မဿဲ နိဒါန်း
နိဒါန်း
မဿဲ ရေးဟှားဟှူ ခရစ်တော်ရဲ့ ဒန်းကောန်းဟှာ ဓမ္မသစ်ကျမ်းထဲမာ ယေရှုခရစ်တော်ရဲ့ သတ်တော်စဉ်ဟှို ဖော်ပြဟှားဟှူ ကျမ်းလေးစောန်ထဲဟှ တစောန်ဖြစ်ဟှယ်။ အယ်ကျမ်းတစောန်စီဟှို “ဧဝံဂေလိ” ဆိုဘီး ခေါ်ဟှယ်။ “ဒန်းကောန်း” ဆိုဘီး ဓိပါယ်ရဟှယ်။ ယေရှု သေဆောင်းဘီးန အယ်ကျမ်းလေဟှို မဿဲ၊ မာကု၊ လုကာန ယောဟန်လေဟှ ရေးဟှားဟှယ်။ ကျမ်းစာပညာရှင်လေဟှာ မဿဲရေးဟှားဟှူ ဒန်းကောန်းရဲ့ နေ့ရစ်ဟှို တိတိက္လက္လ သိဂေ့ဟှ။ အယ်ဘေမဲ့ အယ်ကျမ်းဟှာ ခရစ်တော် မွီးဘီးန ၆၀ ခုနှစ်လောက်ဟှ ဖြစ်နိုင်ဟှယ်။ အယ်ကျမ်းဟှို ရေးသားဟှူ နေရာဟှိုလည်း သိဂေ့ဟှ။ အယ်ဘေမဲ့ အယ်ကျမ်းဟှို ပါလတိန (ပါလက်စတိုင်း) န ယေရုရှလင်ဗြို့မာ ရေးဟှားဟှယ် ဆိုဘီး မျိုးမျိုး ခန့်မှန်းဂေ့ဟှယ်။
မဿဲဟှာ ကျမ်းရေးသူဖြစ်ဘီး ယေရှုရဲ့ တဗဲ့ ဖြစ်လာဟှို့တွပ် ကိုယ်တော်ခေါ်ခန်ဒူးဟှ သူဟှာ ခွန်ကော့‑က်မား တယော့‑က်ဖြစ်ဟှယ်။ သူ့ဟှို လေဝိ နာမယ်နလည်း သိဂေ့ဟှယ်။ မဿဲဟှာ တမန်တော် ဆယ့်နှေ့ပါးထဲဟှ တပါးဖြစ်ဘီး သူဟှာ ယုဒလူမျိုး စာဖတ်မားလေတွပ် ရေးဟှားဟှယ်။ အယ်မူဇာဟှာ ဓမ္မဟောန်းကျမ်းဟှို ရည်ညွန်းဟှားဟှူ ကျမ်းပိုဒ်ပေါန်း ခြော့‑က်ဆယ်ကျော်အားဖြင့် ရှင်းရှင်းလန်းလန်းဟှား ဗြင်နိုင်ဟှယ်။ ယေရှုဟှာ ပရောဖက်ပြုခံဟှားရဟှူ၊ ဘုရားသခင်ရဲ့ ဝီးချယ်ဟှားဟှူ ကယ်တန်ရှင် မေရှိယဖြစ်ဟှယ် ဆိုဇာဟှို ပြဟှို့တွပ် မဿဲဟှ ရည်ရွယ်လေဟှယ်။ မဿဲဟှာ ဘုရားသခင်ရဲ့ နိုင်ငံတော်ကြောန်းဟှိုလည်း ဘောင်ဂီး ရေးဟှားဟှယ်။ ယုဒလေဟှာ မေရှိယဟှို နိုင်ငံရေးနဆိုင်ဟှူ နိုင်ငံရဲ့ မန်းဂီး ဖြစ်လာဟှို့တွပ် မျှော်လင့်ဟှားဟှယ်။ မဿဲဟှာ ဝိညာဉ်ရေးန ဆိုင်ဟှူ ဘုရားသခင်ရဲ့ နိုင်ငံတော်ဟှို ဖော်ပြလိုက်ဇာအားဖြင့် အယ်မျိုး ယောင်ကြည်မှုတွပ် ကီးမားဟှူ စိန်ခေါ်မှုဖြစ်ဟှယ်။
အယ်ကျမ်းရဲ့ ရည်ညွန်းချစ်လေ အားလောင်းဟှာ ဓမ္မဟောန်းကျမ်းဟှို ရည်ညွန်းဟှားဟှူကြောန့် မဿဲရေးဟှားဟှူ ဒန်းကောန်းဟှာ ဓမ္မသစ်ကျမ်း စပြုဟှို့တွပ် ကျမ်းကောန်းတဆူ ဖြစ်လေဟှယ်။ အယ်ကျမ်းဟှာ ကျမ်းနှေ့စောန်လောင်းဟှို ခိဆစ်ပေးဟှားဟှယ်။ မဿဲဟှာ ဓမ္မဟောန်းကျမ်းရဲ့ ပထမဆောင်း ငါးကျမ်းဖြစ်ဟှူ မောရှေရဲ့ ကျမ်းလေရဲ့ ပေါင်စံနတူဟှို့တွပ် ကြိုးစားဟှားနိုင်ဟှယ် ဆိုဘီး ကျမ်းစာပညာရှင်လေဟှလည်း ကြံပြုဟှားလေဟှယ်။ ယေရှုရဲ့ တောန်ထတ်တရားတော်ဟှာ (၅—၇) မောရှေဟှို ဘုရားသခင်ပေးလိုက်ဟှူ ပညတ်တော်န နှိုင်းယှဉ်ကေ့နိုင်ဟှယ် (တရားဟောရာကျမ်း ၁၉.၃—၂၃.၃၃)။
ကြောန်းရာ ကျဉ်းချောက်
၁။ မဿဲဟှာ ယေရှုခရစ်တော်ရဲ့ မွီးဖွားဟှူကြောန်းဖြစ်ဟှူ ဧဝံဂေလိ ဒန်းကောန်းဟှို ပြောပြဟှားဟှူဇာန ကိုယ်တော်ရဲ့ သာသနာ စပြုဟှူဇာအားဖြင့် စတန်ဟှားဟှူကြောန်း (၁.၁—၄.၂၅)
၂။ မဿဲဟှ ယေရှုရဲ့ သာသနာန ကိုယ်တော်ရဲ့ သွန်သန်ချစ် ဘောင်းဂီးဟှို ဖော်ပြဟှားဟှူကြောန်း (၅.၁—၂၅.၄၆)
၃။ မဿဲရဲ့ ဆောင်းသတ်ပိုင်းမာ ကိုယ်တော်ရဲ့ သေဟှားဟှူဇာန ထမြော့‑က်ဇာဟှာ ယေရှုသာသနာရဲ့ ဇာတ်ရှီဗြင့်ဆောင်း ဖြစ်ဟှူကြောန်း (၂၆.၁—၂၈.၂၀)
Nke Ahọpụtara Ugbu A:
မဿဲ နိဒါန်း: NTDWB24
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
The New Testament in Dawei Language © The Word for the World International and The Dawei Bible Translation Committee, 2024.