Mataafa Uumata 11
11
Kawwatta Paapilooni
1Xattaayye, orra piita qara co, piisa afaa takkanew haasawanni. 2Orrase ete qinda piirtota opa kotaannooyye, laka piita sena'ori'i kaye ka oppa' kute'e. 3Ka oori olli' kide, “Xooya! ka wa pilokketteta #11:3 pilokketteta: wa dooqqeta oppa luudene. paha dooqqetoppa koona ka apittan palanna.” Ka akka dakaan tikka qupnaan mina'e, dooqetase a apittan palayshen teyen ka olopa jaqqalissaa'e, wa a simmintoota paha kara' daaten. 4Ka oori olli' kidene, “Xooya katama qupanna ka oppa' kawwatta lettoppa kayto dawanna ka an piita qara an pasnin turan maxxinno dakaytinna.”
5Yaahiwwe ka katamoosen ka qupeetase a orra qupanna tooyya' lekkade. 6Ka dikade, “Ha ishootta sanynyeeta takka ka afaa takkaneew haasawanni ka semmalla sede koda paayyen. Umma amma oori wa dikadene' koda'e, ishootta in malaalto.” 7Yaahiwwe ka tiitawe ka kide, “Xooya lekkanna ka akka olli in dakaynini'i, afaasso olkelan dapna.” 8Semmalla Yaahiwwe ka piita piisa qara ishootta pasishe, ikka katamasene qupa alle' diishen. 9Qoota Yaahiwwe afaa orra piisa upo olkelan dape malla, maxxa katamooseneti Paapilooni kidamen. Sekkammaayye Yaahiwwe piita piisa qara'e orra pasishe.
Sanynyeeta seemi
otoo a 1ta 1:24-27
10Sene are kammopa xata ca sanynyeeta Seemi. A pisha piita qara piren kammaayye, Seemi ete paraadi dippa kayeeyye, Arfaksidi xaaye. 11Seemi a Arfaksidi xaaye kammaayye, para dippa keni kallaade ka parroosen kara hellaa diira isho a tuparra' xaaye ka to'e.
12Arfaksidi ete paraadi dippa ka kunda sessa ken kayeeyye, Saala xaaye. 13Arfaksidi a Saala xaaye kammaayye, para dippa afur ka sessa kallaade ka parroosen kara'e, hellaa a diira isho a tuparra' xaaye ka to'e.
14Saala a paraadi dippa ka kunda sessa kayeeyye, Epoori xaaye. 15Saala a Epoori xaaye kammaayye, para dippa sessa ka kunda sessa kallaade ka parroosen kara'e, hellaa diiraa isho a tuparra' xaaye ka to'e.
16Epoori ete paraadi dippa sessa ka kunda afur kayeeyye, Faaleqi xaaye. 17Epoori a Faaleqi xaaye kammaayye, para dippa afur ka kunda sessa kallaade ka parroosen kara'e, hellaa a diira isho a tuparra' xaaye ka to'e. 18Faaleqi ete paraadi dippa ka kunda sessa kayeeyye, Ra'u xaaye. 19Faaleqi a Ra'u xaaye kammaayye, para dippa lakki ka sakali kallaade ka parroosen kara'e, hellaa a diira isho a tuparra' xaaye ka to'e.
20Ra'u a paraadi dippa ka kunda sessa lakki kayeeyye Serooki xaaye. 21Ra'u a Serooki xaaye kammaayye, para dippa lakki ka tappa kallaade ka parroosen kara'e, hellaa a diiraa isho a tuparra' xaaye ka to'e.
22Serooki ete paraadi dippa ka kunda sessa kayeeyye, Nakoori xaaye. 23Serooki a Nakoori xaaye kammaayye, para dippa lakki kallaade ka parroosen kara'e, hellaa a diira isho a tuparra' xaaye ka to'e.
24Nakoori ete paraadi dippa ka sakal kayeeyye, Taara xaaye. 25Nakoori a Taara xaaye kammaayye, para dippa ka kunda lakki' sakali kallaade ka parroosen kara'e, hellaa a diira isho a tuparra' xaaye ka to'e.
26Taara ete paraadi dippa kaye kammaayye, Apraami ka Naakoori isho Haraani xaaye.
Sanynyeeta Taara
27Sede sanynyeeta Taara. Taara Apraami ka Nakoori isho Haraani xaaye. Haraani ka Looti xaaye. 28Haraani aappaaysho Taara turanne piitase a oppa dalade oppa' to'e. Isha piita Paapilooniti kanta Uuriti dalade. 29Apraami iskatteeta takka Soora kidammitto heme. Naakoori'iw, Milka heme. Haraani tuparra lakki, Milka isho Yaska xaaye. 30Saara' xaayni in kitto, umma inna takkan nefo in qapto.
31Taara innaadi Apraami ka inna innaadi Lootise a Haaraani' xaaye ka iskatteetase a Apraami Soora qeede ka piita Kene'aani opa anta'e, piita uuriti xa'e. Ma xoori ete Kaaraani kayeneeyye, eyye'e kute'en. 32Taara ete para dippa lakki ka ken kayeeyye, piisse a Kaaraani oppa'e to'e.
Nke Ahọpụtara Ugbu A:
Mataafa Uumata 11: MaQu
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye