Luka 2
2
Maryamu l'aa Jesu Baitalami
Mat 1:18-25
1Gyet yiiy w'u mwopp l'aa Yohanna Gu-Baptisma diy, bhi Kaisar Agostus l'e m'ee w'aar, tihh mwopp ran dw'uu khi gurum diy weett dhighin yill Roma kihhdihng'dihng. 2Gyet ran'dwuu mhizeh ni a wu'shee w'u mwopp sh'in yill Roma, byitt w'u Kiriniyos a Govno w'u yill Siriya. 3Pee'mhinyi bhi koohweeh kihh yakhal y'aa mwaan p'ee dum khishikhitt miin'niy tihh mwopp ran nyi diy.
4A nyi seh bhi Yusufu yakhal Nazaret dhighin yill Galili k'aa dum Baitalami dhighin yill Yahudiya. Baitalami ni a tughuzyill w'u gyet mwopp l'aa Miskakhamm Dauda diy. Yusufu sh'in kihhsheh pee'rooh gyet nyi a dhighin seghen khi Miskakhamm Dauda. 5Dum tihh mwopp ran mwopp diy kihshag kihh Maryamu, w'u a mat'yaa keeniy w'u baa mwopp le'sarr dyik, bhi Maryamu ni baa kihh ak. 6Kaarooh mwopp nhighin Baitalami, bhi aktul Maryamu, 7bhi l'aa l'aa wu'shee keera a wu'mis. Bhi mwet nyi kihh zaall dhen dhighin kongsoh khi long, p'ee baah gyet mwopp kad pee dhighin luhmhizeb ni mou.
Mhi'lop dyingg shut mhitapp mwopp
8M'ee mhitapp long mwopp gyet nhighin dh'em kuss kihh tughuzyill Baitalami ni. Mwopp teer naah long keeru khipar. 9Bhi m'ee gu'lop khi Naan dyingg shin mwopp, bhi men'riin khi Daah Naan bhanggpee w'u mwopp diy, bhi bhaann chaat bwut mwopp. 10Dhanggbhi gu'lop ni satt mwopp le, “Tapp kihkhirmuut yak wunn mou. Wu naah ih ji a kihh Pwoo'wurett w'u p'ee l'e tihh Gurum mwopp weett kad rettyit diy. 11Shi-shinn se bhi mwopp l'aa m'ee Gu'bham wunn dhighin Baitalami, tughuzyill w'u gyet mwopp l'aa Dauda diy. Nyi a Kristi w'u a Puup mu. 12A mihhse a bii w'u wunn p'ee naah l'aa lhizhiw ni wu man dyishig: wunn p'ee kad nyi a w'u mihmwet kihh zaall, kihh dhen dhighin kongsoh khi long.”
13Abet bhi dw'uu mhi'lop-l'ek khi Naan w'u kih dhengNaan, mwopp dyingg shut zag dang gu'lop ni, mwopp kaah kwoob Naan mwopp le,
14“Lappdhess a mhi Daah Naan tihngg kih dhengNaan;
dhangg dhighin yill ni zag,
bhi tongkakhamm kihshag kihh
mwooh Naan kihh klihngshangg kihh mwopp.”
15Bwoonrooh mhi'lop ni mwopp reen yet mhitapp ni mwopp diy, mwopp wak duam khi dhengNaan, bhi mhitapp ni mwopp satt shag le, “Mu dum Baitalami tihh mu naah bii w'u put diy nhighin, w'u Daah Naan yakshiiy nyi munn seh.”
16A nyi seh bhi mwopp yakhal laah-laah mwopp duam lyap pee Baitalami, bhi mwopp kad Maryamu mwopp kihh Yusufu nhighin, kihh lhizhiw ni kihh dhen dhighin kongsoh khi long. 17Kaarooh mwopp naah lhizhiw ni, bhi mwopp fwabhelepp kaah bii w'u dyinn mhi'lop khi Daah Naan yak mwopp kaah l'aa ni seh. 18Koohweeh w'u klihng bii w'u mhitapp ni mwopp satt bhi aa'phi nyi pwetd. 19Dhangg Maryamu l'e bii mihhse mwopp weett en ra, kihh blihpshiiy mwopp weett dhighin phitukhup ra. 20Mhitapp ni mwopp y'aa arr p'ee baduam kih tapp, mwopp kihh tihghin Naan, mwopp kwoob nyi p'ee bii w'u mwopp klihng yakhal mwopp naah, w'u dhen a chiitt kihh bii w'u gu'lop khi Daah Naan ni dyinn satt mwopp seh.
21Kih puus wu'pwoghokunn, puus w'u mwopp p'ee gab l'aa ni diy, bhi mwopp l'e shumm w'u a Jesu nyi, shumm w'u gu'lop khi Naan deh shep l'e nyi dhanggbhi Maryamu kihh m'ang ak nyi. #Lev 12:3; Luk 1:31
Mwopp ji kihh Jesu LuhNaan p'ee l'e nyi sarr Naan
22Kaarooh t'eer mhi tu'angg p'ar khimwopp gam, sh'i bii w'u W'aar mhi Musa kamm, bhi Maryamu mwopp kihh Yusufu mwopp dum kihh Jesu Urshalima tihh mwopp l'e nyi diy sarr Naan. 23Mwopp sh'in a mwoorr kaarooh nyi a w'u rih-ran dhighin W'aar khi Naan le, “Kapp laa'wumis w'u shee wangg luh'laa bhi mwopp p'ee wangg nyi dhen Daah Naan;”#Put 13:2,12 24yakhal tihh mwopp wus'biizhukhum w'u w'aar khi Naan satt diy p'ee tu'angg p'ar. Bii'zhukhum ni a zheb daalong vel, kooh duu'duu vel.#Lev 12:6-8
25Gyet m'ee gurum w'u kihh tong Urshalima nhighin, w'u shumm nyi a Simiyon. Nyi gyet a gu'shigrett w'u kihh pihh kaah niy Naan kihhdihng. Gyet nyi kaah gongg puus ji khi Gu'bham khi Isra'ila. Riin khi Naan kaah nyi. 26Riin khi Naan ni wangg nyi satt le baah nyi p'ee m'uut mou harr seeh naah Kristi khi Daah Naan dhangg. 27Bhi Riin khi Naan ni tungg phitukhup nyi tihh dhel diy kihfur LuhNaan. Bhi Kaarooh puup khi Jesu mwopp kihh nhikhin khinyi mwopp ji kihh nyi tihh mwopp sh'in bii w'u wass khi W'aar khi Daah Naan satt diy, 28bhi Simiyon lapp l'aa ni sarr niy bhi y'aa kwoob Naan le,
29“Daah Naan W'u Mettweett,
sh'i bwakhatbhelepp keegha,
bhi ghi yet kromm keegha mwan dhak ser'seh dhighin kihrsaam.
30P'ee yit na baa naah Gu'bham shi w'u ghi lop,
31Gu'bham w'u ghi lop p'ee gurum mwopp weett.
32Peebhangg mhi wanggyit p'ee Seghen'gurum mwopp,
kihh bii nhighilshik mhi gurum keegha, Isra'ila.”#Ish 42:6; 49:6; 52:10
33Bhi bii w'u Simiyon satt kaah l'aa ni aa'phi puup khinyi kihh nhikhin khinyi zag. 34Bhi Simiyon le'wurett mwopp, dhangg yakhal satt nhikhin khinyi Maryamu le, “Yi naah, l'aa mhize ni p'ee dhen a bii p'al khi pakk gurum mwopp, kihh bii yakhal khi pakk mwopp dhess zag dhighin Isra'ila, yakhal nyi p'ee dhen a bii'kattshiiy w'u gurum mwopp p'ee shin'pwoo wu'bis kaah. 35A sh'i kihhsheh bhi Naan p'ee fwoonshiiy p'an khi phitukhup gurum mwopp dhess. Phitukhup yi p'ee p'ar wad pwetd kaa mwopp sh'ul mhizhull yi a kihh g'oo se.”
