Luke 16
16
Onkiele kabaga wo ŋa ambalaga
1Zezi avura ta alwoni a nde ngana ndi: «Obagi omon kiigi ŋa onkyele biibi. Baari ayi naana nde, onkiele wua abiiza we biibi. 2Obagi ocwoli nde ŋaa nde pizi nde ndi: Mi maayuga jaa leebi ma nkuumu a we, ŋaa maya sa mi otali wo biibi baakiele we, okorogo we akamakiele biibi e mi ŋi. 3Onkyele wua yiga acimaŋa ndi: Ŋaa mfumu a mi awu yiga acieze mi ma janja ŋaa mi yiga bunu esa? Mi ti mpari eli mi janja angwunu kali. Kali, mi ŋa okuru, mi ekaje laa ampara ŋi. 4Mi mi mana yaa lemigi lesa mi, ma buni se ami cyeze mi ma janja, baari baabuna yamba mi ka anjo a bo. 5Ŋaa nde cwoli baari ba adifa biibi mpila mfumu a nde, nde ŋa wo ncomi ndi: We kpe difa ŋa mfumu a mi? 6Nde kaali ndi: Kabiimi kayaga mi, ekwumu ba angungulu kwumu ba maari. Ŋaa onkyeli ŋa nde ndi: Mono okanda, ka ma ncie ŋa asisari, teende ekwumu etaani. 7Nde vuri cwoli wo omon nde ndi: Ŋaa we, we kpe difa ŋa mfumu a mi? Wua akaala ndi: Kabiimi kayaga mi, ekwumu baasaki ba mburu alwumu kuumu. Onkyele ŋa nde ndi: Mono okanda teende ekuumu mpwomon. 8Mfumu yugi lemigi leesi onkiele woobi wua. Ŋaa nde yuuzi onkyele woobi wua ma oyeri ba bagi nde. Kabila baari baabiza yaa Njyami avuli ambalaga ka mpaniŋi a bo ŋa bo, okorogo bo avuli baayayi Njyami ambalaga.» 9Zezi amana ndi: «Ee! Mi elyele be ni, leyaga kabaga ka be kayila ncie kaka li keebi ma kayamaŋa abuga a baari, ma kabaga le andigi. Ma ntini eli kabaga kia kamiga mpila be, ŋaa Njyami ayamba be nca njo nde obu-obu. 10Mbwuru oli tele ma amaami ma kiege, nde se tele ma amaami maanini. Mbwuru eli nde ŋa kura ma maami ma akyege, nde se ŋa kura ma maami maanini. 11Ŋaa aka be ka tele ma kabaga kayila ncie kaka li keebi, Njyami kibuna mpa be kakiele kabaga ka jaajaa ŋi. 12Ŋaa aka be kiigi ka tele ma biibi baakiele be ba mbuuru okima ŋi, Njyami kibuna mpa be biibi e nde ba kaswuza ma be ŋi. 13Ojanji omon kibuna kajanja ma amfumu bwele ŋi, nde abele omon, ŋaa nde jyi woomon, sikali nde avula kayiga bila omon, ŋaa nde beli woomon. Be kibuna ka tele ma Njyami, ŋaa be levuri ki ayiga ba ampara ŋi.»
Njyami yayi etuma e baari aso
14Ntini ye afarizi ye ayugi bwa, bo yiga baasebe Zezi, kabila bo ŋa njala ampara. 15Zezi ŋa bo ndi: «Ka miizi a baari, be lemvyere ni be tele, ŋaa Njyami yayi etuma e be. Kabila kalogo kamono baari ndi ko keenini, ka miizi a Njyami koove kali.
16«Ngiri a Moyize bila maami aso ma dugi antuma Njyami, asa baana ma ntini ma antuma tii eyi e Zan Batise, ampi ncia yeeve ye omfumu o Njyami. Baari ayugi, ŋaa mbuuru ŋa mbuuru asa mpari ma kanyunuŋa nca omfumu ba. 17Maami a yulu bila ncie ma buna kayira ŋaa se mpiri mon ye ngiri kibuna yira ŋi.
18«Mbuuru a balaga wo abira okari a nde, ŋaa nde kabala okima, nde mi sa ncwuma ka miizi a Njyami. Ŋaa wo abala okaazi eli olumi ma bira nde, mi sa ncwuma ka miizi a Njyami.»
Ngana ngaa Kabaga bila Ofuga
19Amana Zezi ti ngana ndi: «Kiigi ŋa balaga lemon eli ŋa kabaga, nde kiigi ka laaza amfa aso ma ntali bila ma awali, Ecugu eso ba omuon o nde, nde kasa akiza. 20Ŋaa kiigi ŋa balaga lemon eli kiigi ofuga, nkuumu Lazare, amono ayaka ma tolo ka onyua njo ngaa kabaga wua. Ŋaa nde kiigi njuru emaabya ma ampura. 21Nde amono asaga ja amfufuzu ma biila ma maawa yila mbisa ngaa kabaga wua. Kayila ŋaa amva amono baavura lye nde ampura. 22Mono ofuga akpaa, antuma a yulu abiri nde mpila Abarayame#16.22 Mono Liki13:28 . Mono ngaa kabaga wua se akpaa, ŋa ajiigi nde. 23Kanca kasi ka baari baa akpakpa, nde yiga nca mpasi yomini yeenini. Nde kata miizi ka yulu, nde taali Abarayame kalala, ŋa Lazare li kapaana nde. 24Nde ti nya ndi: “Taara mi Abarayame kolokolo we, mono nkerigi a mi, ŋaa tuma Lazare ma buni nde katuba olyemi a nde nca anja, ma kakwozo mi mpye anja, mi kunu emono mpasi yeenini nca mbaa yi.” 25Abarayame akaala ŋa nde ndi: Mwana mi, we kini abaraga, we ka ba ka kayila ncie we ma ovuma, ŋaa Lazare kiigi ma mpasi. Ŋaa yiga Lazare se mi cyege nca mpasi yiga ma ovuma. Ŋaa we se yiga ma mpasi. 26Kayila ŋaa, ŋa billa leenini kampaniŋi a bizi a be, ma buni baali ka kunu kibuna ya mpila be kwa ŋi, baali ka kwa kibuna ya kunu ŋi. 27Ŋaa ngaa kabaga wua avura lyele ŋa nde ndi: Kolokolo we Taara, aka bwa lyele Lazare kaje njo taara mi. 28Kabila mi ŋa adumu ataani, nde kaje yieze bo, ma buni ncanke bo ayi baga mi nca biri empasi yeenini yi. 29Abarayame akaala ŋa nde ndi: Bo ni ŋa angiri ma nyina Moyize bila mbari ye teende antuma Njyami a ncie, bo ayuga mon, ŋaa bo anyiima mon. 30Ngaa kabaga wua avura kaala ndi: Kali taara a mi Abarayame, ka bwa otu ŋi, nkerive mbuuru wo kpakpa kavuraga yila ncye mpila bo, se bo akaala etuma e bo. 31Ŋaa Abraame ŋa nde ndi: Bo abiza yuga angiri a Moyize bila mbari ye teende antuma Njyami ayila ncie, se mbuuru okima kanyuzuga kanca baari ba kpakpa, bo ba kabuna ka kaala etuma e bo ŋi.»
Nke Ahọpụtara Ugbu A:
Luke 16: teg
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES