aja bila bo?» 3Ŋaa Zezi kayuga osumbu wo kiigi lyele bo, nde ti bo ngana ndi: 4«Nca be aka ŋaa mbuuru eli nde ŋa ekwumu ba endombo kwumu, kandombo kamon kanyoŋo, nde aka nyina endombo ba ekwumu woa ŋa woa nca ncege, ma kaje saga kaka mi nyuoŋo ŋi? 5Ŋaa ntini ye amono nde ko, nde yagi kandombo kia nca kase keenini, biri kayila koro nkii. 6Nde kayavuruga njo, nde cwoli andigi bila abuga ba baaka mpaana nde. Ŋaa nde ŋa bo ndi: Leya bizi a be leswere kabila mi mi vura mono kandombo ka kanyuoŋi. 7Mi elyele be ni, ma lemigi loankulu lia, Njyami bila antuma a nde baamono kase keenini, kabila mbuuru wobi omon mi yalaga Njyami mi kala eku e nde. Ŋaa ka kase ka enkuumu e baari woa ŋa baari woa baama amana yalaga Njyami ŋi.»
Ngana ye doro le enyuoŋi ŋaa amivura mono
8Ŋaa Zezi vuri ti ngana kima ndi: «Sikali aka ŋa okaazi eli ŋa ampara kwumu#15.8 Kiigi yeebi baana ba ampara ma ankozo ma ama fwuga, ma kiigi tuba akaazi ma kasomo nca endi, ma kalege ma nkii bila ma mfu. , ŋaa nde katasa doro omon, nde aka sa acuga munda, nde si kuomo njo, ma kasaga yemiŋi tii kamono nde doro lia ŋi? 9Ŋaa ntini ye amamono nde doro lia, nde cwoli andigi bila abuga ba baaka mpaana nde, nde ŋa bo ndi: Leya bizi a be leswere kabila mi mimono doro le mi le lenyuoŋi. 10Mi elyele be ni, ma lemigi loankulu lia, Njyami bila antuma a nde baamono kase keenini kabila mbuuru wobi omon mi yalaga Njyami mi kala eku e nde.»
Ngana mwana wo tamiŋi
11Ŋaa Zezi avura ta ngana nkima ndi: «Mbwuru omon kiigi ŋa baana ba abalaga bwele. 12Mwarigi ŋa taara ndi: Kolokolo we ataara ŋa le mi wanda. Ŋaa taara se kabi bo. 13Ecugu eyira, mwarigi yagi le nde wanda tegi, kayaga ampara, oyeni kasi ka kima kalala, kato ŋaa nde biizi ampara ma akaazi ba ebila. 14Nde kama mana ampara a nde aso, mono njala yeenini ka yeeva kanca kasi kia. Nde kiigi yiga nca kaama. 15Nde yeni saga janja mpila mbuuru omon otu wo kasi kia, wua tumi nde ma kaje janja, ma kaje kyele enguu kanca anguunu a nde. 16Nde njala esi, nde kakese bu ndi nde kaja biila ba enguu. Ŋaa mbuuru wo ampa nde jo onyaŋa. 17Ŋaa mwarigi wua yiga abaraga maami masi nde, ŋaa nde ndi: Mono mi ekpa ma njala yeenini kakunu ŋi ajanji a taara mi ba apozogo biila.» 18Mi esaraga, mi eje mpila taara mi ŋa mi eto mi lyele nde ni: Taara mi, mi maasa maami maabi ka miizi a Njyami bila a we, 19mi yiga ka mva mwana we ŋi, yiga yaga mi ma ojanji a we. 20Nde kamana cimiŋa bwa, nde sarigi, vurugi mpila ataara.
«Taara ka taala mwana ka kaya, nya esi nde, obiri nciini yeni mpila mwana, nde pori mwana, nde yiga aswere bila mwana. 21Ŋaa mwana ŋa taara ndi: Mi maasa amaami maabi ka miizi a Njyami bila a we. Ŋaa yiga ndaga mi ka ma acwolo ma mwana we. 22Ŋaa taara ŋa ayiga a nde ndi: Le sanaŋa ya bila nde mfa yeevuli owali, le laaza nde yo, le lege nde nkwere ma olyemi, ŋa akorogo. 23Leje kwara ngoombi wooli ŋa maari wua, ŋa lebuma nde, bizi a be leja, leswere. 24Kabila mwana mi wu kiigi mva wo ma akpaa ŋaa nde mi nyuzuga, nde kiigi ma tamaŋa ŋa mi mimono nde. Ŋaa bo yiga baaswere.
25«Kaasa bo bwa okulu kiigi maaje anguunu, kamaya ka mpaana njo yugi luumu leeyiriga bila akini. 26Ŋaa nde cwoli ojanji omon nca bo, ŋaa nde pizi nde ndi: Jo ema esa kunu? 27Osali kaali ŋa nde ndi: Mwaragi a we wo je, ma yavuruga li yemiŋi, yia biri le taara we ye katumi ndi abuma ngoombi wooli ŋa maari wua. 28Okulu kamayuga bwa nkeri esi, osugi, oki kajii. Taara nde o cuugi makaya bwono nde, ŋaa nde ŋa mwana ndi: Kolokolo we ya nyunuŋa nca njo. 29Ŋaa mwana akaala ŋa nde ndi: Ee taara, ma mono kuna le esibi li lesa mi osali o we mva oyiga. Mi nkini ndaga a njila a we ni. Ŋaa we kini mpa se mi mwana ntaba, ma kaswere bila andigi a mi ŋi. 30Ŋaa mwana we wu kaya, nde wo je biiza kabaga ka we bila akaazi ba ebila. Ŋaa eto ma nde we mi buma ngoombi wooli ŋa maari wua! 31Taara kaali ŋa nde ndi: Mwana mi we ni bila mi aka ecugu eso, biibi e mi eso ni e we? 32Yo ŋaa yemiŋi ave bizi a be le swere. Kabila mwana mi wu kiigi mva wo ma akpaa ŋaa nde mi nyuzuga, nde kiigi ma tamaŋa ŋaa mi mimono nde.»
Nke Ahọpụtara Ugbu A:
Luke 15: teg
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES