Yùxanà 1

Nìi kiriu goomaa, tɔ̀ nàu'n kur'la dziɲaan doùn

1Dan dan, sani gè sapɛ yeè ɲɛn, nìi kir'là Goomaa, tɔ̀ na ni nòn. Goomaa na ni Ŋaablà ka, Gooma ree yè bà na Ŋaablà yɛr'la. 2Fɔ dan dan, tɔ ni ko Ŋaablà ka. 3Goomaa nì baraka ɲan, Ŋaabla gè sapɛ ɲɛun, gèsɔn pɛn na ɲɛn à shɔ̀ùn waa. 4Jaamabee na ni wò rii ɲàn, tɔ̀ jaamabee to yè bà na vyevyee mòdzin neè rè. 5Vyevyee rèe deèn tsitsiɛ̀ ɲàn, ŋà, tsitsiɛ̀ na dzi à dzi waa.

6 # Mat 3.1; Mar 1.4; Luk 3.1,2. Ŋaablà yeè e re kɛɛradzin sɔn ka tɔ̀ rii ɲàn, nìi tsoo Yùxanà. 7Tɔ̀ kpir'la nàu, è nà vyevyeè rìì shɛɛrɛbe fa, sànko wò baraka rɔ̀n, mòdzian yè ɲɛn vyevyeè rà. 8Yùxanà yɛ̀r'la naà vyevyeè dɛ, ŋà, à na naɔ̀ vyevyeè shɛɛrɛbe fa rii. 9Vyevyee taki takìà tɔ̀ vyevyee soo rìì, nìi nàu dziɲantsiɛ doùn, è bà mòdzian sapɛ ɲan via. 10Goomaa na ni dziɲan na. Wò rii baraka ɲan, Ŋaabla dziɲan ɲɛun, tà ko e sa ra, dziɲan na à tɔ̀ waa. 11À nàu e yɛr'la fàtsiɛ doùn, ŋà, à fàdzin nèè na e tsiì à ra waa.

12Ŋà, swey yè e tsiiŋ à rà, yè ɲɛn à ra. Tà doùn, à y'à tou twɛy sapɛ yeè bà Ŋaablà dzin ì. 13Mòdzin ker'là kereu'n kur'liì rà kpiri ko tàan raa sàɔ doùn, à na ni a ci è bàu tɔ̀ rii tsuru Ŋaablà dzin ì dɛ, ŋà, Ŋaablà yɛr'la rìì yè è bàu e dzin ì.

14Àwà, Goomaa bàu mòdzin, è tsuù mùn fi. À ɲan tsyɛɔ̀n wùɔ ko sààbeen rà. Mùn y'a nɔɔrɔɔ̀ jàu, nɔɔrɔ rìi daun Fà Ŋaablà re dzin kpiri soo raa.

15Yùxanà y'à shɛɛrɛbe fau, à gbango ci: «Mun mòò riì gooma deu ye ra, ci à nà nà mun shɔ̀ùn, tɔ ni mun jɔun, è bà blà mun mà, kàtsu à na ni tsuù nòn, tɔ̀ y'a tàrà mun naà ni ŋe waa.»

16Mùn sapɛ yeè e ninma jau à ɲanwùɔ ɲàn, dzwɛ sen ɲɛn dzwɛ tsɛ, mùn sapɛ yeè tɔ̀ tàrà. 17Ŋaabla sàrìyaa sìun mùn na, è bo kɛɛra Musà rìì ɲàn, ŋà, à ɲanwùɔ ko sààbeen, twɛy bou à Jaara Moo Yesù rìì ɲàn. 18Mòò pɛn jaa na ɲɛn ja Ŋaablà ma ŋe waa. Ŋà, dzin kpiri soo riì bou Ŋaablà ɲan, à Ŋaablà, è bà ni tsuù Fà Ŋaablà tɛyn, tɔ̀ y'a tou mùn y'a tɔ̀.

Mòdzìn Jààràfoobaa Yùxanà shɛɛrɛbe riì fau

(Matsiyù 3.1-12; Marikì 1.1-8; Lukì 3.1-18)

19Yùxanà shɛɛrɛbe riì fau, tɔ̀ rii siin: Dzyèèsìbee mòdzin neè jɔundzin neè, twɛy saaka goojaabo reè swey, ko Lɛvì raa tsua mòò rèè swey ka bou Yerusalɛmùn. Twɛy yè bè Yùxanà rè, y'à tey ci: «Wo tsì rii ?»

20Yùxanà na e mɛnɛn è mà waa, à y'à dè fyɛ è ra ci: «Mun na Ŋaablà Jaara Modzìàn waa.»

