Lukì 24

Yesù sèè kpunaun min niì, è bo saàn ɲàn

(Matsiyù 28.1-10; Marikì 16.1-8; Yùxanà 20.1-10)

1Shikuan jisee jɔnaa gbishɛɛ̀mà nɔ̀n, twɛy tàan rèè yè swɛ̀y muri, yè bè Yesù kɔ̀ɔ̀ rà. È bèkɔɔn, è na ɲinin kinin dziù ko làtsìkɔrɔ kinin dziù nìì reè lamɔnɔ̀n tsùuŋnà, yè bè twɛy ka e suun. 2È bèu wɔ mɔn, y'à jà ci kpàà brisi rìi na fùnkɔɔ dzii tsyeeŋna, tɔ kòròngoron bou kɔ̀ɔ̀ dzii ra peu. 3Yè dɔ̀n kɔ̀ɔ̀ doùn tɔ̀ rii ɲàn, ŋà, è na Tsìfa Yesù fùàn jà waa. 4Tà goò yè è akiri dò. È ni tɔ̀ tsììma nɔ̀n, è ci e ye fee jà, kpiri fii tsìiŋnà è jaaterema, twɛy mà vya reè yè bà den deèn mɛ̀nɛ̀n mɛ̀nɛ̀n mɛ̀nɛ̀n. 5Tàan rèè shi ɲaanfaa suun, yè e kungɔ sùùru. Tɔ̀un, tɔ̀ kpiri fiɛ̀ yè dzin è ra ci: «Fee y'à to ye yè bà jaama gaa fun ì fi ? 6#Mat 16.21; 17.22,23; 20.18,19; Mar 8.31; 9.31; 10.33,34; Luk 9.22; 18.31-33.À na ni mìin waa, à sèè kpunaun. À nìi dèu ye ra, è bà na ni Galile mar'lɔùn ŋe, ye e taa to tɔ̀ re. 7À dziun ye ra, ci gooɲaan tsìɛ̀ ni nìì reè vu ra, fɔ mòò yè Adamà dziàn wɔ twɛy suun, y'à gban gɔɔ̀ rà, y'à vu. Ci à saunmaà bwèy zhììgìraa sii sèè, è sèè kpunan.»

8Tɔ dèu min niì, tàan rèè taa yeè to Yesù rè gooma deuma rèè rè. 9Yè bo kɔ̀ɔ̀ rà tɔ̀un, yè bè tà goò sapɛ lakɛ̀ɛ̀y Yesù rè kɛɛradzin teeŋ sɔɔn ko à re kàràndzìn dzyee reè sapɛ ra. 10È ɲan, Màngàdàràkà taan Mariyamùn na ni, Yàxanà na ni, Yàkubà raa na Mariyamùn sa yeè bà na ni. Tààn dzyee niì reè sa na ni è ka, twɛy sa tɔ̀ gooma soo rìì lakɛrɔun kɛɛradzin neè rà. 11Ŋà, kɛɛradzin neè jaa ra, ci twɛy tàan rèè gooma kunjaatan ì nì dèe, è na ɲɛn è ra waa.

12Tà doùn, Piyɛrì yè fù tɔ̀ nɔ̀nkɔɔrɔn ko e sa, è vwɛ̀yn dɔ̀n be kɔ̀ɔ̀ rà. À bèu wɔ, è mɛɲɛn, è kɔ̀ɔ̀ doùn siin. È na Yesù fùàn kasangeò vya donsɔn niì ka, tà boshɔ̀ùn, à na gèsɔn jà mɔn dɛ. Tɔ̀un, tɔ̀ goò faumaà y'à to, à duungoo douma blà yeè e kpɛyn sèè na e re tsii.

