यूहन्ना 7
7
ईसू के भईयन कौ अबिसबासी
1इन बातन के बाद ईसू गलील में घूमतौ रहौ। बू यहुदिया पिरदेस जायबौ नांय चांहतौ, चौंकि यहुदी नेता बाय मारबे की ताक में हते। 2यहुदीयन कौ झौपड़ी कौ तौहार#7:2 झौपड़ी कौ तौहार एक ऐसौ तोहार हतो जाय यहुदी लोग फसल इकठ्ठी करकै सात दिनान तक मनाते हते आयबे बारौ हतो। 3जामारै ईसू के भईयन ने ईसू ते कही, “तुमें जि जगैह छोड़कै यहुदिया चले जानौ चहिऐं, जाते जो काम तू करै बिनकूं तेरे चेला देखें। 4ऐसौ कोई नांय जो लोगन में मसहूर हैबै चांहे और अपने कामन कूं दुबक के करै। अगर तू इन कामन कूं करतौ, तौ खुद कूं जा दुनियां पै उजागर कर।” 5ईसू के भईया तक बापे भरोसौ नांय करते हते।
6तब ईसू नें कही, “कै मेरे काजै अबई समै नांय आयौ, पर तुमारे काजै सब समै ठीक है। 7दुनियां के लोग तुमते बैर नांय कर सकत, पर मोते सब बैर करतै, चौंकि मैं बिनके खिलाप जि गबाही देतूं कै बिनके काम बुरेऐं। 8तुम तौहार में जाऔ। मैं अबई जा तौहार में नांय जा रयौ, चौंकि अबई तक मेरौ ठीक समै नांय आयौ।” 9ईसू बिनते जि बात कैहबे के बाद गलील मेंई रैह गयौ।
10जब ईसू के भईया तौहार में चले गये, तौ वाके बाद बू खुद उजागर हैके नांय, पर चुपचाप तौहार में गयौ। 11यहुदी नेता बा तौहार में जि कैहकै ढ़ूढ़ रये हते कै “बू आदमी काँ है?” 12लोग ईसू कै बारे में गुप चुप भीड़ में तरैह-तरैह की बात कर रये हते। कछू तौ कैह रये हते, “कै बू तौ अच्छौ आदमीऐ।”
और कछू कैह रये हते, “के बू लोगन कूं बहकाबतुऐ।” 13कोई आदमी वाके बारे में खुलके बात नांय कर पाय रये हते, चौंकि बे यहुदी नेतन ते डरपत हते।
बडे़ पिराथना घर में ईसू की सिछा
14जब तौहार के करीब आधे दिन बीत गये, तब ईसू नें बडे़ पिराथना घर में सिछा देबौ सुरू करी। 15तब यहुदी लोगन अचम्भौ करकें कैहबे लगे, “बू हमारी पाठसाला में कबऊ पढ़बे नांय आयौ तौ जि ग्यान जाय कांते मिलौ है?”
16ईसू नें बिनते कही, “कै जि मेरी सिछा नांय, पर मेरे भेजबे बारे कीऐं। 17अगर कोई परमेस्वर की इच्छा पै चलबौ चांहे, तौ बू जा ग्यान के बारे में जान जाबैगौ, कै मैं जि सिछा अपनी ओर ते नांय पर परमेस्वर की ओर ते दै रयौऊं। 18जो कोई खुद की ओर ते बोलतै तौ बू अपनी बड़ाई चाहतै। पर जो कोई अपने भेजबे बारे कौ आदर चाहतै, बू सच्चौ है और बामें कोई अधर्म नांय। 19का मूसा ने तुमें व्यबस्था नांय दई? फिरऊ तुमनें बू नांय मानी। तुम लोग मोय मार डारबे की ताक में चौं रैहतो?”
20लोगन नें बाते कही, “तोपै तौ सैतान सबार है गयौए। तोय को मारबे की ताक में रैहतै?”
21ईसू नें बिनते कही, “मैंनें एक चमतकार कौ काम करौ और तुम सब चकित है गये। 22चौंकि मूसा नें तौ तुमें खतना की व्यबस्था दई, पर जि मूसा की ओर ते नांय जि तौ पुरखन ते चली आय रयी है, यहुदिन के आराम दिना में आदमी कौ खतना करके तुमंऊ तौ काम करतौ। 23#यूह 5:9अगर आराम के दिना में आदमी कौ खतना करबे की बजैह ते मूसा की व्यबस्था भंग नांय होत, तौ मैंनें आराम के दिना में एक आदमी कूं पूरी तरैह ते सही करौऔ तौ तुम लोग मोते जा बात पै चौं गुस्सा करतौ? 24मौंह देखकें न्याय मत करौ, पर सही कौ सही न्याय करौ।”
का ईसू, मसीह है?