21 # Mak 3.23; Sdk 18.15,18. Y'à tey tɔ̀un ci: «Wo to tsì rii ? Wo Ŋaablà re kɛɛra Àliì rìì gbɛ ?» Yùxanà yè dzin ci: «Ɔ̀ɔɔn, mun na tɔ̀ waa.» Yè dzin ci: «Wo Kɛɛraa rìì gbɛ ?» Yùxanà yè dzin ci ɔ̀ɔɔn.

22Yè dzin tɔ̀un ci: «Wo to tsì rii soo ? Nìì reè ɲe kaɔ, fɔ ɲe yè bònbàrè see sin twɛy rà. Wo ci dzùrù a re goò ɲàn.»

23 # Ekk 40.3. Yùxanà yè dzin ci: «Ŋaablà re kɛɛra Esayì na à deò ci, Mòdzin sɔn sɛɛ̀y vu boò jènjàà kor'nà doùn ci: "Ye mùn Tsìfaà rè shia lamɔnɔ̀n, è bà tereòn can." Tɔ dèu mòò riì tsɛ, tɔ̀ rii mun.»

24Mòdzin niì reè na ka beò Yùxanà rè, twɛy na Faridziɲɛn ì. 25Twɛy y'à tey ci: «Wo ma ba Ŋaablà Jaara Modzìàn, wo mà bà Ŋaablà re Kɛɛra Àliì, wo to na Kɛɛra waa, fee y'à to wo yè bà mòdzian jaara foo Ŋaablà re shia goo rèè rà ?»

26Yùxanà yè dzin è ra ci: «Mun jaara foo faa yu rìì ka. Ŋà, mòò ni ye fi, ye na nìi tɔ̀ waa. 27À nàa mun shɔ̀ùn. Ŋà, min bà ni à re seereyn fɛɛ̀ foro, mun na wù tɔ̀ tsu ka waa.»

28Àwà, twɛy goo rèè sapɛ fau wɔ̀ sɔn ni ɲàn, ci Betanìn. À ni Yuridɛn baa kir'la kèrè, Yùxanà na mòdzian jaara foo min niì.

29Àyìwà, tɔ̀ raa gbey rɔn, Yùxanà yè Yesù nàkɔɔn ja e kpakèrè. Yùxanà yè dzin ci: «Ŋaablà re Sààtòmòìriɛ yɛ nèe, wò rii dziɲantsiɛ gooɲaan tsìɛ̀ mɛɛybobaà. 30Mun wò rii gooma deu nèe tsuru ci: "Kpiri sɔn nà nà mun shɔ̀ùn, tɔ ni mun jɔun, è bà blà mun mà, kàtsu à na ni tsuù nòn, tɔ̀ y'a tàrà, mun naà ni ŋe waa." 31Mun yɛ̀r'la tsu naà à tɔ̀ waa. Ŋà, mun nàu, min nà mòdzian jaara foò yuà ka, sànko Isirayɛlì mòdzin neè y'à tɔ̀.»

32Àyìwà, Yùxanà yè nèe goo rèe shɛɛrɛbe fa kɔn ci: «Mun Ŋaablà re Dzia jàà bo nakɔɔn jau jìrànxɔ rɔ̀n, a ci màsàkere, è nà e jaà à tsɛ. 33Mun yɛ̀r'la naà à tɔ̀ waa. Ŋà, Ŋaablà riì mun ka nau ci mun yè nà mòdzian jaara foò yuà ka, tɔ̀ na dziɔn mun na ci: "Wo nà mun Ŋaablà re Dzia jàà nakɔɔn ja, è nà e tsuù kpiri sɔn tsɛ. Tɔ̀ rii nà mòdzian jaara foò mun Ŋaablà re Dzi Fɛnɛɛ ka."» 34Yùxanà ci: «Mun yɛ̀r'la tɔ̀ jàu, mun to y'à shɛɛrɛbe faa, ci tɔ̀ kpir'la rìì Ŋaablà Dzin Kpir'la.»

Yesù rè kàràndzìn jɔna reè

35Àyìwà, tɔ̀ raa gbey rɔn kɔn, Yùxanà na ni tɔ̀ gàne soo ɲàn, à ko e re kàràndzin neè mòkun fii. 36Yesù nàu bà dɔ̀ɔn, Yùxanà y'à siin to, è dzin ci: «Ŋaablà re Sààtòmòìriɛ yɛ nèe !»

37Yùxanà rè kàràndzin fii nìì reè na ni à ka, twɛy tɔ̀ goomaa myɛ̀un min niì, yè e gban Yesù rà. 38Yesù yè e jaa kereu, à yè è gbaunma jà e kpɛyn. È tey ci: «Ye fee gaa ?»

Yè dzin à ra ci: «Àrabì, wo tsùùmaà ni min ?» 'Àrabì', tɔ̀ dzuɔn kàrànfaà.

39Yesù yè dzin è ra ci: «Ye nà, ye nà à jà.»