Nìi fau Emayusì wɔ̀ùn shià tsɛ

(Marikì 16.12-13)

13Àwà, tɔ̀ sii sèè ko e sa, Yesù rè kàràndzin fii yè fù, ci ye bèe wɔ̀ sɔn ɲan, nìi kir'là, ci Emayusì. Yerusalɛmùn wɔ̀ɔ̀ ko Emayusì wɔ̀ɔ̀ fia na gereon cilo teeŋ fii tsuru tsɛ. 14Goo nìì reè sapɛ faunà, è na tɔ̀ rii bàrà fa beè. 15È ni twɛy gooma reè rà ko e si ka, Yesù yɛ̀r'la yè nà e kpɛrɛ̀ è ra, è shia kun ko è ka. 16È jaa yɛ Yesù rà, ŋà, à bàu jàci gèsɔn ni yè è jaa ra baun à mà, è na dzi à tɔ̀ waa. 17Yesù yè è tey tɔ̀un ci: «Ye jìì bekɔɔn ni kɛ̀n tsuru gooma ni nà ko e si ka ?» Yesù tà dèu min niì, è taama ŋununbeuma yè e tsiì. 18È mòkun fiɛ̀ ɲàn, soo tsoo na ci Cilopasì. Tɔ̀ yeè dzin Yesù rà ci: «Goo nìi faɔ̀ Yerusalɛmùn bwèy fii rèe ɲan, wo soo boshɔ̀ùn, mòò pɛn na ni mɔn, ci wò na sɔn tɔ tɔ̀ ɲan waa.»

19Yesù sa yeè è tey ci: «Fee rìì fa ɔ̀ ?»

Yè dzin à ra ci: «Goo rìi Nazarɛtsika kpiri Yesù tàrau kɛ̀ ! À kabagoo goo niì reè fau, ko à gooma niì reè dèu, twɛy y'à kpàdèu, ci à bàu kɛɛra barakama Ŋaablà ko mòdzian sa re. 20Ɲe re Saaka Jɔundzin neè, ko ɲe re jàmaàn jɔundzin neè y'à wɔu Ɔ̀rɔ̀mùnka reè suun ci y'à vu, twɛy sa yeè à gban gɔɔ̀ rà. 21Ɲe si na xɔ mòò riì tsɛ, ci à nà Isirayɛlì mòdzin neè kùngɔ màbo, à na wò rii. È ɲɛn tɔ̀ tsɛ, twɛy goo rèè faumaà bwèy zhììgìraa rìì yɛ she.

22Tà doùn, ɲe ko tàan nìì reè kuru soo dzin ì, twɛy dànma nàu gooma sɔn lakɛ̀ɛ̀y ɲe ra, nìi ɲe duungoo dou, fɔ è bè geren. È ci ye swɛ̀y bèu kɔ̀ɔ̀ rà gbishɛɛ̀mà rèe ɲan. 23Ye bèu wɔ, ye na Yesù fùàn jà kɔ̀ɔ̀ doùn dɛ. È na Yesù fùàn jà kɔ̀ɔ̀ doùn nìi fa, yè sèè na, yè nà à lakɛɛ̀y ɲe ra, ci Ŋaablà re Mɛ̀rɛ̀kɛ fii yè e yɛrɛ kpadèu ye ra, yè dzin ye ra, ci Yesù jaama. 24Ɲe kòòsi rèè swey sa bèu kɔ̀ɔ̀ rà, yè b'a jà jàci tàan rèè y'à dèu ɲe ra nìi tsuru, è na b'a yɛ̀r'la jà n dzi waa.»

25Twɛy kpiri fiɛ̀ raa goomaa shɔ̀ùn, Yesù yɛ̀r'la yè dzin è ra ci: «Ee, ye mòdzin akiribɛy ree reè, Ŋaablà re kɛɛra reè nìi sapɛ deu, ye ɲɛn na dzi tɔ̀ ra tabe dɛ ! 26Ŋaablà Jaara Modzìàn yè byɛn tà tsuru, è kòmànà dɔ̀n Ŋaablà nɔɔrɔɔ̀ doùn, tɔ̀ naà wù è fa ɔ ?»

27À tà dè dòu min niì, goo gè o ge sɛbɛɔ̀n à yɛ̀r'la rè goò ɲàn Ŋaablà re Goomaa doùn, è tɔ̀ sapɛ jaa dè è ra. À y'à dzii kun kɛɛra Musà raa sàrìyaa kìtaabuà tsɛ, è geren bè kɛɛra dzyee reè raa rèè sa ka.

28Àyìwà, è bèe wɔ̀ rìi ɲàn, è bèu wɔ tɔ̀ dɔ̀nmàdziɛ rà waatsi riì bwèy, Yesù yè e yɛrɛ ba, jàci wò geren bèe jɔun ni. 29Ŋà, kpir'leè y'à sàn nà kun to ko màfyɛɛ̀n ka, yè dzin à ra, ci è to ye ka, kàtsu, ci bwèè dòu nòn, dzɔɔ̀n to gaa tsì. È dɔ̀n wɔ̀ɔ̀ doùn tɔ̀ rii ɲàn, è to ko è ka. 30Àwà, è ci e ye ɲwɛɛ̀n dzii kun waatsi riì bwèy, Yesù yè bur'la sen, è tswɛ̀y sin Ŋaablà ra, è kòmànà à kùnùn kùnùn, à y'à wɔ wɔ è suun. 31Àwà, tɔ̀ fau min niì, è jaa tsɛ yɔ̀ɔ̀ yè vyɛ̀ bo sɔn, y'à tɔ̀ ci à Yesù rìì. È Yesù tɔ̀u min niì, yè bàràma fɔn à ra e biìn. 32Yè dzin e si ra tɔ̀un ci: «À na goomaa ɲe ka waatsi riì bwèy shia rè, è bà Kìtaabu rèè doùn gooma reè dèe ɲe ra, w'a tɔ̀ à na baɔ̀ taamadzibe brìsi ɲe mà dɛ ?»

33Yè fù tɔ̀un suu, yè kpɛyn sèè na Yerusalɛmùn wɔ̀ɔ̀ doùn. È nàu wɔ mɔn, yè kɛɛradzin teeŋ sɔɔn ko e koòsi rèè jà mɔn, yè e ladzyèeŋnà. 34Twɛy yè kpiri fiɛ̀ kùùntsi nèe gooma ree ka nèe tsuru ci: «Tsìfa Yesù sèè kpunaun n dzi rii, è bo saàn ɲàn ! È yɛrɛ kpadèu Shimɔ̀n nà !» 35Goo nìi twɛy kpiri fiɛ̀ sa tarau shia rè, tà ko à bàu nìi tsuru yè Yesù tɔ̀, è bà na bur'la tanan tan'nà è ra, twɛy sa yeè bo tɔ̀ mà, yè tɔ̀ jaa dè e koòsi kàràndzìn dzyee reè rà.

Yesù yè e yɛrɛ kpadèu e re kàràndzin neè rà min niì

(Matsiyù 28.16-20; Marikì 16.14-18; Yùxanà 20.19-23; Kɛɛradzin neè faadziɛ 1.6-8)

36È ni tɔ̀ goomaa nà, yè nà bàràma, yè Yesù jà e shiɲaanfi. È dzin è ra ci: «Ŋaa yè xɛɛrɛ fa e re !» 37Kàràndzin neè ɲɛyn yè shɛn, yè shi fɔ è bè geren. È na à siɛ̀n, ci ye fùàn sɔn ni ɲɛyn jaɔ̀. 38Ŋà, Yesù yè dzìn è ra ci: «Ye yè e akir'lèè fuɔ̀ feera ? Ye yè e cir'la feera ? 39Ye n si rèè ko n san nèè siin: À mun yɛ̀r'la rìì. Ye dzyɛn siin n na kɛ̀ ! Shutswɛy ko xɔ bàa ni fùn ɲɛyn ɲan ɔ ? N ci ye jaa to yɛ twɛy rà mun ɲan kɛ !»

40À tɔ̀ dèu min niì, è si rèè ko e san nèè kpàdè è ra, à gbanmàà fyɛ̀ɛ̀ yè bà ni twɛy rà. 41Kàràndzin neè taama dzibe ɲaanfaa suun, è naà ɲɛɔ̀n à ra ŋe kuraa. È duungoo yeè dò tsùù. Yesù yè è tey tɔ̀un ci: «Ɲwɛynmageè sɔn na ni ye re mìin ɔn ?»

42Àwà, yè ji dzuuma sɔn bo tɔ̀un, yè tɔ̀ sɔn tara sin à ra. 43À y'à tsi, à y'à ɲɔn è jaa ra.