25कछू येरूसलेम में रैहबे बारे जि कैहते, “कै जि बेई नांय जाय हमारे नेता मारबे की ताक में रैहते? 26पर बू तौ सब लोगन के बीच में बोल रयौए और बे लोग कछू नांय कैह रये। कंऊ ऐसौ तौ नांय कै बे लोग सच जान गये हैं कै जि मसीह है? 27पर हम जानतै कै बू आदमी कांते आयौऐ। और जब बास्तव में मसीह आबैगौ कोई नांय जान पाबैगौ कै बू कांते आयोऐ।”
28जब ईसू बड़े पिराथना घर में सिछा दै रयौ हतो तब बानें ऊंची अबाज में कही, “तुम कैहतौ कै मोय जानतौ और जेऊ कै मैं कांते आयौऊ, फिरऊ मैं अपनी इच्छा ते नांय आयौ, पर जानें मोय भेजौऐ बू सच्चौऐ। तुम बाय नांय जान्त, 29पर मैं बाय जानतूं चौंकि बानें मोकूं भेजौऐ, मैं वाके ज्हां ते आयौऊं।”
30फिरऊ बे बाय पकरबौ चाहते, पर काऊ नें बापै पकरबे काजै हात नांय डारौ, चौंकि वाकौ समै अबई तक नांय आयौ हतो। 31तबई भौत ते लोगन नें ईसू पै भरोसौ करौ और आपस में कैहबे लगे, “कै सच में जि मसीह अई है तबई तौ जि ऐसे चमतकार के काम करतै।”
ईसू कूं पकरबे कौ जतन
32फरीसियन नें चुपके ते लोगन कूं ईसू के बारे में बात करते भये सुनौ, तब यहुदी पिरधान पुरोहितन और फरीसियन ने बाय गिरफ्तार करबे काजै बड़े पिराथना घर के पेहरेदार भेजे। 33फिर ईसू बोलौ, “मैं तुम लोगन के संग कछू समै और रहूंगौ फिर मैं वाके जौरें चलौ जाऊंगौ, जानें मोकूं भेजौऊ। 34तुम लोग मोय ढ़ूढोगे पर ढूढ नांय पाऔगे। और जहां मैंऊ म्हांपै तुम नांय आय सकत।”
35यहुदी आपस में कैहबे लगे, “जि कां जाबैगौ, कै हम जाय ढूंढ नांय पाबिंगे? का जि हमारे लोगन जौरें जाबैगौ जो यूनानी में तितर-बितर हैके रैहतै और यूनानिन नें सिछा दैबैगौ? 36जि बात जानें चौं कही, ‘कै तुम मोय ढ़ूढोगे पर ढूंढ नांय पाऔगे,’ और ‘ज्हां मैंऊ, म्हांपै तुम नांय आय सकत’?”
जीबन दैबे बारौ पानी कौ झरना
37तौहार के आखरी मुख्य दिना ईसू ठाड़े हैके ऊंची अबाज में कैहबे लगो, “अगर कोई पियासौ हो तौ मेरे जौरें आबै पीवे। 38जो कोई मोपै भरोसौ करैगौ, वाके जीबन ते जल की नदियां बह निकरैगी। जैसौ के पबित्र सास्त्र में लिखौ भयौए।” 39ईसू नें जि सब बात पबित्र आतमा के बारे में कही हती, जो भरोसौ करबे बारे लोग पायबे बारे हते। पबित्र आतमा अबई तक काऊ के ऊपर उतरौ नांय हतो चौंकि ईसू अबई महिमाबान नांय भयौ।
ईसू के बारे में लोगन की बातचीत
40जब भीड़ के लोगन नें जब जि बात सुनीं तब बे आपस में कैहबे लगे, “जरूर जि आदमी परमेस्वर की ओर ते बात बतायबे बारौऐ।”
41और कछू आदमी जि कैह रये हते, “कै जि आदमी मसीह है।”
कछू लोग कैह रये हते, “कै मसीह गलील ते नांय आबैगौ। 42 का पबित्र सास्त्र में जि बात नांय लिखी, कै मसीह दाऊद की सन्तान होगौ और बैतलहम ते आबैगौ, जा नगर में दाऊद रैहत हतो?” 43जा तरैह ते लोगन में फूट पर गई। 44कछू तौ बाय बन्दी बनांबौ चाहते, पर काऊ ने बापै हात नांय डारौ।
यहुदी नेतान नें ईसू पै भरोसौ नांय करौ
45जब बड़े पिराथना घर के पैहरेदार पिरधान पुरोहित और फरीसियन के जौरें लौटकै आये तौ उन्नें पैहरेदारन ते पूछी, “तुम ईसूए चौं नांय पकरकै लाए?”
46पैहरेदारन नें जबाब दयौ, “आज तक काऊ नें ऐसी बात नांय करीं जैसी बू करतै।”
47जा बात पै फरीसियन नें बिनते कही, “कै कऊं तुमऊं भैकाबे में तौ नांय आय गये? 48का तुम हमारे काऊ यहुदी नेता और फरीसी कूं जानतौ जानें बापै भरोसौ करौ होय? 49पर जि लोग मूसा की व्यबस्था कूं नांय जान्त, जा बजैह ते बे परमेस्वर के साप के लायक हैं।”
50 #
यूह 3:1,2 निकुदेमुस जो ईसू ते पैहले मिलबे आयौ हतौ। बू एक फरीसी हतो। बानें कही, 51“का हमारी व्यबस्था काऊ आदमी की सुनबाई करै बिना, कै बानें का करौ है बाय दोसी ठहरा सकतै?”
52बिन्नें बाते कही, “का तू अऊ गलील कौ है? पबित्र सास्त्रन में ढ़ूढके पढ़ तौ तोय पतौ चलैगौ, कै गलील ते कोई परमेस्वर की ओर ते बात बतायबे बारौ कबऊ नांय आबैगौ।”
53फिर बे सब अपने अपने घर चले गये,
Nke Ahọpụtara Ugbu A:
यूहन्ना 7: BRAJ
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
NonCommercial-NoDerivatives 4.0 International (CC BY-NC-ND 4.0)