Yè dɔ̀n be, yè b'a tsùùmaà jà. À na ɲɛ̀rɛ̀ɛ̀ dziɛ rìì lè. Yè to mɔn, yè tɔ̀ bwèè dzyeè fa ko à ka. 40Mòkun fii nìì reè Yùxanà rè goomaa myɛ̀un, yè e gban Yesù rà, è ɲan, soo tsoo na Andère, è bà kpiri sɔn naa tseyn kpiri, nìi kir'là Shimɔn Piyɛrì. 41Andère bèu e tsinà kpiri Shimɔ̀n nì jɔ̀na kpɛyn ŋe, è bè dzin à ra ci: «Ɲe Masiyà jàu.» 'Masiyà', tɔ̀ dzuɔn Ŋaablà Jaara Modzìàn.

42Tɔ̀un, Andère yeè bè Shimɔ̀n ka Yesù rè. Yesù y'à siin, è dzin ci: «Wo Shimɔ̀n nì, Yùxanà dzin kpir'la. Wo nà kiri Sefasì.» 'Sefasì', tɔ̀ dzuɔn Piyɛrì. 'Piyɛrì', tɔ̀ dzuɔn kpàa.

43Àyìwà, tɔ̀ raa gbey rɔn, Yesù yè dzin, ci wo nà bè màrà sɔn ɲan, nìi kir'là Galile. È kpiri sɔn ja, tɔ̀ tsoo ci Fìlipù. È dzin tɔ̀ ra ci: «A gban mun na !»

44Fìlipù na wɔ̀ sɔn modzin, nìi kir'là Bɛtsisayidà. Andère ko Piyɛrì sa yeè bà na boò tɔ̀ wɔ̀ rɔ̀n. 45Tà shɔ̀ùn, Fìlipù sa yeè nà bè kpiri sɔn kpɛyn, tɔ̀ tsoo ci Natanayɛlì, è bè dzin à ra ci: «Ŋaablà re kɛɛra Musà mòò riì gooma deu sàrìyaa kìtaabuà doùn, kɛɛra dzyee reè sa yeè bà à gooma deu, ɲe y'à jàu. À Yesù rìì, Yusufù dzin kpir'la, è bo Nazarɛtsì wɔ̀ rɔ̀n.»

46Natanayɛlì yè dzin Fìlipù rà ci: «Fee rìì soo dzia bo Nazarɛtsì wɔ̀ rɔ̀n, è bà wù ?»

Fìlipù yè dzin à ra ci: «Nà, wo nà à jà.»

47Àyìwà, Yesù Natanayɛlì nàkɔɔn jau e ra, è dzin à re goò ɲàn ci: «Nèe Isirayɛlidzin taki takì rìì yɛ nèe. À re goò sapɛ fyɛɔ.»

48Natanayɛlì y'à tey ci: «Wo mun tɔu dzùrù ?»

Yesù yè dzin à ra ci: «È wo to fiigikuà dzuun, sani Fìlipù yè bè wo kiri, mun jaa na ni wo ra mɔn.»

49Natanayɛlì yè dzin Yesù rà tɔ̀un ci: «Kàrànfaà, wo rìì Ŋaablà Dzin Kpir'la. Wo rìì Isirayɛlì màsà kpir'là !»

50Yesù yè dzin à ra ci: «Mun dzin nìi fau, ci mun wo jàu fiigikuà dzuun, tɔ̀ rii wo ɲɛun mun na. Wo nà goo kpɛrɛ ì jà, nìì reè blà tɔ̀ mà.»

51 # Gok 28.12. Yesù yè nèe sa ba e re goomaa tɛ̀y ci: «Sààben na, mun nì ci e ra, ye nà ŋaablaxɔɔ̀ dzii saunma jà, Ŋaablà re mɛ̀rɛ̀kɛ rèè yè bà tèen, yè jàa Adamà dziàn kùngɔù !»

Nke Ahọpụtara Ugbu A:

Yùxanà 1: BDZU

Mee ka ọ bụrụ isi

Kesaa

Mapịa

Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye

Mụtakwuo maka Bible Dzùùngoo Unicode

Yùxanà 1

Amaokwu Akwụkwọ Nsọ Ndị Ama Ama siteré na
Yùxanà 1

Akwụkwọ Nsọ:

Dzùùngoo

Udi: Bible Dzùùngoo Unicode - BDZU

Yùxanà 1

Yùxanà 1

Amaokwu Akwụkwọ Nsọ Ndị Ama Ama siteré na Yùxanà 1

Akwụkwọ Nsọ:

Dzùùngoo

Udi: Bible Dzùùngoo Unicode - BDZU

Yùxanà 1

Amaokwu Akwụkwọ Nsọ Ndị Ama Ama siteré na
Yùxanà 1