44Tà shɔ̀ùn, è dzin è ra ci: «Mun na ni ye ka waatsi riì bwèy, mun nìi dèu ye ra, tɔ̀ rii siin: Mun dziun ye ra ci goo o goo sɛbɛɔ̀n mun ne goò ɲàn kɛɛra Musà rè sàrìyaa kìtaabuà doùn, ko kɛɛra dzyee reè rè kitaabu rèè doùn, ko Zàbùrù ye rèè kìtaabuà doùn, tɔ̀ sapɛ na wù è bo e shi tsɛ.»

45Tà shɔ̀ùn, à nà dzi ba nìi tsuru, kàràndzin neè yè dzi Ŋaablà re Kìtaabuà doùn gooma reè fàànmun, Yesù yè è akir'là dzii san tɔ̀ ra. 46À ci è ra: «Nìi sɛbɛɔ̀n Ŋaablà re goomaa kìtaabuà doùn, tɔ̀ rii siin: Ŋaablà Jaara Modzìàn wù è byɛn ni ŋe, è kòmànà san. À saunmaà bwèy zhììgìraa sii sèè, è sèè kpunan. 47Waajibia yè fa à tsoò ka, sànko dziɲantsiɛ mòdzian sapɛ yè sèè bo e re gooɲaan neè kpɛyn, yè e re jaamabee fau'n kur'la lakere, è re gooɲaan tsìɛ̀ yè mɛɛy bo è vu ra. Tɔ̀ waajibi ree wù à dzii yè kun Yerusalɛmùn wɔ̀ rɔ̀n. 48À wù ye yè bà twɛy goo rèè lakɛɛ̀ybaa rèè, kàtsu ye bàu è shɛɛrɛ ì. 49#Kɛf 1.4.Tà doùn, mun Fà Ŋaablà na nìi làyiri seòn, ci wo nà à sìn ye ra, mun yɛ̀r'la nà tɔ̀ bàji na ye tsɛ. Ŋà, sani tɔ̀ yeè fa, à wù ye yè to Yerusalɛmùn wɔ̀ɔ̀ doùn, fɔ dzia yè dan jìran nɔ̀n è nà jàà ye tsɛ.»

Yesù tèroun ŋaablaxɔɔ̀ doùn min niì

(Marikì 16.19-20; Kɛɛradzin neè faadziɛ 1.9-11)

50 # Kɛf 1.9-11. Àyìwà, Yesù dòu twɛy gooma reè rà waatsi riì bwèy, è re kàràndzin neè kiri bo wɔ̀ɔ̀ doùn, è bè è ka Betanìn wɔ̀ɔ̀ kpàkèrè. À bèu wɔ è ka wɔ̀ɔ̀ tɛyn, è tsiì mɔn, è si rèè ɲansen è kùùn, è dzwɛ ji è ra. 51È Yesù to dzwɛ jia rà è ra, à ɲan yeè nà sen fu bo è ɲan, è tèyn be jìrànxɔɔ̀ doùn.

52Àwà, nìi kàràndzin neè, twɛy yè e kunun gban, yè blàbe ɲɛn à tsɛ, è taama dzibeuma blà yeè kòmànà tàrà, yè e kpɛyn sèè na Yerusalɛmùn wɔ̀ɔ̀ doùn. 53Kudɛyn, è na e si ladzyee Ŋaablà re gbà blàa fɔɔn doùn, yè tsoo dzi ɲɛɛn Ŋaablà tsɛ.

Nke Ahọpụtara Ugbu A:

Lukì 24: BDZU

Mee ka ọ bụrụ isi

Kesaa

Mapịa

Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye

Mụtakwuo maka Bible Dzùùngoo Unicode

Lukì 24

Amaokwu Akwụkwọ Nsọ Ndị Ama Ama siteré na
Lukì 24

Akwụkwọ Nsọ:

Dzùùngoo

Udi: Bible Dzùùngoo Unicode - BDZU

Lukì 24

Lukì 24

Amaokwu Akwụkwọ Nsọ Ndị Ama Ama siteré na Lukì 24

Akwụkwọ Nsọ:

Dzùùngoo

Udi: Bible Dzùùngoo Unicode - BDZU

Lukì 24

Amaokwu Akwụkwọ Nsọ Ndị Ama Ama siteré na
Lukì 24