36M'ee nhi-wanggshiiy, w'u shumm nyi a Anna, gyet nhighin zag. Nyi gyet a reep khi Fanuel, dhighin seghen khi Asha. Gyet baa kus pwetd. Gyet tong kihh mis ra p'ee byitt pwoghovel phi'wu yakhal dyik diy reep. 37Bwoon kihhsheh, kaarooh mis khinyi m'uut, bhi y'aa tong mat'kaah harr kus wull byitt laar pwoghokunn kihh feerr. Baah kihh klakk yet kihfur LuhNaan mou, kihh pihh sat dhakk-pwooNaan chipp, kihshag kihh yaa'pwoo kihh dhangNaan, khipar kihh puus. 38Kaarooh Simiyon kaah laa'pwoo kihh Yusufu mwopp kihh Maryamu, bhi Anna ji dharr kihpee mwopp diy, bhi pihh plangg Naan, yakhal y'aa sattpwoo kaah l'aa ni kwett mwooh phi le'yit p'ee naah ji khi Gu'bham khi Urshalima#2:38 Urshalima a Khishikhitt wu'yon khi Isra'ila. Pee bihze bhi mwopp m'ang nyi a Isra'ila kihhdihng..
39Bwoonrooh Maryamu mwopp kihh Yusufu khibhid koohmeeh w'u w'aar khi Naan satt, bhi mwopp wak duam yill Galili, mwopp duam dihng khishikhitt keeru w'u a Nazaret.#Mat 2:23 40Bhi l'aa ni sokihkyeen kihh y'on, kihh bhall, kihh s'oon, yakhal wu'rett khi Naan kaah nyi.
Jesu naar Mhikamm kihfur LuhNaan
41Shi'byitt, shi'byitt, bhi puup khi Jesu mwopp kihh nhikhin khinyi mwopp kihh ka duam Urshalima Ku'khur Mettkaah.#Put 12:1-27; WSW 16:1-8 42Kaarooh Jesu wull byitt kaghapaad baa'vel, bhi mwopp ka duam Ku'khur ni kaa mwopp kihh lokhot sh'in nyi seh. 43Bwoonrooh mwopp gam t'eer mhi Ku'khur ni mwopp, bhi mwopp y'aa arr w'aa, dhanggbhi Jesu kan dheeh niy Urshalima, dhangg baah Yusufu mwopp kihh nhikhin khinyi mwopp man mou. 44Mwopp kihh ryeeh le dhok nyi runn a dang kakhar gurum mwopp, bhi mwopp m'ang mwaan p'ee t'eer kihmeh. Dhangg kaarooh mwopp lyap nyi naar mhimyaa ru kihh shaar'tong keeru mwopp, 45mwopp kad wonn, bhi mwopp baduam dyi Urshalima p'ee lyap nyi. 46Kih puus wu'kunn, bhi mwopp kad nyi kihfur LuhNaan; kihh tong naar n'an Mhikamm mwopp tihh kihh klihng mwopp diy, yakhal kihh sh'in t'al phi mwopp zag e'h. 47Koohweeh w'u klihng nyi, bhi aa'phi nyi pwetd kihh manshiiy-bii khinyi, kihh lapp t'al khinyi zag. 48Kaarooh puup khinyi mwopp kihh nhikhin khinyi mwopp naah nyi, bhi aa'phi mwopp pwetd. Bhi nhikhin khinyi nang phi nyi le, “Em na, gha sh'in kihh munn kihhsheh pwetd a p'ee mihyeh? Hah, pag kihh wu'an mu lyap gha matt harr mu ann shun pwetd a'ng?”
49Bhi lapp mwopp satt le, “A mihyeh l'e bhi wunn phi lyap a'n ayeh? Kan wu man rooh nyi a ching tihh a tong a tuluh khi Daa maah?”#2:49 Tong a tuluh khi Daa Pakk shi'khir khi pwoo mihhse ni kihh satt le, nyi a ching tihh ih y'aa dhakk khi Daa. 50Dhangg baah mwopp manshiiy orr w'u satt runn seh mou.
51Bhi Jesu yakhal lang'dang mwopp, sam dum Nazaret, kihh klihng mwopp. Nhikhin khinyi looh bhelepp mhize weett phitukhup ra. 52Jesu y'aa sokihkyeen kihh m'an, kihh y'on, yakhal Naan kihhsheh kihh gurum mwopp zag kihh klihngshangg kihh nyi pwetd. #1Sam 2:6; Shmp 3:4
Nke Ahọpụtara Ugbu A:
Luka 2: Chakfem
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
©️2022 Luke Initiative for Scripture Translation